Yuuẖanna 8

Kwa gwina gwidhirilo kwoma gwai gwiter

1A Yasuuⓐ ela gi len lina lan Zetuun. 2A bigunu ro gile ŋwaura manaŋ gi hekal, a liji peth eladha dugun; ŋwujalo, ŋwulalimiye. 3A jathib a Farriisiyiin alodha kwaio dugun, gwina gwidhirilo kwoma gwai gwiter; a dina malgeta keligeny ganu, 4alaicinu, Muⓐallim gwai, kwa ibigwa gwubujana dildhre kwiji gwai gwiter. 5Naamuus gwa Muusa gwabiŋaijije minoŋ darnu, gweta gwina gwiro minoŋ nyaice nyol nyai; ŋabarakwai? 6Labiŋu dhuŋuna ibidha alari gwalidheje, alari gwalteje galo. Abi Yasuuⓐ jule ganu, ŋwule galo lamun lai kwiyaŋ. 7A dina jilo dothathaijo galo, ŋwudire, ŋwulabiŋaijo, ŋwulaici, Gwina gwati gwathapai dhuŋuna dhina dhike no, abrico ŋwau kwereny kol gai. 8Ŋwujule ganu kwiyaŋ manaŋ, ŋwule kwiyaŋ galo. 9A lina lidiŋinu alabiŋini gi dugor ganu degen, altu por gweta gweta, a gwina gwuranu madhini, a liter gwuje gidon; a Yasuuⓐ je cucun, a kwa dhuna keligeny ganu. 10A dina ma Yasuuⓐ dire alaŋ, athuŋw aŋadhi gweda no, abi kwa cucun. Ŋwabiŋaijo, ŋwaici, Kwa gwai, liji lada lina litejaŋa galo? Gwati gweda gwimaŋa akimiye na? Ŋwaicinu, Gwate, Kweleny gwai, no. 11A Yasuuⓐ aicinu, A nyi ko gwati gwaŋakimiye no. Idhi, athaŋa apo dhuŋuna dhike manaŋ no.

Fure gwadhi gidhila

12Al Yasuuⓐ abiŋaijo manaŋ, ŋwulaici, Nyi gwiro fure gwadhi gidhila; gwina gwiny gwuje gwati gwelila kirim no, abi gwaji gwuthi fure gwa dhimidhe. 13A Farriisiyiin abiŋaijo, alaici, Ŋa gwiro shaahid gwa gwidom gwuŋa; a shahaada gwuŋa gwati gwiro titiganu no. 14Al Yasuuⓐ abiŋaijo, ŋwulaici, Ada nyi gwimabiŋi shahaada gwiny, a shahaada gwiny gwiro titiganu; ŋinena liŋidhiny kaloŋa gina gidhinyina, a nyiliŋa gina ginyinela; abi nyaŋa lati liliŋidhi kaloŋa gina gidhinyina, a gina ginyinela no. 15Nyaŋa lathakimiye lijo gi dhuŋun dha aŋinu; abi nyi gwati gwakimiye gweda no. 16Ada nyi gwimakimiye, ẖukm gwiny gwiro titiganu; athiny rui cucun no, abi anaŋa Babo gwai gwina gwukejiny. 17A dhulinu ko gi naamuus gwalo darnu shahaada gwa liji ram gwiro titiganu. 18Nyi gwiro shaahid gwa gwidom gwiny, a gwina gwiro shaahid gwiny, Babo gwiro gwina gwukejiny. 19Alabiŋaijo, alaici, Babo gwuŋa gwada? Al Yasuuⓐ aicinu, Nyaŋa lati liliŋidhiny, i Babo gwiny no; ada nyaŋa liminyiliŋa, a nyaŋa laliŋa Babuŋw gwiny ko. 20Dhuŋun ibidhe dhabiŋu Yasuuⓐ kalo ga dhauwa gwarush, dina alimiyuŋw gi hekal; athi kwiji gweda muthi doi dai no, ŋinena athi saaⓐa juŋun idhi nanaŋ no.

Aŋidhaniye gwa lamun lina lila la dhai ŋidi ŋina ŋike

21Al Yasuuⓐ abiŋaijo manaŋ, ŋwulaici, Nyi gwela gi dhai dhiny, a nyaŋa laji linyibupe, a nyaŋa laji lai ŋidi ŋalo ŋina ŋike; a kalo gina ginyinela, nyaŋa lati luthi ŋoma lila no. 22A Yahuud arnu, Gwaji gwarinya aŋina yuŋun a? ŋinena aruŋwunu, Kalo gina ginyinela, nyaŋa lati luthi ŋoma lila no. 23Ŋwulaicinu, Nyaŋa la galiny, a nyi gwa kabo; nyaŋa la gidhila, a nyi gwati gwa gidhila ibiga no. 24Nyi gwabiŋaijaje, ŋajaici, Nyaŋa laji lai ŋidi ŋalo ŋina ŋike. Ada nyaŋa lati limuminyi darnu nyi gwiro no, nyaŋa laji lai ŋidi ŋalo ŋina ŋike. 25Alaicinu, Au gwan ei? Al Yasuuⓐ aicinu, Gwiro gweta gweta gwilaŋ gwabiŋaijaje gwai. 26Nyi gwuthi dhuŋuna dhoinyadho dha dhajabiŋaijo a dha dhakimiye dagalo; abi gwina gwukejiny gwiro titiganu, a nyi gwabiŋudhi gi liji la gidhila dhuŋuna ibidhe dhina dhidiŋininy dugun. 27Athil liŋidhi darnu gwabiŋudhi di Babo no. 28Al Yasuuⓐ abiŋaijo, ŋwulaici, Maji manyalije Ŋare alaŋ ŋa liji, a nyaŋa laliŋa nyi gwiro; a nyi gwati gwapo dhuŋuna dheda gwiren no; abi gwiro ŋinena aliminyiny na Babo gwiny, nyi gwabiŋi dhuŋuna ibidha. 29A gwina gwukejiny gwo gwijana gwai; Babo gwati gwiminy gathani no, ŋinena athiny apai dhuŋuna peth gigina dhina dhathiŋiriye Babuŋw dhugore. 30Dina abiŋuŋw dhuŋuna ibidhe, a liji loinyadho uminyi.

Upejiyalaŋ gwa Yasuuⓐŋa Yahuud gwai

31A Yasuuⓐ abiŋaijo Yahuud lina luminyu ŋeduŋw, ŋwulaici, Ada nyaŋa limathije gi dhuŋun dhiny, a nyaŋa laro calmiz jiny titiganu. 32A nyaŋa laji laliŋa dhuŋuna dhina dhiro titiganu, a dhuŋun dhina dhiro titiganu dhaji dhajiguda galo. 33Alaicinu, Anaŋa liro ligwurna la Ibraahiim, a anaŋa lati liro jine ja kwiji gwetipo gatur no. Kworaŋ ŋa bare, Nyaŋa laji lagududhini galo? 34Al Yasuuⓐ aicinu, Titiganu, titiganu, nyi gwa gwacaijinu, Gwina gwathapai ŋida ŋina ŋike gwiro gine ga ŋidi ŋina ŋike. 35A gine gati gathije dunu gwortal no; abi Ŋari ŋathinije gwortal. 36Abi ada Ŋari ŋimajiguda galo, nyaŋa lagududhini galo titiganu. 37Nyi gwiliŋidhi darnu nyaŋa liro ligwurna la Ibraahiim, athanyabi bupe dari linyirinya, ŋinena athi dhuŋun dhiny je dagalo no. 38Nyi gwathabiŋi dhuŋuna dhina dhaŋadhiny di Babo gwiny, a nyaŋa lathapai dhuŋuna dhina dhaŋudhanya di babo gwalo. 39Alabiŋaijo, alaici, Babo gwuri gwan Ibraahiim. Al Yasuuⓐ aicinu, Ada nyaŋa limaro keleŋa ga Ibraahiim, nyaŋa laiapai ŋiro ŋa Ibraahiim. 40Abi ŋinena nyaŋa lathibupe dari linyirinya, abi nyi gwiro kwiji gwina gwabiŋaijaje dhuŋuna dhina dhiro titiganu, dhina dhidiŋininy di Kalo; abi Ibraahiim gwati gwapo dhuŋuna ibidha no. 41Nyaŋa lathapai ŋiro ŋa babo gwalo. Alabiŋaijo, alaici, Anaŋa lati liliŋinu ŋwuramai no; anaŋa luthi Babuŋw gwetipo, gwina gwiro Kalo. 42Al Yasuuⓐ abiŋaijo, ŋwulaici, Ada Kalo gimaro Babo gwalo, nyaŋa linyii uminyi; ŋinena tuyiny kwereny, nyila di Kalo; ŋinena athiny idhi gwiren no, ŋwubiro gwukejiny. 43Kworaŋ athanyabi liŋidhi dhuŋuna dhiny no? Ŋinena athanya uthi ŋoma ladiŋini dhuŋuna dhiny no. 44Nyaŋa liro la babo gwalo gwina gwan Ibliis, a nyaŋa lara lathil apai dhuŋuna dha babo gwalo dhina dhathamra. Gwiro gwijigor ro kwerkwereny di a ŋinena ro, athuŋw muthi dhuŋuna dhina dhiro titiganu no, ŋinena irinii dhuŋuna dhina dhiro titiganu dugun, a muŋwabiŋi dhuŋuna dhina dhiro ŋidhuŋun, ŋwabiŋa dugun gwai; ŋinena ruŋw gwidhuŋun, a babo gwa ŋidhuŋun. 45Abi ŋinena nyi gwabiŋaijaje dhuŋuna dhina dhiro titiganu, athanya buminyu no. 46Ei dagalo gwina gwiny aŋajo dhuŋuna dhina dhike? Abi ada nyi gwimabiŋi dhuŋuna dhina dhiro titiganu, kworaŋ athanya buminyu no? 47Gwina gwiro gwa Kalo gwathidiŋini dhuŋuna dha Kalo; dhati dhidiŋinanya, ŋinena athanya rui la Kalo no. 48A Yahuud abiŋaijo, alaici, Anaŋa lati labiŋu dhuŋuna dhiŋir na? ŋinena arananu ŋa gwiro gwa Saamiri, a ŋuthi ŋurinya. 49Al Yasuuⓐ aicinu, Nyi gwati gwuthi ŋurinya no; abi nyi gwineyo Babuŋw gwiny, athinyinbi dhagirinini. 50Abi nyi gwati gwibupo majdh gwiny no; gweda gwo gwina gwathibupe, ŋwakimiye. 51Titiganu, titiganu, nyi gwa gwacaijinu, Ada kwiji gwimamuthadha dhuŋuna dhiny, gwati gwaŋa aiuŋw gatur no. 52A Yahuud aicinu, Ŋinena anaŋa limaliŋa darnu ŋa gwuthi ŋurinya. Ibraahiim gwimai; a nebiŋa; ŋabarnu, Ada kwiji gwimamuthadha dhuŋuna dhiny, gwati gwaŋila aiuŋw gatur no. 53Au gwibuthanu di babo gwuri gwina gwan Ibraahiim, gwina gwimai a? a nebiŋa limai; au gwara gwagitini gwiren a? 54Al Yasuuⓐ aicinu, Ada nyi gwimamajidhini gi dhugor dhiny, a majdh gwiny gwati gwiro titiganu no; Babo gwiny gwiminy majidhe; gwina gwaranya gwai ŋeda gwiro Kalo galo. 55A gwoma gwati gwiliŋidhanya no; nyi biliŋa ada nyi gwina gwathii arnu gwati gwiliŋidhiny no, nyi gwaro ŋinena nyaŋa a gwidhuŋun; abi nyi gwiliŋidhi ŋeduŋw, a nyi mutha dhuŋuna dhuŋun. 56Babo gwalo gwan Ibraahiim gwiŋir dhugore daŋa lamun liny; ŋwaŋa, ŋwiŋir dhugore. 57A Yahuud abiŋaijo, alaici, Ŋa gwoma gwati gwuthi jidhileo dure‐ram‐a‐die nanaŋ no, ŋa baŋa Ibraahiimuŋw akwai? 58Al Yasuuⓐ aicinu, Titiganu, titiganu, nyi gwa gwacaijinu, Kwereny nanaŋ Ibraahiim gwati gwiliŋinu no, nyi gwijo. 59Aluthe nyolya alinyare nyalinyaice; abi Yasuuⓐ gilibini, ŋwutuya gi hekal ganu, ŋwela, ŋwutuya keligeny ganu degen, ŋwulmadhina.

Currently Selected:

Yuuẖanna 8: HBN

Highlight

Copy