Luka 10
10
Yesu a̱ tom ba̱pfong nswak a̱tiyring
1Ka̱ram iya ka bu seyak, A̱gwam Yesu a̱ tssa ba̱yanyet ba̱ mba nswak a̱tiyring a̱ ba̱ tom ba̱hwahwa, ba kwwat ka̱son nu a̱ nwa kozan ka̱nkrang a na̱ nin nwa ni. 2A̱ hywa da̱ mba, “Yak a ba̱gingang a̱za̱n kei maai ni yya, ma ba̱nyet yya ba a̱ shii ka̱tswa ba. Yi naai a̱ntyok byyi yak u na̱ tom di ba̱nyet ba yya yak a. 3Yi nat n ya tssop di bvon-tsaap ka̱yat na̱bvwu a̱yit i. 4Yi ryok sook a̱doma nkrum ba, ko a̱doma naai ko a̱kpatak. Yi ryok sseng a̱zi ryen i byei ba̱ a̱yin ba. 5Koke yi sin nwa, yi byyek ka̱ryi ka, i hywa ‘Sa̱la̱ma nyin, ba̱nyet ka̱ryi!’ 6Ki a̱ntyok cat tsswa nda a̱n shyi ka̱ryi iya, yi ryok byet nyin na i swrang ba̱ nu; ka̱ a̱mi ba, yi brek bu byet tsswa nda nyin na. 7Bu ka̱ryi iya yi nin swat, i ya, i bu sswa sa̱rei kyang a ba shya a̱ ya ryi ni, rot a̱ntyok mpfong a̱ maai ba ku tan. Yi ryok nwai na̱sa swrap ba. 8Ki yi si nwa i ka̱nkrang ba ya gwai, bu kyang a ba ya ryi ni yi ya. 9Yi creng ba̱nyet nhywu i bu hywa di ba̱nyet ka̱nkrang ba, ‘Dityok Ka̱za ba shishrek ba̱ nyin.’ 10Ma ka̱nkrang ka yi si nwa ba ya san ni ba, yi wruk bu sseng i na̱ta̱ryen ka̱nkrang a i hywa da̱ mba, 11‘Dibvuk ka̱nkrang nyin ti ma sseng a a̱nyyan a̱byen njit ani zi ta̱ zrup ya weyang i, ma yi swat bvwo Dityok Ka̱za ba ba̱shishrek ba̱ nyin.’ 12N ya tyyei ka̱ryong: ka̱tuk shirya Ka̱za ka, Ka̱za a̱ ni pfong dizot ba̱nyet Saduma a̱ ra̱u ba̱nyet ka̱nkrang iya.”
Na̱nkrang a a̱ rak san Yesu ni
(Matta 11:20-24)
13Yesu a̱ ryat a̱ hywa, “Kaito nyin ba̱nyet Korasinu bu ba̱nyet Baitsaida. A̱cecet nkyang u ba ya tyyei ni, n da hywa di Sur bu Saida ba ba̱ yya mi, se ba yin swrang ahwa, a̱ kup ba̱kikyak ba̱tro, a̱ bvei ntong a̱ ya kwot i, a̱ ga tyyei ka̱sak ka ban wwon a̱ka̱tukyya mba nu ni. 14Ma ka̱tuk nom shirya ka Ka̱za a̱ ni hok dizot ba̱nyet Sur bu Saida a̱ ya ran. 15Nyin ma ba̱nyet Ka̱fa̱rna̱hum, ryok hwa di yi ni ya yrek nTazwa ba. Ba ni ya brek a̱ tyyi ka̱byen yi sin nat ka̱yabyen.”
16Yesu a̱ bo brak a̱ hywa di na̱won pfong nu na, “A̱yin nu a̱ ya pfong ni, nzuk na̱ pfong. A̱yin nu a̱ ma̱ ya rak ni, nzuk a̱mi na̱ rak. A̱yin nu a̱ n dak ni a̱ rak a̱tuba nu a̱ n tom ni.”
Ba̱pfong nswak a̱tiyring ba a̱ brek
17Ba̱pfong nswak a̱tiyring ba a̱ brek bu ba̱gwai ba̱t, a̱ bu hywa da̱ nu, “Malam! A̱ka̱tuk tswa ma zi ba̱ nyying ka̱yat diyrek nwan ba za pfong.”
18Yesu a̱ hywa, “N dyi Ka̱ta̱nyrang ka brum nyyai Tazwa a̱ bu kpa di ka̱krong nza ni. 19Yi hok: n ya ryi cet yi gi sswa cet a̱ra̱ndwan; ko yi shai ndyik bu nyang, kyang ni ya byram ba. 20Ma yi ryok gwai ho a̱ka̱tuk tswa a̱ ya pfong ba, seko yi gwai rot ba jem a̱yiyrek nyin Tazwa.”
Yesu a̱ dyep
(Matta 11:25-27; 13:16-17)
21Ka̱ram iya Tswa Ka̱za i nwa Yesu na̱ hok rya sai ba̱gingang a̱ hywa, “A̱tyyi, A̱gwam Tazwa bu ka̱byen, n na̱ dyep ba̱t, rot a tyyei ba̱gbyik ba̱nyet kyang a a nyat ba̱nyet bvwo bu ba̱nyet a̱jinjing a̱huhwa mi ni. A̱tyyi, a yya a̱mi rot a hok ansham nkpa.
22“A̱tyyi nzuk u a̱ n dyi kozan kyang. A̱yin a̱ bvwo Ka̱won ka ba, se A̱tyyi nu ba̱diyin; da̱ a̱yin na̱ bvwo A̱tyyi nu ba, se Ka̱won ka bu ba̱nyet ba Ka̱won ka ka tssa a̱ ni ba̱ tyyei da̱ nu ni.”
23Yesu a̱ brak a̱za̱ gbang a̱yring a̱ hywa di na̱won pfong nu na, “Seko yi gwai yin shya nkyang ani ryi. 24N ya tyyei: ba̱nyet tyyei ba̱ryat Ka̱za ba̱gingang bu ba̱gwam a̱ cat ryi nkyang a yi ryi ni a̱ hok kyang a yi hok ni a̱ shya ba.”
A̱ntyok Samariya nu a̱ yin hok dizot ni
25Malam Truwang a̱yaan a̱ nyyai a̱ ba a̱ cat me Yesu. A̱ bu hywa da̱ nu, “Malam, a̱nzan n ni yya n ni shya sucet wityak?”
26Yesu a̱ hywa da̱ nu, “Kot, ba̱ryat Ka̱za ba a̱ hywa ni? A̱nzan a na twang ka̱ yemi?”
27A̱ntyok a̱ywu a̱ hywa, “ ‘A ni cat Ka̱za A̱gwam nwan bu rya nwan na sa̱rei, bu sso nwan ji bu cet nwan na bu kap nwan na,’ ‘i bu gwai a̱wumba nwan nu ka̱sak kanka an ya gwai ni.’ ”
28Yesu a̱ hywa, “Ka̱ryong a̱mi, ki a yya nkyang ani a ni shya sucet.”
29Malam a̱ywu a̱ bo brek a̱ cat ya tyyi ka̱ryong ka, a̱ zzim Yesu a̱ hywa, “A̱nyan a̱ yet a̱wumba nzuk u?”
30Yesu a̱ hywa, “A̱yanyet a̱ yin wruk nyyai Urushalima a̱ naat Yariko, ba̱tang a̱ si ku pyyem a̱zi ryen a̱ tsot a̱ san nkyang nu na sa̱rei a̱ ku drok a̱ wwon ka̱nu dikwu. 31Gado Ka̱za a̱yaan a̱ sook ryen iya, na̱ si ryi a̱yin a̱ywu a̱ jik a̱za̱ gbang a̱yring a̱ seyak. 32A̱mi meyang a̱ntyok brang gado Ka̱za a̱yaan a̱ bo ma̱n hyok, a̱ nyyai a̱ bu cyang a̱yin a̱ywu a̱ brak zan a̱ seyak a̱ ku wwon. 33Ma a̱ntyok Samariya a̱ ma̱n sook ryen iya a̱ nyyai a̱ bu ku shya, a̱ hok dizot nu ba̱t. 34A̱ nat ka̱rek nu ka, a̱ si ku tssu nhwot a a̱ ku kon dihywu a̱ ku zzop i sa̱rei. A̱ ku sook a̱ sak tazwa ka̱janki nu ka a̱ nat ba̱ nu ka̱ryi tsswa a̱ si ku tot a̱n tyak ka̱tuk ka. 35Ka̱ntson a̱ wo tat na̱ ni seyak a̱ nat nkwwan nu na, a̱ tun krum pfong nom hwa a̱ wrak a̱ntyok ka̱ryi nu, a̱ hywa, ‘Ku cam ansham. Ki n brek n ni na̱ tan sa̱rei kyang a a hywat a̱za̱ nu ni.’ ”
36Yesu na̱ bu tyak a̱ ku zzim, “A̱nyan a̱mi ka̱yat ba̱nyet ba̱tat bani a hwa da̱ yet a̱wumba a̱tuba nu ba̱tang ba ba tsot i?”
37Malam u a̱ hywa, “A̱tuba nu a̱ hok dizot nu ti ni.”
Yesu a̱ hywa da̱ nu, “Da̱ ma̱n nat si yya a̱mi.”
Yesu a̱ nat byyek Martsa bu Maryamu
38Yesu bu na̱won pfong nu na ba shyi i ka̱cyet a̱ si tat ka̱bankrang ka̱yaan, a̱ra̱mbyring a̱yaan, ba ku yei Martsa a̱ ba̱ gwai a̱ ba̱ ryi ka̱rek pfwi gbang nu. 39Martsa a̱ yin byyi a̱wumba ba ku yei Maryamu a̱ nyyai a̱ bu swrang bu Yesu a̱ pfong zzek nu na. 40Martsa a̱ bu rwan bu mpfong a na̱ shyi i yya na ni, a̱ nyyai a̱ bu hywa di Yesu, “Malam, a hok ansham Maryamu na̱n ni n wwon n yya mpfong a ba̱diyin o? Ku tyyei na̱ ba a̱ n brang.”
41Yesu a̱ hywa da̱ nu, “Martsa, a tyyi rya nwan a nkyang ba̱gingang; 42ma bu kyang yring a̱mi a cat. Maryamu a̱ wa ka̱n tun a̱tsatsak u, da̱ a̱yin na̱ bo byyi kpo san da̱ nu ba.”
Currently Selected:
Luka 10: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.