yuwana 19

asa 19

liju lidijo bilaṯusŋ ganu

mṯ. 27:15-31, mks. 15:6-20, lk. 23:13-25

1na bilaṯus ape yecuŋ nanupi; 2na ajana ɽenyo jugi gi laḏe nalgaki gi lɽa elo luŋun, nalgaki giria gun gure gumɩno ganu. 3naṯɩlwila lugwun, naṯɩleicɩno, ŋa gwiŋir ŋa gwele gweḏi liju a? naṯɩlpi gi jei ganu di de. 4na bilaṯus du mɩna kɩluḏo nuleicɩno, eʼe nyi gwo gwidijeije kani nyalɩŋe nyi gwate manbuje ŋuɽuna ŋədi lugwun ŋun ŋɩki no. 5na dino na yecu du kɩluḏo na ŋu gwukanu jugi jun jɩɽeḏɩnu gi laḏe na giria gun gure gumɩno ganu. nal bilaṯus eicɩno, eʼe gwiji gwiro kweno. 6gwune na jɩsis jun jɩbuḏo na jaḏam aŋu, naləri gwula naleicɩno, ɽinyɩḏɩl, ɽinyɩḏɩl gi luɽi lun lɩmalɩḏo ganu. nal bilaṯus eicɩno, apɩl nyaŋa nyaɽinye gi luɽi lun lɩmaliḏo ganu gi gwune nyi gwate manbuje ŋuɽuna ŋədi lugwun ŋun ŋɩki no. 7na liju wɩrlijo ŋuɽuna naleicɩno, anəṯi ŋuɽuna, na ŋuɽun ŋe ŋeno arram ŋu gwai, gi gwune gwiduji gwula gwuŋun ŋaɽe ŋeḏi elo. 8gwune na bilaṯus diŋɩni ŋuɽuna ŋeno, nuḏonyene gworki. 9nuəḏi mɩna kalo geḏi mudir nueico yecuŋ no, ŋa gweḏi ne gwiro? namɩni nate nan yecu wɩrlijo ŋuɽuna no. 10na bilaṯus uməḏɩjo nueicɩno, ŋa gwate gwinyuməḏɩjo no? ŋa gwate gwilɩŋiḏi nyi gwəti ŋelɩnya gwaŋaɽinye gi luɽi lun lɩmalɩḏo ganu na nyi gwəṯi ŋelɩnya nyi gwaŋakədə ga na? 11na yecu wɩrlijo ŋuɽuna nueicɩno, ŋa gwate gwəṯi ŋelɩnya lugwi no ḏa ŋate ŋiḏəḏaŋalo kanyin no. na ŋiro dino ŋu gwun gwiḏəḏɩnyi ŋaŋu gwəṯi ŋuɽuna ŋun ŋɩkeno. 12na bilaṯus bunyi gwikədə ga namɩni liju laṯəri gwula naleicɩno, ḏa ŋa makədə gwiji ga kweno, ŋa gwate gwiro meḏin gweḏi gesar no, gwiji gwun gwaṯɩḏuji gwula gwuŋun gwele nuar gwape ŋelɩnya ŋeḏi gesar. 13gwune na bilaṯus diŋɩni ŋuɽuna ŋeno, nudi yecuŋ ki nujiga kɩḏoɽ ge ḏakɩmiḏa kalo gun gan bulaṯ namɩni lɩbrani gaṯɩleico jubaṯa. 14na kaja kono giro gun gigelɩlŋe ŋɩdɩo muma ŋeḏi gɩmuri ge ḏouwɩrico, na galo giro anyino ganu, nueico liju no, eʼe gwelɩnya gwalo. 15naləri gwula naleicɩno, apɩl, apɩl, nyaɽinye gi luɽi lun lɩmalɩḏo ganu. nal bilaṯus eicɩno, nyi gwaɽinye gwelɩnya gwalo a? naleicɩno, anate nəṯi gwelɩnya no, gesar gwiro gwetɩdo. 16nulɩḏəḏo gwalɽinye gi luɽi lun lɩmalɩḏo ganu. nalape yecuŋ nalgwulo.

diɽinyɩḏa ḏeḏi yecu gi luɽi lun lɩmalɩḏo ganu

mṯ. 27:32-44, mks. 15:21-32, lk. 23:26-43

17nutu nuape luɽi luŋun lun lɩmalɩḏo ganu, lalwele kalo gun gan galo geḏi gwunə, na gaṯɩl lɩbrani eico, juljuṯa. 18na ŋɩnəwei nalɽinye lijiŋale liro kaja lɩttən ŋwuɽi ŋwun ŋwɩmalɩḏo ganu, na luŋa nalɩje ŋwumere, na yecu je kɩlɩgi ganu. 19na bilaṯus uli ŋuɽuna nulgele gi luɽi elo lun lɩmalɩḏo ganu, na ŋulinu, yecu gweḏi nasɩra, gwele gweḏi liju. 20na liju lutu əgɩri ŋuɽuna ŋeno, gi gwune galo gun giɽinyɩḏɩne yecuŋ go gɩṯo kamɩrɩgen, na ŋuɽun ŋeno ŋulinu ŋuɽun ŋeḏi lɩbrani, na ŋeḏi liji leḏi rumiya, na ŋeḏi ligrigi 21na jɩsis jun jɩbuḏo jeḏi liju naleico bilaṯusŋ no, ŋa gwo gwuli, gwele gweḏi liju, ŋamɩni uli, ŋu gwarno, nyi gwiro gwele gweḏi liju. 22nal bilaṯus wɩrlijo ŋuɽuna nuleicɩno, ŋun ŋimiluli, ŋimulini. 23gwune na ajana ɽinye yecuŋ nalape jiria juŋun nalɩkenyeḏe ganu luŋa gwoɽo, nalape dino giria gun gola gikədɩnu gate gukɩɽinu ŋwumeria no. 24na dino naluməḏəṯe laginŋu ŋɩmaga nalarno, ilouwɩrico ilwawalaḏa ganu no, ilgimɩnmɩɽi gwumara kani ilaŋu əḏi gwiro gwar gwape, kani a ŋuɽun ṯɩmi ŋeḏi gɩḏam geḏi elo ŋun ŋarno,

nalkenyɩḏiḏi jiria jinyi ganu ŋɩmaga

nalmɩɽi gwumara giria ge ginyi gun gola.

25na ajana yiro yikaḏo ŋɩdio ŋeno. na nana gweḏi yecu, na megin gweḏi nana gwuŋun gwun gwan mariam, gwun gwiro gwa gweḏi kuluba, na mariam majdaliya, nalḏuḏɩni ga gi luɽi lun lɩmalɩḏo ganu leḏi yecu. 26na yecu aŋu nanaŋ gwuŋun, na ṯalɩmis ḏun ḏaṯuəmɩnyi lɩḏuḏɩnu ga, nueico nanaŋ gwuŋun no, nana, eʼe ŋaɽe ŋuŋa. 27nueico ṯalɩmis ḏuŋun no, eʼe nanaŋ gwuŋa. na uro kaja kono ṯalɩmis ṯeno apa dunu lugwun.

ḏaiya ḏeḏi yecu

mṯ. 27:45-56, mks. 15:33-41, lk. 23:44-49

28na ŋɩno gɩdo na yecu lɩŋe ŋɩdio wei ŋɩmaṯɩmi wɽi, kani a ŋuɽun ṯɩmi ŋeḏi gɩḏam geḏi elo nuarno, ouḏo yo yiṯiŋi. 29na gwaŋ gwijo gwete gwenyeḏo ŋau ŋiɽi ŋan kal, nalenyeji sawinja jun jɩməṯi ŋau, nuləḏɩje gi jɩwɩra, nulgele yecuŋ gi linyi luŋun. 30na gwune na yecu ape kal nuarno, ŋɩməṯɩmi wɽi; nuriḏi lɽa luŋun nukuwa gwuɽɩwə gwuŋun.

ḏɩkwoḏa ḏeḏi ŋiɽe na ḏɩkwura

mṯ. 27:57-61, mks. 15:42-47, lk. 23:50-56

31na gi gwune lamon liro le ḏigela ŋɩdio ŋe sabiṯ muma, na gi gwune jiŋɩno jate jaje ŋwuɽi ŋwun ŋwɩmalɩḏo ganu gi lamon le sabiṯ no, gi gwune lamon le sabiṯ leno liro lamon le lɩbuḏo, na lju ɽoṯəḏɩjo bilaṯusŋ ŋwulakɩra ŋwara ganu ki aləbɩri jiŋɩno. 32na ajana wila nalakɩra ŋwara ganu ŋweḏi gwun gwiro lɽa, na gɩdo ŋweḏi gwun gwiro kaja lun lɩɽinyɩḏɩlo yecuŋale ŋwuɽi ŋwun ŋwɩmalɩḏo ganu, 33namɩni gwune nalwila ḏi yecu nate nalakɩra ŋwara ŋwuŋun ganu no gi gwune ŋumai, 34namɩni gwete kajana nuḏuge lɩmeria ŋire ŋe, na cou nuiro ŋuwəno na ŋau. 35na ŋu gwun gwaŋəḏi nuteije ga, na ḏɩteijo ḏuŋun ga ḏiro gwerkwe, na ŋu gwilɩŋiḏi gwuməḏi gwerkwe kani nyəmɩnyi nyaŋa dino. 36na ŋuɽun ŋeno ŋɩmila kani a ŋuɽun ṯɩmi ŋeḏi gɩḏam geḏi elo ŋun ŋarno, luya luŋun late lanakɩraḏe ganu no. 37na ŋuɽun ŋiro kaja ŋeḏi gɩḏam geḏi elo ŋun ŋarno, luŋa gwaniaŋalaḏe gwun gwiḏugo.

38na ŋɩno gɩdo na yusib gweḏi amɩrɩgen yun yan rama, gwun gwiro ṯalɩmis ḏeḏi yecu, namɩni nyɩkwom gi gwune nuḏonye liju, nuɽoṯəḏɩjo bilaṯusŋ gwar gwape aŋɩna yeḏi yecu, na bilaṯus ouwɩrico nuape. nalwele nalape aŋɩna yeḏi yecu. 39na nikudimus wila dino gwun gwuwiḏi ḏi yecu gwerre gilio, na ŋu gwapo ŋɩdio ŋun giro ŋɩḏini ŋan murr na auḏin, ŋaro gi rotl ḏuɽi kwoɽoṯəɽɩ na ṯoḏɩne. 40nalape aŋɩna yeḏi yecu, nalmɩɽi nanu jiria je jun jɩmɩde ganu na ŋɩdi ŋe ŋun ŋiro ŋɩḏini, ŋiro gi ŋuɽun ŋeḏi liju ŋe ḏɩkwurno. 41na kalo kono giɽinyɩḏɩne gi luɽi lun lɩmalɩḏo ganu gəṯi jɩneina, na gi jɩneina ceno gil gijo giya gate gɩmanigele gwiji ganu gwerre no. 42na ŋɩnəwei nangele yecuŋ ganu gi gwune gwiro lamon le ḏigela ŋɩdio muma ŋe sabiṯ leḏi liju; na gi gwune gil gijo gɩṯo.

Currently Selected:

yuwana 19: OTR1966

Highlight

Copy