ŋɩru ŋun ŋapɩlo duwəjo 15

asa 15

liji lun liro ga dino lun liro lɩkɩrisṯin na ŋuɽun ŋun ŋigelijɩlo elo musaŋ

1na liji kworo nalgwulo yauḏia nalalɩmi lɩmage naleicɩno, na ḏa nya late lɩmouɽene ŋuɽun ŋeḏi musa no, nya late ləkədəḏɩni ga no. 2na gwune bulusŋa barnaba gwe nate naləmɩnyi ŋuɽuna ŋagin no, na ŋuɽun ŋun ŋɩbɩɽe naldiɽi lagin. na dino na lɩmage gele ŋuɽuna nalarno bulusŋa barnaba gwe na kworo lagin alabo urucəlɩm aluməḏəṯe duwəjoŋale na lele leḏi kɩniso ŋuɽun ŋeno.

3nal liji leḏɩ kɩniso gele gi ṯaṯ naldare kɩlɩgi ganu binigia na samɩra naluməḏɩjo liji ŋuɽuna ŋeḏi liji lun liro ga dino lun lɩmaɽuwaḏa ḏi elo; nalapa ḏidila ganu weoi gi lɩmage. 4gwune nalṯɩmi urucəlɩm na liji leḏi kɩniso na duwəjo na lele nalɩməṯo naləmɩnyi, naluməḏɩjo ŋɩru wei ŋun ŋapɩlo elo luŋaŋale. 5na lɩbarɩsi kworo lun ləmɩnyu naldiɽi naleicɩno, arram luŋa louɽeḏɩm nyagelɩjo ŋuɽuna aldɩme ŋuɽuna ŋun ŋigelijɩlo elo musaŋ.

əcərio yeḏi kɩniso urucəlim

6na duwəjo na lele nalaɽuwaḏa ldu naluməḏəṯe ŋuɽun ŋeno. 7gwune na ŋuɽun uti na buṯrus diɽelo nuleicɩno, lɩmagəri, nyalilɩŋiḏi galakwe kaja gwola ganu elo gwuməṯɩnyi lagalo, gi linyu linyi la liji deŋɩnejo lun liro ga dino ŋuɽun ŋiŋir ŋeḏi yecu aləmɩnyi. 8na elo gwun gwaṯɩlɩŋe dugwor, laŋijulo ŋeno gwune nulḏəḏə gwuɽɩwə gwun gwɩpiḏo pɽul gi gwune ḏəḏijɩne, 9na gwate mijinduji kaja ḏi luŋa no, na gwuwei dugwor dagin ḏɩməṯo ḏe. 10na gwudaro gəko nanyɩḏeije eloŋu nanyagele luɽi gi lidom elo leḏi calɩmis, lun late ləṯi ŋɩma lɩman lɩgwurnɩnyo lage ape gi lidom lagin na liŋə dɩno no. 11namɩni iləmɩnyi ḏiŋiriḏa ḏe ḏeḏi gwele gwun gwan yecu iləkədəḏɩni ga gi luŋa.

12na liji wei nalji nyɩkwom naldeŋɩnejo barnabaŋ na bulus luməḏi ŋan ŋuɽuna ŋun ŋɩbuḏo na ŋɩdi ŋun ŋɩmobeje liji ga ṯuṯ ŋun ŋapɩlo elo luŋaŋale kɩlɩgi ganu gi liji lun liro ga dino. 13gwune nalɩji nyɩkwom nal yagub uməḏɩjo nuleicɩno, lɩmagəri, deŋɩnejɩnyil. 14simaun gwuməḏi ŋuɽuna galakwe gwerre na elo aŋinijo ḏiŋiriḏa gi liji lun liro ga dino, nulməṯo kworo lagin alro liji lun ləṯi jiri juŋun. 15na ŋuɽun ŋedi nebɩŋa ŋiro kal gete gworo gwe kwe gi gwune ŋulinu,

16na ŋɩno gɩdo nyi gwaɽuwa

nyi gwuṯe duno gweḏi ḏauuḏ gwun gwɩmake;

na gwar gwiuṯe mɩna,

17kani a liji lun lɩṯanu naṯɩlbunyi gwelɩnya gwun gwɩro elo,

na lun liro ga dino lun ləṯi jiri jinyi,

18na gwele gwun gwiro elo gwar dino gwun gwaṯaŋiḏi ŋɩdio

ŋeno uro gi gwune gelu gɩḏilio.

19na dino nyi gwarno, ilate lagele ŋuɽuna ŋɩni gi liji leno liro ga dino lun liwɩrlijo eloŋu galo no, 20nilɩmɩni ulijo aṯɩldonye ŋɩdio ŋun ŋɩmal ŋwobo duji ŋɩrleḏ, na ŋeḏor, na ŋɩdi ŋun ŋideijɩlo ŋate ŋɩḏugɩnu no, na ŋuwən. 21namɩni uro gwerre musa gwaṯəṯi iiji lun laṯuməḏɩjo liji ŋuɽuna ŋuŋun gi jɩmɩrɩgen wei ŋun ŋaṯəgɩrini gi lɩdunu leḏi elo ŋwamon ŋwe sabiṯ wei.

jawab jan lɩkɩrisṯin lun liro liji lun liro ga dino

22na gwune na duwəjo na lele na liji wei leḏi kɩniso naluməḏəṯe lalɩkuwa lun lɩməṯɩḏo lagin, nalaɽuwa anḏakia bulusŋa barnaba gwe, na luŋa nalɩməṯo lun luɽano gi lɩmage lan yauḏa gwun gwan barsaba na sila. 23nalweje gɩḏam ge nalarno; duwəjo na lele na lɩmage lisalɩmi lɩmage lun liro ga dino anḏakia na suriya na kilikia. 24na anamadiŋɩnno galakwe kworo lun lɩmədu lagəri leijeicɩlo ga ŋuɽun ŋe naluɽuḏi lula lalo ganu ŋuɽun ŋe, namɩni late liḏəḏənalo ŋuɽuna ŋeno no, 25nanaṯuməḏəṯe lulo le letɩdo nanaməṯo ləmɩnyəŋe kworo nanalwəjo barnabaŋa bulus gwe lun ləmɩnyanalo, 26lun liwəlije gi jiŋɩno jagin jiri je jeḏi gwele gwage gwun gwan yecu kɩrisṯo. 27na dino nanawəjo yauḏaŋaije sila gwe lun lajuməḏɩjo ŋwinyu ŋwe ŋuɽuna ŋeno. 28na gwuɽɩwə gwun gwɩpiḏo pɽul na anaŋa ŋurləḏiḏianalo nanate najeicico ga ŋuɽun ŋutəno kworo kwe no, 29kani nyadonye aṯaṯanyaʼe ŋɩdio ŋun ŋigelɩnu ŋwobo elo, na ŋuwən, na ŋɩdi ŋun ŋideijɩlo ŋate ŋɩḏugɩnu no, na aṯanyuriḏa no. na ḏa nyalmadɩme lula lalo ŋuɽun ŋeno ŋiŋir lagalo.

30na dino naluwəje nalgwuli anḏakia. gwune nalwəɽeice liji ldu nalɩḏəḏə gɩḏam. 31gwune naləgɩri naldile ganu ŋuɽun ŋeḏi moɽa ganu. 32na yauḏa na sila liro nebɩŋa dino, naluməḏɩjo lɩmage ŋuɽuna ŋutu nalɩmoɽe ganu nalɩbɩɽi nanu. 33na gwune nalijiga ŋɩnəwei ŋwamon ŋwədi na lɩmage ouwɩrico nalaɽuwe ḏisalɩmia ḏe ḏun ḏuwəjɩliḏe. 34namɩni sila arno gwajiga.

35na bulus dino na barnaba naljiga anḏakia, nalalɩmi naluməḏɩjo ŋuɽuna ŋiŋir ŋeḏi gwele gwun gwan yecu lijiŋale lun lutu lun liro kaja.

36na ŋwamon ŋwədi na bulus eico barnabaŋ no, ouwɩrico ilaɽuwe ilaŋaḏa lɩmage lage wei gi jɩmɩrɩgen jun juməḏɩjalalene ŋuɽuna ŋeḏi gwele gwun gwan yecu ilinaŋaḏa liro galakwe. 37na barnaba arno labaje yuwanaŋ gwun gwan markus aliwele dino. 38namɩni bulus arno gwate gwiŋir gwilɩwele gwuŋɩno walijɩne bambilia gwate mileleŋu ŋɩru no. 39na late ləmɩnyejiḏi ḏuṯ no nalkenyɩḏiḏi ganu, na barnaba gwulo markusŋ nalwele murkab gwe gabarus. 40namɩni bulus məṯo silaŋ na gwune nal lɩmage gele gi ḏiŋiriḏa ḏeḏi ŋwele ŋwun ŋwan yecu nalwele, 41nalwele kɩlɩgi ganu suriya na kilikia labɩɽia liji leḏi kɩniso nanu wei.

Currently Selected:

ŋɩru ŋun ŋapɩlo duwəjo 15: OTR1966

Highlight

Copy