Matta 27

Yasuuⓐ gwijo gi je ganu ja Biilaaṯus, gwina gwiro mudiir gwa Ruumiya

1A dina ma kalo ro bigunu a leleny peth la gusus a leleny liter la liji abiŋaijiye liduŋw di Yasuuⓐ, alari gwalrinya. 2A dina malguke dhoi alodhadha di Biilaaṯus al Bunṯi gwina gwiro mudiir.

Ai gwa Yahuudha

3A Yahuudha, gwina gwugejiyina, dina muŋw aŋa Yasuuⓐ dakimini, ŋwugejini, ŋwuwure gwarush dhure‐a‐die gwina gwiro faḏḏa, ŋwudhedha lelenya la gusus a liji lina lurun. 4Ŋwulaici, Nyi gwimapai ŋida ŋina ŋike ŋinena ugejiny kwiji gwina gwiŋir. Albi abiŋaijo, alaici, Anaŋa luthaŋa? Dhuŋun dhuŋa dhiro. 5Ŋwugeta faḏḏa galo gi hekal, ŋwutu por, ŋwela gwurinyini dhar dhai. 6A leleny la gusus apai faḏḏa, alarnu, Gwati gwiŋir digeta kalo ga dhauwadhini gwarush gwa hekal no, ŋinena ruŋw luro la ŋin. 7Alabiŋaijiye, alelaŋ dhiruiny dha liji lina lathigarije dha dhigwurce lirina. 8Minoŋ a dhiruiny ibidhe uthi jiriny jan dhiruiny dha ŋin, di gi lamun ibila. 9A dhuŋun uthi je ganu dhina dhabiŋu nebi Irmiya, ŋwarnu, Alapai faḏḏa dhure‐a‐die, luro la ŋeda lina lurinu, gwina gwima keleŋa ga Israayiil getijo luro. 10Aldhedha delia dhiruiny dha liji lina lathigarije, gwiro ŋinena aŋaijina Kweleny.

Yasuuⓐ gwijo gi je ganu ja Biilaaṯus

11A Yasuuⓐ dhuna gi je ganu ja mudiir; ŋwothaije galo, ŋwaici, Ŋa gwiro Malik gwa Yahuud a? A Yasuuⓐ aicinu, Ŋa gwarna momaŋ. 12Abi ma leleny la gusus a liji lina lurun dhagirini dugun, ŋwugugide. 13A Biilaaṯus abiŋaijo, ŋwaici, Ŋa gwati gwidiŋinu dhuŋuna dhoinyadho dhina dhugejil dhai duguŋa na? 14Athuŋw babiŋaijo dhuŋuna dhetipo gatur no; di a mudiir ali galo dir gwuleny. 15Gi lamun la ŋidwa ibiŋe mudiir gwathi gudajo lijo maẖbuus galo gweta gwina gwathil bupe. 16Aluthi maẖbuus gweta gwina gwike, gwan Baaraabaas. 17A dina mal auradha liduŋw, al Biilaaṯus abiŋaijo, ŋwulaici, Ei gwiro gwina gwibupanya daji gudejo galo, Baaraabaas, i Yasuuⓐ, gwina gwan al Masiiẖ? 18Gwiliŋidhi darnu gwikijilo dugore, albodhadha dugun. 19A dina nanaŋ jaluŋw kursi alaŋ ga maẖkama, a kwa gwuŋun ukejiye dugun, ŋwaici, Athena ŋa gwapai dhuŋuna dheda kwiji ibigwe gwina gwiŋir no; gi lamun ibila dhiŋidi dhenyaijiny dhuŋuna dhoinyadho dugun gwai. 20Abi leleny la gusus a liji lina lurun lelinyaje lijo alari lothaijo mudiiruŋw galo Baaraabaas gwai, albi rinya Yasuuⓐuŋw. 21Albi mudiir abiŋaijo, ŋwulaici, Ei gwiro gweta gwa liji ibila ram gwina gwuminyanyanya dari gwaji gudujo galo? Alarnu, Baaraabaas. 22Al Biilaaṯus aici, Abi nyi gwure Yasuuⓐuŋw akwai, gwina gwidhedhanya jiriny jan al Masiiẖ? Alare peth nu, Abrico ŋwai gi lure alaŋ lina limaliganu. 23A mudiir arnu, Kworaŋ abi dhuŋun dhiro dhaŋ dhina dhapuŋw dhike? Albauruni gwula gwuleny, alaici, Abrico ŋwai gi lure alaŋ lina limaliganu. 24Dina ma Biilaaṯus aŋa darnu gwati gwareje dhuŋuna dheda no, abi liji laguje ganu, ŋwapa ŋau, ŋwuye doi duŋun gi je ganu ja liji, ŋwarnu, Nyi gwijuro doi ŋin ŋa kwiji ibigwa gwina gwiŋir. Daŋadhul nyaŋa. 25A liji peth abiŋaijo, alaici, Abrico ŋina ŋuŋun alje daguri a keleŋa guri. 26Ŋwubi guda Baaraabaasuŋw galo; a muŋw pi Yasuuⓐuŋw, ŋwudhiŋa dalalije gi lure alaŋ lina limaliganu.

Rinyini gwa Yasuuⓐ gi lure alaŋ lina limaliganu

27A ejigur ya mudiir odha Yasuuⓐuŋw gi Daar al Waaliya, a orṯa peth auradha liduŋw. 28Al wala ciraŋa juŋun, alguke jallaabiiya jina jure ditaŋ. 29A dina mal kwoiya cugi nyuda, aliguke gi lira alaŋ, alguke karo gina giro gidhudho gi dhoi dhuŋun dhina dhiro dhiŋir. Alidijo ŋwurko ŋwai, al urnini ganu, alaici, Salaam, Malik gwai gwa Yahuud. 30Algwogenya ŋwoiny nono, alpi dhimoiny dhai gi lira alaŋ. 31A dina man urnini ganu, alwala jallaabiiya, alguke ciraŋa juŋun, alodhadha dirinya gi lure alaŋ lina limaliganu. 32A dina idhilo, alaŋa kwijo gweta gwan Simⓐaan, gwina gwiro Gerawaani; alelinyaije dapai lure luŋun lina limaliganu. 33A dina malela kalo gina gan Juljutha, gwina gwiro kalo ga guna, 34aldhedha khall gilagadho ganu murr gwai gwa dhiye; a dina muŋw ŋile, athuŋw iyo no. 35A malalije gi lure lina limaliganu, alguginudhe ciraŋa juŋun, aljidhuriye; a dhuŋun uthi je ganu dhina dhabiŋu nebi, ŋwarnu, Liguginudho ciraŋa jiny, aldhuriye jallaabiiya jai jiny. 36Aljalo mine alidaŋa. 37Alule dhuŋuna gi lira alaŋ luŋun dhina dharil dhai gwike, alarnu, yasuuⓐ gwiro ibigwa gwina gwiro malik gwa yahuud. 38Alalije luram lai ram, ŋeda ŋalai gi lure lina limaliganu, a gweta jadha gi dhoi dhina dhiro dhiŋir, a gweta gi dhour. 39A liji lina lathimadhina galo alilo, athil aice ŋwura ŋwegen bulibuli. 40Alarnu, Kwiji gwai gwina gwatharnu gwakeye hekal ŋari ŋodhadha manaŋ ŋwamun ganu thiril, gududhinu galo ada ŋa gwimaro Ŋari ŋa Kalo, uladha galo gi lure alaŋ lina limaliganu. 41An leleny la gusus dhagirini minoŋ ko, a jathib a liji lina lurun, alaici, 42Gwina gwathigilaŋiye lijo liter; athuŋw buthi ŋoma gwagilaŋini gwiren no. Ada ŋa gwimaro Malik gwa Israayiil, abrico ŋinena ŋwuladha galo gi lure alaŋ lina limaliganu, anuminyi. 43Gwathi dhra Kalo; abricul a Kalo gilaŋiye ŋinena ada gimuŋw uthi, ŋinena aruŋwnu, Nyi gwiro Ŋari ŋa Kalo. 44A luram lina lijilai ŋwure alaŋ ŋwina ŋwimaliganu alilo minoŋ ko.

Ai gwa Yasuuⓐ

45A kalo rimi ganu kalo peth ro saaⓐa die‐a‐ram di a saaⓐa ro thiril. 46A gi saaⓐa thiril a Yasuuⓐ ure gwula gwuleny, ŋwarnu, Iloi, Iloi, lama sabakhtani? gwina gwiro Kalo giny, Kalo giny, kworaŋ nyibi gathani? 47A liji coŋ lina lijo mine dina mal diŋini, alarnu, Kwiji ibigwa gwa gwurnio Iliiyaŋw. 48An kwiji gweta ortadhadha ganu, ŋwapa safinja, ŋwun buluje khall, ŋwunije gi dhimoiny, ŋwudhedha, ŋwiye. 49A liji liter arnu, Abricul alaŋa ada Iliiya gwimila, ŋwugilaŋiye. 50A Yasuuⓐ ure gwula gwuleny manaŋ, ŋwudhiŋa dhigirima dhuŋun. 51A kiraŋ ga hekal dhireyadhini ganu ram ro agwilaŋ di ŋwubaije galo galiny; a kwiyaŋ ube galo, a nyol upe ganu. 52A del igiini; a aŋinu yoinyadho ya liji lina lina liŋir lina limai dire, 53altuya gi del maji muŋw dire dai, alela gi mediina gwina gwiŋir didirel, alaŋini gi liji loinyadho. 54A dina ma zabith a liji lina lijilai aŋa Yasuuⓐuŋw, a dina malaŋa kwiyaŋu dube galo, a ŋidi peth ŋina ŋupinu, aldhenya gwuleny, alarnu, Titiganu kwiji ibigwa gwiro Ŋari ŋa Kalo. 55A la loinyadho lijo mine lina lidhunudhi romine, alaŋa lina lathi gwudhiye Yasuuⓐ ŋalai Jaliil, athil upijo ŋiro. 56Gweta degen gwan Maryam al Majdaliiya, a Maryam, gwina gwiro nana gwa Yaⓐguubŋa a Yuusi, a nana gwa keleŋa ga Zabadi.

Gwurcini gwa Yasuuⓐ

57A ma kalo ro ŋibilbil a kwiji gweta ila gwina gwuthi ŋida ŋoinyadho, gwan Yuusuf gwa Ar Raama, gwina gwiro thilmiz dha Yasuuⓐ. 58A kwiji ibigwe ela di Biilaaṯus, ŋwothaije galo aŋinu yai ya Yasuuⓐ; a Biilaaṯus abiŋaijo ŋwari gwela aldhedha. 59A dina ma Yuusuf apai aŋina, ŋwumiri nono kiraŋ gai gina giro tiil. 60Ŋwudhire kimu ganu gina gikuruŋw kol ganu; ŋwudhadhire kolya gwugiluthe our ya dhel, ŋwela. 61A Maryam al Majdaliiya je mine, a Maryam gwiter, allije galo aldhuni dhel ganu. 62A gi lamun lina ligwodhaijo lamun la dhijarimani, a leleny la gusus a Farriisiyiin auradhe liduŋw di Biilaaṯus. 63Alabiŋaijo, alaici, Kweleny gwai, anaŋa limaŋidhani dhuŋuna dha kwiji ibigwa gwina gwathukinejo lijo ganu dina nanaŋ midhuŋw, ŋwarnu, Maji minyai, a nyi gwaje ŋwamun thiril, a nyi gwadire manaŋ. 64Abiŋu amr a dhel ethadhini di a ŋwamun ro thiril, i calmiz juŋun jaji jila gile, alapai ŋwuramai, alaici lijo nu, Ŋeda gwimadire dai; a gulta ga gidon gaji gakani gulta ga kwereny. 65Al Biilaaṯus aicinu, Nyaŋa luthi dhedhiban; idhul, nyare dhuŋuna dhina dhanya dhuthi ŋoma. 66Alela, alethadhe kaloŋa gina gidhirna aŋina yuŋun, alkhathimiye kolya, aldhuneje dhedhiban.

Currently Selected:

Matta 27: HBN

Highlight

Copy