Markut 15

Ba nat bu Yesu di Bilatut

(Matta 27:1-2, 11-14; Luka 23:1-5; Yohana 18:28-38)

1Ka̱ntson a̱ wo tat, ba̱cecet ba̱gado Ka̱za ba a̱ tung bu ba̱malam truwang ba, bu ba̱nekwo ba, a̱ rop ka̱nu a̱ rop Yesu a̱ nat ba̱ nu a̱ si wrak Bilatut, 2Bilatut a̱ ku zzim a̱ hywa, “Nwan a̱mi yet a̱gwam ba̱nyet Yahuda nu oo?”

Yesu a̱ hywa, “Iii. Da̱ ni an hywa ni.”

3Ba̱gado Ka̱za ba a̱ bvei diraa a̱ twang nkyang ba̱gingang di Yesu a̱ yya. 4Bilatut a̱ bo zzim Yesu, a̱ hywa, “A hok nkyang a ba ryat tazwa nwan ka ni ee? An byyi kyang hywaa?”

5Yesu a̱ rak krang a. Bilatut a̱ yya ka̱hat ba̱gingang.

Ba yya Yesu shirya dikwu

(Matta 27:15-26; Luka 23:13-25; Yohana 18:39--19:16)

6Kozan ka̱ram dihywa Swrap wwon ba̱nyet ba a̱ na tssa a̱neyring ka̱yat ba̱nyet ka a̱ shyi an jaru ni a̱ tyyi Bilatut a̱ ku byyik a̱ wwon. 7Ka̱ram iya Barabbat bu ba̱yanyet ba shyi a jaru, ba yin hywat a̱yin ka̱ram jyi. 8Ba̱nyet ba a̱ tung a̱ naai Bilatut na̱ ba̱ byyik a̱neyring a̱ wwon. 9Na̱ ba̱ zzim a̱ hywa, “Yi cat n ya byyik a̱gwam ba̱nyet Yahuda nu o?” 10A̱ bvwo ba̱cecet ba̱gado Ka̱za ba a̱ ba di Yesu da̱ nu rot ba rak ku ryi.

11Ma ba̱cecet ba̱gado Ka̱za ba a̱ hwwut ba̱nyet ba di ba tyyi Bilatut a̱ kai Barabbat a̱ wwon, a̱ breng Yesu. 12Bilatut a̱ bo zzim ba̱nyet ba a̱ hywa, “To, a̱nzan yi cat n yya ba̱ a̱tuba nu yin yei a̱gwam ba̱nyet Yahuda nu ni?”

13Ba krok nkun a̱ hywa, “Ku kpang di nkusa tazwa ka̱teyang na̱ kwu.”

14Bilatut a̱ zzim, “Hok a̱nzan? A̱nzan a̱ka̱tuk nkyang na̱ yya?”

Ba bo krok nkun na na ra̱u ka̱son ka, a̱ hywa, “Nwan dai ku kpang i ka̱teyang na̱ kwu!”

15Rot Bilatut a̱ cat ba̱nyet a̱ ku gwai, a̱ kai Barabbat a̱ wwon. Wwon a̱ tyyi ba tsot Yesu da̱ a̱yo a̱ si tyyi ba ku pyyem a̱ si ku kpang di nkusa tazwa ka̱teyang.

Nsoja na mai Yesu

(Matta 27:27-31; Yohana 19:2-3)

16Wwon nsoja na i nwa ba̱ nu ka̱yat ka̱ryi a̱gwam ka, a̱ si tung kpikpit nsoja na. 17Ba ku kup a̱gba̱dang a̱tro a̱ bvei shong a̱ bvei ryi dindying. Wwon a̱ bvwa a̱shyim a̱n cyik rawoni a̱ ku yyak i diccu ti. 18A̱n nwa ku byei a̱ yya, “Ka̱za wwon sso, A̱gwam ba̱nyet Yahuda.” 19Ba ku tsot di shan diccu, a̱ ku tang ba̱ncwwa, a̱ ta̱gbok a̱ta̱ssi nu. 20Ba bu tyak ku zzang a a̱ kruk a̱gba̱dang a̱tro nu, a̱ brek di ba̱tro nu ba a̱ ku kup i, a̱ drok ba̱ nu a̱ naat a̱ si ku hywat tazwa ka̱teyang ka.

Ba teyang Yesu tazwa ka̱teyang

(Matta 27:32-44; Luka 23:26-43; Yohana 19:17-27)

21Ba shyi i ka̱cyet a̱ si mon ba̱ a̱yanyet na̱ nyyai ka̱bankrang ka̱yaan a̱ naat Urushalima. Ba ku gwwak na̱ cot ka̱teyang na. Ba ku yei Siman, a̱ntyok Kurane, a̱tyyi ba̱nyet Alezanda bu Rufat. 22Ba nat bu Yesu ka̱bvwa ka̱yaan ban yei Golgota, nka a̱ yet ka̱bvwa diccu. 23Ba si ku jyet nkwwa kyyai bu dikan ti yaan, ban ta̱ yei Mur, na̱ rak sswa na. 24Ba ku teyang tazwa ka̱teyang ka a̱ tung ba̱tro nu ba a̱n ta gyai a̱ ryi a̱nyyi nu koyan na̱ ni shya ni. 25Ba yin ku teyang tazwa ka̱teyang ka da̱ni di tswam a̱kumbvuyring a̱ta̱ntson ni. 26Ba jem tazwa ka̱teyang ka, “A̱gwam ba̱nyet Yahuda.” 27A̱ hywaai ba̱tang ba̱hwa tazwa ka̱teyang ka ndung ba̱ nu, a̱tuba yring an bvak yak, a̱yring an bvak myin. ( 28Ku cong ba ba̱ cicrak bu kyang a ba̱ryat Ka̱za ba hywa ni, “Ba ni ku mon bu ba̱tang.”)

29Koyan a̱ seyak a̱zi ryen ka a̱ kak diccu, a̱ ku mai, a̱ hywa, “Wwai, dyi a̱yin nu a̱ hywa da̱ a̱ ni hwwei bat Ka̱za na a̱ nok ka̱yat nom tat ni. 30Da̱ kyrek nyyai tazwa ka̱teyang ka, i yen san diccu nwan!”

31Ba̱cecet ba̱gado Ka̱za ba bu ba̱malam truwang ba a̱ ku yya ryihywat, a̱ ku mai a̱ yya, “A̱ wa san ba̱yanyet, ma a̱ rat san diccu nu. 32Zi cat i ryi Kristi nu, a̱tuba nu a̱ yet a̱gwam ba̱nyet Yahuda nu ni, na̱ kyrek tazwa ka̱teyang ka zi gi ku ryi ndya njit a!” Ba̱tang iya ba̱mba ba̱hwa a̱ ma̱n nwa ku pfwei.

Dikwu Yesu

(Matta 27:45-56; Luka 23:44-49; Yohana 19:28-30)

33A̱katyyi a̱ta̱nom ka̱bvwa ka a̱ kwwat ryin sa̱rei ka̱byen ka hat tswam tsat. 34Tswam tsat ji zi bu yya Yesu a̱ yrek diwan tazwa a̱ hywa, “Eli, Eli, lama sabaktani!” Nkpa yet, “Ka̱za nzuk, Ka̱za nzuk, a̱nzan a̱n byyi a ni n dak wwon?”

35Ba̱nyet ba a̱ sseng ka̱rek ka ni a̱ hok a̱ hywa, “Yi hok, a̱ yei Iliya!” 36A̱tuba a̱yring a̱ tyong ncyi a̱ si sook a̱soso a̱ ssuk a nkwwa a̱ rop an shan a̱ ku neyak i ka̱nu, a̱ hywa, “Zi ni yen dyi ki Iliya a̱ bai a̱ bu ku kyrek tazwa ka̱teyang ka.”

37Yesu a̱ yrek diwan ba̱ ntazwa a̱ si kwu.

38Labule na shyi i bat Ka̱za na ni i tra nyyai ntazwa si kpang ka̱tak. 39A̱tuba nu a̱ yet a̱gba̱dang nsoja nu a̱ sseng ka̱bvwa ka ni a̱ ryi ka̱sak ka Yesu na̱n shek sso ji a̱ kwu ni, a̱ hywa, “Ka̱ryong a̱mi, a̱yin a̱ni a̱ yet ka̱won Ka̱za!”

40Ba̱nyring ba̱yaan ma a̱ sseng gba̱gbang a̱ ku cyang. Ba̱nyet Maryamu Magadaliya bu Maryamu, a̱naa cincong-Yakubu bu Yosi, bu Salomi a̱ shyi ba̱ mba. 41Mba a̱mi a̱ shyi ba̱ nu nyyai ka̱byen Galili a̱ ku yya mpfong. Ba̱nyring ba̱yaan ba a̱n shyi ni ba ma̱ yin cong ba̱ nu a̱ ba Urushalima nu.

Ba nyat Yesu

(Matta 27:57-61; Luka 23:50-56; Yohana 19:38-42)

42Ka̱jenshring a̱ bu yya ka̱tuk jyi nkyangya Swrap wwon ka; ka̱ntson a̱ wo tat ba shya nom pfwi. 43Yusufu, a̱ntyok Arimatiya, a̱ nyyai a̱ ba. A̱ shyi i ba̱cecet ba̱nyet Yahuda ba. Ba̱nyet ba̱gingang a̱ pfong ansham nu, na̱ bo tot Dityok Ka̱za ti. Na̱ gbung rya a̱ nat di Bilatut a̱ si naai na̱ ku ryok na̱ sook kom Yesu na. 44Bilatut a̱ yya ka̱hat ba̱gingang Yesu na̱ ka̱n kwu a̱ yei a̱gba̱dang nsoja nu a̱ ku zzim, ki Yesu a̱ kwu nyyai gba̱gbang.

45Ba ku tyyei na̱ wwon Yusufu na̱ nat a̱ si sook kom Yesu na. 46Yusufu a̱ si san a̱jijyat a̱tro a̱ bu sook Yesu a̱n gat a̱ nat ba̱ nu a̱ si nyat i ryak a ba rung an kpang ni, wwon a̱ brek da̱ a̱gba̱dang kpang zaan a̱n kup ka̱nu ryak ka. 47Maryamu Magadaliya bu Maryamu a̱naa Yosi ba sseng a̱ cyang ka̱bvwa ka ban ku nyat i.

Currently Selected:

Markut 15: kaj

Highlight

Copy