Luka 13
13
Yi wwon a̱ka̱tukyya nyin nu
1Ka̱ram iya ba̱yanyet ba shyi ka̱ yemi a̱ tyyei Yesu ka̱sak ka Bilatut na̱n hywaai ba̱yanyet nyyai Galili ba shyi yya Ka̱za sujada ni. 2Yesu a̱ hywa da̱ mba, “Yi hwa di ka̱sak ka ban hywat ba̱nyet Galili ba ni ni tyyei di ba ra̱u kpikpit ba̱nyet Galili na da̱ a̱ka̱tukyya nu o? 3Ko ba̱cincong! N ya tyyei, ki yi wwon a̱ka̱tukyya nyin nu ba, yi ma̱ ni kwi da̱ mba ni. 4Ba̱nyet Siluwam swak bu a̱ninai ba a̱gba̱dang dinok u na̱ yin bvut a bu hywaai ni hwa? Yi hwa di ba ra̱u kpikpit ba̱nyet a shyi Urushalima ka ni da̱ a̱ka̱tukyya nu o? 5Ko ba̱cincong! N ya tyyei, ki yi wwon a̱ka̱tukyya nyin nu ba, yi ma̱ ni kwi da̱ mba ni.”
Ka̱kon a̱lemu ka a̱ sang disum ni
6Yesu a̱ ba̱ tyyei misali a̱ hywa, “A̱yanyet a̱ yin tup ka̱kon a̱lemu i ka̱byen nu. Ka̱kon ka a̱ rai, na̱ cong a̱ cyang a̱ ryi ki ka byyi disum, ma di na̱ shya kyang ba. 7Na̱ hywa da̱ a̱ntyok keyak nu nu, ‘Cyang, a̱rya a̱tat a̱ naani n cong n cyang ki ka̱kon a̱lemu kani a̱ sum, ma n nin shya kyang ba. Ka̱ tyyak rot. Ho a̱nzan ka nin swat a̱n byyan ka̱byen ka ba̱ a̱kpam?’ 8A̱ntyok keyak u a̱ hywa, ‘A̱ntyok ka̱ryi, yen ka̱ ryok ka bo bvwa dirya. N ni ka̱ rung n krang n nin tyyi taki. 9Ki dirya krang ka sum, to, ba ka̱ wwon; ki ka sum ba, ba ka̱ tyyak a̱ rot.’ ”
Yesu a̱ creng a̱mbyring u a̱ byyi a̱gwuk ka̱ma ni
10Ka̱tuk ka̱yaan Yesu na̱ shyi i zzek ka̱yat bat a̱duwa ka̱tuk A̱sa̱ba̱t. 11A̱mbyring a̱yaan a̱ shyi ka̱ yemi a̱ yya hywu a̱ka̱tuk tswa a̱rya swak ba̱ a̱ninai, a̱ gwuk a̱n hwan, a̱ maai a̱ neyak ba. 12Yesu na̱ bu ku ryi a̱ ku yei a̱ hywa, “A̱ra̱mbyring, ba na̱ tun hywu nwan na.” 13A̱ ku sak bvak, bu ka̱baram a̱mbyring a̱ywu a̱ neyak a̱ dyep Ka̱za.
14A̱kpok u i bat a̱duwa na a̱ yya diryen, rot Yesu a̱ creng a̱yin ka̱tuk A̱sa̱ba̱t. A̱ hywa di ba̱nyet ba, “Zi byyi nom yya pfong ba̱na a̱kitat; rot a̱mi yi cong a nom iya ba bu ya creng, ban bu ka̱tuk A̱sa̱ba̱t ka.”
15A̱gwam Yesu a̱ hywa da̱ nu, “Nyin ba̱nyet raai ba̱nyet, yi na trung bvon nyin ji cong zzop bu za̱ tyyei ba̱shekwot ka̱tuk A̱sa̱ba̱t. 16Ma ka̱mbvon Ibrahim a̱nkaani Ka̱ta̱nyrang ka rop a̱ rot za swak bu a̱ninai, nyin ba rak ba ka̱ creng ka̱tuk A̱sa̱ba̱t.” 17Hywa nu na a̱mi yin tyyi ba̱ra̱ndwan nu ba a̱ hok sum, ma kpikpit ba̱nyet a ba shyi i gyrep nkyang ka̱hat na na̱ yya ni.
Tswa ka̱kum
(Matta 13:31-32; Markut 4:30-32)
18Yesu a̱ si hywa da̱ mba, “A̱nzan zi nin mak Dityok Ka̱za ti brak ni? Zi ni hywa di ti tai a̱nzan ni? 19Ee, n yring! Ti ryi di tswa ka̱kum ji a̱yin na̱ tup i ka̱byen nu ni, zi rai i tyyi a̱gba̱dang ka̱kon, na̱non a̱ ba a̱ bun yya na̱sa mba a mbvak a.”
Dityok Ka̱za tai yisti
(Matta 13:33)
20Yesu a̱ bo hywa, “A̱nzan n bo n nin mak Dityok Ka̱za ti? 21Ti ryi di yisti u a̱ra̱mbyring na̱n sook a̱ kyyai bu mpyyi a ryei ni, na ngan a̱ bu tyyi a̱gba̱dang dikwang.”
Cincong kofa
(Matta 7:13-14, 21-23)
22Yesu a̱ nwai a̱cwwang ba̱ a̱cecet na̱nkrang a̱ ba̱ zzek a̱ tyei ka̱ssi ka a̱za̱gbang Urushalima. 23Ba̱yanyet a̱ ku zzim a̱ hywa, “Ba̱nyet ba Ka̱za ka ni san ni, a̱ si wa ni shii ka̱tswaa?”
Yesu a̱ hywa da̱ mba, 24“Koyan a̱ kwan a̱ shya nwa a cincong ka̱nu gyen ji, rot ba̱nyet ba̱gingang a̱ ni kwan nwa na ma ba ni maai ba. 25A̱ntyok ka̱ryi nu a̱ bu ta̱za a̱ yyik ka̱bvwa ka. Ki yi sseng a̱ta̱sa ka i nwa tsot ka̱bvwa ka i hywa, ‘A̱ntyok ka̱ryi, za yrang i!’ na̱ hywa da̱ nyin, ‘N bvwo ka̱rek ka yin nyyai ni ba.’ 26Wwon yi hywa, ‘Zi yin za i sswa ba̱ nwan. Har a yin zzek i ka̱nkrang njit.’ 27Na̱ bo ya tyyei a̱ hywa, ‘N bvwo ka̱rek ka yin nyyai ni ba. Yi drok kyi n wwon, ba̱ka̱tuk ba̱nyet.’ 28Taka̱i ka̱nak a yi ni kun ni a̱ shii i rywei mbvak ta̱sang, ka̱ram ka yin dyi Ibrahim bu Ishaku bu Yakubu bu sa̱rei ba̱nyet tyyei ba̱ryat Ka̱za ba ba shyi i dityok Ka̱za ti ni, nyin nu ba ka̱n nyying! 29Ba̱nyet a̱ ni ba nyyai a̱za̱gbang dityin, ba̱yanyet a̱za̱gbang a̱jenshring, ba̱yanyet nyyai ka̱tak, ba̱yanyet nyyai ka̱za, a̱ bu swrang a̱ ya kyangya i Dityok Ka̱za ti. 30Ka̱ram iya ba̱nyet ba a̱ yet na̱son nani ni a̱ ni ba riryim, ba̱nyet ba a̱ yet na̱ryim naani ni a̱ kwwat ka̱son.”
Yesu a̱ hok dizot Urushalima
(Matta 23:37-39)
31Bu ka̱ram iya ba̱nyet Farisa yaan i ba i bu hywa di Yesu, “Da̱ rak tyong, Hirudut a̱ yemi a̱ na̱ cat a̱ ni hywat!”
32Yesu a̱ hywa da̱ mba, “Yi nat si tyyei ka̱kyeng iya Hirudut: ‘Ka̱pfun bu ka̱ntson n trung a̱ka̱tuk tswa n bo n creng ba̱nyet nhywu. A̱tuwa n wo n tyak pfong nzuk a.’ 33Ma dolet n bo n pyyem ryen ka̱pfun bu ka̱ntson bu tat ka̱tswa. Ku myim ba hywat a̱ntyok tyyei ba̱ryat Ka̱za ka̱rek ka̱yaan ba, seko bu Urushalima.
34“Urushalima, Urushalima! Nwan hywaai ba̱nyet tyyei ba̱ryat Ka̱za ba. Nyin a̱mi yi mang ba̱nyet ba Ka̱za ka tssop da̱ nyin ni di kpang. Nkrang ka̱mang n nin cat tyyi mbvak nzuk a n ya ra n tyyi, da̱ni di nyon zi nan tyyi nhweyak nji na n da na̱won nji na tyyi ni, da̱ nyin ba shim ba. 35Naani na̱sa nyin na a̱ ni swat kwot! Da̱ nyin ba bu ni n dyi ba, se ka̱tuk ka yin hywa, ‘Ka̱za a̱ wwon a̱yin nu a̱ bai i diyrek A̱gwam Tazwa ni nda.’ ”
Currently Selected:
Luka 13: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
