ŋɩru ŋun ŋapɩlo duwəjo 16

asa 16

ṯimuṯawus na bulus lapo ŋɩru berene lisra

1na bulus wila ḏarɩba na lisra dino. na ŋɩnəwei na ṯalɩmis je ḏete ḏan ṯimuṯawus, ŋaɽe ŋeḏi gwa gwete gwun gwiro gwiju gwun gwəmɩnyu yecuŋ, namɩni baba gwuŋun gwiro gwugrigi. 2na liji lun liro lɩmage laṯuməḏəṯe ḏi ṯimuṯawus nalarno gwiŋir lun laṯɩje lisra na igunia. 3bulus gwarno gwaŋalgwuwele numəṯo nuɽənyə ŋuɽun ŋeḏi liju kalo kono, gi gwune lɩŋiḏɩlo wei baba gwuŋun gwiro gwugrigi.

4gwune nalwele gi jɩmɩrɩgen gi jɩmɩrɩgen nəlɩḏəḏə ŋuɽuna ŋeḏi duwəjo na ŋeḏi lele leḏi kɩniso lun lijo urucəlim. 5na dino na kɩniso bɩɽe nanu ḏɩməṯo ḏe, naṯi liji baḏaṯe bubruṯ bubruṯ.

bulus gwuwiḏi kɩlɩgi ganu geḏi asia

6nalwele paragia na galaṯia na gwuɽɩwə gwun gwɩpiḏo pɽul akajo gi ḏuməḏɩjo liji ŋuɽuna ŋun ŋiŋir asia. 7gwune nalwele gɩṯo misia naliḏeije lele biṯinia namɩni late lɩmal gwuɽɩwə gweḏi yecu ouwɩrico no, 8naldare misia nalgwuli ṯarawas. 9na bulus aŋu ŋuɽuna ŋun ŋaŋinu gi ŋwume gilio; gwəmɩnyo gwete gweḏi makɩḏunia gwuḏuḏɩnu nuɽoṯeḏe gworki nueicɩno, wila makɩḏunia ŋijigelejo uwə. 10gwune aŋəḏu ŋuɽuna ŋun ŋaŋinu gi ŋwume, cou naniḏeije anele makɩḏunia anlɩŋiḏi muma elo gworniḏije lanaluməḏɩjo ŋuɽuna ŋiŋir ŋeḏi yecu kɩrisṯo.

bulus gwuwiḏi makɩḏunia; ŋu gwo bilibi

11nanawalane ṯarawas murkab gwe nanawele morrr samuṯraki, na giləganu nanaṯɩmi niabulus. 12na ŋɩnəwei nanawele bilibi, gwun gwiro amɩrɩgen yun yɩbuṯano gi loro leḏi makɩḏunia yeḏi liji leḏi rumiya. nanaje kamɩrɩgen yono ŋwamon ŋwəḏi, 13na lamon le sabiṯ nanədu ga kaja gɩburə geḏi amɩrɩgen gun gijo gɩṯo gi ḏɩrawe, nanarno galo geḏi uməḏɩjo eloŋu go, nanajiga nanumə la le lun laɽuwaḏo ldu. 14na gwa gwete gwan lidia gwun gwaṯela jiria jun jure jumɩno ganu nudiŋɩni ŋuɽuna ŋəri. na ŋu gweḏi amɩrɩgen yun yan ṯayaṯira gwaṯorṯeḏa eloŋu, na gwele gwun gwiro elo iḏi ḏugwor ḏuŋun nudiŋɩni ŋuɽuna ŋun ŋuməḏɩjilɩlo bulus. 15na gwune nalbabṯaijɩni liji le leḏi dunu gwuŋun nuŋwiɽoṯəḏɩjo gworki nuarno, na ḏa nyalmarno nyiməmɩnyi gwelɩnya gwun gwiro elo muma, wilal dunu lugwi nyajiga. nuɽoṯeḏe gworki kəbe nananwele.

16na lamon lete gwune nanar nele kalo geḏi uməḏɩjo eloŋu, nanbuje ŋeria ŋete ŋiro wainy ŋəṯi ḏiŋeroma ḏun ḏəŋiḏi ŋuɽuna ŋun ŋaje ŋila, ŋun ŋaṯəpijo lelɩnya luŋun ḏɩbona ḏutu ŋuɽun ŋe ŋe ḏirdeijo liji ganu. 17naṯugwuje bulusŋ na anaŋa, nuəri gwula nuarno, ləmɩnyo leno liro lɩwainy leḏi elo gwun gwolenelo lun laŋijaje ṯaṯ ḏe ḏɩkədəḏɩnə ga. 18ŋu ŋaṯarre dino ŋwamon ŋwutu nuuməḏəṯo bulusŋ gi nəni, nuwɩrle ganu nueico diŋeroma no, nyi gwuməḏɩjaŋa jiri je jeḏi yecu kɩrisṯo tuḏi lugwun. nudu lugwun kaja kono.

bulus na sila lo kɩrkon naləbɩrinu

19gwune na lele luŋun aŋu ŋuɽuna nalarno ḏɩbona ḏagin ḏun ḏutu ḏɩmete, nalməṯo bulusŋaije sɩla gwe naligwuloḏa gi lele gi cu. 20naligwuloḏeṯa gi lele leḏi əcərio nalarno, ləmɩnyo leno lun liro liju lɩmagele ŋuɽuna kamɩrɩgen yəri gworki ŋe ḏikiḏiḏia gi jei. 21laṯijuməḏɩjo gɩmuri ge gun gɩtumuḏəna anaŋa lun liro rumiya gun gate gəmɩnyana ganape ganarre no. 22na liji diɽi kal gete nalikiḏiḏi, na lele leḏi əcərio naliwawɩla jiria nalgele ŋuɽuna lalipi duwa de. 23gwune nalipi gworki naləḏɩje kɩrkon, nalgele ŋuɽuna ŋɩbɩɽe kwiji gwun gwaṯɩdɩme kɩrkona luldɩme muma, 24nudiŋɩni ŋuɽuna ŋeno nuləḏɩje uro gɩdəno kɩrkon nukaiaje ŋwara ŋwagin gwuɽi.

25na giligina ganu bulus na sila naluməḏɩjo eloŋu nalelɩŋeijo eloŋu delɩŋa, namɩni gwubabuny diŋɩni. 26nalje ŋɩdɩgə na gwɩnyəm ubəga gworki na jama je kɩrkon ubəga, na cou na jɩbur iḏini wei na ŋɩdi wei ŋun ŋɩkaiilɩŋe ŋwubabunya nalbɩɽeṯeḏa ga. 27gwune na gwiji gwun gwidɩmiḏi kɩrkona nudiɽo ŋwar nuaŋu jɩburə jeḏi kɩrkon jimiḏini, nuwal kɩwiḏio gwuŋun nuarno gwaɽinye gwula gwuŋun, nuarno ŋwubabuny ŋwumabɩre. 28na bulus orniḏe ŋwal ŋwe ŋwɩbuḏo gworki nueicɩno, ma, ŋaḏugɩno no. annon wei. 29nuorniḏe gwete gwunəɽəḏɩjo, nukɩɽəje gɩdəno nuubəga, nuiḏi ŋwara ganu ḏi bulusŋa sila gwe. 30nulideije kɩluḏo nuleicɩno, lɩmagəri le, nyi gwarre galakwe nyi kəḏəḏɩni ga? 31nalɩmɩni eicɩno, əmɩnyu gwelɩnya gwun gwan yecu na ŋa gwəkədɩni ga na liji leḏi dunu gwuŋa. 32naluməḏɩjoŋu na liji wei leḏi dunu gwuŋun ŋuɽuna ŋeḏi gwele. 33nalgwulo kaja kono giliŋ kono nulwei dəɽi dagin nalɩbabṯaijane liji le luŋun wei cou. 34nuləḏɩje gɩdəno lugwun, nulḏəḏə ŋɩdio ŋe ḏiṯa; nudile ganu gi gwune ŋu na liji leḏi dunu gwuŋun lɩməmɩnyi eloŋu.

35gwune na galo uɽe na lele leḏi əcərio nalweje jalbuliḏa naleicɩno, kədəḏi liji lono ga. 36na gwun gwidɩmiḏi kɩrkona uməḏɩjo bulusŋ ŋuɽuna ŋeno nueicɩno, lele leḏi əcərio lɩmouwəjo ŋuɽuna larno nyi gajikədə ga, na ŋiro dino, tuḏɩl gwunnɩno nyele mino ŋuɽun ŋe ŋiŋir. 37nalmɩni bulus eicɩno, luŋa lɩmijipi gi jei ganu jeḏi liji kwuḏon əcərio yate, nandro liji leḏi rumiya, na luŋa ləḏɩjije kɩrkon na gwunnɩno nalmijidi nyɩkwom a? awe; ouwɩricɩlo alwila luŋa ŋwijildi. 38na jalbuliḏ wəɽeice ŋuɽuna ŋwara gi lele leḏi əcərio; na gwune naldiŋɩnno leḏi rumiya liro naldonye, 39nalwila nalarno limobega ṯuṯ, nalɩḏi, nalɽoṯəḏɩjo gworki lədu kamɩrɩgen yeno. 40naldu kɩrkon naləḏi kwu dunu gweḏi lidia, na gwune nalaŋu lɩmaga nalɩbɩɽi nanu nalwele.

Currently Selected:

ŋɩru ŋun ŋapɩlo duwəjo 16: OTR1966

Highlight

Copy