Yuuẖanna 7

Yasuuⓐ a limegen luŋun

1A ma dhuŋun ibidhe erna a Yasuuⓐ elila galo Jaliil; ŋinena doinyuŋw delila galo Yahuudiiya, ŋinena ari gwa Yahuud rinya. 2Ŋidwa ŋa Yahuud ŋa Jutu ŋijo githo. 3A limegen aicinu, Abiro mina, ŋela Yahuudiiya, di ma calmiz juŋa aŋa ŋiro ko ŋina ŋathaŋal apai. 4Kwiji gweda gwate gwina gwathapai dhuŋuna nyim, ŋwubari ŋwaŋini no. Ada ŋa gwimapai dhuŋuna ibidha, tejinu galo gidhila. 5A ŋinena ko athathi limegen uminyu no. 6Al Yasuuⓐ aicinu, Lamun liny loma lati lidhi no; abi ŋwamun ŋwalo ŋwathije gigina. 7Gidhila gati guthi ŋoma gajidoinya no; abi gathi ginyidoinya, ŋinena riny shaahid gwa ŋiro ŋuŋun ŋina ŋike. 8Alidhul ŋidwa; nyi gwati gwalo nanaŋ kimure ibiga no; ŋinena athi lamun liny lidhi no. 9A dina muŋwulabiŋaijo dhuŋuna ibidha, ŋwunanaŋ je Jaliil. 10Abi dina ma limegen alo ŋidwa, a Yasuuⓐ alo ko nyim, athuŋw idhi ditir no. 11A Yahuud ileje gi ŋidwa, alarnu, Ŋeda gwada? 12A liji romaje diman galo gwoinyadho; a coŋ arnu, Ŋeda gwiŋir; a liter arnu, Oo, abi gwathukinejo lijo ganu. 13Abi kwiji gwate gweta gwina gwabiŋudhi dugun ditir no, ŋinena dhenyilo Yahuud.

Yasuuⓐ gwalimiyo gi Urushaliim, ŋwarnu gwidhi di Kalo

14Abi keligeny ganu ŋwamun ŋwa ŋidwa a Yasuuⓐ alo gi hekal, ŋwulalimiye. 15A Yahuud ali galo dir, alarnu, Kwiji ibigwa gwiliŋidhi jitham na? ŋinena gwati gwaliminu no. 16Al Yasuuⓐ aicinu, Alimiye gwiny gwati gwiro gwiny no, ŋwubiro gwa ŋeda gwina gwukejiny. 17Ada kwiji gweda gwimaro gwapai bupuŋw gwuŋun, gwaji gwaliŋa taⓐliim, ada dhimaro dha Kalo, i ada nyi gwimabiŋa gi dhugor dhiny. 18Gwina gwathabiŋi gi dhugor dhuŋun gwathibupe majdh gwuŋun; abi gwina gwathibupe majdh gwa ŋeda gwina gwukejo, gwathabiŋi dhuŋuna dhina dhiro titiganu, athuŋw uthi ŋwujimiya no. 19Muusa gwati gwidhedhaje naamuus na? abi gwati gweda dagalo gwathuthejo naamuus kuni no. Kworaŋ nyabi bupe dinyil rinya? 20A liji aicinu, Ŋa gwuthi ŋurinya. Ei gwiro gwina gwara gwaŋarinya? 21Al Yasuuⓐ abiŋaijo, ŋwulaici, Nyi gwimapai ŋiro ŋeta ŋaji ŋai alije galo dir peth. 22Gi dhuŋun ibidha Muusa gwidhedhaje dhuŋuna dha dhurtedhini; (dhati dhiro dha Muusa no, ŋwubiro dha baboŋa;) abi gi lamun la Sabith nyaŋa lathura kwijo. 23Ada kwiji gwimuminyi duredhini gi lamun la Sabith, a naamuus gwa Muusa gwati gwakini no; nyilbi kijo dugore ŋinena getiny kwijo momaŋ gi lamun la Sabith a? 24Athanyan akimaijajo ganu no, nyabakimiye gi dhuŋun dhina dhathau.

25A la Urushaliim coŋ arnu, Gwati gwiro ibigwa gwina gwaril gwai nu gwalrinya na? 26Aŋadhul, ŋeda gwabiŋu ditir, athilabiŋaijo dhuŋuna dhetipo dugun no. Leleny liliŋidhi momaŋ darnu gwiro al Masiiẖ titiganu a? 27Abi anaŋa liliŋidhi kaloŋa gina gidhina kwiji ibigwa; abi maji ma al Masiiẖ ila, kwiji gwati gweda gwina gwiliŋidhi kaloŋa gina gidhuŋwuna no. 28Dina alimiye Yasuuⓐ gi hekal, ŋwabiŋi gwuleny, ŋwulaici, Nyaŋa liliŋidhiny, nyaliŋa ko kaloŋa gina gidhinyina; a nyi gwati gwidhi gi dhugor dhiny no, abi ŋeda gwina gwukejiny gwiro titiganu gwina gwati gwiliŋidhanya no. 29Abi nyi gwiliŋidhi ŋeduŋw; ŋinena idhiny dugun, a ŋeda gwukejiny. 30Albupe alari gwalmutha; athibi kwiji gweda muthi doi dai no, ŋinena athi saaⓐa juŋun idhi no. 31A liji loinyadho uminyi, alarnu, Maji ma al Masiiẖ ila, ŋwapai ŋiro ŋoinyadhanu gi ŋiro ibiŋa ŋina ŋipiŋipa ŋina ŋapilo kwiji ibigwa a? 32Dina ma Farriisiyiin diŋini darnu liji limaromaje Yasuuⓐuŋw diman galo minoŋ; a Farriisiyiin a leleny la gusus ukeje gadham dilmutha. 33Al Yasuuⓐ aicinu, Alaje nanaŋ gwitiny, a nyi gwaji gwela di ŋeda gwina gwukejiny. 34A nyaŋa laji linyibupe, a nyaŋa lati linyibuje no; a kalo gina ginyinje, nyaŋa lati luthi ŋoma lila no. 35A Yahuud abiŋaijiye, alarnu, Gwara gwela na, athilbuthi ŋoma gwalbuje no? Gwara gwela gi liji lina limabai galo gi Liumam, dalimiye Liumam a? 36Dhuŋun dhiro dhaŋ dhina dharuŋw dhinu, Nyaŋa laji linyibupe, a nyaŋa lati linyibuje no; a kalo gina ginyinje, nyaŋa lati luthi ŋoma lila no?

Ŋau ŋimidho

37Gi lamun la gidon lina liro lamun lipa la ŋidwa, a Yasuuⓐ dhuna, ŋwure gwula, ŋwarnu, Ada kwiji gweta gima odha eny, abrico ŋwila diginy, ŋwiye. 38Gwina gwiny uminyi, gwiro ŋinena abiŋina kitham, ŋau ŋina ŋimidho ŋaji ŋire kari ganu guŋun. 39(Ŋwubabiŋa gi Dhigirim dhina dhaji dhuŋwuldhedha lina luminyu; ŋinena athi Dhigirim dhina Dhiŋir dhedhinu degen no; ŋinena athi Yasuuⓐ majidhinu nanaŋ no). 40A ma liji loinyadho diŋini dhuŋuna ibidhe, alarnu, Titiganu ibigwa gwiro nebi. 41A liter arnu, Al Masiiẖ gwiro ibigwa, abi liter arnu, al Masiiẖ gwaji gwila Jaliil a? 42Kitham gati gabiŋu darnu al Masiiẖ gwiro ŋwulaŋ ŋwa Daawud, ŋwuliŋini gi len lan Betlaẖm lina lijina Daawud na? 43A liji lagaje dhuŋuna ganu gi dhuŋun dhuŋun. 44A coŋ ari gwalmutha; athibi gweta muthi doi dai no. 45A jadham ela gi leleny la gususŋa Farriisiyiin ŋalai; alabiŋaijo, alaici, Kworaŋ athanyabi udhi no? 46A jadham aicinu, Kwiji gwati gweta gwina gwabiŋu gwiro ŋinena kwiji ibigwa no. 47Al Farriisiyiin aicinu, Nyaŋa ko lakinejinu ganu a? 48Leleny i Farriisiyiin gwuminyulo a? 49Abi liji ibila lina lati liliŋidhi naamuus no aldunyini. 50A Niiguudiimuus, (gwina gwidhi di Yasuuⓐ gile, gwiro gweta degen,) ŋwulaicinu, 51Naamuus gwega gwati gwathakimiye kwijo gwina gwati gwimadiŋini kwereny, ŋwuliŋa dhuŋuna dhuŋun no, darnu gwapaŋa na? 52Alabiŋaijo, alaici, Ŋa gwati gwiro gwa Jaliil ko na? Bupo, ŋa datiŋa; nebi gwati gwitui Jaliil no. 53Athi kwiji gweta gweta ela dunu dugun.

Currently Selected:

Yuuẖanna 7: HBN

Highlight

Copy