Lukas Ondjiukisiro
Ondjiukisiro
Evangeri ra Lukas ere pOmavangeri aehe nu muna oviṋa ovinanḓengu tjinene mbi he ri mOmavangeri ingo warwe. Tjimuna omahungi nga: Ongwatero ya Johanes Omupapitise (1:5-25, 57-66), Ovarise mba ya kObetlehem okukamuna okanatje Jesus (2:6-20), Jesus mondjuwo ya Muhona ngunda eri omuatje wozombura omurongo nambari (2:41-52), Ondanaukiro ya umwe omurunde ngwa papererwe kotjikoroise puna Jesus (23:40-43), nu wina o mevangeri ndi orini mu mwa tjoziwa omasanekero tjimuna; omutumbe na Lasarus (16:19-31), omusamaria omunatjari (10:25-37), nomuzandu ngwa pandjara (15:11-32).
Evangeri ra Lukas ra haṋika motupa tutano otunene: (1) Ohunga nongwatero ya Jesus, omekuriro we, nomarongerisiro kotjiungura Tje (1:1—4:13); (2) Otjiungura tja Jesus mOgalilea na motukondwa ongondoroka na Galilea (4:14—9:50); (3) Ouyenda wa Jesus kOjerusalem nomahongero we mondjira (9:51—19:27); (4) Otjiungura tja Jesus mOjerusalem na motukondwa ongondoroka na Jerusalem (19:28—21:38); (5) Onḓiro, nombendukiro, nomarondero wa Jesus (22:1—24:53).
Omakondwa omurongo mEvangeri ra Lukas, ye serekarera ouyenda wa Jesus kOjerusalem, ngunda mEvangeri ra Markus eri ekondwa rimwe uriri (Mark 10) nu mEvangeri ra Mateus omakondwa yevari (Matt 19-20). Momuano mbo Lukas u raisa kutja Jesus wa ri nombango yomasa tjinene okuyenda kOjerusalem kutja a kaṱe kotjikoroise poruveze rwetu (9:51; 13:33).
Lukas wa raisa oukahu ondando ye yomatjangero komautiro wEvangeri re. Eye ma vanga Teofilus (na imba ovakongorere va Kristus puna Teofilus) okutjiwa ouatjiri auhe ohunga na Jesus na imbi mbya ungura (1:1-4). Lukas ma raisa Jesus otja Omuyame, nu ngu he ri va Israel porwe, nungwari Omuyame wovandu noviwaṋa avihe mbi kambura mu Jesus (Lk 1:69, 71, 77; 2:10-11; 2:28-32; 19:10; 24:47).
Ehungi rEvangeri ra Lukas ra kaenda komurungu membo rOviungura vyOvaapostele (oro noho nda tjangwa i Lukas). Embo rOviungura vyOvaapostele (1:1-11) rautira mba Evangeri ra Lukas puraandera nu oro ra yanda nombendukiro nomarondero wa Jesus. Ngunda Evangeri ra Lukas ama ri hungire omahitiro wa Jesus mOjerusalem, embo rOviungura vyOvaapostele ma ri raisa omahandjaukiro wOmbuze ombwa ohunga na Jesus, okuza mOjerusalem okuyenda mouye auhe (1:8).
Omakutiro womambo
Ongwatero ya Johanes Omupapitise noya Jesus (1—2)
Oviungura vya Johanes Omupapitise (3:1-20)
Ombapitisimo ya Johanes nokurorwa kwa Jesus (3:21—4:13)
Otjiungura tja Jesus mOgalilea (4:14—9:50)
Okuza kOgalilea okuyenda kOjerusalem (9:51—19:27)
Otjivike otjisenina popezu na mOjerusalem (19:28—23:56)
Ombendukiro, omerimunikisiro, nomarondero wa Muhona (24:1-53)
Currently Selected:
Lukas Ondjiukisiro: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.