ŋɩru ŋun ŋapɩlo duwəjo 2

asa 2

ḏiḏəḏo ḏeḏi gwuɽɩwə gwun gwɩpiḏo pɽul

1gwune na lamon wila leḏi ḏuɽi ṯoḏɩne,#2:1 gɩmori gun gaṯilgegɩle liju gi lamon leḏi ḏuɽi ṯoḏɩne ḏa gɩmori gɩmete ge ḏouwɩrico. na calɩmis aɽuwaḏa ldu kalo gete dugwor de detɩdo. 2gwune jil ŋɩdɩgə na ŋuɽun gwulə kanyin ŋiro gi ḏɩron ḏutu nulṯimɩnanega nuenyeḏe duno gwun gwijɩne. 3na diŋɩla aŋino lagin diro gi igo nalgəgɩnyeḏe ganu ŋwuɽelo ŋwagin wei. 4na luŋa wei nalenyeḏe gwuɽɩwə ganu gwun gwɩpiḏo pɽul nalau ḏuməḏo ḏiro kajakaja ḏiro gi gwune ḏəḏɩlo gwuɽɩwə.

5na liju lijo urucəlim lun liro ləmɩnyo lun laṯɩḏonye eloŋu, lun lɩwiḏi gi jɩmɩrɩgen wutiwuti jun jijo kɩḏilio. 6gwune na liji diŋɩni ŋɩɽilo ŋweno nalaɽuwaḏe ldu kal gete nalobaga ṯuṯ luɽuḏɩnu ganu, gi gwune luŋa wei naldiŋɩni ŋuɽuna ŋagin gi gwune aṯi gwiji umə ŋuɽuna ŋuŋun ŋuŋun. 7na luŋa wei nalobaga ṯuṯ naluməḏəṯe laginŋu nalarno, aŋəḏɩlo, lədu le wei lun laṯumə ŋuɽuna ŋeno ŋeḏi jalil na? 8na galakwe gəko nildiŋɩni gwete gwete ŋuɽuna ŋage ŋe ŋilɩŋənilɩne? 9lɩbarṯia na lɩmaḏia, na liləmɩya, na lun laṯɩje ŋi jɩbɩrio ganu je ḏɩrawe, na yauḏia, na kapaḏukia, na bunṯu, na asia, 10na paragia, na bambilia, na masɩr, na kalo ge libia guɽeico gerawanŋ galo, na liji lun liro kaja gwe leḏi rumiya, na liju, na lun laṯɩməṯo ŋuɽuna ŋeḏi liju, 11likariṯ na lijulu, na lɩŋə nilɩdeŋɩnejo luməḏi ŋuɽuna ŋage ŋan ŋɩru ŋun ŋɩmobeje liji ga ṯuṯ ŋun ŋapɩlo elo. 12nalobaga ṯuṯ luŋa wei nate nallɩŋe aŋ gwiro no, naluməḏəṯe laginŋu nalarno, ŋuɽun ŋɩrṯaŋe? 13na kworo nalaki jumo nalarno, ləmɩnyo leno lipe ŋɩmidiə ŋun ŋajɩla.

ŋuɽun ŋedi butrus gi lamon lun liro duɽi ṯoḏɩne

14na buṯrusŋa naldiɽelo lun liro di na gwete nuumə ŋwal ŋwe ŋwɩbuḏo nuleicɩno, ləmɩnyo le leḏi yauḏia na nyaŋa wei lun laṯɩje urucəlim, ouwɩricɩlo ŋeno alɩŋini lagalo na nyadiŋɩni ŋuɽuna ŋinyi. 15leno late lɩrləlo gi gwune aranyane nyaŋa no, ŋiro dino mimmi gilio sa ṯoḏɩnekwoɽo kuwei. 16na ŋuɽun ŋeno ŋiro ŋono ŋun ŋulilo nebi gwun gwan yuwil,

17elo gwarno, ŋwamon ŋweḏi gɩdo ganu

nyi gwadoija gwuɽɩwə gwi gi liji wei,

na nyaɽe nyalo na nyera nyalo nyaje nyuməḏɩjo liji ŋuɽuna

ŋun ŋaŋijilɩlo elo,

na jamal jalo jaje jaŋu ŋuɽuna gi jei ganu jagin ŋiro gi

gwume,

na nɩmon nalo nun niro ləmɩnyo naje nal ŋwume e,

18na ŋwamon ŋwono nyi gwadoija gwuɽɩwə gwi

gi lɩwainy linyi lun liro ləmɩnyo na lun liro la

naluməḏɩjo liji ŋuɽuna ŋun ŋaŋijilɩlo elo.

19namɩni nyi gwaŋinio ŋɩdio kanyin ŋun ŋobeje liji ŋa ṯut,

na ŋuɽun ŋun ŋɩbuḏo ga kwɩnyəm,

ŋuwən na igo na gwulu;

20gwerre ganu lamon lɩbuḏo liŋir late lɩmila leḏi gwele gwun

gwiro elo no,

anyin yərimi ganu na uwə gwəmɩdini ŋuwəno,

21na wei lun laṯorniḏe galo jiri je jeḏi gwele gwun gwiro elo

ləkədəḏɩni ga.

22ləmɩnyo le leḏi isreiyil diŋɩnɩl ŋuɽuna ŋeno: yecu gweḏi nasɩra gwun gwima elo aŋinijo kɩlɩgi ganu lagalo ŋɩru ŋe ŋeḏi ŋɩma ŋun ŋɩbuṯano kworo gweḏi liji, na ŋɩdi ŋun ŋɩmobeje liji ga ṯuṯ, na ŋuɽun ŋun ŋɩbuḏo ŋun ŋɩmal elo ape ŋu gwe kɩlɩgi ganu lagalo, gi gwune nyaŋa lilɩŋiḏi gi lulo lalo, 23gwiji kweno gwiḏəḏini ŋuɽun ŋun ŋɩbunyɩlo elo na ŋun ŋilɩŋiḏulo uro gwerre, manyaməṯo nanyaɽinye gi luɽi lun lɩmalɩḏo ganu di de deḏi liji lun late ləṯi ŋuɽuna ŋeḏi elo no. 24na elo kədə ga ŋwuɽede ŋweḏi galo geḏi liji lun laiyo na mudiɽi, gi gwune ḏaiya ḏate ḏəṯi ŋɩma ḏəməṯo no. 25na gwuməḏi gwe ḏauuḏŋu,

nyi gwaṯaŋu gwelɩnya gwun gwiro elo gi jei ganu lugwi

bubruṯ,

na ŋu gwaṯɩje gi ḏi ḏinyi ḏun ḏiro ḏiŋir, na dino nyi

gwaṯɩjiga bubɽil gwate gwatɩndigin ga no;

26ŋiro dino ḏugwor ḏi ḏidilo ganu na nyi gwuməḏi ḏidilaḏe

ganu;

na aŋɩnu yinyi yo yɩḏuḏɩnɩjo ŋuɽuna ŋe ŋaje ŋila,

27gi gwune ŋa gwate gwouwɩrico gwula gwinyi kalo geḏi liji

lun laiyo no,

na ŋa gwate gwaŋouwɩrico gwuŋa gwun gwɩpiḏo pɽul

gwadigɩɽe no.

28ŋa gwiro gwaŋijinyi daṯ deḏi ḏɩmiḏa,

na ŋa gwienyeji ḏidila ḏe ganu gi jei ganu lugwuŋa.

29na buṯrus gwarno, lɩmagəri lun liro ləmɩnyo, ouwɩricil ŋwajiluməḏɩjo muma ŋan gwurninyo gwalo gwun gwan ḏauuḏ, na ŋu mai makwurɩni dino na gil guŋun gore go lage. 30na ŋu gwiro nebi na gwilɩŋiḏi gwerɩmɩjo elo nuarno nyaɽe nyeḏi aŋɩnu yuŋun ŋete ŋaje ŋədu gi loro ŋaje kɩḏoɽ geḏi ŋele ŋuŋun. 31na ŋu ŋaŋəḏulo gwerre naṯuumə ḏidiɽo ḏe gi ḏaiya ḏeḏi kɩrirṯo, nuarno elo gwate gwouwɩrico gwula gwuŋun gwaje kalo geḏi liji lun laiyo no, na aŋɩnu yuŋun yate yadigɩɽe no. 32na elo madiɽi yecuŋ kweno na liŋə wei ilro lun laŋiḏi ŋuɽuna ŋeno. 33na dɩno ŋu mudiɽi ḏi ḏe ḏeḏi elo ḏun ḏiro ḏiŋir, na maməṯo gwuɽɩwə gwun gwɩpiḏo pɽul ḏi baba gwun gwəru gwe gwerre, nudoija ŋuɽuna ŋeno ŋun ŋaŋaḏanyalo na nyaldiŋɩni. 34na ḏauuḏŋu gwate mabo kanyin no, namɩni ŋu kwulo gwuŋun nuarno,

gwele gwun gwiro elo gweico gwelɩnya gwi no,

jigaŋa gi ḏi ḏinyi ḏun ḏiro ḏiŋir,

35kəbe nyiduji liji lun lɩkiḏiḏianyale gɩ gɩḏoɽ geḏi ŋwara

ŋwuŋa.

36na dino ouwɩricil liji wei leḏi isreiyil allɩŋe muma alarno elo mudui gwele na kɩrisṯo gwun gwuɽinyɩḏenya gi luɽi lun lɩmalɩḏo ganu. 37na gwune naldiŋɩni nalɩḏuge gi dugwor ganu dagin, naleico buṯrusŋaije duwəjo de dun dɩṯanu no, lɩmagəri lun liro ləmɩnyo, anarre galakwe? 38nal buṯrus eicɩno, wɩrlal ga ŋuɽun ŋalo ŋun ŋɩki, nyababṯaijɩni nyaŋa wei gi jiri jeḏi yecu kɩrisṯo kani ŋwajəbɩrijo ŋuɽuna ŋalo ŋun ŋɩki nanyalape gwuɽɩwə gwun gwɩpiḏo pɽul ga dino. 39na ŋuɽun ŋeno ŋalo ŋiro na nyaɽe nyalo, na liji wei lun lijo gala gwola ganu, wei lun lorniḏɩlo gwele gwun gwiro elo gwage. 40ŋuɽun ŋo ŋiro kaja ŋutu ŋuməḏɩjulilɩŋe nuɽoṯeḏe gworki nuleicɩno, kədəḏɩl lula lalo ga gi liji leḏi gwunne lun ləṯi ŋuɽuna ŋɩmanɩḏo ganu, 41na lun lɩmaməṯo ŋuɽuna ŋuŋun ḏidila ḏe ganu nalbabṯaijɩni, na gi lamon leno nalbaḏaṯe nalro alɩb ṯəɽɩl ca.

ŋuɽun ŋeḏi lɩkɩrisṯin lun leḏi gwerre

42naljaḏaṯa ḏiḏir gi ḏalɩmia ḏeḏi duwəjo nalɩməṯo, ŋaliŋɩro ŋɩmaga, nalbɩleṯɩnya gia ganu, naṯɩluməḏɩjo eloŋu.

43nal ŋɩḏe e wei, na duwəjo duji ŋɩdio ŋun ŋɩmobeje liji ga ṯuṯ na ŋuɽun ŋun ŋɩbuḏo. 44na wei lun ləmɩnyɩḏo wei laginŋu naləṯi ŋɩdio ŋagin laginŋu. 45naṯɩleḏɩla ŋɩdio ŋagin naṯɩlunijo liji wei laginŋu, ŋiro gi gwune bunyilo gwete gwete gwun gwibɩɽaṯo ŋɩdio. 46na bubruṯ laṯaɽuwaḏe ldu kwu dunu gweḏi elo gwun gwubuḏo dugwor de detɩdo, nalbɩleṯɩnya gia ganu gi lɩdunu gi lɩdunu, nalʼe ḏidila ḏe ganu dugwor de detɩdo. 47naṯɩlorṯeḏa eloŋu na liji wei naldile ganu lagin. na ŋwamon wei naṯi gwele baḏeica liji kɩniso lun lar ləkədəḏɩni ga.

Currently Selected:

ŋɩru ŋun ŋapɩlo duwəjo 2: OTR1966

Highlight

Copy