Luka 8
8
Ba̱nyring ba a̱ yin cong bu Yesu ni
1Ba bu bvwa ka̱baram, Yesu a̱ drok a̱ nwai na̱nkrang bu na̱mankrang a̱ tyyei Ka̱sham Ba̱ryat ka tazwa Dityok Ka̱za. Ba̱pfong ba ba̱ mba swak bu ba̱hwa a̱ cong ba̱ nu. 2Ba̱nyring ba̱yaan ba a̱ ka̱n byyi a̱ka̱tuk tswa bu nhywu Yesu a̱ ba̱ trung i ni a̱ ma̱ yin ku tssup. Ba̱nyring ba a̱ yin cong ba̱ nu ni: Maryamu, ba bo ku yei Magadaliya, nu a̱mi Yesu na̱ yin tun a̱ka̱tuk tswa a̱tiyring a da̱ nu; 3bu Yuwana, a̱mbyring Kuza (Kuza a̱ yin yet wakili Hirudut); bu Sussana nta̱mak bu ba̱nyring ba̱yaan ba̱gingang. Ba kok nkyang a ba byyi ni a̱n brang Yesu bu na̱won pfong nu na.
A̱ntyok nai yak
(Matta 13:1-9; Markut 4:1-9)
4Ba̱nyet ba̱gingang a̱ hywei nyyai i na̱nkrang ba̱gingang a̱ cong di Yesu. Ba̱nyet ba̱gingang ba bu tung, Yesu a̱ ryat ba̱ mba a misali, a̱ hywa,
5“A̱yanyet a̱ nat nai zwa yak. Na̱ si shyi i nai a, tswa zaan i kwei a̱zi ryen; ba̱nyet a̱ shai a̱ swrap, na̱non a̱ nyyai a̱ bu tang. 6Zaan i kwei tazwa kukwak, i ta ma i kwi rot ba̱shekwot a̱ yin shyi ba. 7Zaan i kwei ka̱yat a̱shyim, i ta i rai ba̱cicrak ba̱ a̱shyim a. A̱shyim a a̱ hwwok nwrum yak a. 8Zaan i kwei a tsatsak ka̱byen, i ta, i rai, i bu sum tswa cyi-cyi.”
Na̱ bu tyak a̱ hywa da̱ mba, “A̱yin nu a̱ byyi a̱pfo ni na̱ hok ansham.”
Kyang a misalai ji zi yet i
(Matta 13:10-17; Markut 4:10-12)
9Na̱won pfong Yesu na a̱ ku zzim kyang a misali ji zi yet i. 10Yesu a̱ hywa da̱ mba, “Nyin a̱mi ba ya wwon yi bvwo kyang a shyi i dityok Ka̱za ti ni, ma kpikpit a ba ni ba̱ tyyei a misalai. Ba ni cyang di ba ni ryi a̱ bvwong ba, a̱ hok di ba ni hok a̱ bvwong ba.”
Yesu a̱ ba̱ tyyei kyang a misali ji zi yet i
(Matta 13:18-23; Markut 4:13-20)
11A̱ ba̱ tyyei a̱ hywa, “Kyang a misali ji zi yet ni ku na ni: Zwa yak ji nji yet ba̱ryat Ka̱za ba. 12Tswa ji kwei a̱zi ryen ka ni nji yet ba̱nyet ba a̱ hok ba̱ryat Ka̱za ba ni ma a̱gwam a̱ka̱tuk ntswa a̱ nyyai a̱ bu tun ba̱ryat ba a ndya mba, ba ga wi wrak Ka̱za ndya mba na a̱ shya sucet. 13Tswa ji kwei i kukwak a ni nji yet ba̱nyet ba a̱ hok ba̱ryat ba a̱ ba̱ san bu gwai ni, ma ba nwa ka̱yat ndya mba ka ba. Ba shim ba̱ryat ba, ma ka̱baram ba̱cincong ba brek riryim, ka̱ram ka ka̱bvung ka n ba̱ ba ni. 14Tswa ji kwei a a̱shyim a ni nji yet ba̱nyet ba a̱ hok ba̱ryat ba, ma a̱huhwa bu cat zwa bu shya-hwat ka̱sa nani i ba̱ hweyak ndya na, ba rai a̱ si tun ba. 15Tswa ji kwei a a̱tsatsak ka̱byen nu ni nji yet ba̱nyet ba a̱ hok ba̱ryat Ka̱za ba a̱ ba̱ san a̱ tyyi ka̱yat a̱tsatsak ndya mba ka, a̱ ya ka̱son bu ba̱ tssup se ba sin tyyi disum.”
Fitila ji ban tyyi rong ni
(Markut 4:21-25)
16A̱ bo hywa da̱ mba, “A̱yin a̱n shyi a̱ na tyyi rong a fitila a̱ sook ryei a̱n kup ba, ko na̱ sak a̱ta̱hwa a̱ngbrak; seko na̱ za̱ sak tazwa tebur, ba̱nyet ba a̱ nwai ni a̱ ga shya ka̱bvwa sai. 17Kozan kyang a shyi i nyat i ba ni wruk da̱ nkpa a̱ ba mi a̱za̱kpai, kyang a ba ma̱n cii a̱ tyyi ni ba ni kpo tyyang a̱ ba mi a̱ta̱sa.”
18A̱ bo hywa da̱ mba, “Se yi ta̱rwam bu ka̱sak ka yin pfong ni. A̱yin nu a̱ byyi ni, ba bo nin ku brang i; a̱yin nu a̱ sang ni, ka̱bacincong ka na̱ ryi na̱ byyi ni ba bo ni ka̱ san a̱ ku wwon.”
Ba̱wumbeyang Yesu ba̱ a̱naa nu nu a̱ ba da̱ nu
(Matta 12:46-50; Markut 3:31-35)
19A̱naa Yesu bu ba̱wumbeyang nu ba a̱ ba da̱ nu, ma a̱ bu shya diwat tat da̱ nu ba, rot ka̱tswa ba̱nyet ka a̱ yin da̱u. 20A̱yanyet a̱ hywa di Yesu, “A̱naa nwan nu bu ba̱wumbeyang nwan ba a̱ ba da̱ nwan; ba yemi a̱ sseng a̱ta̱sa.”
21Yesu a̱ hywa da̱ mba ba̱sa̱rei, “A̱naa nzuk u bu ba̱wumbeyang nzuk ba mba a̱ yet ba̱nyet ba a̱ pfong ba̱ryat Ka̱za ba a̱ bo ba̱ tssup ni.”
Yesu a̱ kam wun ku sseng
(Matta 8:23-27; Markut 4:35-41)
22Ka̱tuk ka̱yaan Yesu a̱ nwa kpongo bu na̱won pfong nu na, a̱ hywa da̱ mba, “Zi yen byyek nat ka̱ma̱nyyi ya ni.” Ba brak a̱ rot. 23Ba bu shyi i naat a, Yesu a̱ kpa nda. Wun i nwa hywap di cet ba̱t, kpongo nu na̱ jim, ba̱shekwot ba n nwai. Ba shyi ka̱nu dikwu. 24Na̱won pfong ba a̱ ba di Yesu a̱ bu ku shyek a̱ hywa, “Malam, malam. Zi hwan.”
Yesu a̱ ta̱za a̱ kam wun na bu ba̱shekwot ba. Wun na i pfwi hywap a, ba̱shekwot ba a̱ pfwi jim a. 25Yesu a̱ hywa di na̱won pfong a, “A̱nzan a̱n byyi yi wi ni n dyi ndya nyin na?”
Mba ba yya ka̱hat, ka̱wun a̱ bo ba̱ pyyem, ba hywa di ba̱yaan, “A̱nyan a̱nu ni, a̱ ma tssap wun bu ba̱shekwot ba ku pfong.”
Yesu a̱ creng a̱ntyok byyi a̱ka̱tuk tswa
(Matta 8:28-34; Markut 5:1-20)
26Yesu bu na̱won pfong nu na a̱ nwa kpongo nu a̱ byei a̱ naat ka̱ma̱nyyi ka̱byen Garisawa ka. Ba yin swat a̱ ya sak ka̱ssi bu kei ti nyyai ka̱byen Galili ni. 27Yesu na̱ kyrek a kpongo nu a̱ mon ba̱ a̱yanyet nyyai i ka̱nkrang na̱ shyi ba̱ a̱ka̱tuk tswa. A̱ ka̱n bvwa ka̱ram na̱ cong a̱n byyi ba̱tro ba. A̱ maai a̱ swat ka̱ryi ba, seko bu ka̱bvwa a̱byyi. 28Na̱ bu ryi Yesu a̱ tyyi kun tazwa a̱ kpa ka̱byen a̱ta̱ssi Yesu a̱ hywa da̱ nu, “Yesu Ka̱won A̱gba̱dang A̱gwam Ka̱za, a̱nzan a cat da̱ nzuk? N na̱ naai a ryok yya da̱ nzuk ba.” 29A̱ yin dyat a̱mi, rot Yesu a̱ yin tyyi a̱ka̱tuk tswa nu na̱ wruk i rwam nu na. Nkrang ba̱gingang a̱ka̱tuk tswa nu na̱ ku breng, ko ba yin ku rop mbvak ba̱ a̱tak di na̱sa̱rka̱ a̱ ku tyyi a̱ jaru ni, ki ba ku rop di na̱sa̱rka̱ na, ki a̱ka̱tuk tswa nu a̱ ku yrek, na̱ na̱ tsseng a̱ seyak a̱ kpa ka̱yit.
30Yesu a̱ ku zzim a̱ hywa “Ba na̱ yei a̱nyan?”
Na̱ hywa, “Ba n yei ‘Ka̱tswa’ ”, rot a̱ka̱tuk tswa shii ka̱tswa ka̱yat rwam nu ka. 31A̱ka̱tuk tswa nu a̱ naai Yesu na̱ ryok ba̱ nyying a̱ nat i a̱yabyen ba.
32Ka̱srong ba̱la̱de a̱ yin shyi i ba̱ya ka̱ yemi beyang ntsok. A̱ka̱tuk tswa nu a̱ naai Yesu na̱ ba̱ wwon ba nat a̱ si nwa ba̱la̱de ba. Na̱ ba̱ shim mi. 33Ba wruk da̱ a̱tuba a̱ywu a̱ si nwa ba̱la̱de ba, sa̱rei mba ba gbit a̱ si kwei i dudung ba̱shekwot a̱ kwi.
34Ba̱nyet a̱tsaai ba a̱ bu ryi a̱mi a̱ tyong a̱ si tyyei i ka̱nkrang ka bu na̱bvwa a̱keyak. 35Ba̱nyet ba a̱ gbit a̱ ba ryi kyang a yya ni. A̱ bu shya Yesu ba̱ a̱tuba nu a̱ yi yen byyi a̱ka̱tuk tswa nu ni na̱ swat a a̱tak Yesu na bu ba̱tro, rya na ku brek. Ba hok ka̱wun ba̱sa̱rei. 36Ba̱nyet ba a̱ bu ryi ni a̱ ma̱n tyyei ba̱yanyet ka̱sak ka Yesu na̱n creng a̱tuba a̱ywu ni. 37Sa̱rei ba̱nyet Garisawa ba a̱ tun Yesu na̱ drok, rot ba yin pfong ka̱wun ba̱gingang. Yesu a̱ drok a̱ si nwa kpongo nu a̱ ni nat. 38A̱tuba nu ba tun a̱ka̱tuk tswa nu i rwam nu na ni a̱ naai Yesu a̱ hywa, “N cat ba ba̱ nwan.”
Ma Yesu a̱ rak a̱ hywa, 39“Kaai, nat ka̱ryi si tyyei ba̱nyet ba kyang a Ka̱za ka na̱ yya mi ni.”
Na̱ ma̱n tat a̱ si nwai a̱ tyak ka̱nkrang ka a̱ ba̱ tyyei kyang a Yesu na̱ ku yya mi ni.
Yesu a̱ creng ka̱won ka̱neyang Yayirut
(Matta 9:18-26; Markut 5:21-43)
40Ka̱ram ka Yesu na̱n brek a̱ nat ka̱ma̱nyyi ka̱yring ka ni, ka̱tswa ba̱nyet ka a̱ si ku gwai ba̱t rot ba yin shyi i ku tot. 41A̱yanyet a̱ nyyai a̱ ba. Ba yin ku yei Yayirut. A̱ yin breng bat a̱duwa. Na̱ nyyai a̱ bu kpa a̱ta̱ssi Yesu a̱ ku naai na̱ nat ba̱ nu a gbang nu ka, 42rot a̱ yin byyi ka̱won ka̱neyang bu ka̱yring, hywu i ka̱ pyyem ka shyi i hwrang a̱ ni kwu. Ka yin yet a̱rya swak ba̱ hwa.
Yesu a̱ drok ka̱cyet ka ba̱nyet ba ku hwam ba̱ a̱zi gba̱gbang. 43A̱mbyring a̱yaan a̱ ma̱ yin shyi ka̱yat ba̱nyet ka a̱ yya hywu bvei mbvak; a̱rya swak ba̱ hwa na̱ sswa ka̱bvung. A̱ ka̱n hywat sa̱rei kyang a na̱ byyi ni i cong di ba̱bvok, ma a̱yin a̱ maai ku creng ba. 44Na̱ hwam ka̱yat ba̱nyet ka riryim Yesu a̱ bu byram gak a̱tro Yesu na ba̱sok ba a̱ sseng. 45Yesu a̱ zzim a̱ hywa, “A̱nyan a̱ n da?”
Koyan a̱ ton. Bitut a̱ hywa, “Malam, a ryi ba̱nyet ba ba na̱ hwam ba a?”
46Yesu a̱ hywa, “A̱yin a̱ n byram dei, rot n hok cet ku wruk da̱ nzuk.” 47A̱mbyring a̱ywu na̱ bu ryi ba hok kyang a na̱ yya ni a̱ bvwong, na̱ shot a̱ bu kpa a̱ta̱ssi Yesu a̱ trim. A̱ tyyei kyang a n byyi na̱n byram Yesu ni, a̱ bo tyyei ka̱sak ka na̱n creng bu i ka̱baram iya ni. 48Yesu a̱ hywa da̱ nu, “Ka̱won nzuk, wrak ka̱ryong nwan ka na̱ creng. Nat ka̱ryi bu rya nwan yring.”
49Yesu na̱ ri shyi i ba̱ryat ba, a̱yanyet a̱ nyyai a̱gbang Yayirut ka a̱ bu hywa da̱ nu, “Ka̱won nwan ka a̱ kwu, se a ryok Malam shinshwon.”
50Yesu a̱ hok a̱ hywa da̱ nu, “Ryok hok ka̱wun ba, n tyyi bu rya, ka̱won nwan ka a̱ ni creng.”
51Ba bu si nwa ka̱ryi ka, na̱ wwon a̱yin a̱ nwa ba̱ nu ka̱yat bat ka ba, seko bu Bitut bu Yohana bu Yakubu, nta̱mak ba̱ a̱tyyi ka̱won nu ba̱ a̱naa nu. 52Sa̱rei ba̱nyet ba ba shyi i ka̱nak a̱ tsot na̱hok mba na. Yesu a̱ hywa da̱ mba, “Yi ryok kun ba, ka kwu ba, ka shyi nda a̱mi.”
53Ba ku mai dimrang ryihywat, rot ba bvwo ka̱won ka a̱ kwu. 54Na̱ pyyem bvak nka na a̱ ka̱ yei a̱ hywa, “Ka̱neyang, ta̱za!” 55Bu i ka̱baram sso nka ji i brek, ka ta̱za a̱ swrang. Na̱ tyyi ba ka̱ ryi kyangya. 56Ba̱nyet ka̱won ba a̱ ma pyyem bu na̱nu. Ma Yesu a̱ ba̱ gbang ba ryok tyyei a̱yin ba.
Currently Selected:
Luka 8: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
