Luka 16
16
A̱ra̱ntong wakili
1Yesu a̱ bo hywa di na̱won pfong nu na, “A̱yanyet a̱ yin shyi a̱ byyi zwa ba̱t. A̱ shya a̱yanyet na̱ yet wakili a̱ cam nkyang nu na. Ba bu si yya kara wakili na da̱ a̱ yya di nkyang a. 2Na̱ ku yei a̱ hywa da̱ nu, ‘A̱nzan n bo n hok a̱mi tazwa nwa n? N cat a n kok i ka̱sak ka an yya bu nkyang nzuk a ni, rot a bu ni yet wakili nzuk brak ba.’ 3Wakili nu a̱ brek a̱ bu swrang a̱ hwa a̱ hywa, ‘To, a̱nzan n ni yya? A̱ntyok ka̱ryi nzuk u a̱ ni n nyying, da n byyi cet keyak ba, nzuk nuni n pfong nsum naai. 4To, n bvwo kyang a n ni yya ni, n ga bu shya ka̱rek nwa ki ba n nyying, ba̱rywai nzuk ba a̱ si n san i na̱sa mba na.’ 5Na̱ yei ba̱nyet ba a̱ yin breng a̱ta a̱ntyok ka̱ryi nu na ni. A̱ zzim a̱tuba a̱yring u a̱ hywa, ‘A̱mang a̱ntyok ka̱ryi na̱ na̱ tssup?’ 6Na̱ hywa, ‘Dihywu a̱ganga swak ba̱ a̱kitat.’ Wakili nu a̱ hywa, ‘Da̱ nga kpa nwan na, jem ka̱rek diyrek nwan ka a̱ninai.’ 7A̱ bo hywa da̱ a̱tuba a̱yring u, ‘Nwan hwa, a̱mang ba na̱ tssup?’ Na̱ hywa, ‘A̱shasha ncyi.’ Na̱ hywa da̱ nu, ‘Da̱ ma̱ nga kpa nwan na, jem ka̱rek diyrek nwan ka nswak a̱ninai.’ 8A̱ntyok ka̱ryi nu a̱ bu ryi a̱za̱ncyi wakili nu na a̱ sang ka̱ryong ni a̱ ku dyep, rot ba̱nyet ka̱sa bani a̱ byyi a̱za̱ncyi an kyang a ba yya ni a̱ ra̱u ba̱nyet ba a̱ shyi i ka̱bvwa sai ka ni.”
9“Nkpa n ya tyyei, yi yya amfani di a̱ka̱tuk zwa nyin nu n bvei ba̱rywai, rot ka̱ram ka zi bun tyak ni ba si ya san i ka̱ryi Tazwa ka bam bu tyak. 10A̱yin nu a̱ kok tsutswat a a̱cwwang nkyang u ni, ki ba ku sak a̱cecet nkyang u a̱ ni kok tsutswat. A̱yin nu a̱ wi kok tsutswat a a̱cwwang nkyang u ni, ki ba ku sak a a̱cecet nkyang u, a̱ ni kok tsutswat ba. 11To, ki yi kok ka̱ryong bu nkyang ka̱sa na ba, yi ni maai kok ka̱ryong bu nkyang a i yet nying Ka̱za na ni ba. 12Ki yi kok ka̱ryong an kyang a i yet nying a̱yanyet i ba, a̱yin a̱ ni ya ryi kyang a yet nyiin ni ba.”
13A̱ bo ya ka̱son a̱ hywa da̱ mba, “A̱yin a̱n shyi a̱ ni maai yya dikwwa ba̱nyet ba̱hwa ba. A̱ ni rak a̱neyring a̱ cat a̱neyring. Ko na̱ pfong a̱tuba a̱yring a̱ byyai a̱tuba a̱yring u. A̱yin a̱n maai tssup Ka̱za a̱ bo tssup zwa ba.”
Gan zaan ji Yesu na̱ yin dyat i
(Matta 11:12-13; 5:31-32; Markut 10:11-12)
14Ba̱nyet Farisa na ba bu hok kyang a na̱ ryat i a̱ nwa ku jet, rot ba yin yet ba̱nyet cat krum. 15Yesu a̱ hywa da̱ mba, “Nyin a̱mi na cat yet ba̱tsatsak ba̱nyet a a̱ssi ba̱nyet, ma Ka̱za a̱ bvwo ndya nyin na. Rot kyang a ba̱nyet ba cyang ku yet a̱gba̱dang kyang ni, ka̱bvwa Ka̱za ku yet kyang ba.
16“Truwang Musa ji bu nkyang a ba̱nyet tyyei ba̱ryat Ka̱za ba ba yin jem ni a̱ yin yya pfong a̱ bu tat ka̱ram Yohana A̱yya Baptisma. Ma nyyai ka̱ram iya ba shyi tyyei Ka̱sham Ba̱ryat tazwa Dityok Ka̱za ti, koyan na̱ ma̱n tyei ka̱ssi a̱ cat nwa na. 17Ma ku ni yet a̱hyom Tazwa bu ka̱byen a̱ seyak di digo yring ka̱yat Truwang Musa ji i kpa.
18“A̱yin nu a̱ nyying a̱mbyring nu a̱ bo bvwa a̱yaan ni, kan-a̱naan a̱mi na̱n swat. A̱yin nu a̱ bvwa a̱mbyring u ba nyying ni, a̱ ma̱n kan-a̱naan.”
A̱ntyok nzwa bu Lazarut
19“A̱yanyet a̱ yin shyi a̱ byyi zwa ba̱gingang, a̱ tssup na̱sham ba̱tro a̱ bo swat i pfong ansham kozan ka̱tuk. 20A̱yanyet a̱ bo nshyi a̱ yet a̱ntyok dizot a̱ swat ka̱nu ka̱ryi nu ka. Ba yin ku yei Lazarut. Sa̱rei rwam nu na yin yet bu ba̱gap. 21A̱ yin swat a̱n byyi rya a̱ shya nkpikpit nkyangya na yin kwei nyyai an kyangya a̱ntyok nzwa na ni. Na̱bvwu na ma a̱ ri nyyai a̱ bu ryai ba̱gap nu ba. 22A̱ntyok dizot u a̱ bu kwu, ba̱pfong Ka̱za a̱ ku sook a̱ nat ba̱ nu Tazwa, na̱ si swrang bu Ibrahim. A̱ntyok nzwa nu a̱ ma̱n kwu ba ku nyat. 23Na̱ shyi a̱yabyen a̱ sswa ka̱bvung. Na̱ bu yrek a̱ssi tazwa a̱ ryi Ibrahim gba̱gbang na̱ swat bu Lazarut shishrek ba̱ nu. 24Na̱ yei a̱ hywa, ‘A̱tyyi nzuk Ibrahim, hok dizot nzuk i tom Lazarut na̱ si tyyi ka̱ta̱hrung nu ka i ba̱shekwot a̱ bu n dot i i diryem nzuk ti ti gi shrim, rot n sswa ka̱bvung ba̱t ka̱yat ndong kani.’ 25Ibrahim a̱ hywa da̱ nu, ‘Ka̱won nzuk, a bring o? Ka̱ram ka an shyi i ka̱sa ka ni a shya kozan kyang a rya nwan na ku cat i, Lazarut na̱ sswa ka̱bvung; naani na̱ ma̱n shyi i pfong ansham, a ma̱n sswa ka̱bvung ka. 26Ban bu iyemi ma, ba ka̱n tyyi a̱gba̱dang ta̱ncen a̱katyyi nyin ba̱ njit, a̱yin njit a̱ ga wi maai byyek a̱ ba da̱ nyin, da̱ a̱yin na̱n byyek nyyai da̱ nyin a̱ ba da̱ njit ba.’ 27-28A̱ntyok nzwa nu a̱ hywa, ‘To, A̱tyyi, n byyi ba̱wumbeyang ba̱ mba ba̱pfon gbang a̱tyyi nzuk ka; n cat ki a shim a tom Lazarut na̱ si ba̱ kam ba ga ma̱n wi ba ka̱rek ka n nin shyi-shyi naani ni, a̱ bu sswa taka̱i ka̱bvung ani.’ 29Ibrahim a̱ hywa, ‘Ba̱wumbeyang nwan ba a̱ shyi bu kyang a Musa bu ba̱nyet tyyei ba̱ryat Ka̱za ba ba jem ni, di ba hok kyang a ba ni ba̱ tyyei ni.’ 30A̱ntyok nzwa nu a̱ hywa, ‘A̱tyyi nzuk, ba̱nyet iya a̱ maai ba. A̱yin a̱ da ni nat nyyai a̱yabyen ka, ba wwon a̱ka̱tukyya mba nu.’ 31Ibrahim a̱ hywa, ‘Ki ba rak hok Musa bu ba̱nyet tyyei ba̱ryat Ka̱za ba, ko a̱yin a̱ nat nyyai a̱yabyen ka ba ni hok ba.’ ”
Currently Selected:
Luka 16: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
