Matta 26

Algeta dhuŋuna nyim dhina dhadhil dhai rinya Yasuuⓐuŋw

1A dina ma Yasuuⓐ je githo dimeaje dhuŋuna ibidhe, ŋwabiŋaijo calmiz juŋun, ŋwulaici, 2Nyaŋa liliŋidhi gwaji ŋwamun ram Ŋidwa ŋa dh’Abrico ŋaje, a Ŋari ŋa liji ŋaji ŋanugejiye duŋwrinyini gi lure alaŋ lina limaliganu. 3Abi leleny la gusus a jathib a leleny la liji auradhe liduŋw gi dunu gwa kweleny gwa gusus gwina gwan Gayaafa. 4Albi abiŋaijiye, alari lamutha Yasuuⓐuŋw nyigam, alrinya. 5Albarnu, Athil nanaŋ muthi ŋidwa ŋijo no, lidhenyo alari lal liji lagaje ganu.

Dina jo Yasuuⓐ Betⓐanya a kwa gweta buluje ŋela gi lira alaŋ la Yasuuⓐ

6A dina jo Yasuuⓐ Betⓐanya, gi dunu gwa Simⓐaan gwina gwiro ŋilaŋ, 7a kwa gweta ila dugun, ŋwapa gizaaza gina giro goweny, guthi ŋela ganu ŋina ŋiro gwudhurul, ŋuthi luro loinyadho, ŋwulbuluje gi lira alaŋ la Yasuuⓐ, dina jaijilo tharabeza galo. 8Abi dina ma calmiz juŋun aŋa, alkadugore, alarnu, Gi dhuŋun dhudhaŋ abi ŋela kadhini galo minoŋ? 9Ŋati ŋadhuthi ŋoma ŋadhilini gwarush gwoinyadho, a gwadhil dhedha lijo lina lati luthi ŋida no. 10Dina ma Yasuuⓐ liŋa dhuŋuna dhegen, ŋwulabiŋaijo, ŋwulaici, Kworaŋ nyabi rumajo kwaio diman galo? Gwiminyurijo dhuŋuna dhina dhiŋiranu. 11Liji lina lati luthi ŋida no lathanyalje gigina; abi alati lathilaje gigina no. 12Gi dhuŋun ibidhe nyibi ŋeda buruthe ŋela ŋai aŋina, ŋinena adhinyi gwurcini. 13Titiganu nyi gwa gwacaijinu, Kalo peth ga gidhila gina gaji gan Dhuŋun ibidha dhina Dhiŋir abiŋini, a dhuŋun dhina dhima kwa apai dhalaŋidhani.

Ugejiye gwa Yahuudha

14A Yahuudha al Iskharyuuṯi, gwina gwiro gweta gwa calmiz juŋun jina jiro die‐a‐ram, ŋwela gi leleny la gusus, 15ŋwulaici, Nyaŋa liny dhedha aŋa ada nyi gwimajidhedha Yasuuⓐuŋw? Aluminyejiye dildhedha riyaal dhure‐a‐die, gwina gwiro faḏḏa. 16A gi lamun ibile ŋwun bupe lamun lina ladhuŋwul ugejie.

Gimure gina gimiradhi

17Gi lamun lina liro kwerkwereny la Ŋidwa ŋa dh’ⓐesh Fatir a calmiz ila di Yasuuⓐ, alaicinu, Ŋa gwara anaŋa laŋa gitijo kaloŋa momaŋ na ga dhaŋaneny ŋida ŋa Ŋidwa ŋa dh’Abrico a? 18Ŋwulbabiŋaijo, ŋwulaici, Idhul len, nya labuje kwijo gweta, nyabiŋaijo, nyaici, Muⓐallim gwarnu, Saaⓐa jiny jimila githo; nyi gwaji gweny ŋida ŋa Ŋidwa ŋa dh’Abrico gi dunu gwuŋa calmiz jai jiny. 19A calmiz are ŋinena abiŋaijina Yasuuⓐ, algeta ŋida momaŋ ŋa Ŋidwa ŋa dh’Abrico. 20Dina ma kalo ro ŋibilbil aljaijo tharabeza galo calmiz jai jina jiro die‐a‐ram. 21Kwereny nanaŋ lati lithi no, ŋwulaici, Titiganu nyi gwa gwacaijinu, Gweta gwo dagalo ganu gwithi lai gwina gwaji gwinyin ugejiye. 22Albi ka dugore gwuleny, alabiŋaijo leda leda, alaici, Nyi gwiro, Kweleny gwai, a? 23Ŋwulbabiŋaijo, ŋwulaici, Kwiji gwina gwana gwai dhuwajiye kia nono gi s̱aẖn jetipo, gwiro gwina gwaji gwinyin ugejiye. 24Ŋari ŋa liji ŋela gwiro ŋinena uladhina dugun; abi dhuŋun dhake kwiji gwina gwugejiyo Ŋare ŋa liji; gwiŋiranu kwiji ibigwe dhathuŋwii liŋinu gatur no. 25A Yahuudha, gwina gwugejina, abiŋaijo, ŋwaici, Muⓐallim gwai, nyi gwiro a? Ŋwabiŋaijo, ŋwaici, Ye. 26A dina maleny, a Yasuuⓐ apai ⓐesh, ŋwuyabiŋaijo Kaloŋa, ŋwurta ganu, ŋwudhedha calmiz, ŋwulaici, Apul, nyeny, aŋinu iny iro ibiya. 27Ŋwari ŋwapai finjaan, ŋwugwabiŋaijo Kaloŋa, ŋwuldhedha, ŋwulaici, Apul peth, nyeye, 28ŋin ŋiny ŋiro ibiŋa ŋa dhuŋun dha Kalo dhina dhiyaŋ, ŋina ŋirijo lijo loinyadho, dubure ŋida ŋina ŋike. 29Abi nyi gwa gwabiŋaijaje, ŋajaici, Nyi gwati gweye ŋau ŋa dhugur ibiŋa gwortal no, di maji minyiliye ŋina ŋiyaŋ kidhila ga Babo gwiny.

Yasuuⓐ gwabiŋu darnu gwaji gwa calmiz juŋun gathani

30A dina maleliŋa dheliŋa dha dhorthadha Kaloŋa, altu, alela gi len lina lan Zetuun. 31Al Yasuuⓐ abiŋaijo, ŋwulaici, Nyaŋa peth laji laka dugore gwan nyi gile ibiga, dhulinina, ŋwarnu, Nyi gwaji gwupi gwora, a jaŋal ja lidoŋa jaji jabai galo. 32Abi maji minyi dire manaŋ, a nyi gwaji gwajimadhina a nyi gwela Jaliil. 33Abi Buṯrus abiŋaijo, ŋwaici, Liji ibile peth laji laka dugore gwan ŋa, abi nyi gwati gwaka dhugore gatur no. 34A Yasuuⓐ aicinu, Titiganu nyi gwa gwaicaŋanu, Gile ibiga, kwereny nanaŋ lugugure lati luro no, ŋa gwaji gwinyi doinya ŋwamun ganu thiril. 35A Buṯrus abiŋaijo, ŋwaici, Ada nyi gwimari gwaŋeijo, nyi gwati gwaŋa doinya no. An calmiz juŋun peth are minoŋ.

Yasuuⓐ gwijo Jathsemaani

36Alila Yasuuⓐ ŋalai kalo gina gan Jathsemaani, ŋwabiŋaijo calmiz juŋun, ŋwulaici, Jalul mina, nyela nanaŋ mine nyabiŋaijo Kaloŋa. 37Ŋwodhani Buṯrusuŋw a keleŋa ram ga Zabadi, ŋwuke dhugore, ŋwuni gwuleny gi dhugor ganu dhuŋun. 38Ŋwulabiŋaijo, ŋwulaici, Dhugor dhiny dha dhimiriiny dhiro ŋinena nyinai; jalul mina, alethadhe. 39Ŋwudoga galo gwitiny, ŋwide kwiyaŋ, ŋwabiŋaijo Kaloŋa, ŋwaici, Babo gwai gwiny, ada ŋa gwimuminyi, waludhiny finjaan ibigwa; athaŋa babrico dhuŋuna dhina dhinyi dhare no, ŋwubi je dhina dhuminyaŋa. 40Ŋwila gi calmiz, ŋwulbuje didhre, ŋwabiŋaijo Buṯrusuŋw, ŋwaici, Nyaŋa lati luthi ŋoma alethadhe galo saaⓐa jetipo na? 41Ethadhul galo, nyabiŋaijo Kaloŋa, athathanya ugejinu gi dugor ganu dalo no; titiganu dhigirim dhathojimaje, abi aŋinu yathowaje. 42Ŋwari ŋwela manaŋ, ŋwabiŋaijo Kaloŋa, ŋwaici, Babo gwiny, ada finjaan ibigwa gwati gwimuthi ŋoma gwinyiwala no, abi gwinyiye, ŋababrico dhuŋuna dhuŋa ŋwuthi je ganu. 43Ŋwaura manaŋ ŋwulbuje didhre, ŋinena ithilo ŋwar. 44Ŋwari ŋwulgathani ŋwela manaŋ, a lamun la thirilŋa ŋwari ŋwabiŋaijo Kaloŋa dhuŋuna dheta dheta. 45Ŋwari gwila gi calmiz, ŋwulabiŋaijo, ŋwulaici, Dhirul ŋinena, nya gathuwa, saaⓐa jimila githo, a Ŋari ŋa liji ŋadhedhini gi doi ganu da liji lina like. 46Dirul, alela, aŋadhul ŋeda gwina gwugejinyina gwo githo.

Mutha gwa Yasuuⓐ

47A dina juŋw nanaŋ dabiŋi, a Yahuudha, gweta gwina gwiro calmiz jina jiro die‐a‐ram, ila liji lai loinyadho, lapanu jalala a ŋwura, lukejilo leleny la gusus a lina liro leleny la liji. 48Al kwiji gwina gwugejiina ŋwuldhedhana dhuŋuna, ŋwulaici, Gwina gwaji gwinyi mira, ŋeda gwiro. Muthul didiny. 49Ŋwuneladha ganu di Yasuuⓐ, ŋwaicinu, Muⓐallim gwai, ŋwumira. 50A Yasuuⓐ abiŋaijo, ŋwaici, Ori, ŋa gwiludhi kaŋ? Alila, almutha Yasuuⓐuŋw, alodha. 51A gweta gi liji lina lidhunadhila Yasuuⓐ ŋalai wal dhoi ganu, ŋwuwal kalala guŋun, ŋwugimiri gadham ga kweleny gwa gusus, ŋwura kuni galo. 52Abi Yasuuⓐ aicinu, Wuruja kalala kuli, ŋediŋa peth lina lapo jalala laji lai jalala jai. 53Ŋa gwarnu nyi gwati gwuthi ŋoma gwabiŋaijo Babuŋw gwiny, a gwaji gwinyi ukeja orṯa die‐a‐ram yoinyadhanu ina iro malaayka na? 54Abi dhuŋun dhina dhulinu gi jitham dhaii uthi je ganu akwai dhina dharnu dhaji dhaii ro minoŋ na? 55Gi lamun ibile a Yasuuⓐ abiŋaijo lijo, ŋwulaici, Nyaŋa liludhiny nono gwiro ŋinena gwuram jalala jai a ŋwura ŋwai dinyilmutha a? Nyi gwathiijalo gigina, nyalimiye gi hekal ganu, athinyil muthi no. 56Abi dhuŋun ibidha peth dhupinu, a dhuŋun uthi je ganu dhina dhulinu gi jitham ja nebiŋa. A calmiz juŋun gathani peth, alabire.

Maẖkama gwa Yasuuⓐ gi je ganu ja kweleny gwa gusus

57A lina limuthi Yasuuⓐuŋw alodha, algwela gi dunu gwa Gayaafa gwina gwiro kweleny gwa gusus, kalo gina gauradhina jathib a liji lina lurun liduŋw. 58Athibi Buṯrus gwuje ro gidon di ŋwila gi dunu gwa kweleny gwa gusus, ŋwuni kiru, aljalo jadham jai, ŋwari gwaŋa aŋ gwiro gwina gwaji gwaro. 59A leleny peth la gusus, a liji lina lurun, a liji peth la juriya bupe lijo lina liro lidhuŋun alro shuhuud gwa Yasuuⓐ, diluthi ŋoma albujijo dhuŋuna dha dhirinya. 60Athilbuthi ŋoma dhalbuje no; liji lina liro shuhuud lina liro lidhuŋun lidhi loinyadho, athilbujo no, a gidon a shuhuud ila ram gwina gwiro lidhuŋun. 61Alarnu, Kwiji ibigwa gwarnu, Nyi gwuthi ŋoma gwakiye hekal gwa Kalo, a gwinyalije ŋwamun thiril. 62A kweleny gwa gusus diralaŋ, ŋwabiŋaijo, ŋwaici, Ŋa gwati gwuthi dhuŋuna dha dhabiŋi na? Dhuŋun dhiro akwai dhina dhabiŋudhi liji duguŋa? 63Athibi Yasuuⓐ abiŋu dhuŋuna dhetipo no, a kweleny gwa gusus abiŋaijo, ŋwaici, Nyi gwaŋalifiye Kaloŋa gina gimidho, nyarnu, Ŋa gwiro al Masiiẖ, gwina gwiro Ŋari ŋa Kalo a? 64A Yasuuⓐ abiŋaijo, ŋwaici, Ŋa gwimanare, abi nyi gwa gwabiŋaijaŋa, ŋaici, Ro ŋinena ŋa gwaji gwaŋa Ŋare ŋa liji dijalo gi dhoi dhina dhiro dhiŋir dha ŋoma, a ŋila gi jiburu ja Sama. 65A kweleny gwa gusus ŋiretha jallaabiiya ganu juŋun, ŋwarnu, Gwimalo Kaloŋa; alŋa la libupo shuhuud gwiter gwaraŋ? Nyaŋa limadiŋini nyuni nyai nyalo guŋw lo Kaloŋa. 66Nyaŋa larakwai? Alabiŋaijo, alaici, Gwiro gathi. Gwa dhai. 67Al gwoginya gi je ganu, al dhithiŋa, a liter pi nyirke nyai. 68Alarnu, Masiiẖ gwai abiŋaijije dhuŋun dhai dha nebiŋa, ei gwiro gwina gwipidhaŋa?

Buṯrus gwirinu Yasuuⓐuŋw

69Abi Buṯrus jalo por gi hosh ganu, a ŋera ŋeta ila dugun, ŋwaicinu, Ŋa ko gwijilo Yasuuⓐ gwai gwa Jaliil. 70Ŋwubi ŋiŋirini gi je ganu degen peth, ŋwarnu, Nyi gwati gwiliŋidhi dhuŋuna dhina dhabiŋaŋa no. 71A dina muŋw tu por kwereny, a ŋera ŋiter aŋa, ŋwabiŋaijo lijo lina lijo githo, ŋwulaici, Kwiji ibigwa gwijilo Yasuuⓐ gwai gwa Naas̱ira. 72Ŋwuŋiŋirini, ŋwabiŋi gwudho gi je, ŋwarnu, Nyi gwati gwiliŋidhi kwijo no. 73A gwaji gwitiny a liji lina lijali lai githo ila, alabiŋaijo Buṯrusuŋw, alaici, Titiganu ŋa gwiro gweta degen; a dhuŋun dhuŋa dhirna. 74Ŋwubi luye, ŋwalif, ŋwarnu, Nyi gwati gwiliŋidhi kwijo no. An lugugure oradha ganu. 75A Buṯrus aŋidhani dhuŋuna dha Yasuuⓐ dhina dhabiŋaijuŋw kwereny, ŋwaici, Kwereny nanaŋ lugugure lati luro no, ŋa gwaji gwinyi doinya ŋwamun ganu thiril. Ŋwutu por, ŋware gwuleny.

Currently Selected:

Matta 26: HBN

Highlight

Copy