Luka 12
12
Ba̱nyet raai ba̱nyet
(Matta 10:26-27)
1Ka̱ram ka ba̱nyet ba̱brika̱tei ban tung ni, a̱ shai ba̱yaan, Yesu a̱ hywa di na̱won pfong nu na, “Yi cam yisti a̱nying ba̱nyet Farisa nu, ba̱nyet ba a̱ raai ba̱nyet i. 2Sa̱rei nkyang a shyi i nyat ni ba ni na̱ tyyang a̱ wruk i, nkyang a shyi nrang ni ni ba a̱za̱kpai. 3Rot a̱mi kyang a yi ryat an ndyin ni, ba ni kpo hok a̱za̱kpai. Kyang a yi ma̱n shwwang ka̱yat bat i a pfwo ba̱nyet i, ba ni kpo ryat tazwa.”
Yi hok ka̱wun Ka̱za
(Matta 10:28-31)
4“Ba̱rywai nzuk, yi ryok hok ka̱wun ba̱nyet ka a̱ maai bu hywat rwam a ni ma ba maai a̱ bo yya kyang a ra̱u a̱mi ni ba. 5Ma n ni ya tyyei a̱yin nu a̱ myim yi hok ka̱wun nu ni: Ka̱za nka a̱ maai yi hok ka̱wun nka. Rot nka a̱mi a̱ maai hywat a̱ si bo byyi cet tyyi an dong. Ee, n ya tyyei yi hok ka̱wun nka.
6“Ba̱bva ba̱pfon ba zzap kobo hwa ka̱ni? Ma Ka̱za a̱ ka̱n bring ko a̱yring ka̱yat mba ba. 7Ko a̱cat diccu nyin na ma Ka̱za a̱ bvwo ka̱tswa nna. Rot a̱mi, yi ryok hok ka̱wun kyang ba, yi ra̱u ba̱bva ba̱gingang.”
Tyyei shim Kristi a a̱ssi ba̱nyet
(Matta 10:32-33; 12:32; 10:19-20)
8“N bo ya tyyei brak: a̱yin nu a̱ wruk a̱za̱kpai a̱ tyyei ka̱sak ka na̱ nin shim nzuk Ka̱won A̱neywu ni, nzuk n ma̱ ni ku shim a a̱ssi ba̱pfong Ka̱za. 9A̱yin nu a̱ ma̱n ton n bvwo a a̱ssi ba̱nyet i, nzuk n ma̱ ni ton ku bvwo a a̱ssi ba̱pfong Ka̱za.
10“A̱yin nu a̱ n dyat a̱ka̱tuk ba̱ryat i, nzuk Ka̱won A̱neywu, Ka̱za a̱ ni ku kaai a̱ wwon; ma a̱yin nu a̱ ywap Tswa Ka̱za ni a̱ ni ku kaai a̱ wwon ba.
11“Ka̱ram ka ban nat ba̱ nyin a̱ ni ya yya shirya ka̱yat a̱bat a̱duwa ko a̱ta̱ssi ba̱gwamna ko a̱ta̱ssi ba̱gwam ni, yi ryok hwa bu kyang a yi ni ba̱ tyyei ko yi ni ryat i ba. 12Ka̱ram iya Tswa Ka̱za ni ya zzek kyang a yi ni ryat i.”
Byyi zwa a̱ntyok sang a̱za̱ncyi
13A̱yanyet ka̱yat ka̱tswa ba̱nyet ka a̱ hywa da̱ nu, “Malam, tyyei a̱wumba nzuk u zi ya ka nkyang a a̱tyyi njit u na̱ kwu a̱ za wwon mi ni.”
14Yesu a̱ hywa da̱ nu, “A̱ntyok a̱ni, a̱nyan a̱ n sak n yya shirya ko n ya ka zwa ji ba kwu a̱ ya wwon mi ni?” 15A̱ bo hywa da̱ mba, “Kozan ka̱ram yi ta̱rwam bu tyyi ndya nyin i cat zwa, rot ba byyi zwa ba̱gingang nkpa a̱mi yet sucet ka̱ryong a ba.”
16Yesu a̱ ba̱ tyyei nkhang a̱yanyet, a̱ hywa, “A̱yanyet a̱ yin byyi zwa ba̱t. Yak nu na i tyyi ba̱t. 17Na̱ swrang a̱ nwa a̱huhwa, ‘To, a̱nzan n ni yya bu taka̱i yak a ni da n byyi ka̱rek kpo tyyi ka ba? 18Kyang a n ni yya ni nkpa yet: n ni hwwei ba̱ngban nzuk ba sa̱rei n nok ba̱yaan ba a̱ ni maai n tyyi yak a ni bu sa̱rei nkyang a n byyi ni.’ 19Wwon n hywa ka̱yat mpfwa nzuk, ‘To, n tung maai, n bo n sang kyang ba. Ku n maai a̱rya ba̱ a̱rya. N ni pfwi, n za n sswa, n yya kyang a n cat i.’ 20Ma Ka̱za a̱ hywa da̱ nu, ‘A̱bvwon a̱yin da̱ nwan ni, a̱ta̱tuk ka̱pfun sso nwan nin srang. To, nkyang ani a ya tu-tung ani mi a̱ ni yet nyi a̱nyan?’
21“A̱mi meyang kun dyi ba̱ a̱yin nu a̱ ya tung zwa ni, ma Ka̱za a̱ bvwo a̱mi a̱ yet a̱ntyok zwa ka̱ryong ba.”
Wwon Ka̱za a̱huhwa nyin nu
(Matta 6:25-34)
22Yesu a̱ bo hywa di na̱won pfong nu na, “Nkpa n byyi n ni ya tyyei yi ryok tyyi a̱huhwa nyin an kyang a yi ni ya ni ko kyang a yi ni kup i ba. 23Rot sucet ra̱u kyangya, rwam a i bu ra̱u kyang a a̱yin na̱ ni kup ni. 24Yi cyang ba̱ngbeyak ba ansham. Ba kap ba, di ba tung yak ba; ba byyi a̱bat saai nkyang ba, di ba byyi ba̱ngban ba. Ma Ka̱za a̱ ba̱ jyet kyang a ba ni ya ni. Yi ran na̱non na ba̱gingang. 25A̱nyan ka̱yat nyin a̱jinjing a̱huhwa nu na̱ ni tyyi na̱ seyak nom swat ka̱sa nu na? 26To, ki yi maai yya cincong nkyang a̱mi ba, a̱nzan a̱ nin byyi yin tyyi a̱huhwa nyin nu a nkyang a ra̱u a̱mi ni? 27Yi cyang a̱tyin fure na ansham, ka̱sak ka nan dai ni. Ba ya tywei ba̱tro ba, ma Solomon bu taka̱i nzwa nu iya ba̱tro nu ba a̱ yin yet ka̱sham di fure jring ni ba. 28Ki Ka̱za a̱ ni jyi ba̱pyyi ba a̱ ni truk ka̱pfun ka̱ntson ba ba̱ ta an dong ni, a̱nzan a̱ nin byyi na̱ nin ya kaai a̱ wwon? Ka̱ a̱nzan a̱ ya bvwo ntyyi ndya na?
29“Rot a̱mi, yi ryok ya tyyi a̱huhwa, i dam kyang a yi ni kup ni ko kyang a yi ni ya ni ba. 30Ba̱nyet ka̱sa ba a̱mi a̱ na tyyi a̱huhwa mba nu an taka̱i nkyang ani. Ma A̱tyyi nyin nu a̱ bvwo ka̱sak ka yin cat nkyang ani ni. 31Kyang a myim ni yi tyyi ndya nyin na i Dityok Ka̱za ti, kpikpit nkyang a meyang Ka̱za a̱ ni ya ryi.”
Tung zwa Tazwa
(Matta 6:19-21)
32“Nyin ba̱nyet ba a̱ shyi i ka̱srong nzuk ka ni yi ryok hok ka̱wun ba, rot A̱tyyi nyin nu a̱ cat yin byyi i dityok nu ti. 33Yi zzap nkyang a yi byyi ni sa̱rei i ka ba̱nyet sang ba, i shya dibvwo nkrum ti ni cak ni ba bu zwa Tazwa ji wi byyi tyak ni, da̱ a̱tang na̱ naat yyi ba, di zzu zi ni ya ba. 34Rot ka̱rek ka zwa nyin ji zin shyi ni, ka̱ yemi ndya nyin na nan shyi.”
Ba̱kwwa ba a̱ cam a̱ntyok ka̱ryi mba ni
35“Yi ya rop ansham i swat tot kozan kyang a ya bai ni, i tyyi rong a fitila nyin ji, 36da̱ni di ba̱kwwa ba a̱ tot a̱ntyok ka̱ryi mba na̱ brek nyyai ka̱rek nyreng ni. Ka̱ram ka na̱n nyyai a̱ bu zzu ka̱bvwa ka ni ba ku yrang i ba ahwa. 37Ba̱kwwa ba a̱ntyok ka̱ryi mba nu na̱ brek a̱ bu ba̱ shya ba swat a̱ ku tot i a̱ ni hok ansham. A̱ ni tyyi ba swrang an tebur, a̱wwon nu na̱ ya rop a̱ ba̱ jyet kyangya. 38Ki ba shyi i ku tot a, ko a̱kwop a̱ta̱tuk na̱n ba, ba ni hok ansham. 39Nyin yi bvwo ka̱ a̱ntyok ka̱ryi nu a̱ bvwo ka̱ram ka a̱tang na̱ nin ku nwa ni, a̱ ni ryok a̱tang u a̱ ku nwa ka̱ryi ka ba. 40Nyin meyang, ku myim yi swat i cam, rot nzuk Ka̱won A̱neywu n bai ka̱ram ka yi nin cam ni ba.”
A̱tsatsak a̱kwwa bu a̱ra̱ntong a̱kwwa
(Matta 24:45-51)
41Bitut a̱ hywa da̱ nu, “Malam, njit a za tyyei misali jini e, ki sa̱rei ba̱nyet ba?”
42A̱gwam Yesu a̱ hywa da̱ nu, “A̱tuba nu a̱ yet a̱kwwa ka̱ryong a̱ byyi a̱za̱ncyi ni, a̱mi a̱ntyok ka̱ryi nu na̱ ku wwon kpikpit ba̱kwwa a mbvak, na̱ ba̱ jyet kyangya i ka̱ram ka a̱ myim ni. 43A̱kwwa nu a̱ ni hok ansham, ka̱ a̱ntyok ka̱ryi nu a̱ brek a̱ bu shya na̱ yya ka̱sak ka ban ku sak ni. 44Ka̱ryong a̱mi n ya tyyei: a̱ntyok ka̱ryi nu a̱ ni ku tyyi sa̱rei ka̱ryi nu ka mbvak nu. 45Ma ka̱ a̱kwwa a̱ywu a̱ hywa, ‘A̱ntyok ka̱ryi a̱ ni brek ahwa ba,’ a̱ nwa tsot kpikpit ba̱kwwa na, di ba̱ntyok di ba̱nyring, a̱ ya a̱ sswa a̱ shyi ba an hyong, 46wwon a̱ntyok ka̱ryi nu a̱ si nyyai a̱ bu nwa nnom a bu ka̱ram ka a̱kwwa nu na̱n bvwo ko a̱n ku cam ni ba. Na̱ ku nyyek a̱ ku bvwa zang wipfong nu ji bu ba̱nyet sang ka̱ryong.
47“A̱kwwa nu a̱ bvwo kyang a a̱ntyok ka̱ryi nu nu na̱ cat na̱ yya ni di na̱ yya ni ba, ba ni ku nyyek di tsot a̱yo. 48Ma a̱kwwa nu a̱ bvwo kyang a a̱ntyok ka̱ryi nu nu na̱ cat ni ba, ma a̱ yya kyang a myim tsot ni, ba ni ku tsot ba̱cincong. Ki ba wrak a̱yin nkyang ba̱gingang, ba ma̱ ni cat na̱ wrak ba̱gingang. Ki ba ma̱n sak nkyang ba̱gingang da̱ a̱yin, ba ma̱ ni cat ba̱gingang da̱ nu.”
Yesu a̱ ba ghai mbyin
(Matta 10:34-36)
49“N ba tyyi ka̱sa ka rong. N cat se rong a wu ka̱n pyyem. 50N shyi bu baptisma nu n ni san ni. N shyi i ku shying har bu tat ka̱ram ka ba nin nin yya da̱ nu ni. 51Yi hwa di n ba bu sa̱la̱ma i ka̱sa kaa? Kaai, n ba n ga n ghai. 52Ba̱nyying, ka̱ryi ba̱nyet ba̱pfon a̱ ni ya ghai, ba̱nyet ba̱hwa bu ba̱tat ko ba̱nyet ba̱tat bu ba̱hwa. 53Na̱won a̱ ni ya rak bu ba̱tyyi mba, na̱won na̱neyang bu ba̱na mba, ba̱kumbvon bu ba̱yikop mba.”
Zi cam ka̱ram
(Matta 16:2-3)
54Yesu a̱ bo hywa di ba̱nyet ba, “Ki yi ryi a̱ninyyan na hyok nyyai a̱za̱gbang a̱jenshring, yi na hywa, ‘Za ni bvwa,’ a ryi zi ma̱n ba. 55Ki yi ma̱n dyi wun na ku hywap nyyai a̱za̱gbang ka̱tak yi na hywa, ‘Ka̱bvwa a̱ ni grup,’ a ryi ka ma̱n grup. 56Nyin ba̱nyet ba a̱ wi tssup ba̱ryat nyin ni, ki yi maai cyang ka̱sa ka ba̱ a̱ninyyan na i bvwo kyang a na yet i, a̱nzan a̱n ya bvwo yi ryi ka̱ram ba̱nyying ka bvwong.”
Yi jyi swat nyin na bu ba̱yaan
(Matta 5:25-26)
57“A̱nzan a̱n ya bvwo cyang nkyang a myim yi yya ni? 58Ka̱ a̱yin a̱ cat yya kara nwan, kwan ahwa i ku shya yi jyi nyyai yi ka̱n nat ka̱bvwa shirya ka ba. Ki a rak, na̱ si na̱ tyyi an bvak a̱ntyok shirya, a̱ntyok shirya a̱ na̱ tyyi an bvak ba̱dogari, mba ba ma̱ na̱ tyyi a jaru. 59N na̱ tyyei, a byyi wruk ka̱ yemi ba, se a tan a̱ngbom kobo nu ba na̱ tssup ni.”
Currently Selected:
Luka 12: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.