Markus 10
10
Jesus ma hongo ohunga norukupo
(Mt 19:1-12; Lk 16:18)
1Jesus tja za poṋa mbo, wa ya korukondwa rwa Judea, nu a kakonda onḓonḓu Jordan. Notjimbumba otjingi tjovandu tja woronganena pu ye rukwao, neye we ve honga otja tjaa tjiti aruhe.
2Nu Ovafarisei tjiva ve ya ku ye, nave mu roro amave mu pura ave tja: “Pa yandjerwa omurumendu okuisa omukazendu we?”
3Jesus we ve zira nepuriro na tja: “Moses we mu rakiza kutja tjike?”
4 #
Deu 24:1-4; Mt 5:31 Owo ave ziri ave tja: “Moses wa yandjera omurumendu kutja a tjange orutuu rwokuhaṋika, nu a ise omukazendu we.”
5Jesus opa tjera ku wo: “Moses we mu tjangera etwako ndi mena rokutja eṋe muna omitima omikukutu. 6#Gen 1:27; 5:2Omatjangwa opu maye zu okutja: ‘Nungwari kombutiro oviutwa tji vya utwa, Ndjambi we ve utire omurumendu nomukazendu. 7#Gen 2:24Omurumendu opu ma zu okuisa ihe na ina, nu a kakatere komukazendu we, 8nu aveyevari mave rire onyama imwe.’ Nowo otji ve he tji na kurira vevari, nungwari mave rire onyama imwe uriri. 9Ihi tji tja kutwa kumwe i Ndjambi, ape ningi omundu ngu me tji haṋa.” 10Nu tji va ri mondjuwo, ovahongewa ve ve mu pura otjiṋa hi rukwao. 11#Mt 5:32; 1Kor 7:10, 11Eye wa tja ku wo: “Omurumendu auhe ngu ma isa omukazendu we na kupu warwe, eye ma katuka orukupo otja komukazendu we. 12Nu momuhingo tjingewo omukazendu ngu ma isa omurumendu we na kupwa i warwe, eye ma katuka orukupo otja komurumendu we.”
Jesus ma sere ovanatje ondaya
(Mt 19:13-15; Lk 18:15-17)
13Ovandu tjiva va etere ovanatje ku Jesus kokutja eye a ṱune ku wo, nungwari ovahongewa ve va tjaera imba mbe ve eta. 14Jesus tja muna otjiṋa hi, wa pindika na tja kovahongewa ve: “Veseye ovanatje ve ye ku ami, nu amu ve tjaere, orondu ouhona wa Ndjambi owo owaimba mbe ri nao. 15#Mt 18:3Tjiri, me mu raere, auhe ngu hi nokuyakura ouhona wa Ndjambi otja omuatje, kamaa hiti mu wo.” 16Tjazumba eye wa pukata imba ovanatje, a yambeke omake ku wo nu e ve sere ondaya.
Omundu omutumbe
(Mt 19:16-30; Lk 18:18-30)
17Jesus tja pita mondjuwo, nu ngunda amave ka wondja mondjira, arire tji pa utuka omundu worive, a wora ozongoro komurungu we nu e mu pura a tja: “Muhonge Omuwa, hi tjite vi kutja mbi mune omuinyo waaruhe?”
18Jesus we mu zira a tja: “Okutjavi tji motja owami omuwa? Kape nomundu omuwa posi na Ndjambi erike. 19#Eks 20:13; Deu 5:17 Eks 20:14; Deu 5:18 Eks 20:15; Deu 5:19 Eks 20:16; Deu 5:20 Eks 20:12; Deu 5:16Omatwako nga ove mo ye tjiwa: ‘Ko nakuzepa ko; ko nakukatuka ko orukupo; ko nakuvaka ko; ko nakuhungirira ko omukweṋu omahongononeno wovizeze; ko nokutjita ko ovineya; yozika iho na nyoko!’”
20Nu ingwi omundu wa zira a tja: “Omatwako aehe nga ami mbe ye ṱakamisa okuza koumutanda wandje.”
21Jesus we mu tara osemba norusuvero na tja ku ye: “Otjiṋa tji wa hepa i tjimwe uriri. Twende u karandise avihe mbi u na vyo, nu imbi ovimariva u kayandje kovasyona, nove otji mo kara notjihuze meyuru; tjazumba kotoka nu u ye kundjikongorera.” 22Omundu ngwi tja zuva omambo nga wa uruma, nu a i noruhoze, orondu eye tjinga a ri omutumbe tjinene.
23Jesus wa yevayeva movahongewa ve na tja ku wo: “Tjiri, ma rire ouzeu tjinene kovatumbe okuhita mouhona wa Ndjambi!”
24Ovahongewa ve va himisiwa i omambo nga, nungwari Jesus wa hungira komurungu a tja: “Vanatje vandje, tjiri, ouzeu okuhita mouhona wa Ndjambi! 25Oupupu ongamero okuhitira mondovi yonane pomutumbe okuhita mouhona wa Ndjambi.”
26Omambo nga ya himisa ovahongewa tjinene, nave purasana kutja: “Nambano ngu ma sora okuhupisiwa komuinyo owaṋi?”
27Jesus we ve tara osemba na ziri a tja: “Otjiṋa hi ovandu matji ve uru pendje na Ndjambi, orondu eye ke notjiṋa tji tje mu ura.”
28Nu Petrus wa hungira a tja: “Tara, eṱe twa isa oviṋa avihe, nu twe ku kongorera.”
29Jesus arire tja ziri a tja: “Tjiri, me mu raere, auhe ngu ma isa onganda ye; poo omarumbi novangu ve; poo ovaṱena; poo ina; poo ihe; poo ovanatje ve; poo omahi we womakunino mena randje na mena rOmbuze Ombwa, 30eye, nambano mouye mbwi, ma mwine po ovingi potumasere, okutja: Ozonganda, ovangu nomarumbi, ovaṱena, ooina, ovanatje, omahi womakunino pamwe nomatatumisiro omengi; nu mouye wokombunda eye ma kamuna omuinyo waaruhe. 31#Mt 20:16; Lk 13:30Nungwari ovengi nambano mbe ri ovatenga mave karira ovasenina, novengi nambano mbe ri ovasenina, mave karira ovatenga.”
Jesus ma hungire onḓiro ye potutatu
(Mt 20:17-19; Lk 18:31-34)
32Jesus novahongewa ve va ri mondjira amave i kOjerusalem neye ama ka wondja komurungu wawo. Ovahongewa va urumine tjinene, novandu mbaa ve kongorere kombunda va tira. Nu Jesus rukwao wa isanena imba ovahongewa omurongo na vevari peke, nu a utu okuveraera oviṋa mbi mavi tjitwa ku ye, 33nu a tja: “Purateneye, matu i kOjerusalem, ingo Omuna wOmundu oku ma kayandjewa kovapristeri oviuru na kozonongo zomambo. Nowo mave mu pangura kokuṱa, okuzambo ave mu yandja ku imba mbe he ri Ovajuda. 34Nowo mave mu nyekerere, ave mu tjekere omate, ave mu tono, nu ave mu zepa; nungwari meyuva oritjatatu eye ma penduka movakoke.”
Omaningiriro wa Jakobus na Johanes
(Mt 20:20-28)
35Jakobus na Johanes, ovazandu va Sebedeus, ve ya ku Jesus ave tja: “Muhonge, matu vanga kutja u tu tjitire otjiṋa.”
36Jesus we ve pura nai: “Nu mamu vanga kutja mbi mu tjitire tjike?”
37Owo va zira ave tja: “Tu pao kutja tu kahaame puna ove mondjingonekero yoye, umwe kokunene koye, na umwe kokumuho koye.”
38 #
Lk 12:50
Jesus wa tja ku wo: “Kamu nokutjiwa kutja mamu ningire tjike. Mamu sora okunwa otjinwino tjomihihamo ami tji me nu are? Mamu sora okupapitisiwa nombapitisimo ami ndji me papitisiwa na yo are?”
39Owo va zira nai: “Ii, matu sora.”
Jesus wa tja ku wo: “Eṋe, tjiri, mamu nu otjinwino tjomihihamo ami tji me nu, nu mamu papitisiwa nombapitisimo ami ndji me papitisiwa na yo. 40Nungwari ingwi okukahaama kokunene na kokumuho kwandje oko ka kwandje okuyandja. Otuveze hwi otwa imba Ndjambi mba ṱunina.”
41Novahongewa imba ovakwao omurongo tji va zuva otjiṋa hi, va pindikira Jakobus na Johanes. 42#Lk 22:25, 26Jesus ope ve isanena ku ye avehe na tja: “Mamu tjiwa kutja imba mbe varwa kutja ovahonapare woviwaṋa vya imba mbe ha tjiwa Ndjambi ve vi honaparera, nokutja imba mbe ri ovanane vawo, ve nouvara kombanda yavyo. 43#Mt 23:11; Mk 9:35; Lk 22:26Nungwari kape sokukara nao mokati keṋu. Ingwi ngu ma vanga okurira omunene povakwao, u sokurira omukarere wovakwao. 44Nu ngu ma vanga okurira omutenga mokati keṋu, u sokurira omukarere waavehe. 45Orondu nangarire ingwi Omuna wOmundu ke ere okukarerwa, nungwari we era okukarera nokuyandja omuinyo we, u rire onguturiro yovengi.”
Jesus ma verukisa omupoṱu Bartimeus
(Mt 20:29-34; Lk 18:35-43)
46Nowo va vazere mOjeriko. Nu Jesus novahongewa ve notjimbumba otjingi tjovandu ngunda amave zu mo mOjeriko, otji pa haamene omupoṱu wena Bartimeus, omuzandu wa Timeus, meṋe yondjira ama ningire. 47Eye tja zuva kutja oJesus wa Nasaret, wa uta okuravaera a tja: “Jesus, Muna wa David, arikana ndji ṱira otjari!”
48Nu ovandu ovengi ve mu kandaiza ave tja nga mwine. Nungwari eye wa ravaerera ko nomasa a tja: “Muna wa David, arikana ndji ṱira otjari!”
49Jesus wa kurama na tja: “Mu isaneye”. Nowo va isana ingwi omupoṱu nave tja: “Yanḓipara momutima; Sekama, eye me ku isana.”
50Eye otja sekama, a isa ko ongwava ye nu eya ku Jesus. 51Jesus we mu pura a tja: “Mo vanga kutja mbi ku tjitire tjike?”
Ingwi omupoṱu wa zira a tja: “Muhonge, me vanga kutja mbi mune.”
52Jesus we mu raera a tja: “Twende, ongamburiro yoye yeku verura.”
Tjimanga eye wa uta okumuna, nu a kongorere Jesus mondjira.
Currently Selected:
Markus 10: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
