maṯa 9
9
asa 9
gwiji gwun gwumide ganu mɩdeḏ məmɩḏe
mks. 2:1-12, lk. 5:17-26
1nuəḏi kwu murkab ganu numuri nuwele kamɩrɩgen yuŋun. 2naləpijo gwiji gwun gwumɩde ganu mɩdeḏ aɽagar ye, na yecu aŋu ḏɩməṯo dagin nueico gwiji gwun gwumɩde ganu mɩdeḏ no, bɩɽiḏi nanu ŋaɽe ŋinyi, nyi maŋaḏuḏɩjo ŋuɽun ganu ŋuŋa ŋun ŋɩki. 3na kworo lun liro jalgaṯɩm nalar gi lulo lagin no, gwiji kweno gwiḏenɩdi. 4na yecu lɩŋe ḏuməḏɩno ḏagin nuleicɩno, gwudaro nanyuməḏɩni ŋuɽuna ŋun ŋɩki gi dugwor ganu dalo? 5aŋ gwiro gwouwɩrəno ganu: ḏa nyi marno ŋuɽun ŋuŋa ŋɩmaganiḏuḏɩjo ganu ŋun ŋɩki, i gi nyieicɩno, diɽu ŋele? 6namɩni kani nyalɩŋe nyarno ŋaɽe ŋeḏi liji ŋəṯi ŋelɩnya kɩḏilio ŋaḏuḏe ganu ŋuɽun ŋun ŋɩki nueico gwiji gwun gwumɩde ganu mɩdeḏ no, diɽu, ŋape aɽagara yuŋa ŋele dunu lugwuŋa. 7nudiɽi nuwele dunu lugwun. 8gwune na liji lutu agu nalobaga ṯuṯ, nalbuḏi eloŋu gwun gwiḏəḏi liji ŋelɩnya ŋun ŋiro dino.
ḏorniḏa ḏeḏi maṯa
mks. 2:13-17, lk. 5:27-32
9na gaja gun ŋɩwiḏige yecu nuagu gwiji uro ŋɩnəwei gwijiga kalo gun gaṯunɩmeje ṯulba gwan maṯa, nueicɩno, gwujani. nudiɽi nugwujane.
10na gaja gun gijuge dunu gi ḏiṯa na liji lutu wila lun laṯɩmeje ṯulba na lun lɩki, nalɩjiga yecuŋale na calɩmis juŋun. 11gwune na lɩbarɩsi aŋu, naleico calɩmis juŋun no, gwudaro gəko mualɩm gwalo nalʼe lijiŋale lun laṯɩmeje ṯulba na lun lɩki? 12gwune na yecu diŋɩni nuleicɩno, liji lun lɩŋir nanu late laṯɩbunyi lakima no namɩni liro lun leḏedo nanu. 13namɩni wiḏɩl nyalɩminɩ ag gwiro gwan ŋuɽun ŋeno, nyi gwubunyu ŋino, ŋədu ŋe ḏiḏuga no. gi gwune nyi gwate gwuwiḏi lilorniḏe lun liŋɩr no namɩni liro lun lɩki.
ḏɩməṯo əbuṯo
mks. 2:18-22, lk. 5:33-39
14na calɩmis jeḏi yuwana wila lugwun naleicɩno, gwudaro gəko anaŋa na lɩbarɩsi nanaməṯo əbuṯo ŋwamon ŋwutu, namɩni calɩmis juŋa ate nalməṯo əbuṯo no? 15nal yecu uməḏɩjo nuleicɩno, gaja ge ḏaga lɩmeḏin leḏi gwiji gwe ḏaga ləṯi ŋɩma larone ḏa gwiji gwe ḏaga gwumaje a? namɩni ŋwamon ŋwaje ŋwila ŋwun ŋwauŋ gwiji gwe ḏaga ape; na kaja kono ləməṯo əbuṯo. 16na gwiji gwate gwete gwun gwouɽu giria gun giya gugukɩɽe gworo gwun gwuɽun no, na giria gun giya gaŋɩrṯa gworo ganu gwun gwuɽun, na giria gaŋɩrṯaḏane ganu. 17na late laṯɩdoije ŋɩmidiə ŋun ŋiya gi jurəḏ jun juɽun no; gi gwune ŋwaki jurəḏo, na ŋɩmidiə ḏuḏe galo na jurəḏ jake. namɩni lədoije ŋɩmidɩə ŋun ŋiya gi jurəḏ jun jiya na ŋaje muma.
ŋaɽe ŋeḏi yairus na gwa gwun gwaṯarṯo ŋuwəno
mks. 5:21-43, lk. 8:40-56
18na kaja gun guluməḏɩjo ŋuɽuna ŋeno, na gwele gwete wila nuiḏi gi jei ganu lugwun, nueicɩno, ŋaɽe ŋinyi ŋun ŋiro gwa ŋɩmai gwunnɩno; ŋamɩni wila alwele ŋangele ḏi ḏuŋa elo na ŋumiḏe. 19na yecu diɽi, luŋa calɩmis je juŋun nalgwujane.
20na gwa gwete je gwun gwaṯarṯo ŋuwəno jɩḏilio di na gwuttən, nuwila gi ḏuɽo ganu lugwun nuḏɩmumi ḏiɽil ḏeḏi giria guŋun; 21nuare gi ḏugwor ganu ḏuŋun no, ḏa nyi məḏɩmumi giria guŋun kuwei nyi gwiŋir nanu. 22na yecu wɩrle ganu, nuaŋu nueicɩno, bɩɽiḏi nanu gwa, ḏɩməṯo ḏuŋa ḏɩmaŋiŋiri nanu. na gwa iŋir nanu gi sa ceno.
23na yecu wila kwu dunu gweḏi gwele nuaŋu liji ləṯəri ŋwuba na liji ləri gwula, 24nuleicɩno, abɩrɩl. ŋaɽe ŋate ŋaiyo no, namɩni ŋɩḏɩro. nalaki jumo; 25gwune nudi liji, nuəḏi numəṯo gi ḏi, na ŋaɽe diɽi. 26na ŋuɽun ŋeno wɩreḏelo kaja kono kamɩrɩgen yeno wei.
ləmɩnyo lɩṯɩən lun lɩrimə gi jei
27na gaja gun giwiḏige yecu ŋɩnəwei, na liji gwujane lɩttən lun lɩrimə gi jei, nalərəjo gwula naleicɩno, inəḏije ŋaɽe ŋeḏi ḏauuḏ. 28gwune nuəḏi kwu dunu na liji lun lɩrimə gi jei wila lugwun, nal yecu eicɩno, nyaləmɩnyu nyalarno, nyi gwəṯi ŋɩma nyi gwarre ŋuɽuna ŋeno a? naleicɩno, i gwele gwəri. 29na dino nuḏɩmumi jei jagin nuleicɩno, na ŋiro dino gi gwune əṯanya ḏɩməṯo na ŋaro lagalo. 30naluɽi jei ganu, nal yecu uməḏɩjo ŋuɽuna ŋɩbɩje nuleicɩno, jil muma nyate nyanuməḏɩjo gwiji gwetɩdo no. 31nalmɩni tu nalwɩrəji ŋuɽuna elo ŋan gu kamɩrɩgen yeno wei.
gwiji gwun gwəṯi ḏiŋeroma ŋɩma ŋate ŋuŋumə no
32na kaja gun gijɩlge gi ḏituḏa, nalgwuloḏa gwiji lugwun gwəṯi ḏiŋeroma gwate gwaṯumə ŋuɽuna no. 33gwune na ḏiŋerom tu na gwiji umə. na liji lun lutu obaga ṯuṯ nalarno, ŋuɽun ŋate ŋɩmanaŋini ŋiro dino gwerre isreiyil no. 34namɩni lɩbarisi nalarno, ŋu gwatɩḏi ḏiŋeroma gwele gwe gweḏi ḏiŋerom. 35na yecu wewele galo gi jɩmɩrɩgen wei na ŋwurgwom, naṯulalɩmi gi lidunu lagin leḏi elo, naṯuluməḏɩjo ŋuɽuna ŋun ŋiŋir ŋeḏi ŋele ŋeḏi elo, naṯugele liji muma wei lun leḏeḏo nanu na wei lun ləṯi ŋɩɽainy.
ŋino ŋeḏi yecu gi liji
36gwune nuaŋu liji girɩpi, nulino gworki gi gwune nalrtonyɩḏe nalwɩreḏelo, nalro gi joŋol jun jate jəṯi gwaɽa no. 37nuuməḏɩjo calɩmis juŋun nuleicɩno, ḏɩwona do ḏutu namɩni liji lun lapo ŋɩru lɩti. 38na ŋiro dino ɽoṯeḏɩl kwele gweḏi ḏɩwona gwun gwiro elo gwuwəɽo liji lun lapo ŋɩru gi ḏɩwona ḏuŋun.
Currently Selected:
maṯa 9: OTR1966
Highlight
Share
Copy
Want to have your highlights saved across all your devices? Sign up or sign in
Nuba, Otoro New Testament
© British and Foreign Bible Society, 1966.
