ŋɩru ŋun ŋapɩlo duwəjo 3

asa 3

gɩbɩjo ke gaṯɩgegilejo liji ḏi ganiḏəḏə ŋɩdio gɩmagelini muma

1na buṯrusŋa yuwana gwe nalabo berene kwu dunu gweḏi elo gwun gwubuḏo sa ṯəɽɩl kaja geḏi ḏuməḏɩjo eloŋu. 2na gwiji gwete gwar gwalape gwiro gɩbɩjo uro gwune lɩŋinu kare ganu ḏi nana gwuŋun, gwaṯɩlape bubruṯ nalgele kouwɩr elo kɩbur geḏi dunu gweḏi elo gwun gwubuḏo gun gan gwɩdila, gwaṯɩgegilejo liji ḏi gwaniḏəḏə ŋɩdio ŋədi lun laṯəḏi kwu dunu gweḏi elo. 3gwune nuaŋu buṯrusŋaije yuwana gwe lar ləḏi kwu dunu gweḏi elo nuluməḏɩjo galo gwaniḏəḏə ŋɩdio ŋədi. 4na buṯrusŋa yuwana gwe nanaŋalaḏe na buṯrus eicɩno, ŋələḏijɩne. 5nudiɽi jei ganu nuar gi ḏugwor ganu no gwar gwaniḏəḏə laŋ lədi. 6na buṯrus eicɩno, nyi gwate gwəṯɩne əlgɩrucə i ḏab no, namɩni ŋun ŋəṯilo ŋaŋalḏəḏə. gi jiri jeḏi yecu kɩrisṯo gweḏi nasɩra, diɽu, ŋele. 7numəṯo gi ḏi ḏun ḏiro ḏiŋir nudiɽi. na cou na ŋwara ŋwuŋun na ŋwuya ŋweḏi ŋwuɽɩjir nalbɩɽe nanu. 8nukɩɽejelo, nuḏuḏɩni nuwele, naləḏi kwu dunu gweḏi elo gwun gwubuḏo, nuwele nuḏɩrṯe nuorṯeḏa eloŋu. 9na liji wei aŋu nuwele nuorṯeḏa eloŋu. 10nallɩŋe nalarno ina gwiro kweno gwun gwaṯɩjiga kouwɩr elo yeḏi gɩbur geḏi dunu gweḏi elo gun gan gwɩdila, gwun gwaṯɩgegilejo liji ḏi; nalobaga ṯuṯ ŋuɽun ŋe ŋun ŋɩmaŋini lugwun.

11na gwune na gɩbɩjo gun gɩmagelini muma numəṯo buṯrusŋaije yuwana gwe, na liji wei eneḏe ldu lagin naləḏi karda ganu geḏi suliman nalobaga ṯuṯ gworki.

ŋuɽun ŋeḏi buṯrus kwu dunu gweḏi elo gwun gwubuḏo

12gwune nal buṯrus aŋu nuluməḏɩjo nuleicɩno, ləmɩnyo le leḏi isreiyil, gwudaro gəko na nyobaga ṯuṯ dino? aŋ gwiro nuijɩnɩŋalaḏe dino na nyar gi larno ŋɩma ŋəri ŋiro, i ḏiŋiriḏa ḏəri ḏiro ṯe ḏimanaḏigele gwiji kwe muma nuwele? 13elo gweḏi ibraim na isak na yagub, na gwiro elo gweḏi lɩgwurninyo lage mabuḏi gaḏama guŋun gan yecu, gwun manyaḏəḏə liji nanyadonye gi jei ganu jeḏi bilaṯus, gwune nuarno gwukədə ga. 14namɩni gwudonyanya gwun gwɩpiḏo pɽul gwiŋir nanyamɩni bunyi gwun gwuɽinyɩḏo ḏɩmar, 15na nyalmaɽinye gwelɩnya gwe ḏɩmiḏa. na ma elo diɽi gi ḏaiya. andro lun laŋiḏi ŋuɽuna ŋeno. 16na ḏɩməṯo ḏe jiri juŋun, na jiri ceno jɩmabɩɽi gwiji nanu kweno, gwun gwanyaŋu gwanyalɩŋe. yɩti, ḏɩməṯo ḏe yecu gwe magelini muma maḏuḏɩni ga gi jei ganu lagalo wei. 17na gwunne, lɩmagəri, nyi gwilɩŋiḏi ŋarranyalo ŋɩɽilo ŋe gi gwune lele lalo ŋidujilɩne dino. 18namɩni ŋiro dino nan elo ṯɩmi ŋuɽuna ŋun ŋuməḏɩnu gwerre ŋwinyu ŋwe nebɩŋa wei ŋarno kɩrisṯo gwuŋun gwiḏe. 19na dino wɩrlal ŋa ŋuɽun ŋun ŋɩki nyawɩrlaḏa lugwun na ŋuɽun ŋalo ŋun ŋɩki ŋamuḏini, na gaja ge ḏɩmiḏa gila gi jei ganu jeḏi elo, 20na gwaje gwouwəjo yecu kɩrisṯoŋ gwun gwuməḏɩjaje gwe gwerre. 21na gwa kanyin məṯo kəbe kaja kono gagi ŋɩdi aɽuwa wei ŋun ŋɩḏuḏo, na ŋeno ŋuməḏɩnɩŋe elo gi gwune gelu gɩḏilio ŋwinyu ŋweḏi nebɩŋa luŋun lun lɩpiḏo pɽul. 22na musa arno, gwele gwun gwiro elo gwajidiɽijo nebɩŋ gwete gi lɩmagalo lalo gi gwune diɽinyi, nyadiŋɩni ŋuɽuna wei ŋun ŋajiŋeico. 23na liji wei lun late lɩdiŋɩnu ŋuɽuna ŋeḏi nebi gwəwei no lai gi jei ganu jeḏi liji. 24yɩti, na nebɩŋa wei uro kaja geḏi samuwil na wei lun lɩmila gɩdo, na wei lun lumadi, luməḏi ŋuɽuna ŋan ŋwamon ŋweno. 25nyalro nyaɽe nyeḏi nebɩŋa, na nyeḏi ŋuɽun ŋun ŋɩkaiilo eloŋa lɩgwurninyo le lalo, nuuməḏɩjo ibraimŋ nueicɩno, na nyaɽe nyuŋa nye əriḏo wei kɩḏilio yape ḏɩmoreḏa. 26na elo diɽi gaḏama guŋun gun guwəḏɩjeje gwerre kani gajimora ŋajiwɩrlio ga nyaŋa wei ŋuɽun ŋalo ŋun ŋɩki.

Currently Selected:

ŋɩru ŋun ŋapɩlo duwəjo 3: OTR1966

Highlight

Copy