Luka 2

Byin Yesu

(Matta 1:18-25)

1Ka̱ram iya A̱gba̱dang A̱gwam Rom, Kaisar Augustat, a̱ yei ba twang sa̱rei ba̱nyet ka̱byen dityok nu ba. 2Twang ani a̱mi yin yet ka̱tsitsrang ka ka̱ram ka Kiriniyat na̱ yin yet gwamna ka̱byen Siriya nu ni. 3Rot a̱mi koyan a̱ nat ka̱nkrang nu ba si ku twang ka̱ yemi.

4Yusufu a̱ ma̱n drok nyyai Nazarat i ka̱byen Galili a̱ nat Batalami ka̱nkrang Dawuda, i ka̱byen Yahudiya, rot a̱ yin nyyai an sot Dawuda ji. 5A̱ nat bu Maryamu, ka̱neyang nu ka, a̱ yin shyi bu ka̱hwa ka ni. 6Ka̱ram ka ban shyi ka̱ yemi ni, nom mbyin Maryamu na i krang ba. 7Na̱ byin ka̱won ka̱ssi nu ka ka̱won ka̱seyang. A̱ ka̱ gat di nwwang ba̱tro a̱ ka̱ myyi ka̱bvwa tssung nyak ba̱pyyi, rot ka̱bvwa ka a̱ yin hweyak i ka̱ryi ba̱yecen ka.

Ba̱pfong Ka̱za bu ba̱nyet a̱tsaai

8I ka̱byen iya ba̱nyet a̱tsaai a̱ ma̱ yin shyi a̱za̱n kei a̱ shyi i tot na̱srong bvon-tsaap mba a̱kang ka̱ram a̱ta̱tuk. 9A̱pfong A̱gwam Ka̱za a̱ nyyai a̱ ba da̱ mba, A̱gwam Ka̱za a̱ tyyi ka̱bvwa ka a̱ brak sai ka̱rek shyi mba ka, a̱ tyyei dityok nu ti. Sa̱rei mba ba hok ka̱wun ba̱gingang. 10Wwon a̱pfong Ka̱za nu a̱ hywa da̱ mba, “Yi ryok hok ka̱wun ba, n ya ba bu Ka̱sham Ba̱ryat nying na ni tyyi sa̱rei ba̱nyet rya sai ba̱gingang ni. 11Ka̱pfun kani ba ya byin a̱ntyok ya san i ka̱nkrang Dawuda, nu a̱ yet Kristi A̱gwam nyin nu. 12Ka̱sak ka yi nin dyi bvwong ni nka a̱ yet, yi naat si shya ba gat ka̱bawon di nwwang ba̱tro a̱ ka̱ myyi ka̱bvwa tssung nyak ba̱pyyi.”

13Bu ka̱baram nsoja Tazwa ba̱gingang nta̱mak bu a̱pfong Ka̱za nu a̱ sook a̱bvom a̱n dyep Ka̱za, a̱ hywa,

14“Zi dyep Ka̱za A̱gwam njit u a̱ shyi Tazwa ni,

i ka̱sa ka a̱ wrak ba̱nyet ba na̱ pfong ansham mba ni myyi ndya.”

15Ba̱pfong Ka̱za ba ba bu drok a̱ nat Tazwa, ba̱nyet a̱tsaai ba a̱ ya tyyei a̱ hywa, “Yi ta̱za zi nat Batalami si ryi kyang a yya ni, nna ni A̱gwam Ka̱za na̱ za tyyei ni.”

16Ba ta̱za ba ahwa a̱ nat a̱ si shya Maryamu bu Yusufu a̱ bo ryi ka̱bawon ka ka myyi ka̱bvwa tssung nyak ba̱pyyi ka. 17Ba̱nyet a̱tsaai ba ba bu ryi ka̱bawon ka, a̱ tyyei ba̱tyyi ba kyang a a̱pfong Ka̱za nu na̱ bu ba̱ tyyei a̱zi ka̱won ka ni. 18Koyan nu a̱ hok kyang a ba̱nyet a̱tsaai ba ba hywa ni a̱ ma pyyem bu ka̱nu. 19Maryamu a̱ breng nkyang ani ka̱yat mpfwa nu kozan ka̱ram. 20Ba̱nyet a̱tsaai ba a̱ brek a̱ bvom a̱ naat a̱ tyyei shii Ka̱za a̱ ka̱ dyep rot nkyang a ba hok a̱ bo ryi ni. Ba ryi ba̱cicrak bu kyang a a̱pfong Ka̱za nu na̱ ba̱ tyyei ni.

Ba tun Yesu diyrek

21Sati i krang ba, ba ni tyyi Yesu ncen, ba ku tun diyrek a̱n yei Yesu, diyrek ti a̱pfong Ka̱za nu na̱ yin ku tun ni nyyai ba ka̱n shya ka̱hwa nu ka ba.

Ba ba bu Yesu a̱ta̱ssi Ka̱za

22Ka̱ram ka bu yya Yusufu bu Maryamu ba nin ya jrang ni da̱ni di Truwang Musa ji zi yin ba̱ tyyei ni, ba sook ka̱won ka a̱ nat Urushalima a̱ si wrak A̱gwam Ka̱za. 23A̱mi ba yin jem ka̱yat Truwang A̱gwam Ka̱za ka a̱ hywa, “Kozan ka̱won ka̱ssi ka yet ka̱seyang ni a̱ yet ka̱nying A̱gwam Tazwa.” 24A̱ breng ba̱bva ko ba̱ta̱nta̱ba̱ra ba̱hwa a̱nta̱mak a̱ nat a̱ sin yya ba̱hyum ka̱sak ka truwang A̱gwam Ka̱za zin ba̱ tyyei ni.

25To, a̱yanyet a̱ yin shyi Urushalima ba ku yei Simiyan. A̱ yin yet a̱tsatsak a̱yin a̱ pfong ka̱wun Ka̱za ba̱t. A̱ yin tot ka̱ram ka Ka̱za ka nin san Isreila ni, Tswa Ka̱za i shyi ba̱ nu. 26Tswa Ka̱za ji bu ka̱n ku tyyei di a̱ ni kwu ba se a̱ ryi ba Kristi na Ka̱za ka ryat a̱ sak ni. 27Tswa Ka̱za i ku brang na̱ nwa ka̱yat bat Ka̱za ka. Ba̱tyyi Yesu ba a̱ ma̱n ba ba̱ nu a̱ bu ku yya kyang a truwang ji zi cat i, 28Simiyan a̱ san ka̱won ka a̱ breng a̱ gwai Ka̱za mi, a̱ hywa,

29“A̱gwam Tazwa, a breng kyang a a yin dyat sak ni n tyyei ni n kpo ryi;

mu ryok a̱kwwa nwan na̱ nat bu myyi rya.

30A̱ssi nzuk a ryi sucet nwan na,

31nna ni a ka̱n shirya a̱ta̱ssi sa̱rei nwap a ni.

32Ka̱bvwa sai ka a̱ ni tyyei nwap ka̱sa na ryen nwan na ni,

a̱ tyyi ba̱nyet nwan Isreila diywa.”

33Ba̱tyyi ka̱won ba a̱ hok kyang a Simiyan na̱ hywa a̱zi ka̱won ka ni a̱ ma pyyem bu na̱nu. 34Simiyan a̱ ba̱ pfwa nda a̱ hywa di Maryamu, a̱naa nu nu “A ryi ka̱won kani, Ka̱za a̱ ka̱ tssa ka ga tyyi ba̱yanyet dikpak a̱ yrek ba̱yanyet ba̱gingang ka̱yat Isreila. Nu a̱ bo yet a̱lama nyyai di Ka̱za nu ba̱nyet ba ni ryi a̱ rak ni, 35a̱ wruk da̱ a̱huhwa ba̱nyet ba̱gingang. Ee, rya nwan ni byyan a hok da̱ni di ba tuk bvurya nwan ji di ka̱krong a̱kpat ni.”

36A̱kukwo a̱mbyring a̱yaan a̱ ma̱ yin shyi a̱ yet a̱mbyring tyyei ba̱ryat Ka̱za, ba yin ku yei Hannatu, a̱ yet ka̱won Fanuila an sot ba̱nyet Ashira. A̱ yin yreng a̱ yya a̱rya a̱tiyring, a̱ntyok u a̱ kwu a̱ ku wwon ba̱diyin. 37Ka̱ram kani na̱ ka̱n kop a̱ yet a̱rya nswak a̱ninai ba̱ naai. Kozan ka̱ram na̱ swat bu i bat Ka̱za na a̱ yya a̱duwa a̱nta̱mak ba̱ a̱zumi. 38Bu ka̱ram iya na̱ ba a̱zanson a̱ gwai Ka̱za a̱ ryat ba̱ryat ka̱won ba bu sa̱rei ba̱nyet ba a̱ yin tot ka̱ram ka Ka̱za ka nin san Urushalima a̱ wwon ni.

Ba brek a̱ nat Nazarat

39Ka̱ram ka Yusufu bu Maryamu ba bun tyak yya nkyang a Truwang Ka̱za ji zi ba̱ tyyi yya na ni, a̱ brek a̱ nat i ka̱nkrang mba ka Nazarat i ka̱byen Galili ka. 40Ka̱won ka a̱ rai a̱ tyyi cet; a̱ byyi a̱za̱ncyi ba̱t, a̱liheri Ka̱za a̱ shyi ba̱ nka.

Yesu a̱ nwa bat Ka̱za

41Ba̱tyyi Yesu ba a̱ yin cong a̱swa Swrap wwon nu Urushalima kozan dirya. 42Ka̱ram ka Yesu na̱n yet a̱rya swak ba̱ hwa ni, ba̱tyyi nu ba a̱ nat ba̱ nu ka̱rek a̱swa ka, da̱ni ba nan yya ni. 43Ba bu tyak a̱ bvwot a̱ bai ka̱ryi, Yesu a̱ brek a̱ swrang Urushalima, ba̱tyyi nu ba ba bvwo ba. 44Ba hwa da̱ a̱ shyi ka̱yat ba̱nyet ka̱cyet ka. Ba cong a̱n tyak nom a, a̱ si ku cat ka̱yat ba̱wumbeyang mba bu ba̱kpondang mba. 45Ba bu ku shya ba, a̱ si bo brek a̱ ba Urushalima a̱ ku cat. 46Ka̱tuk nom a̱mba̱tat ba si nyyai a̱ bu ku shya na̱ swat ka̱yat bat Ka̱za bu ba̱malam a̱ pfong nkyang a ba ryat i a̱ ba̱ zzim nkyang nzaan. 47Sa̱rei ba̱nyet ba a̱ yin ku pfong ni a̱ ma ryin diwat ti na̱n byyi taka̱i a̱za̱ncyi iya ni, rot ka̱sak ka na̱ yin ba̱ ssip i ni. 48Ba̱tyyi nu ba ba si ku ryi a̱ ma pyyem bu na̱nu mba na. A̱naa nu a̱ hywa da̱ nu, “Ka̱won nzuk, a̱nzan an byyi an za yya a̱mi? Nzuk ba̱ a̱tyyi nwan nu zi na̱ cat taka̱i cat ani, ka̱wun ka za ya.”

49Yesu a̱ hywa da̱ mba, “A̱nzan a̱ yet a̱nying n cat u? Nyin ma yi bvwo dolet n shyi ka̱ryi A̱tyyi nzuk ka ka̱ni?” 50Ba hok kyang a na̱ ba̱ tyyei ni a̱ bvwong ba.

51Wwon na̱ ba̱ tssup a̱ nat Nazarat u, a̱ si swat ba̱ mba a̱ ba̱ pfong. A̱naa nu nu a̱ tung nkyang ani a̱ sak mpfwa. 52Yesu a̱ rai i rwam, a̱za̱ncyi nu na na mbrang, Ka̱za bu ba̱neywu ba pfong ansham nu.

Currently Selected:

Luka 2: kaj

Highlight

Copy