Luka 15
15
Bvon-tsaap ji i brik ni
(Matta 18:12-14)
1Ka̱ram ka̱yaan ba̱nyet ssang diga̱ndu bu ba̱nyet a̱ka̱tukyya a̱ ba pfong zzek Yesu na. 2Ba̱nyet Farisa bu ba̱malam Truwang ba a̱ nwa kop a̱dyying a̱ hywa, “A̱ntyok a̱ni a̱ wwon ba̱nyet a̱ka̱tukyya gak nu, hat a̱ ya kyangya ba̱ mba.” 3Yesu a̱ ba̱ sook nkhang ani, a̱ hywa,
4“Da̱ni di a̱yin nyin a̱ byyi bvon-tsaap ba̱ nji ncyi, jring i brik, na̱ yya ni? Se na̱ wwon swak a̱kumbvuyring bu a̱kumbvuyring iya ka̱rek a̱tsaai ka a̱ brek a̱ nat cat jring ji i brik ni se a̱ si za̱ shya. 5Ki a̱ si za̱ shya, rot hok ansham na̱ za̱ sook a̱ hwrang a̱mampfwa 6a̱ cot a̱ nat ka̱ryi. A̱ si yei sa̱rei ba̱rywai nu ba bu ba̱nyet ba a̱ swat a̱ ku hywot i a̱ hywa da̱ mba, ‘N gwai n ni shya bvon-tsaap nzuk ji. Yi ba i n brang gwai a.’ 7A̱mi ba nin gwai Tazwa i hywak a̱tuba a̱yring u a̱ wwon a̱ka̱tukyya nu ni a̱ ra̱u ba̱nyet nswak a̱kumbvuyring ba̱ a̱kumbvuyring ba a̱ ya yei ba̱tsatsak ba̱nyet i.”
A̱zurfa nu a̱ brik ni
8“Ka̱ a̱ra̱mbyring a̱ byyi a̱zurfa ba̱nu swak, a̱yring a̱ kpa, a̱nzan na̱ ni yya? A̱ ni tyyi rong an fitila a̱ ryang ka̱ryi ka a̱ cat ba̱shinshwon sei a̱ si shya a̱yring a̱ywu. 9Ki a̱ si shya, na̱ yei ba̱rywai nu ba bu ba̱nyet ba a̱ swat a̱ ku hywot i a̱ hywa da̱ mba, ‘Rya nzuk a sai, n shya a̱zurfa nzuk u a̱ kpa ni. Yi ba n brang gwai a.’ 10A̱mi ba̱pfong Ka̱za ba ba nan gwai ka̱ a̱tuba a̱yring a̱ wwon a̱ka̱tukyya nu nu.”
Ka̱won ka a̱ brik ni a̱ brek
11Yesu a̱ bo ya ka̱son bu nkhang nzaan. “A̱yanyet a̱ yin shyi a̱ byyi na̱won na̱hwa, ba yet zam. 12Ka̱tuk ka̱yaan a̱shishyi nu ka̱yat na̱won ka a̱ hywa da̱ a̱tyyi nu, ‘Baba, n dyi ka̱ssi nzuk ka ka̱yat nkyang nwan ka.’ A̱tyyi nu a̱ ma̱n ba̱ ka nkyang a. 13Ba bvwa na̱ma̱nom, a̱shishyi nu a̱ ryap nkyang nu na a̱ kok krum ji, a̱ nat ka̱byen ka̱yaan gba̱gbang, ka̱ yemi na̱ sin yya dira̱ntong ti. 14Sa̱rei krum nu ji i tyak, zong i si kpa ya ka̱byen ka na̱n shyi ni, na̱nu a̱ bo byyi ko kobo ba. 15Na̱ nat a̱ si swrang ba̱ a̱yanyet a̱yaan i ka̱byen iya, na̱ ku tom di na̱ nat a̱ si ku tssung ba̱la̱de. 16Na̱ cat ya kikam a ba̱la̱de ba a̱ ya ni, ma ba a̱yin nu a̱ ku ryi ni ba. 17Na̱ ma bu tung kap a̱ hywa, ‘Cyang ba̱nyet ba a̱ shyi ba̱ a̱tyyi nzuk u a̱ ku yya mpfong ni, koyan a̱ na ya a̱ yrik a̱ ta, ma nzuk nu cihywat ku ni bvwa!’ 18N ni brek n nat da̱ a̱tyyi nzuk u, n si hywa da̱ nu, ‘Baba, n bvwa Ka̱za a̱bvun, n bo na̱ bvwa a̱bvun. 19N bo maai ba n yei ka̱won nwan ba. Ryok n nwa bu ba̱nyet ba a̱ na̱ yya mpfong a ni.’ ” 20A̱ ta̱za a̱ bvwot a̱ bai ka̱ryi.
“Na̱ bu hyok gba̱gbang, a̱tyyi nu a̱ ku ryi, a̱ hok dizot nu ba̱t. Na̱ tyong ncyi a̱ si ku pyyem a̱ ku krum, 21a̱ hywa da̱ nu, ‘Baba, n bvwa Ka̱za a̱bvun, n bo na̱ bvwa a̱bvun. N bo maai ba n yei ka̱won nwan ba.’ 22A̱tyyi nu a̱ yei ba̱kwwa ba a̱ hywa, ‘Yi gha bu a̱tsatsak ba̱tro bu ku kup i. I ku tyyi sa i ka̱ta̱hrung, i bu ku tyyi a̱kpatak a a̱tak a. 23I nat si shya ka̱banyak ka a̱ byyi rwam ni, i ba bu hywat zi ya i song. 24Rot ka̱won nzuk kani a̱ ka̱n kwu a̱ bo shyek, ka brik ba bvo ka̱ shya.’ Ba nwa ba̱pfo.
25“To, ka̱ram iya a̱yekwo ka̱won nu na̱ ri shyi ka̱yit. Na̱ bu tat shishrek bu ka̱ryi ka a̱ hok byin ba̱ a̱gba, ba̱nyet ba shyi i ba̱pfo. 26Na̱ yei a̱kwwa a̱yring a̱ ku zzim, ‘A̱nzan ba shya a̱mi?’ 27A̱kwwa nu a̱ hywa, ‘A̱shishyi nwan nu a̱mi a̱ brek, baba nyin nu na̱ gwai na̱n brek lafiya, a̱ hwaat ka̱banyak ka a̱ byyi rwam ni ban gwai brek nu na.’ 28A̱yekwo nu a̱ yya diryen a̱ rak nwa na ka̱ryi ka. A̱tyyi nu a̱ ba a̱ bu ku naai. 29Na̱ hywa da̱ a̱tyyi nu, ‘Cyang, a̱rya a̱mang a̱naani n na̱ yya mpfong da̱ a̱kwwa ni, da an ka̱n dak yya kyang a a n tyyi yya ni ba, ma nwan ko bvon a ka̱n pyyem n dyi n hywat n za bu ba̱rywai nzuk ba. 30Ma ka̱won nwan ka a̱ nat bu zwa nwan ji a̱ sin yya dira̱ntong bu ba̱nyring ni ka brek-brek a ka̱ hywat nyak ji byyi rwam ba̱t i.’ 31A̱tyyi nu a̱ hywa, ‘Ka̱won nzuk, kozan ka̱tuk a shyi ba̱ nzuk. Kozan kyang n byyi ku yet nwaan. 32Ma ku yet dolet zi yya dihywa jini i gwai, rot a̱wumba nwan a̱ni a̱ yin kwu na̱ bo shyek; a̱ yin brik, ba bo ku shya.’ ”
Currently Selected:
Luka 15: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
