Lukas 9

Jesus ma hindi ovahongewa omurongo na vevari

(Mt 10:5-15; Mk 6:7-13)

1Jesus wa isanena pamwe ovahongewa ve omurongo na vevari, nu e ve pe omasa nouvara wokupitisa ozombepo azehe ozohakohoke nokuverukisa omitjise. 2Tjazumba otje ve hinda okukazuvarisa ouhona wa Ndjambi, nokuverukisa ovavere, 3indu tja za nokutja nai ku wo: “Mouyenda weṋu ngaamu roro amu twaerere otjiṋa kutja; okati, poo ondjaṱu yondjira, poo ovikurya, poo ovimariva, nu noho amu toora ozombanda mbari. 4Ngamwa akuhe ku mamu kayakurwa kareye mondjuwo tjingeyo ndjo nga tji mwa zu mo motjirongo ho; 5#Oviu 13:51#Lk 10:4-11akuhe ovandu ku ve hi nokumuyakura piteye motjirongo ho, nu mu pume oruuma kozombaze zeṋu a rire omaronga ku wo.”

6Ovahongewa otji va karyanga movirongo avihe amave zuvarisa Ombuze Ombwa, nu amave verukisa ovavere koṋa akuhe.

Herodes wa kurunga momuinyo

(Mt 14:1-12; Mk 6:14-29)

7 # Mt 16:14; Mk 8:28; Lk 9:19 Herodes, omunane wOrukondwa rwa Galilea, wa zuvire oviṋa avihe mbyaa vi tjitwa, nu arire tja himwa tjinene kutja nga tjite vi, orondu ovandu tjiva aave tja: “OJohanes Omupapitise ongwa penduka movakoke.” 8Tjiva aave tja: “OElia ongwa munika,” varwe aave tja: “Omuprofete umwe wa imba ovakuru ongwa penduka movakoke.” 9Herodes wa tjere: “Johanes ami mba kondisa otjiuru; nu nambano ingwi woviungura mbi ngu me zuu owaṋi?” Neye wa kondjere okumuna Jesus.

Jesus ma parura ovarumendu omayovi yetano

(Mt 14:13-21; Mk 6:30-44; Jhn 6:1-14)

10Ovaapostele va kotoka nave serekarerere Jesus avihe mbi va katjitire. Eye we ve toora e ve twara peke kotjirongo tjena Betsaida. 11Otjimbumba tji tja zuva otjiṋa hi tje mu kongorera. Eye we tji yakura, e tji serekarerere ohunga nouhona wa Ndjambi nu a verukisa avehe mbaa ve hepa omberukiro.

12Neyuva tji ratoko ovahongewa omurongo na vevari ve ya ku ye nave tja: “Raera ovandu kutja ve yaruke, ve yende kovirongo na kotukondwa ongondoroka kutja ve kapahe ovikurya no poṋa pu mave sekire, orondu eṱe mba tu ri mokuti.”

13Nungwari Jesus wa tjere ku wo: “Eṋe oveni ve pee ovikurya ve rye.”

Owo va zira ave tja: “Eṱe tu na ozomboroto ndano nozohi mbari uriri. Mo vanga kutja tu karandere otjimbumba atjihe hi ovikurya po?” 14Nu poṋa mbo pa ri ovarumendu mangara omayovi yetano.

Jesus wa tja kovahongewa ve: “Haamiseye ovandu movimbumba omirongo vitano pekepeke.”

15Ovahongewa tji va za nokuhaamisa ovandu, 16Jesus arire tja toora inḓa ozomboroto ndano nozohi mbari, a tara keyuru, e ze sere ondaya, e ze koyora ne ze yandja kovahongewa kutja ve ze haṋe movandu. 17Novandu avehe va rya nave kuta, noutekero mbwa hupa po ovahongewa ve urisa na wo ovimbamba omurongo na vivari.

Petrus ma hongonona Jesus

(Mt 16:13-19; Mk 8:27-29)

18Eyuva rimwe Jesus ngunda ama kumbu erike, ovahongewa ve ya ku ye, neye we ve pura a tja: “Ovandu ve tja ami owami aṋi?”

19 # Mt 14:1, 2; Mk 6:14, 15; Lk 9:7, 8 Owo va zira ave tja: “Tjiva ve tja oove Johanes Omupapitise. Tjiva ve tja oove Elia, nu varwe ve tja oove umwe wovaprofete imba ovakuru ngwa penduka movakoke.”

20 # Jhn 6:68, 69 Eye we ve pura a tja: “Neṋe mu tja owami aṋi?”

Petrus wa zira nai: “Oove ngu u ri Omutwirisiwa wa Ndjambi.”

Jesus ma hungire ondatumisiro nonḓiro ye

(Mt 16:20-28; Mk 8:30—9:1)

21Jesus we ve rakizire oukukutu kutja ave ha tjivisa otjiṋa hi komundu. 22Eye wina wa tja ku wo: “Omuna wOmundu ma sokuhihamisiwa tjinene, nu ma sokunakaurwa i ovanene novapristeri oviuru nozonongo zomambo. Eye ma ṱu, nungwari kombunda yomayuva yetatu eye ma penduka.”

23 # Mt 10:38; Lk 14:27 Nu eye wa tja nai ku wo avehe: “Auhe ngu ma vanga okundjikongorera, nge rizembe omuini, a toore otjikoroise tje eyuva arihe, nu e ndji kongorere. 24#Mt 10:39; Lk 17:33; Jhn 12:25Orondu ingwi auhe ngu ma vanga okuyama omuinyo we omuini me u pandjarisa, nungwari ingwi ngu ma pandjarisa omuinyo we mena randje eye me u yama. 25Pe nombatero yatjike omundu okukara noviṋa avihe mouye auhe, nungwari eye omuini a pandjara? 26Omundu ngu ma ṱohoṋi na ami nomambo wandje, Omuna wOmundu wina otjinga ama ṱohoṋi na ye indu tji meya mounene we, na mounene wa Ihe na imbwi wovaengeri ovayapuke. 27Tjiri, me mu raere, mokati kaimba mba kurama mba mu na tjiva mbe hi na maave ṱu ngunda ave hiya muna ouhona wa Ndjambi.”

Ondjitukiro ya Jesus

(Mt 17:1-8; Mk 9:2-8)

28Kombunda yomayuva mangara hambondatu Jesus tja za nokuhungira omambo nga, arire tja toora Petrus na Johanes na Jakobus, nu ave karonda kondundu okukakumba. 29Nu ngunda ama kumbu, ombunikiro yomurungu we arire tji ya tjituka, nozombanda ze aze rire ozombapa twee. 30Tjimanga pa ri ovarumendu vevari mbaa ve hungire kuna ye. Owo va ri Moses na Elia, 31nu va munika mouyere amave hungire kuna Jesus imbwi omuhingo eye mbu ma yenenisa na wo ombango ya Ndjambi, indu tji ma kaṱira mOjerusalem. 32Petrus novakwao vari mozomboṱu ozonḓeu, nu tji vayanḓimuka va muna Jesus mouyere we novarumendu vevari mba kuramene pu ye. 33Novarumendu vevari mba ngunda amave rirongerere okuyenda, Petrus wa tja ku Jesus: “Muhona, okokuwa eṱe okukara mba. Ngatu tunge oviranda vitatu: Tjimwe tji rire otjoye, tjimwe tji rire otja Moses, tjimwe tji rire otja Elia.” Eye kaa tjiwa kutja ma hungire tjike.

34Nu Petrus ngunda ama hungire, kwe ya otjikamba tji tje ve pa omuzire; novahongewa va toora emuma, ihi otjikamba ngunda ama tji ya kombanda yawo. 35#Jes 42:1; Mt 3:17; 12:18; Mk 1:11; Lk 3:22#2Pt 1:17, 18Motjikamba mwa za eraka nda tja: “Ingwi eye Omuna wandje ngu mba toorora; purateneye ku ye!”

36Neraka tji ra za nokuhungira, Jesus wa munika e ri erike. Ovahongewa va mwina, nu momayuva ngo kave hungirire komundu okaṋa nangarire kemwe kaimbi mbi va mwine.

Jesus ma verukisa omuzandu ngu nombepo ohakohoke

(Mt 17:14-18; Mk 9:14-27)

37Nu mependukirwa, Jesus novahongewa vetatu mba va heruka kondundu, notjimbumba otjinene tjovandu tja hakaena na Jesus. 38Omundu umwe motjimbumba hi wa ravaera a tja: “Muhonge, ami me riyarikaṋa kove, tara notjari komuzandona wandje! 39Ombepo i mu kambura, neye tjimanga otje ura, a horo orutu aruhe nga tji ma eta etutu kotjinyo. Oyo i kara pokumuhihamisa, nu tjandje okumwesa ouzeu! 40Ami mbe riyarikaṋa kovahongewa voye kutja ve pitise ombepo ndji, nungwari owo kave yenenene!”

41Jesus wa zirire a tja: “Muhoko okehinangamburiro nokapuke! Me kara puna eṋe nga ruṋe? Me kara nomuretima na eṋe nga ruṋe?” Okuzambo arire tja tja komurumendu: “Eta ingwi omuatje woye imba.”

42Omuzandu ngunda ama etwa, ombepo ohakohoke ye mu vanda pehi nai mu undurire pozombaze za Jesus. Nu Jesus wa rakiza nomasa tjinene indji ombepo ohakohoke, a verukisa omuzandu ne mu yarura ku ihe. 43Ovandu avehe mba ri mbo va himisiwa i omasa omanene wa Ndjambi.

Jesus ma hungire onḓiro ye rukwao

(Mt 17:22-23; Mk 9:30-32)

Ovandu ingee ngunda ava himisiwa i oviṋa Jesus mbya tjita, eye wa tja nai kovahongewa ve: 44“Ṱakamiseye nawa omambo nga ngu me mu raere momitima vyeṋu! Omuna wOmundu ma yandjewa momake wovandu.” 45Nungwari ovahongewa kaave tjiwa kutja omambo nga maye hee tjike. Omaheero wawo ya horekerwe ku wo kokutja ave ha zuu, nungwari okumupura omambo ngo tjandje mave tira.

Ngu ri omunenenene owaṋi?

(Mt 18:1-5; Mk 9:33-37)

46 # Lk 22:24 Nu pa kara ozombata pokati kovahongewa zokutja owaṋi pu wo avehe ngu ri omunenenene. 47Jesus aa tjiwa imbi mbi mave ripura, notja kambura okanatje ne ke kuramisa meṋe ye, 48#Mt 10:40; Lk 10:16; Jhn 13:20na tja ku wo: “Ingwi ngu ma sekirisa okanatje kemwe otja inga mena randje, ma sekirisa ami; nu ingwi ngu ma sekirisa ami, wina ma sekirisa ingwi ngwe ndji hinda. Orondu ingwi ngu ri okaṱiṱi pu eṋe amuhe onguri omunenenene.”

Ingwi ngu hi nokumurwisa eye u ri puna eṋe

(Mk 9:38-40)

49Johanes wa hungirire a tja: “Muhona, eṱe twa munu omundu ama ungurisa ena roye okupitisa na ro ozombepo ozohakohoke, neṱe otji twe mu tjaere, eye tjinga e he ri owapuna eṱe.”

50Jesus wa tja ku ye na kovahongewa ovakwao: “Amu mu tjaere, orondu ingwi ngu hi nokumurwisa u ri puna eṋe.”

Otjirongo tjOvasamaria matji panḓa okuyakura Jesus

51Nomayuva wa Jesus wokutja a twarewe keyuru tji ya ri pokuyenena, eye arire tja tye okuyenda kOjerusalem. 52Eye wa hindire ovahindwa komurungu we, nowo va kahita motjirongo tjOvasamaria okukemuṱunina oviṋa avihe. 53Nungwari ovandu votjirongo ho kave mu yakurire, owo tjinga ava muna kutja eye uri mondjira okuyenda kOjerusalem. 54#2Ozo 1:9-16Ovahongewa mba Jakobus na Johanes tji va muna otjiṋa hi va tja nai: “Muhona, movanga kutja tu isane omuriro u rauke okuza keyuru okuningirisa ovandu mba?”

55Jesus wa tanauka okutara ku wo ne ve raere omambo omakukutu. 56Tjazumba Jesus novahongewa ve arire tji va i kotjirongo tjarwe.

Ovakongorere va Jesus ooveṋe?

(Mt 8:19-22)

57Nowo ngunda amave kayenda mondjira, omundu umwe wa tja ku Jesus: “Ami me ku kongorere ngamwa akuhe ku mo i.”

58Jesus wa tjere ku ye: “Ozombandje ze nomiṋa, nozonḓera ze noviruwo, nungwari Omuna wOmundu ke nopoṋa puma twa otjiuru okurangavara nokusuva.”

59Nu komukwao warwe eye wa tja: “Ndji kongorera!”

Nungwari omundu ngo wa zira a tja: “Muhona, ko tji ndji esa mbi kapake tate rutenga.”

60Jesus wa zira: “Isa ovaṱi ve pake ovaṱi vawo oveni. Ove twende u kazuvarise ouhona wa Ndjambi.”

61 # 1Ozo 19:20 Nomundu warwe wa tja nai: “Ami me ku kongorere, Muhona; nungwari ndji yandjera kutja rutenga mbi kavirikize kovazamumwe vandje konganda.”

62Jesus wa tja ku ye: “Auhe ngwa twako omake we kotjipuruu, nu tjazumba a panḓere pokutara kombunda, eye ka pwire ouhona wa Ndjambi.”

Currently Selected:

Lukas 9: HRR-UNI

Highlight

Copy