yuwana 20

asa 20

gil gwuḏu ganu

mṯ. 28:1-10, mks. 16:1-8, lk. 24:1-12

1na gi lamon lun liro lɽa lun laduji kwoɽoṯəɽɩl na marian majdaliya wila kil mimmi gilio girɩm gijɩre, nuaŋu gɩḏolia giməbɩrəḏɩni ga kil. 2nuaɽu nueneḏe, nuwele ḏi simian buṯrus na gi ṯalɩmis ḏiro kaja, ḏun ḏaṯi yecu əmɩnyi, nuleicɩno, lɩmape gwelɩnya gwun gwiro elo kil nanate nilɩŋiḏi gwəri malgele ne no. 3na dino na buṯrus duḏa na ṯalɩmis ḏiro kaja nalwele kil. 4naleneḏe berene; na ṯalɩmis ḏun ḏiro kaja darane ḏi buṯrus nuwele kil gwerre; 5nuriḏe nuaŋu jiria jun jɩmɩḏe ganu jun jigakilje jijiga, numɩni ate nuəḏi no. 6na simian buṯrus wila nugwujane nuəḏi kil; nuaŋu jiria jijoga jun jɩmɩde ganu, 7na giria gun gijo gi lɽa luŋun gate gijilga jiria je jun jɩmɩḏe ganu no, namɩni girəmɩḏinu gijoga kaja. 8na ṯalɩmis əḏi dino ḏun ḏɩwiḏi gwerre kil, nuaŋu nuəmɩnyi; 9gi gwune lijɩre late ŋilɩŋiḏɩ ŋuɽuna ŋeḏi gɩḏam geḏi elo, arram ŋu gwediɽi gi ḏaiya no. 10na dino calɩmis nalaɽuwe lagin.

yecu maŋini ḏi mariam

mks. 16:9-11

11namɩni mariam ḏuḏɩnəḏəṯo gil kɩluḏo nuəri gwula, na gi gwune ju gi ḏərio gwula, nuriḏe nuaŋalaḏe kil, 12nuaŋu liji leḏi kanyin lun liro lɩttən lɩkanu jiria jun jɩpiḏo lijoga, gwete gi lɽa, na gwiro kaja nuje ŋwara kalo gun gijɩne aŋɩnu yeḏi yecu. 13naleicɩno, gwa, gwudaro na ŋəri gwula? nuleicɩno, lɩmape gwelɩnya gwi gwun gwiro elo, na nyi gwate gwilɩŋiḏi malgele ne no. 14gwune nuluməḏɩjo dino nuwɩrla ga nuaŋu yecuŋ gwuḏuḏɩnu ga, namɩni gwate gwilɩŋiḏi yecu gwiro no. 15na yecu eicɩno, gwa, gwuḏaro na ŋəri gwula? əḏi gwiro gwibunya? nuro gi gwarno gwiji gweḏi jɩneina gwiro, nueicɩno, gwele gwi, ḏa ŋa gwumaro gwumanape, uməḏɩjiŋi nyiaŋijo gala gun gɩmangele na nyi gwiape. 16na yecu eicɩno, mariam. nuwɩrla ga, nuorniḏe jiri je jeḏi lɩbrani nuelcɩno, rabbuni, jun jarno, mualɩm. 17na yecu eicɩno, ŋiḏɩmuma nanu no, gi gwune nyi gwore gwate gwɩmabo ḏi baba gwinyi no; ŋamɩni ele gi lɩmagəri ŋaleicɩno, nyi gwar gwabo ḏi baba gwinyi na baba gwalo, na elo gwinyi na elo gwalo. 18na mariam majdaliya wila nuuməḏɩjo calɩmis ŋu gwaŋəḏi gwelɩnya, na dino ŋu gwiro gwun gwuməḏɩjo ŋuɽuna ŋeno.

yecu maŋini gi duwəjo

mṯ. 28:16-20, mks. 16:14-18, lk. 24:36-49

19gi lamon leno lun liro lɽa lun laduji loro kwoɽoṯəɽɩl, na gɩbe gilaŋiṯinu kalo gun gaɽuwaḏɩne calɩmis ldu ŋɩḏe ŋeḏi liju, na yecu wila nuḏuḏɩni kɩlɩgi ganu lagin nuleicɩno, ḏouwɩɽiḏa ḏaje lagalo. 20gwune nuluməḏɩjo dino, nulaŋijo di duŋun na lɩmeria, na calɩmis dile ganu gwune nalaŋu gwelɩnya. 21naɽu nal yecu eicɩno, ḏouwɩɽiḏa ḏaje lagalo. gi gwune wəjɩŋi baba ŋiro dino nyi gwajiwəje. 22gwune nuluməḏɩjo ŋuɽuna ŋeno, nugele uwə gwubuḏo lagin nuleicɩno, məṯɩl gwuɽɩwə gwun gwɩpiḏo pɽul. 23ḏa nyalmaḏuḏɩjo gwiji ŋuɽun ganu ŋun ŋɩki, na ŋuɽun ŋuŋun ŋun ŋɩki ŋɩmalɩnḏuḏɩjo ganu; na ḏa nya late lɩmaḏuḏe ŋuɽun ganu ŋun ŋɩki ŋeḏi gwiji no, ŋate ŋɩmanɩnḏuḏɩjo ganu no gwore gwəṯi ŋuɽuna ŋun ŋɩki.

yecu maŋini ḏi ṯoma

24namɩni ṯoma, gwun gwiro gwete gweḏi calɩmis jun jiro di na gwuttən gwun gwan gwəriḏɩnu, gwate gwijille kaja gun giwiḏige yecu no. 25na calɩmis jun jiro kaja naleicɩno, anaŋəḏi gwelɩnya gwun gwiro elo. nuleicɩno, ḏa nyi gwate maŋu di duŋun jamrɩcilo jeḏi ŋwusmar, ki magele lamon linyi kamrɩcil geḏi ŋwusmar, na nyi magele ḏi ḏinyi gi lɩmere luŋun no, nyi gwate gwəmɩnyi no.

26gwune na ŋwamon ete dubə na calɩmis aɽu naləḏi kwu ḏunu, na ḏijɩlo ṯomaŋale; na yecu wila na gɩbe gilaŋiṯɩnu, nuḏuḏɩni kɩlɩgi ganu nuarno, ḏouwɩɽiḏa ḏaje lagalo. 27nueico ṯomaŋ no, wila lamon le luŋa ŋɩne ŋaŋu di ḏinyi; ŋila ḏi ḏe ḏuŋ a ŋagele gi lɩmere linyi, namɩni ŋa gwo gwete ḏɩməṯo, ŋamɩni əmɩnyi. 28na ṯoma wɩrlijo ŋuɽuna nueicɩno, gwele gwi na elo gwi. 29na yecu eicɩno, gi gwune niŋiaŋu ŋa məmɩnyi wɽi a? ḏɩmoreḏa ḏaje lagin lun late laŋəḏi no nalmɩni əmɩnyi. ŋuɽun ŋun ŋiŋir ŋeḏi yecu kɩrisṯo ŋulinu kani a liji əmɩnyi yecu gwe

30na yecu mape ŋuɽuna ŋutu ŋun ŋiro kaja ŋun ŋɩbuḏo gi jei ganu jeḏi calɩmis juŋun, ŋun ŋate ŋulinu kɩḏam keno no; 31namɩni ŋeno ŋulinu kani nyəmɩnyi yecu gwiro kɩrisṯo gwun gwiro ŋaɽe ŋeḏi elo; na ḏa nyalməmɩnyi nyaləṯi ḏɩmiḏa jiri je juŋun.

Currently Selected:

yuwana 20: OTR1966

Highlight

Copy