Lukas 1
1
Embo ku Teofilus
1Musuverwa Teofilus: Ovandu ovengi va kondja tjinene okutjanga omaserekarerero woviṋa mbya tjitwa mokati ketu. 2Owo va tjanga imbi eṱe mbi twa serekarererwa i imba mba muna oviṋa mbi okuza komautiro wavyo, nu mba zuvarisa ombuze ndji. 3Muingona Teofilus, ami tjinga amba konḓonona oviṋa avihe mbi nawa okuza komautiro wavyo, otjinga ambe ripura kutja okokuwa okukutjangera omahungi nga nawa. 4Ami me tjiti nai kokutja u tjiwe imbwi ouatjiri auhe womambo aehe ngu wa hongwa.
Ongwatero ya Johanes Omupapitise mai zuvarisiwa
5 #
1Eku 24:10
Oruveze Herodes tja ri ombara ya Judea, mwa ri omupristeri wena Sakaria, nu ngwa ri oworupa rwa Abija roupristeri. Ena romukazendu we ra ri Elisabet; eye wina wa zire meṱunḓu ra Aron roupristeri. 6Owo aveyevari va ri ovasemba komurungu wa Ndjambi, nu aave ṱakamisa nawa inga omatwako nomaraerero aehe wa Muhona. 7Nu kava ri novanatje, Elisabet tjinga a ri ongandji; nu aveyevari wina va kurupire tjinene.
8Eyuva rimwe Sakaria ngunda ama ungura oviungura vyoupristeri komurungu wa Ndjambi, moruveze rwotjimbumba tjawo okuungura, 9otja kongaro youpristeri, eye otja toororwa nozohanga kutja a hite mondjuwo ya Muhona, nu a katwimise ovyomoro omuwa. 10Imbi ovyomoro omuwa ngunda amavi twimisiwa, tjandje nao ihi otjimbumba atjihe tjovandu tji ri pendje matji kumbu.
11Omuengeri wa Muhona we riraisa ku ye, a kurama kokunene kwotjipunguhiro tjomatwimisiro wovyomoro omuwa. 12Nu Sakaria tje mu muna, wa uruma nu a tira tjinene. 13Nungwari ingwi omuengeri wa tjere ku ye: “O tira, Sakaria, Ndjambi wa zuvire ongumbiro yoye, nu omukazendu woye Elisabet me ku pandukire omuatje omuzandu, nena re mo mu ruku Johanes. 14Eye ma rire enyando nondjorokero kove, nu ovengi mave nyandere ongwatero ye; 15#Num 6:3orondu eye ma rire omunene komurungu wa Muhona, nu kamaa nu ko omavinu nomanuwa omazeu; nu me urisiwa nOmbepo Ondjapuke ngunda e ri mezumo raina. 16Eye ma kotora Ovaisrael ovengi ku Muhona Ndjambi wawo; 17#Mal 4:5, 6nu ma tengere po Muhona mombepo na momasa otja omuprofete Elia, kokutja a hanganise ooihe novanatje, nokutanaurira ovehinanḓuviro kounongo wovasemba, nokuṱuna otjiwaṋa kutja tji rirongerere omeero wa Muhona.”
18Sakaria wa tjere komuengeri: “Ihi ami me tji tjiwa vi? Ami mba kurupa, nomukazendu wandje wina wa kurupa.”
19 #
Dan 8:16; 9:21 Omuengeri wa zira a tja: “Owami Gabriel! Ami mbi kurama komurungu wa Ndjambi, neye ongwe ndji hindi okuyekuhungira kuna ove, nokukuraera ombuze ombwa ndji. 20Tara, ove mo pata eraka, nu komoo sora okuhungira nga keyuva ndi oviṋa mbi tji mavi tjitwa, mena rokutja ove kokamburire momambo wandje ngu maye rire ouatjiri moruveze nduriro.”
21Ihi otjiwaṋa tjandje nao matji undju Sakaria, nu otja rira otjihimise ku tjo kutja eye wa wombere tjike nai mondjuwo ya Muhona. 22Neye tja pita ka sorere okuhungira kuna wo, nowo otji va muna kutja eye wa munu otjirimunikise mondjuwo ya Muhona, orondu eye wa uta okutjita ovisanekero nomake uriri nu a rire otjikume.
23Nomayuva we wokukarera Muhona mondjuwo ye tji ya manuka, Sakaria arire tja yaruka koye. 24Kombunda yomayuva ngo, omukazendu we Elisabet wa rira otjingundi, nu we rihorekere oure womieze vitano. Ama tja: 25“Nambano Muhona we ndji vatere, notja isa mo ohoṋi yandje mokati kovandu!”
Ongwatero ya Jesus mai zuvarisiwa
26Momueze outjahamboumwe, Elisabet tja ri otjingundi, Ndjambi wa hindire omuengeri Gabriel kotjihuro tji tja ri mehi ra Galilea, tjena Nasaret. 27#Mt 1:18Eye wa etere ombuze komusuko ngwa varekerwe i omurumendu wena Josef, ondekurona yombara David. Nu indi ena romusuko ra ri Maria. 28Omuengeri weya ku ye na tja: “Minikwa, ove ngu wa ingonekwa notjari. Muhona u ri puna ove!”
29Maria wa urumisiwa tjinene i ombuze yomuengeri ndji na himwa kutja omambo nga maye hee tjike. 30Omuengeri wa tjere ku ye: “O tira, Maria, ove wa munu ondjingonekero komurungu wa Ndjambi. 31#Mt 1:21Tara, mo rire otjingundi, nu mo panduka omuatje omuzandu, nu ena re mo mu ruku Jesus. 32#2Sam 7:12, 13, 16; Jes 9:7Eye ma rire omunene, nu ma isanewa Omuna wa Ndjambi wOkombandambanda. Muhona Ndjambi me mu pe otjihavero tjouhona tjaihe mukururume David. 33Nu eye ma honaparere ozondekurona za Jakob otja ombara nga aruhe; nouhona we kamaau yanda ko!”
34Maria wa tja komuengeri: “Otjiṋa hi matji tjitwa vi ami ambi hiya rora okuhakaena nomurumendu?”
35Omuengeri wa zira a tja: “Ombepo Ondjapuke mai ya kombanda yoye, nomasa wa Ndjambi wOkombandambanda maye ungura move. Nu ingwi omuatje omuyapuke ngu ma zu move opu ma zu okuisanewa Omuna wa Ndjambi. 36Tara, omuhoko woye Elisabet wina nai otjingundi tjomuatje omuzandu mongurupiro ye, neye ngu ku za ongandji nambano u nezumo romieze hamboumwe. 37#Gen 18:14Orondu Ndjambi ke notjiṋa tji tje mu ura.”
38Maria wa tja nai: “Owami omukarere wa Muhona; ngape tjitwe ku ami otja punga awa hee.” Nomuengeri arire tja zu po pu ye.
Maria ma kavarura Elisabet
39Kombunda yanao Maria wa hakahana okuyenda kotjirongo tji tja ri mehi rovivanda ra Judea. 40Eye wa kahita mondjuwo ya Sakaria na minike Elisabet. 41Nu Elisabet tja zuva ombinika ya Maria, okanatje arire tji ka nyinganyinga mezumo re; nu ingwi Elisabet omuini we urisiwa nOmbepo Ondjapuke, 42nu a ravaere neraka enene a tja: “Oove omuṋingandu mokati kovakazendu, nu nga serwe ondaya ingwi omukwatwa wezumo roye! 43Otjiṋa otjinene hi matji tjitirwa tjike ku ami kutja ina yo Muhona wandje me yokundjivarura? 44Orondu tara, tjimanga tji mba zu nokuzuva ombinika yoye okanatje otji ka nyinganyinga nenyando mezumo randje. 45Tjiri, oove omuṋingandu ngu wa kambura kutja avihe mbya hungirwa i Muhona kove mavi yenenisiwa!”
Eimburiro ra Maria rondjoroka
46Maria wa tja:
“Omuinyo wandje mau hivirike Muhona,
47nombepo yandje mai yoroka mu Ndjambi,
Omuyame wandje,
48 #
1Sam 1:11
Eye tjinga a tara komukarere
we omuhinanḓengu.
Tara, okuzamba omihoko avihe
mavi ndji isana omuṋingandu,
49tjinga amba tjitirwa oviṋa ovinene
i Ndjambi Omunamasa,
Ena re oro eyapuke;
50otjari tje tji karerera okuza
kozondekurona nga kozondekurona
ku imba mbe nondira ku ye.
51Eye wa ungura oviṋa ovinene nokuoko kwe,
nu wa piza imba mbe ritongamisa
momeripuriro womitima vyawo.
52 #
Job 5:11; 12:19 Wa herura ozombara ozonauvara
kovihavero vyazo vyouhona,
nu wa tongamisa imba ovehinanḓengu.
53Eye we kutisa ovanandjara noviṋa oviwa,
novatumbe wa yarura make nge ri tjo.
54Wa yenenisa omakwizikiro nga
tjitire kootate mukururume,
nu wa vatere Israel, omukarere we.
55 #
Gen 17:7
#
1Sam 2:1-10
Eye wa zemburuka okuṱotjari na Abraham
nozondekurona ze nga aruhe!”
56Maria wa kara oure womieze mangara vitatu puna Elisabet, tjazumba arire tja yaruka koye.
Ongwatero ya Johanes Omupapitise
57Nambano oruveze rwa Elisabet rwokupanduka arire tji rwa yenene, neye wa panduka omuatje omuzandu. 58Ovararanganda novazamumwe ve tji va muna kutja Muhona we mu raisire otjari tje otjinene, arire tji va yoroka pamwe na ye. 59#Lev 12:3Nu meyuva oritjahambondatu owo ve ya okusukareka okanatje nu ave vanga okukeruka ena ra ihe Sakaria. 60Nungwari ingwi ina wa tja: “Kako! Eye ma rukwa ena Johanes!”
61Owo va tja nai ku ye: “Kape na umwe momuhoko woye ngu nena ndo!” 62Tjazumba va ṋanga ihe nave mu pura kutja omuatje eye ma vanga okumuruka tjikwaye.
63Sakaria wa ningira otjitjangero nu a tjanga nai: “Ena re oJohanes!” Nowo avehe arire tji va himwa! 64Tjimanga otjinyo tja Sakarias tja paturuka, neye wa hungira a tanga Ndjambi. 65Ovararanganda na ye avehe arire tji va hara omburuma, nombuze aihe ndji ya zuvaka mehi arihe rovivanda vya Judea. 66Auhe ngwa zuva oviṋa mbi, we ripura na vyo na pura a tja: “Omuatje ngwi ma rire omukwatjike?” Orondu okuuoko kwa Muhona okunamasa tjiri kwa ri kombanda ye.
Eimburiro rondangero ra Sakaria
67Sakaria, ihe ya Johanes, we urisiwa nOmbepo Ondjapuke, neye wa hungira ombuze ya Ndjambi a tja:
68“Nga tangwe, Muhona, Ndjambi wa Israel,
eye tjinga eya okuvatera otjiwaṋa tje nokutjikutura.
69Eye we tu yetere Omukuture omunamasa,
ondekurona yomukarere we David.
70Otja tja kwizikire rukuru novinyo
vyovaprofete ve ovayapuke
71kutja eye me tu yama kovanavita na eṱe,
na kouvara wa imba avehe mbe tu tonda.
72Eye wa tjere ma raisa otjari kootate mukururume,
nu ma zemburuka omerikutiropamwe we omayapuke.
73Wa zikamisa noruyano oruṱakame ku
tate Abraham kutja me tu pe
74okutukutura momake wovanavita na eṱe,
tu mu karere nokuhina okutira
75kutja tu rire ovayapuke novasemba komurungu we
omayuva aehe ngunda atu nomuinyo.
76 #
Mal 3:1
“Nove, muatje wandje, mo isanewa omuprofete
wa Ndjambi wOkombandambanda.
Ove mo tengere po Muhona
okumuṱunina ondjira ye,
77nokuraera otjiwaṋa tje kutja otjo matji yamwa
mokuisirwa ourunde watjo.
78Mena rotjari tja Ndjambi wetu,
ondjerera yeyuva pokupita mai yere
kombanda yetu okuza meyuru.
79 #
Jes 9:2
Okuyandja ondjerera ku imba avehe mbe ri
monḓorera na momuzire wonḓiro,
nokuyatisa ozombaze zetu mondjira yohange.”
80Nu ingwi omuatje we kura na hara omasa morutu na mombepo. Eye wa kara mokuti onguza nga keyuva ndi eye nda raisiwa kotjiwaṋa tja Israel.
Currently Selected:
Lukas 1: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
