Luka 9
9
Yesu a̱ tom ba̱pfong nu ba swak bu ba̱hwa
(Matta 10:5-15; Markut 6:7-13)
1Yesu a̱ yei ba̱pfong nu ba swak bu ba̱hwa, a̱ ba̱ ryi cet, a̱ ba̱ tun ba si trung a̱ka̱tuk tswa a̱ creng ba̱nyet nhywu. 2A̱ ba̱ tom ba si yya wa'azi Ka̱sham Ba̱ryat Dityok Ka̱za ti, a̱ bo creng ba̱nyet nhywu. 3A̱ hywa da̱ mba, “Ki yi naat yi ryok sook kyang ba. Yi ryok sook shan ka̱cyet ba, da̱ nyin ba ni breng ka̱badoma ba, da̱ nyin ba ni breng kyangya ba, da̱ nyin ba ni breng krum ba, bam ba̱ a̱ntyok sook a̱tro a̱mba̱hwa. 4Ka̱bvwa ka ba sin ya san ni yi swat bu i ka̱ryi iya, se yi bu wwon ka̱nkrang ka. 5Ka̱bvwa ka ba ma̱ sin ya rak ni, yi wwon ka̱nkrang ka i zrup dibvuk a̱nyyan a̱byen nyin ti ba̱ krok i ti ba̱ yet shaida.”
6Ba̱pfong ba a̱ ma̱n drok a̱ nwai na̱mankrang a a̱ yya wa'azi Ka̱sham Ba̱ryat u, a̱ bo creng ba̱nyet nhywu koke.
Hirudut a̱ tyyi ba̱tai
(Matta 14:1-12; Markut 6:14-29)
7Hirudut na̱ yet a̱gwam Galili, a̱ hok nkhang sa̱rei nkyang a ba yya ni, na̱ tyyi ba̱tai. Rot ba̱yanyet a̱ yin hywa, “Yohana A̱yya Baptisma a̱mi, a̱ bo ta̱za nyyai a̱yabyen.” 8Ba̱yanyet a̱ hywa di Iliya a̱mi a̱ brek. Ba̱yanyet a̱ hywa da̱ a̱yanyet a̱mi ka̱yat ba̱nyet ba a̱ yin tyyei ba̱ryat Ka̱za ni a̱ ta̱za. 9Hirudut a̱ hywa, “N ka̱n tyyi ba tun diccu Yohana ti, to, a̱nyan n pfong ba riryat a ni?” Na̱n tyyi ka̱ssi a̱ shya Yesu a̱ ryi.
Yesu a̱ tssung ba̱ntyok ncyi nswak npfon
(Matta 14:13-21; Markut 6:30-44; Yohana 6:1-14)
10Ba̱pfong ba a̱ brek a̱ bu tyyei Yesu sa̱rei kyang a ba si yya ni. Na̱ ba̱ sook a̱za̱gbang a̱yring a̱ drok ba̱ mba a̱ nat ka̱nkrang ka̱yaan ban yei Baitsaida. 11Ka̱tswa ba̱nyet ka ba bu hok ka̱rek ka na̱n shyi ni, ba ku tssup a̱ nat ka̱ yemi. Na̱ si ba̱ gwai. A̱ ba̱ yya wa'azi Ka̱sham Ba̱ryat Dityok Ka̱za ti, a̱ creng ba̱nyet ba a̱ cat creng ni.
12Nom a ku bu kwei, ba̱pfong ba swak bu ba̱hwa a̱ ba di Yesu a̱ bu hywa, “Tun ba̱nyet bani ba nwa na̱mankrang a bu na̱sa ba̱keyak a̱ ga shya kyangya bu na̱bvwa kwai, rot ka̱yit a̱ nkaa ni.”
13Yesu a̱ hywa da̱ mba, “Nyin a̱mi ni ba̱ ryi kyang a ba ni ya ni.”
Ba hywa da̱ nu, “Sa̱rei kyang a zi byyi ni nkpa yet burodi pfon bu hwon ba̱ nji swa. A cat zi nat si kwei kyangya bu wrak ka̱tswa ba̱nyet kani e?” 14(Ba̱ntyok ba a̱ yin tat cyi kop tsson).
Yesu a̱ hywa di na̱won pfong nu na, “Yi tyyi ba̱nyet bani a̱ sswak i ba̱tswa nswak mpfo-pfon.”
15Na̱won pfong a a̱ tyyi sa̱rei mba ba swrang. 16Yesu a̱ sook burodi na ba̱ nkpa pfon nta̱mak bu hwon swa ji, a̱ cyang tazwa a̱ gwai Ka̱za mi. Wwon a̱ tra burodi na bu hwon ji a̱ wrak na̱won pfong nu na ba ka ba̱nyet ba. 17Sa̱rei mba ba ya a̱ swei, na̱won pfong a a̱ sook na̱nshang swak bu na̱hwa a̱n tung kpikpit a a̱ tyei a̱n hywaai.
Bitut a̱ tyyei kyang a Yesu na̱ yet i
(Matta 16:13-19; Markut 8:27-29)
18Ka̱ram ka̱yaan Yesu na̱ shyi i yya a̱duwa ba̱diyin, na̱won pfong nu na a̱ ba da̱ nu, na̱ bu ba̱ zzim a̱ hywa, “Ba̱nyet ba a̱ hywa da̱ nzuk n yet a̱nyan?”
19Ba hywa, “Ba̱yanyet a̱ hywa da̱ nwan i yet Yohana A̱yya Baptisma, ba̱yanyet a̱ na̱ yei Iliya, ba̱yanyet a̱ hywa da̱ a̱ntyok tyyei ba̱ryat Ka̱za nnyyai a̱yaan a̱mi a̱ ta̱za.”
20Yesu a̱ ba̱ zzim, “To, nyin hwa, yi n yei a̱nyan?”
Bitut a̱ hywa, “Nwan a̱mi yet Kristi, a̱tuba nu Ka̱za ka tom ni.”
Yesu a̱ tyyei ka̱sak ka na̱ nin sswa ka̱bvung ni
(Matta 16:20-28; Markut 8:30--9:1)
21Wwon Yesu a̱ ba̱ gbang ba ryok tyyei a̱yin ba. 22A̱ bo hywa da̱ mba, “Ka̱won A̱neywu a̱ ni sswa ka̱bvung ba̱t, ba̱nekwo bu ba̱cecet ba̱gado Ka̱za bu ba̱malam Truwang a̱ ku rak. Ba ni ku hywat, ma ka̱yat nom a̱mba̱tat na̱ bo ta̱za.”
23A̱ bo hywa da̱ mba sa̱rei, “A̱yin nu a̱ cat ba ba̱ nzuk ni na̱ jing diccu nu a̱ cot ka̱teyang nu kozan ka̱tuk a̱ n tssup. 24Rot a̱yin nu a̱ kwan zwang san diccu nu ni a̱ ni hwan, ma a̱yin nu a̱ jing sso nu a̱zi hywak nzuk ni nu a̱mi a̱ ni kaat. 25A̱nzan kyang a̱yin na̱ ni shya ki a̱ shya ka̱sa ka sa̱rei, ma a̱ wai sucet nu na? 26A̱yin nu a̱ pfong nsum ya yei a̱nzuuk ni, a̱ bo a̱ pfong nsum san ba̱ryat nzuk ba ni, nzuk meyang Ka̱won A̱neywu a̱ ma̱n ni hok nsum ku yei a̱nzuuk ka̱ram ka n nin nwa i dityok ti ti yet tinzuuk bu A̱tyyi nzuk bu ba̱pfong Ka̱za nu ba ni. 27Yi ryok n ya tyyei ka̱ryong: ba̱nyet a̱n shyi kyi a̱ ni kwi ba, se ba ryi Dityok Ka̱za ti.”
Yesu a̱ brak ryi nu na
(Matta 17:1-8; Markut 9:2-8)
28Yesu na̱ ka̱n dyat a̱mi, wwon ba yya da̱ni di nom a̱ninai ni, Yesu a̱ nat bu Bitut bu Yohana bu Yakubu, ba wrak a̱ nat yya a̱duwa a̱za̱n tsok. 29Yesu na̱ bu shyi i yya a̱duwa nu, a̱ssi nu na a̱ brak, ba̱tro nu ba a̱ sai a̱ ya a̱ssi ba̱kinkyai. 30-31Bu i ka̱baram ba ryi ba̱yanyet ba̱ mba ba̱hwa ka̱yat ndwam da̱ra̱ja, Musa bu Iliya, ba ryat ba̱ nu. Ba yin shyi i ryat ba̱ nu ka̱sak ka na̱n naat Urushalima a̱ si kwu a̱ ga tyak kyang a Ka̱za ka yin dyat a̱ sak ni. 32Ka̱ram iya Bitut bu ba̱nyet ka̱cyet nu ba ba shyi nda. Ba bu shyek a̱ ryi da̱ra̱ja Yesu na bu ba̱nyet ba̱hwa iya ba sseng ba̱ nu. 33Ba̱nyet iya ba bu bvwot a̱ wwon Yesu, Bitut a̱ hywa, “Malam, zi hok ansham shyi na kyi. Se zi yya mbvut ba̱na ntat: nwan yring, Musa yring, Iliya yring.” (Ma a̱ yin bvwo kyang a na̱ ryat i ba).
34Nyyai na̱ ri shyi i ba̱ryat ba, a̱ninyyan a̱ nyyai a̱ bu ba̱ kup, ba̱pfong ba a̱ hok ka̱wun ka̱ram ka a̱ninyyan na na yin ba̱ kup i. 35Ba hok diwan nyyai a ninyyan na ti hywa da̱ mba, “Ka̱won nzuk ka n ka̱n tssa ni kankaa ni. Yi ka̱ pfong.”
36Diwan ti ti bu tyak ba̱ryat ba, ba ryi Yesu ba̱diyin. Ba̱pfong ba a̱ swat ba̱nyong, ba tyyei a̱yin ka̱ram iya kyang a ba ryi ni ba.
Yesu a̱ creng ka̱bawon ka a̱ byyi a̱ka̱tuk tswa ni
(Matta 17:14-18; Markut 9:14-27)
37Ka̱ntson a̱ wo tat ba kyrek nyyai tazwa ntsok ka, a̱ si mon bu ba̱nyet ba̱gingang. 38A̱yanyet ka̱yat ka̱tswa ka a̱ yrek diwan nu ti a̱ hywa, “Malam, ki a shim a n cyang i cyang ka̱won kani, ba̱ nu a̱ yet ka̱won nzuk ka. 39A̱ka̱tuk tswa a̱ na mak-mak a̱ ku tswang na̱ tyei nkun, a̱ na ku ta̱kpei, rwam a i nwa trim, na̱ nwa tuu shefwi ka̱nu. Se na̱ ku breng a̱ ku bvei se rwan bu rwan, a̱ sin ku kaai a̱ wwon. 40N naai na̱won pfong nwan na ba ku nyying da̱ nu, na̱ ba̱ kaat.”
41Yesu a̱ hywa da̱ mba, “A̱nzan taka̱i ba̱nyet sang ntyyi rya bu ba̱nyet a̱ka̱tuk a̱huhwa yi yet? A̱nzan ka̱ram n nin swat n shyi bu ba̱ nyin? A̱nzan ka̱ram n nin yya hakuri ba̱ nyin?” Wwon a̱ hywa da̱ a̱tyyi nu, “Ba bu ka̱won ka kyi.”
42Ka̱won ka ka bu drok a̱ bai di Yesu, a̱ka̱tuk tswa nu a̱ ku sook a̱ mak ka̱byen na̱ trim. Yesu a̱ kam a̱ka̱tuk tswa nu a̱ creng ka̱won ka a̱ ka̱ brek a̱ wrak a̱tyyi nu. 43Ba̱nyet ba a̱ ma pyyem bu na̱nu rot ba ryi cet Ka̱za.
Yesu a̱ bo tyyei ka̱sak ka na̱ nin kwu ni
(Matta 17:22-23; Markut 9:30-32)
Ba̱nyet ba ba shyi i yya ka̱hat nkyang ji na̱ yya ni, na̱ hywa di na̱won pfong nu na, 44“Yi san ba̱ryat bani n ka̱n ya tyyei ni sak ansham. Ba ni pyyem Ka̱won A̱neywu a̱ tyyi an bvak ba̱nyet cet.” 45Ma ba bvwo kyang a na̱ ryat i ba; ku yin ba̱ shyi i ka̱nrang, ma ba pfong ka̱wun ku zzim ka.
A̱nyan a̱ yet a̱kpok u?
(Matta 18:1-5; Markut 9:33-37)
46Na̱won pfong Yesu na a̱ nwa a̱cecet a̱za̱ a̱yin nu a̱ ni yet a̱kpok ka̱yat mba ni. 47Yesu a̱ bvwo kyang a ba hwa ni a̱ kwwat ka̱bawon a̱ sseng i a̱ta̱ssi nu ka, 48a̱ hywa da̱ mba, “A̱yin nu a̱ gwai ka̱bawon di ka̱nkani ni nzuk a̱mi na̱ gwai. A̱yin nu a̱ n gwai ni a̱ gwai a̱tuba nu a̱ n tom ni. Rot a̱tuba nu yi ryi da̱ nu a̱ yet ka̱baan ka sa̱rei ka̱yat nyin ni, nu a̱mi a̱ yet a̱kpok u sa̱rei.”
A̱yin nu a̱ yya dira̱ndwan ba̱ nyin ni ba a̱ shyi ba̱ nyin
(Markut 9:38-40)
49Yohana a̱ yrek diwan a̱ hywa, “Malam, zi ryi a̱yanyet na̱ nyying a̱ka̱tuk tswa i diyrek nwan, zi ku tyyei na̱ ryok rot a̱ shyi ba̱ njit ba.”
50Yesu a̱ hywa da̱ nu bu kpikpit na̱won pfong a, “Yi ryok n ku bvwo ba, rot a̱yin nu a̱ yya dira̱ndwan ba̱ nyin ni ba a̱ shyi ba̱ nyin.”
Ba rak Yesu i ka̱bankrang ka̱yaan i ka̱byen Samariya
51Nnom a na bu bvat ba̱cincong bu ka̱ram ka ba nin nat bu Yesu Tazwa ni, na̱ rop a̱ pyyem ryen a̱ naat Urushalima. 52Na̱ tun na̱won pfong ba kwwat ka̱son nu a̱ nat ka̱bankrang ka̱yaan i ka̱byen Samariya ba si ku jyi ka̱bvwa nwa. 53Ma ba̱nyet ka̱bankrang ba a̱ si rak ku san na, rot ba yin bvwo ba̱zizrak a̱ naat Urushalima. 54Na̱won pfong na̱hwa nu, Yohana bu Yakubu, ba bu ryi a̱mi ni a̱ hywa di Yesu, “Malam, a cat zi yei rong nyyai Tazwa ku bu ba̱ hwwi o?”
55Yesu a̱ brak a̱ ba̱ kam, 56ba seyak a̱ nat ka̱bankrang ka̱yaan.
Ba̱nyet ba a̱ maai tssup Yesu ni
(Matta 8:19-22)
57Ba shyi i ka̱cyet ka, a̱yanyet a̱ hywa di Yesu, “N ni na̱ tssup koke a nat.” 58Yesu a̱ hywa da̱ nu, “Na̱kyeng a̱ byyi a̱bvong, na̱non a̱ byyi na̱sa, ma nzuk Ka̱won A̱neywu n byyi ka̱rek myyi diccu ba.”
59A̱ hywa da̱ a̱yanyet, “N tssup.” A̱tuba a̱ywu a̱ hywa, “Malam, yen dyok n ye nat n si nyat a̱tyyi nzuk n brek.” 60Yesu a̱ hywa, “Ryok ba̱nyet ba a̱ ryi di nkom ni a̱ nyyak nkom mba na. Nwan a nat si yya wa'azi Dityok Ka̱za.”
61A̱yanyet a̱ bo hywa da̱ nu, “Malam, n ni na̱ tssup, ma yen dyok n nat si byyek ba̱nyet ka̱ryi nzuk ba sak.” 62Yesu a̱ hywa, “A̱yin nu a̱ nwa keyak a̱ bvan a̱ cyang riryim ni a̱ byyi kpungtun i Dityok Ka̱za ti ba.”
Currently Selected:
Luka 9: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
