Luka 11
11
Yesu a̱ ba̱ zzek ka̱sak ka ba nan yya a̱duwa ni
(Matta 6:9-13; 7:7-11)
1Ka̱tuk ka̱yaan Yesu na̱ shyi i yya a̱duwa ka̱rek ka̱yaan. Na̱ bu tyak, a̱yanyet ka̱yat na̱won pfong nu ka a̱ hywa, “A̱gwam njit, za zzek a̱duwa nu ka̱sak ka Yohana na̱ yin zzek na̱won pfong nu na ni.”
2Yesu a̱ hywa da̱ mba, “Ki yi naa-naat yya a̱duwa yi hywa:
‘A̱tyyi njit:
Zi cat ba dyep diyrek nwan ti,
dityok nwan ti i ba.
3Za ryi kyang a zi ni ya kozan ka̱tuk ni.
4Za kaai wwon ka̱ywap njit ka,
rot njit zi kaai wwon ba̱nyet ba a̱ za ywap ni.
I ryok za tyyi i ka̱mak ka a̱ sswa cet njit ni ba.’ ”
5Yesu a̱ bo ya ka̱son a̱ hywa da̱ mba, “Ka̱ a̱yin ka̱yat nyin a̱ byyi a̱rywai, na̱ ba da̱ nu a̱kang ka̱ram a̱ta̱tuk a̱ bu hywa da̱ nu, ‘A̱ntyok ka̱ryi, n cat a n kwwak kyangya. 6A̱rywai nzuk a̱ wruk cyet, na̱ nwa a̱ ni tsswa da̱ nzuk, da n byyi kyang a na̱ ni ya ni ba.’ 7Yi hwa da̱ a̱rywai nu nu a̱ hywa da̱ nu, ‘Ryok n shwu a̱pfo ba! N wa ka̱n hweyak ka̱bvwa ka n nwa myyi bu na̱won nzuk, n bo n ta̱za n na̱ ryi kyang ba.’ 8Yi cyang ansham: ko a̱ ni ku ryi kyang rot a̱ yet a̱rywai nu ba, a̱ ni ku ryi kozan kyang a na̱ cat i rot hwat mbvak nu na. 9Kyang a n ya tyyei ni: Yin tyyi ka̱ssi i naai, ba ni ya ryi kyang a yi cat i. Ki yin tyyi ka̱ssi bu cat a, yi ni shya. Ki yi sseng i tsot ka̱bvwa ka, ba ni ya yrang i. 10A̱yin nu a̱ naai ni, ba ni ku ryi; a̱yin nu a̱ cat i, a̱ ni shya; a̱yin nu a̱ ma̱n tsot ka̱bvwa ka ni, ba ni ku yrang i. 11A̱nzan a̱tyyi ka̱yat nyin ka̱won nu ka ni ku zzim hwon, na̱ ka̱ ryi shon? 12Ka̱ a̱nyan ka̱won nu ka ni ku zzim dicyi, na̱ ka̱ ryi nyang? 13To, nyin ba̱nyet ba wu yet ba̱ka̱tuk ba̱nyet ba ni ki yi wu bvwo a̱tsatsak za̱nang, ba̱lle A̱tyyi nyin nu a̱ shyi Tazwa ka ni, ku ni yya ni n ku kaat na̱ wrak ba̱nyet ba a̱ ku naai ni Tswa Ka̱za ji?”
Yesu bu Ba'alzabul
(Matta 12:22-30; Markut 3:20-27)
14Yesu a̱ yin tun a̱ka̱tuk tswa nu a̱ yin bvwo ba̱ryat ni. Ka̱ram ka a̱ka̱tuk tswa nu na̱ wruk ni, a̱tuba a̱ywu a̱ nwa ryat, ba̱nyet ba a̱ shyi ka̱rek ka ni a̱ yya ka̱hat ba̱t. 15Ma ba̱yanyet ka̱yat mba a̱ hywa, “A̱ trung a̱ka̱tuk tswa di cet Ba'alzabul, a̱gwam a̱ka̱tuk tswa.”
16Ba̱yanyet a̱ nwa ku me a̱ cat na̱ ba̱ tyyei a̱lama nyyai Tazwa. 17Yesu a̱ ryi a̱ bvwong kyang a ba hwa ni, a̱ hywa, “Dityok ti shyi an zwang ba̱ nti ni, dolet ti kpa. Ka̱ryi ka a̱ ma̱n shyi bu an zwang ni ka ni hwwei. 18Rot a̱mi ki dityok Ka̱ta̱nyrang ti ghai shyi an zwang, ba yya ni a̱n sseng? Nyin ba hywa di Ba'alzabul a̱mi a̱ n dyi cet na n nin nyying a̱ka̱tuk tswa nu ni. 19To, ki a̱mi n ni ba̱ nyying, ba̱nyet ba a̱ ya tssup ni a̱ ba̱ nyying da̱ a̱nzan? Ka̱ yemi ba̱nyet ya tssup ba ban ya tyyi ka̱ywap. 20Ma n cat yi bvwo di cet Ka̱za a̱mi n ni nyying a̱ka̱tuk tswa nu, yi gi bvwo Dityok Ka̱za ka̱n ba da̱ nyin.
21“A̱yin nu a̱ byyi cet i, ka̱ a̱ bvwa nkyang nzwang a̱ sak a̱n cam ka̱ryi nu ka, nkyang a na̱ byyi ni na shot. 22Ma ka̱ a̱yanyet a̱ ma̱n ku ra̱u di cet a a̱ ku nwa a̱ kok nkyang zwang nu na na̱ hyong ni, se na̱ kok nkyang nu na a̱ ka ba̱nyet.
23“A̱yin nu a̱ n brang ni ba a̱ yet a̱ra̱ndwan nzuk. A̱yin nu a̱ n brang tung a ni ba a̱ shyi i ka̱wop.”
Brek a̱ka̱tuk tswa na
(Matta 12:43-45)
24Yesu a̱ bo ya ka̱son a̱ hywa, “Ki a̱ka̱tuk tswa na̱ wruk i rwam a̱yin, a̱ na kat nkei a cat ka̱rek swrang. Ka̱ si shya ba a̱ na hywa, ‘Ryok n brek n nat i ka̱ryi nnyyai nzuk ka.’ 25Ka̱ brek a̱ ni nyyai a̱ si shya ba ka̱n dyang ka̱bvwa ka a̱ wwon ba̱zizrak, 26a̱ si brek a̱ si yei ba̱ka̱tuk ba̱yaan ba a̱ ku ra̱u ni ba̱ mba a̱tiyring, ba bu nwa a̱ swrang. A̱yin a̱ywu a̱ si byyan a̱ ra̱u ka̱sak ka na̱ yin dyi nnyyai ka ni.”
A̱tsatsak hok ansham
27Yesu na̱ bu hywa a̱mi, a̱mbyring a̱yaan ka̱yat ka̱tswa ka a̱ yrek diwan nu ti a̱ hywa, “A̱naa nu a̱ na̱ byin ni a zzwa dibyyang nu ni, Ka̱za a̱ ku wwon nda.”
28Yesu a̱ ma̱n hywa da̱ nu, “Ka̱za ma a̱ wwon a̱yin nu a̱ hok ba̱ryat nka a̱ ba̱ tssup ni nda.”
Ba̱nyet a̱ka̱tuk ka̱ram a̱ cat a̱lama
(Matta 12:38-42)
29Ba̱nyet ba ba bu tung a̱ krang Yesu, na̱ hywa, “Ba̱nyet zamani bani a̱ yet a̱ka̱tuk ba̱nyet. Ba zzim ba̱ a̱lama. A̱lama a̱yaan a̱n shyi ba ni ba̱ tyyei ba, se taka̱i a̱nying Yunana na. 30Ka̱sak ka Yunana a̱ntyok tyyei ba̱ryat Ka̱za nu na̱ yin yet a̱lama di ba̱nyet Ninawi ba ni, a̱mi meyang nzuk Ka̱won A̱neywu n ma̱ n yet a̱lama di ba̱nyet zamani bani. 31Ka̱tuk shirya ka a̱mbyring u a̱ yin yet a̱gwam Abasha nu ni a̱ bu ta̱za a̱ ba̱ tyyak, rot a̱ yin cong a̱ krang a̱ tyak kpikpit ka̱sa nani a̱ bu hok bvwo Solomon na. To, a̱yanyet a̱yaan a̱nuni a̱ ra̱u Solomon. 32Ka̱tuk nshirya ka, ba̱nyet Ninawi a̱ bu ta̱za a̱ ya tyyak, rot ba yin hok wa'azi Yunana ji a̱ wwon a̱ka̱tukyya mba nu. To, a̱yanyet a̱yaan a̱nuni a̱ ra̱u Yunana.”
Fitila Rwam
(Matta 5:15; 6:22-23)
33“A̱yin a̱n shyi a̱ ni tyyi rong an fitila a̱ sook ryei a̱n za̱ kup ba, seko na̱ za̱ sak a̱za̱ a̱ntwam, koyan a̱ nwa a̱ ga shya ka̱bvwa sai. 34A̱ssi nwan na nna yet fitila rwam nwan ji. Ka̱ a̱ssi nwan na a̱ yet a̱zizrak, sa̱rei rwam nwan na ni swat ba̱zizrak. Ma ka̱ a̱ssi nwan na a̱ ma̱n byyi hywu, dolet rwam nwan na i swat ba̱gbyik. 35Rot a̱mi se a ta̱rwam ka̱bvwa sai nwan ka ka bu yet ryin. 36Ki rwam nwan na sa̱rei sai, ryin di kun shyi ba, se a ryi ku tyyi ka̱bvwa sai ka̱sak ka rong fitila ku na na̱ sai ni.”
Yesu a̱ weyang ba̱nyet Farisa bu ba̱malam Truwang
(Matta 23:1-36; Markut 12:38-40)
37Yesu na̱ bu tyak ba̱ryat ba, a̱yanyet ka̱yat ba̱nyet Farisa ka a̱ ku yei ba nat a̱ si ya kyangya a̱ gbang nu. Na̱ nat a̱ si swrang a̱ ni ya kyangya na. 38Ka̱ram ka a̱ntyok ba̱nyet Farisa nu na̱n dyi Yesu na̱ ni ya kyangya na di na̱ tssu mbvak nu na ni ba, na̱ yya ka̱hat ba̱t. 39A̱gwam Yesu a̱ hywa da̱ nu, “Nyin ba̱nyet Farisa, yi na tssu ka̱ma ryei bu a̱ridei u, ma ka̱yat nyin ka a̱n hywaai ba̱ a̱ka̱tuk cat bu na̱kpot. 40Ba̱bvwon, Ka̱za ka a̱ yya ka̱ta̱sa ka ni a̱ shyyak bu ka̱nying ka a̱ yya ka̱yat ka ni e? 41Yi wrak ba̱nyet dizot kyang a i shyi a ryei iya bu a̱ridei u ni, yi ryi kozan kyang ku tyyi ba̱zizrak.
42“Kaito nyin ba̱nyet Farisa, yi wwat za̱ka a̱nying a̱jajwu bu ninon bu kozan taka̱i a̱pipyyi dinyying, ma kok ka̱ryong bu gwai Ka̱za ya kaat. Ku myim yi gwai Ka̱za sa̱rei bu kula bu kpikpit nkyang a.
43“Kaito nyin ba̱nyet Farisa, yi na tssa a̱tsatsak na̱rek sswak a ka̱yat a̱bat a̱duwa ka i bu cat ba ta̱gbok a̱ ya byei i na̱bvwa tunga bu na̱tung ba̱nyet. 44Kaito nyin rot yi ryi di ndyak a sang a̱lama ni, ba̱nyet ba ban cong i cyi ni.”
45A̱yanyet ka̱yat ba̱malam Truwang ka a̱ hywa, “Malam, ki a hywa a̱mi a ma̱n za pfwei nta̱mak yemi.”
46Yesu a̱ hywa, “Nyin ba̱malam Truwang ba, ka̱bvung a̱ ma̱ ya shyi. Yi kok a̱gba̱ryet ncot saai ba̱nyet i a̱za̱ ma, da̱ nyin ba ni neyak ko ka̱ta̱hrung n ba̱ brang ba. 47Kaito nyin. Yi nok a̱byyi ba̱nyet tyyei ba̱ryat Ka̱za na na yet ka̱sham, ba̱nyet ba ba̱tyyi nyin ba ba yin hywaai ni. 48Wato, yi tyyei ka̱sak ka yin hok ansham nkyang a ba̱tyyi nyin ba ba yin yya ni, rot mba a̱ hywaai ba̱nyet tyyei ba̱ryat Ka̱za ba, nyin yi nok a̱byyi mba na. 49Nkpa n byyi Ka̱za ka̱yat bvwo nka ka kan hywa, ‘N ni ba̱ tssop di ba̱pfong nzuk bu ba̱nyet tyyei ba̱ryat nzuk, ba si hywaai ba̱yanyet a̱ tyyi ba̱yanyet i ka̱bvung.’ 50Rot a̱mi ba̱nyet zamani bani a̱ ni sswa ka̱bvung rot ba̱pfong ba ba hywaai nyyai ka̱ram ka Ka̱za kan yya ka̱sa ka ni. 51Wato, nyyai i dikwu Habila bu tat dikwu Zakariya, a̱tuba nu ba yin hywat a̱katyyi ka̱rek ba̱hyum ka bu ka̱rek nzuk ni. Ka̱ryong a̱mi n ya tyyei, ba̱nyet zamani bani a̱mi a̱ ni tan ba̱sok mba ba.
52“Kaito nyin ba̱malam Truwang ba, rot yi nyat ka̱won a̱kwado ka a̱ yrang ka̱ryi bvwo ka ni, da̱ nyin ba nwa ba, da̱ nyin ba wwon ba̱nyet ba a̱ nwa ba.”
53Ka̱ram ka Yesu na̱n drok ka̱ yemi ni, ba̱malam Truwang ba bu ba̱nyet Farisa na i ku ta̱gbang da̱ a̱ka̱tuk ba̱ryat bu zzim ba̱gingang, 54na̱ ga ryat a̱ si ywap ba shya kyang ku pyyem.
Currently Selected:
Luka 11: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.