Markus 11
11
Omahitiro wa Jesus mOjerusalem
(Mt 21:1-11; Lk 19:28-40; Jhn 12:12-19)
1Nowo tji va ri popezu na Jerusalem, movirongo Betfage na Betanie kOndundu yOmiṋinga, Jesus otja hinda ovahongewa vevari 2na tja ku wo: “Twendeye kotjirongo hi na tji tji ri osemba komurungu weṋu. Neṋe tjimanga tji mwa kahita mu tjo mamu kamuna okasinona ku ka kutwa, nu ku ke hi na indu ka kavirirwe. Ke kutureye nu mu ke ete nguno. 3Nu tji pa ningi omundu ngu me mu pura kutja mamu tjitire tjike nao, itjeye Muhona me ke hepa, neye me ke kotora tjimanga.”
4Owo otji va ya nu ave kamuna okasinona momuvanda aka kutwa pomuvero wondjuwo pendje nave ke kutura. 5Novandu tjiva mba kuramene mbo, ve ve pura ave tja: “Okasinona mamu ke kuturire tjike?”
6Owo va zira otja punga ava raerwa i Jesus, novandu ve ve yandjera okuyenda. 7Nokasinona ve ke eta ku Jesus, ave twako ozombanda zawo kombanda yako, nu Jesus e ke kavire. 8Ovandu ovengi va yara ozombanda zawo mondjira, nu varwe va ka otutavi komiti nave tu yara mondjira. 9#Psa 118:25, 26Ovandu mba mba ri komurungu na imba mbu yave ve kongorere va ravaera ave tja: “Hosiana, nga serwe ondaya ingwi ngu meya mena ra Muhona. 10Ouhona wa tate David mbu mau ya, ngau tangwe. Hosiana mokombanda!”
11Jesus weya mOjerusalem, a hiti mondjuwo ya Muhona na tara oviṋa avihe nawa, tjandje nao eyuva ratoko, nu eye novahongewa omurongo na vevari ave i kObetanie.
Jesus ma sengi omukuyumbwa
(Mt 21:18-19)
12Nu mependukirwa, owo tji va zire kObetanie, Jesus wa ri nondjara. 13Eye tja muna omukuyumbwa kokure mbwa ri noviyao, otja ya okukatara kutja nani u nomakuyu. Nungwari tje ya ku wo, ka vazere ko otjiṋa posi yomaso porwe, orondu kari oruveze rwomakuyu. 14Jesus wa tja nai komukuyumbwa: “Okuza ku nai ngaa aruhe ka pena omundu ngu mari ovihape okuza kove.”
Novahongewa ve omambo nga ve ye zuva.
Jesus ma i kondjuwo ya Muhona
(Mt 21:12-17; Lk 19:45-48; Jhn 2:13-22)
15Nowo ve ere mOjerusalem. Nu Jesus wa kahita mondjuwo ya Muhona, na utu okupitisa imba avehe mbu yave randasanene mu yo. Eye wa tjengura oviriro vya imba mbu yave pimbasana ovimariva, novihavero vya imba mbu yave randisa ozonguti, 16nu eye ka yandjerere omundu okukapitisira mo otjiṋa morupanda rwondjuwo ya Muhona. 17#Jes 56:7 Jer 7:11Tjazumba otja honga ovandu a tja: “Momatjangwa mwa tjangwa nai: ‘Ondjuwo yandje mai isanewa kutja ondjuwo yongumbiro koviwaṋa avihe.’ Posi ya eṋe mwe i isa po ondimba yovapunde!”
18Ovapristeri oviuru nozonongo zomambo va zuva omambo nga, nowo otji va paha omuhingo mbu mave zepa na wo Jesus. Owo aave mu tira, orondu otjimbumba atjihe tjovandu tjinga atja himisiwa i omahongero we.
19Nu tja rira ongurova, Jesus novahongewa ve arire tji va zu mo motjihuro.
Omukuyumbwa wa kukuta
(Mt 21:20-22)
20Omuhuka omunene, owo ngunda amave ka wondja meṋe yondjira otji va muna omukuyumbwa mbwi awa kukuta auhe nga komize. 21Petrus wa zemburuka imbi Jesus mbya hungirire, notja tja ku ye: “Muhonge, tara, omukuyumbwa mbwi mbu wa sengire owo mbwi wa kukuta!”
22Jesus wa zira a tja: “Kareye nongamburiro mu Ndjambi. 23#Mt 17:20; 1Kor 13:2Tjiri, me mu raere kutja auhe ngu ma tja kondundu ndji: ‘Zapo mba keriwisire mokuvare,’ nu e hi nakuripura pevari momutima we, nungwari e nongamburiro yokutja ihi tji ma hungire matji tjitwa, otjo matji tjitirwa ye. 24Ami opu me zu okumuraera nai: Atjihe tji mamu ningire mongumbiro, kambureye kutja mwe tji munu, nu otjo matji rire otjeṋu. 25#Mt 6:14, 15Tji mwa kurama okukumba, nu tji mu notjiṋa nomundu, mu isireye kokutja Iho ngu ri meyuru wina e mu isire ozongatukiro zeṋu. 26Orondu eṋe tji mu hi nokuisira ovakweṋu, Iho ngu ri meyuru wina kemee mu isire ozongatukiro zeṋu.”
Ouvara wa Jesus
(Mt 21:23-27; Lk 20:1-8)
27Nowo va kotokere rukwao kOjerusalem. Nu Jesus ngunda ama ryanga mondjuwo ya Muhona, ovapristeri oviuru nozonongo zomambo novanene arire tji ve ya ku ye, 28nave mu pura ave tja: “Oviṋa mbi u vi tjita mouvara watjike? Nu ngwe ku pa ouvara okutjita oviṋa mbi, owaṋi?”
29Jesus wa zira a tja: “Ami wina me mu pura epuriro rimwe uriri, neṋe tji mwe ndji pe eziriro, otji me mu raere kutja mbi nouvara watjike okutjita oviṋa mbi. 30Ombapitisimo ya Johanes ya za mu Ndjambi poo ya za movandu? Ndji zireye.” 31Owo va uta okupatasana oveni ave tja: “Tji twa tja: ‘Ya za mu Ndjambi,’ ma tja: ‘Nu okutjavi tji mu ha kamburire mu Johanes?’ 32Nungwari tji twa tja: ‘Ya za movandu…’ ” Owo aave tira otjiwaṋa, orondu ovandu avehe aave vara Johanes kutja wa ri omuprofete. 33Nowo otji va zira Jesus kutja: “Katu nokutjiwa.”
Jesus opa tjera ku wo: “Nu ami wina otji mbi hi na okumuraera kutja oviṋa mbi ami mbi vi tjita mouvara watjike.”
Currently Selected:
Markus 11: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
