Luka 3
3
Wa'azi Yohana A̱yya Baptisma
(Matta 3:1-12; Markut 1:1-8; Yohana 1:19-28)
1Ka̱ram iya A̱gwam Rom Tibariyat na̱ yet a̱rya swak ba̱ pfon i dityok ti, Buntut Bilatut na̱ ma̱n yet gwamna Yahudiya, Hirudut na̱ yet a̱gwam ka̱byen Galili, a̱wumba nu Filibut na̱ yet a̱gwam Ituriya bu Tarakunitit, Lisaniyat na̱ yet a̱gwam Abilene. 2Ka̱ram iya brak Hanana bu Kayafat mba a̱ yin yet ba̱cecet ba̱gado Ka̱za ba. Ka̱ram iya Yohana a̱hwai Zakariya na̱ shyi ka̱yit, ba̱ryat Ka̱za a̱ ba da̱ nu. 3Na̱ kat sa̱rei na̱nkrang a a̱ hywot ncen Urdun na ni, a̱ yya wa'azi ba̱nyet a̱ wwon a̱ka̱tukyya mba nu, ba ba̱ yya baptisma, Ka̱za a̱ ga ba̱ tssu a̱ka̱tukyya mba nu. 4Da̱ni di ban jem ka̱yat kpa a̱ntyok tyyei ba̱ryat Ka̱za ka ba yin yei Ishaya ni, a̱ hywa,
“Diwan a̱yanyet n shyi ka̱yat ka̱yit ya tyyei
di yi jyi na̱ta̱ryen A̱gwam Tazwa,
i ta̱twang na̱ta̱ryen nu na.
5Ba ni bap kozan a̱ngam,
a̱ bvwum sa̱rei a̱huhwan na bu tsutsok ji.
Sa̱rei na̱bvwa na a̱ gon ni, dolet ba ni na̱ neyak na tyyi ba̱tuntwang;
na̱bvwa na a̱ byyi ngyep ni ba ni na̱ bvwum.
6Sa̱rei ba̱nyet ka̱sa ba a̱ ni ryi sucet Ka̱za.”
7Rot a̱mi Yohana a̱ hywa di ka̱tswa ba̱nyet ka a̱ cong ba ba̱ yya baptisma nu ni, “Na̱won shon, a̱nyan a̱ ya zzek tyong diryen Ka̱za ti ka ni tom mi ni? 8Nde, yi yya nkyang a ni tyyei ka̱sak ka yin wwon a̱ka̱tukyya nyin nu ni, i ryok ya raai di yi yet na̱mbvon Ibrahim ba. Ka̱ryong n ni ya tyyei: ki Ka̱za a̱ shim, ka brak kpang jini a̱n yya Ibrahim na̱mbvon. 9Ba̱nyying ka̱tssong a̱ wa ka̱n nat atyin na̱kon. Ka̱kon ka a̱ wi sak a̱tsatsak disum ni ba ni ka̱ kprip a̱ tyyi an dong.”
10Ba̱nyet ba a̱ tung ni a̱ ku zzim a̱ hywa, “To, a̱nzan zi ni yya naani ni?”
11Na̱ hywa da̱ mba, “A̱yin nu a̱ byyi ba̱tro ba̱hwa ni na̱ ya ka ba̱ a̱yin nu a̱ sang ni; a̱ntyok byyi kyangya meyang ba̱rimi.”
12Ba̱nyet ssang diga̱ndu a̱ ma̱n ba ba ba̱ yya baptisma, a̱ bu zzim, a̱ hywa, “Malam, a̱nzan zi ni yya?”
13Na̱ hywa da̱ mba, “Yi ryok ssang seyak ka̱nu ka ba ya sak ssang a ni ba.”
14Nsoja i ma̱ nyyai bu ku zzim, “Njit meyang a̱nzan zi ni yya?”
Na̱ hywa da̱ mba, “Yi ryok san krum a̱yin di cet ko di shaida diraa ba. Yi breng kyang a ba ya trang ni di hakuri.”
15Ba̱nyet ba shyi tot, koyan na̱ hwa ki Yohana a̱mi a̱ yet Kristi nu. 16Yohana a̱ hywa da̱ mba ba̱sa̱rei, “Nzuk n ya yya baptisma di ba̱shekwot, ma a̱yanyet a̱n shyi a̱ bai a̱ n da̱u, ko ryik a̱kpatak nu n maai n kpo byyik ba. Nu a̱ ni ya yya baptisma di Tswa Ka̱za bu rong. 17A̱ shyi bu bibyyi tyyet yak a. A̱ ni kpo tyyet a̱ wwon ba̱zizrak a̱ tun tswa ji a̱ tyyi a a̱ngban nu nu, a̱ tung sunsso na a̱n tyyi rong a byyi nom rryik ni ba.”
18Nkyang ani a̱mi bu nzaan ba̱gingang na̱ yin zzek ba̱nyet ba a̱ ba̱ tyyei Ka̱sham Ba̱ryat ka. 19A̱ byat A̱gwam Hirudut a̱zi Hirudiya, a̱mbyring a̱wumba nu nu na̱ yin bvwa ni, ba̱ a̱ka̱tuk nkyang nzaan nu nu Hirudut na̱ yin yya ni. 20Hirudut a̱ bo sin brang a̱ka̱tuk a̱yaan, a̱ pyyem Yohana a̱ tyyi a jaru.
Ba yya Yesu baptisma
(Matta 3:13-17; Markut 1:9-11)
21Ba bu yya ba̱nyet ba baptisma nu, Yesu a̱ ma̱n ba meyang, Yohana a̱ bu ku yya baptisma nu. Yesu na̱ bu shyi i yya a̱duwa, Tazwa ji i yrang, 22Tswa Ka̱za i nyyai da̱ a̱bva ni bu kyrek a̱za̱ nu. Diwan i nyyai Tazwa bu hywa da̱ nu, “Ba̱ nwan yet ka̱won ka n byyi ni, nwan n ni sak rya.”
Ka̱ryi ba̱nyet Yesu ka
(Matta 1:1-17)
23Ka̱ram ka Yesu na̱n tat a̱rya nswak ntat i a̱ nwa pfong nu na. Ba̱nyet ba a̱ yin ku kok da̱ a̱hwai Yusufu ni.
Yusufu meyang a̱ yin yet a̱hwai Heli,
24Heli a̱ yet a̱hwai Matat,
Matat a̱ yet a̱hwai Lawi,
Lawi a̱ yet a̱hwai Malki,
Malki a̱ yet a̱hwai Yanna,
Yanna a̱ yet a̱hwai Yusufu,
25Yusufu a̱ yet a̱hwai Matatiya,
Matatiya a̱ yet a̱hwai Amuna,
Amuna a̱ yet a̱hwai Na̱um,
Na̱um a̱ yet a̱hwai Asali,
Asali a̱ yet a̱hwai Najaya,
26Najaya a̱ yet a̱hwai Ma'ata,
Ma'ata a̱ yet a̱hwai Matatiya,
Matatiya a̱ yet a̱hwai Shim'i,
Shim'i a̱ yet a̱hwai Yuseka,
Yuseka a̱ yet a̱hwai Yahuda,
27Yahuda a̱ yet a̱hwai Yohana,
Yohana a̱ yet a̱hwai Risa,
Risa a̱ yet a̱hwai Zarubabila,
Zarubabila a̱ yet a̱hwai Sha'altilu,
Sha'altilu a̱ yet a̱hwai Niri,
28Niri a̱ yet a̱hwai Malki,
Malki a̱ yet a̱hwai Addi,
Addi a̱ yet a̱hwai Kusama,
Kusama a̱ yet a̱hwai Almadama,
Almadama a̱ yet a̱hwai Ar,
29Ar a̱ yet a̱hwai Yosi,
Yosi a̱ yet a̱hwai Alazarut,
Alazarut a̱ yet a̱hwai Yorima,
Yorima a̱ yet a̱hwai Matat,
Matat a̱ yet a̱hwai Lawi,
30Lawi a̱ yet a̱hwai Simiyan,
Simiyan a̱ yet a̱hwai Yahuda,
Yahuda a̱ yet a̱hwai Yusufu,
Yusufu a̱ yet a̱hwai Yonana,
Yonana a̱ yet a̱hwai Aliyakimu,
31Aliyakimu a̱ yet a̱hwai Malaya,
Malaya a̱ yet a̱hwai Mainana,
Mainana a̱ yet a̱hwai Matat,
Matat a̱ yet a̱hwai Natana,
Natana a̱ yet a̱hwai Dawuda,
32Dawuda a̱ yet a̱hwai Yassa,
Yassa a̱ yet a̱hwai Obida,
Obida a̱ yet a̱hwai Bwaza,
Bwaza a̱ yet a̱hwai Salmuna,
Salmuna a̱ yet a̱hwai Nahashuna,
33Nahashuna a̱ yet a̱hwai Aminadap,
Aminadap a̱ yet a̱hwai Adamin,
Adamin a yet a̱hwai Arama,
Arama a̱ yet a̱hwai Hasaruna,
Hasaruna a̱ yet a̱hwai Farisa,
Farisa a̱ yet a̱hwai Yahuda,
34Yahuda a̱ yet a̱hwai Yakubu,
Yakubu a̱ yet a̱hwai Ishaku,
Ishaku a̱ yet a̱hwai Ibrahim,
Ibrahim a̱ yet a̱hwai Taraha,
Taraha a̱ yet a̱hwai Nahura,
35Nahura a̱ yet a̱hwai Saruja,
Saruja a̱ yet a̱hwai Ra'u,
Ra'u a̱ yet a̱hwai Falaja,
Falaja a̱ yet a̱hwai Abiru,
Abiru a̱ yet a̱hwai Shela,
36Shela a̱ yet a̱hwai Kan'ana,
Kan'ana a̱ yet a̱hwai Arfakshada,
Arfakshada a̱ yet a̱hwai Samu,
Samu a̱ yet a̱hwai Nuhu,
Nuhu a̱ yet a̱hwai Lamaka,
37Lamaka a̱ yet a̱hwai Matushalaha,
Matushalaha a̱ yet a̱hwai Anuhu,
Anuhu a̱ yet a̱hwai Yarada,
Yarada a̱ yet a̱hwai Mahala'ilu,
Mahala'ilu a̱ yet a̱hwai Kan'ana.
38Kan'ana a̱ yet a̱hwai Anosha,
Anosha a̱ yet a̱hwai Shitu.
Shitu a̱ yet a̱hwai A̱damu,
A̱damu a̱ ma̱n yet ka̱won Ka̱za.
Currently Selected:
Luka 3: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
