Yuuẖanna 16

1Nyi gwimajabiŋaijo dhuŋuna ibidha, dathanya dikadhinu ganu no. 2Laji lajiteje por gi majaamiⓐ; ye, lamun laji lila lina laji lal kwiji gweda arnu ada gwimajirinya, gwupijo Kaloŋa ŋiro. 3A dhuŋun ibidha dhaji dhalapai dagalo, ŋinena athil liŋidhi Babuŋw, i nyi no. 4Abi nyi gwimajabiŋaijo dhuŋuna ibidha, a maji ma lamun ila, nyaŋa laŋidhani darnu dhabiŋaijaje. A dhuŋun ibidha dhati dhabiŋaijaje kwereny no, ŋinena jilo. 5Abi ŋinena nyi gwela di ŋeda gwina gwukejiny; a gwati gweda dagalo gwina gwarnu, Au gwela na? no. 6Abi ŋinena abiŋaijaje dhuŋuna ibidha, nyaŋa laka dugore gwuleny. 7Abi nyi gwa gwabiŋaijaje titiganu, ŋajaici, Gwiŋiranu dajilijo; abi ada nyi gwati gwimalo no, Gwimiri gwati gwuladha dagalo no; abi ada nyi gwimalo, a nyi gwaji gwukeja Gwimira dagalo. 8A maji muŋwula, gwathi gwaŋeŋira lijo la gidhila gi dhuŋun dhike, a gi dhuŋun dhiŋir, a ẖukm. 9Gi dhuŋun dhike, ŋinena athinyil uminyu no. 10A gi dhuŋun dhiŋir, ŋinena adhinyalo di Babo gwiny, a nyaŋa lati linyaŋa manaŋ no. 11Gi ẖukm, ŋinena kweleny gwa gidhila ibiga gwa gwakiminu. 12Nyi gwoma gwuthi dhuŋuna dhoinyadho dha dhajabiŋaijo, abi dhati dhuthi ŋoma dhanya ure ŋinena no. 13Abi maji ma Dhigirim dha dhuŋun dhina dhiro titiganu ula, dhaji dhajaŋajo dhuŋuna peth dhina dhiro titiganu; ŋinena athathuŋw abiŋudhi dugun no; abi dhuŋun peth dhina dhaji dhuŋwdiŋini dhaji dhuŋwabiŋi; a dhaji dhajaŋajo dhuŋuna dhina dhaji dhila. 14Ŋeda gwaji gwiny majidhe; ŋinena adhuŋw aji ŋwapai dhuŋuna dhiny, a dhaji dhajaŋajo. 15Dhuŋun peth dhina dhuthi Babo dhiny dhiro; ŋinena arinyina gwaji gwapai dhuŋuna dhiny, a dhaji dhajaŋajo. 16Gwaji gwitiny, a nyaŋa lati linyaŋa manaŋ no; a gwaji gwitiny manaŋ, a nyaŋa laji linyaŋa, ŋinena adhinyalo di Babo. 17A calmiz juŋun coŋ abiŋaijiye, alarnu, Aŋ bigwiro ibigwe gwaicijigwainu, Gwaji gwitiny, a nyaŋa lati linyaŋa no; a gwaji gwitiny manaŋ, a nyaŋa laji linyaŋa, ŋinena adhinyalo di Babo?

Dhuŋun dhan jil galo liŋir

18Alabiŋi, alarnu, Aŋ gwiro ibigwa gwan gwaji gwitiny, gwina gwabiŋadhuŋwuna? Alŋa lati luthi ŋoma laliŋa darnu gwabiŋudhi kaŋ no. 19Abi Yasuuⓐ liŋa darnu gwara gwalothaijo galo, ŋwulabiŋaijo, ŋwulaici, Nyaŋa lothaijiyo galo gi dhuŋun dhina dhabiŋiny nyare, Gwaji gwitiny, a nyaŋa lati linyaŋa no; a gwaji gwitiny manaŋ, a nyaŋa linyaŋa a? 20Titiganu, titiganu, nyi gwa gwacaijinu, Nyaŋa laji lare a laruni, abi liji la gidhila laji liŋir dugore; nyaŋa laji lake dugore, abi dhuŋun dhalo dha dhike dugore dhaji dhurle galo a dharo dha dhiŋir dugore. 21Mathi ŋari enya kwaio gweta, ŋwuka dhugore, ŋinena idhi saaⓐa juŋun ja dhiliŋa; abi maji muŋwliŋa ŋare, athuŋw aŋidhanu ŋiya manaŋ no, ŋwubiŋir dhugore ŋinena ma ŋari liŋini kidhila. 22A ŋinena ko nyaŋa lirunu; abi nyi gwaji gwajaŋa manaŋ, a nyaŋa laji liŋir dugore, a dhuŋun dhalo dha dhiŋir dugore dhati dhaji kwiji gweda wala dagalo no. 23A gi lamun ibile nyaŋa lati linyothaije galo dhuŋun dhai dheda no. Titiganu, titiganu, nyi gwa gwacaijinu, Dhuŋun peth dhina dhaji dhanya dhothaije Babuŋw galo gi jiriny jiny, dhaji dhajidhedha. 24Ro kwereny a di ŋinena nyaŋa lati limuthe galo dhuŋun dhai dheda gi jiriny jiny no. Uthul galo, danya apai, a nyaŋa liŋir dugore gwuleny.

25Nyi gwabiŋaijaje dhuŋuna ibidha odaije gwai; abi lamun laji lila lina lati laji lal odaije no, abi nyi gwajaŋiye momaŋ di Babo. 26Gi lamun ibile nyaŋa luthe galo gi jiriny jiny; a nyi gwati gwabiŋaijaje darnu nyi gwothaije Babuŋw galo nyaŋa lai no. 27Babo gwiren gwuminyaje, ŋinena uminyinyilo, a nyuminyi darnu nyi gwidhi di Kalo. 28Nyi gwidhi di Babo, a nyiludha kidhila; a ko nyi gwagathani gidhileo, nyalo di Babo. 29A calmiz juŋun abiŋaijo, alaici, Ŋa gwimiji abiŋaijo ditir ŋinena, abi ŋa gwati gwabiŋu odaije gwai gwetipo no. 30Ŋinena anaŋa limaliŋa momaŋ darnu ŋa gwiliŋidhi dhuŋuna peth, dhati dhiro ŋoma daŋa kwiji othaije galo no; abi anaŋa luminyu dhuŋuna ibidha darnu ŋa gwitui di Kalo. 31A Yasuuⓐ aicinu, Nyaŋa limuminyi ŋinena a? 32Aŋadhul, saaⓐa jaji jila, ye, a jo ŋinena a nyaŋa laji labai galo, a gweta gweta gwela ŋidi ŋuŋun, a nyaŋa liny gathani cucun; abi nyi gwati gwajalo cucun no, ŋinena jina Babo gwai. 33Nyi gwabiŋaijaje dhuŋuna ibidha, a nyaŋa luthi audhaijiyuŋw galo diginy. Manyaje kidhila liji laji lajin dhagirini; abi iŋiriyul dugore; nyi gwimadhinyi gidhileo.

Currently Selected:

Yuuẖanna 16: HBN

Highlight

Copy