Lukas 10

Jesus ma hindi imba Omirongo Hambombari na Vevari

1Kombunda yoviṋa mbi Jesus wa toorora ovarumendu ovakwao omirongo hambombari na vevari ne ve hindi vevari na vevari komurungu we kovirongo avihe na koṋa ngamwa akuhe eye omuini ka ri ama i. 2#Mt 9:37, 38Eye wa tjere ku wo: “Omakondero wovihape omanene, posi ya imba ovaungure ombe hi nanḓengu. Kumbeye komuini womakondero kutja a hinde ovaungure mbu mave kondo ovihape vye. 3#Mt 10:16Twendeye! Ami me mu hindi otja ozondjona mokati kozombungu. 4Nu amu twaerere ovimariva poo ondjaṱu yondjira poo epanda rarwe rozongaku; amu korisa omundu mondjira. 5Aruhe tji mamu hiti mondjuwo, rutenga itjeye nai: ‘Ohange ngai kare nondjuwo ndji!’ 6Nu mu yo tji mwa tura omundu wohange, ombinika yeṋu yohange ngai kare kombanda ye, nungwari tje he ri nao, ohange mai kotoka ku eṋe oveni. 7#1Kor 9:14; 1Tim 5:18Kareye mondjuwo tjingeyo ndjo amamu ri nokunwa imbi mbi mamu pewa, orondu omuungure wa pwa okupewa ondjambi ye. Nu amu ryangere mozondjuwo pekepeke. 8Tji mwa hiti motjirongo novandu ave mu sekirisa, ryee ngamwa atjihe tji mave mu pe, 9verukiseye ovavere motjirongo ho, nu mu tje nai kovature vatjo: ‘Ouhona wa Ndjambi weya popezu na eṋe.’ 10#Oviu 13:51Nungwari tji mwa hiti motjirongo novandu ave he mu sekirisa, twendeye momivanda vyatjo mu katje nai: 11#Mt 10:7-14; Mk 6:8-11; Lk 9:3-5‘Nangarire indwi oruuma rwotjirongo tjeṋu ndwa kakatere kozombaze zetu, matu ru pukumunine mu eṋe otja otjiraisiro. Nungwari tjiweye kutja ouhona wa Ndjambi weya popezu na eṋe!’ 12#Gen 19:24-28; Mt 11:24 Mt 10:15Tjiri, me mu raere, meyuva rombanguriro Ndjambi ma tjariparere Sodom okukapita otjihuro ho!

Ovirongo ovihinangamburiro

(Mt 11:20-24)

13 # Jes 23:1-18; Esek 26:1—28:26; Joel 3:4-8; Amos 1:9, 10; Sak 9:2-4 “Owee kove, Korasin! Owee kove, Betsaida! Andakuzu ovihimise mbya tjitirwa mu eṋe vya tjitirwa mOtirus na kOsidon, andakuzu ovature vavyo va zara rukuru ozombanda zomakutu nokurisisira omutwe okuraisa kutja owo ve ritanaura kourunde wawo! 14Meyuva rombanguriro Ndjambi ma tjariparere Tirus na kOsidon tjinene okukapita eṋe. 15#Jes 14:13-15Nove, Kapernaum, mo tjangovasi mo tongamisiwa nga keyuru po? Ka tji pe ri, ove mo nakaurirwa pehi nga motjovasengwa!”

16 # Mt 10:40; Mk 9:37; Lk 9:48; Jhn 13:20 Jesus wa tja kovahongewa ve: “Ingwi ngu ma puratene ku eṋe ma puratene ku ami; nu ingwi ngu ma nyengwa eṋe ma nyengwa ami; nu ingwi ngu ma nyengwa ami, ma nyengwa ingwi ngwe ndji hinda.”

Omakotokero wa imba Omirongo Hambombari na Vevari

17Nu imba omirongo hambombari na vevari va kotokere nenyando enene, nu ave tja: “Muhona, nangarire inḓa ozombepo ozohakohoke za ri nonḓuviro ku eṱe, tji twe ze pitisa mena roye!”

18Jesus we ve zirire a tja: “Ami mba muna Satan amau okuza keyuru otja orutjeno rwombura. 19#Psa 91:13Purateneye! Ami mbe mu pa ouvara okuyata ozonyoka nozondje nokukara nomasa tjinene kombanda yomunavita, nu kape notjiṋa tji matji mu hihamisa. 20Nungwari amu yoroka mena rokutja ozombepo ozohakohoke ze nonḓuviro ku eṋe, posiya yorokee mena rokutja omana weṋu ya tjangwa meyuru.”

Mu Jesus mu nenyando

(Mt 11:25-27; 13:16-17)

21Nu moiri tjingeyo ndjo Jesus wa yoroka mOmbepo Ondjapuke na tja: “Me ku tjere okuhepa, Tate, Omuhona weyuru nehi, kutja wa undika oviṋa mbi kozonongo na kovanazondunge, nu we vi vandururira ounatje ouṱiṱi. Ii, Tate, indji oyo ondja ri ombango yoye kutja pe kare nao.

22 # Jhn 3:35 Jhn 10:15 “Oviṋa avihe Tate we vi yandja ku ami. Kape na ngu ma tjiwa kutja Omuna owaṋi posi na ihe, nu kape na ngu ma tjiwa kutja Ihe owaṋi posi yOmuna na imba Omuna omuni mba toorora okuvevandururira.”

23Jesus novahongewa ve ngunda averi peke, eye, wa tanaukira kuwo na tja: “Tjiri, oweṋe ovaṋingandu okumuna oviṋa mbi mamu munu! 24Me mu raere kutja ovaprofete nozombara ozengi va vangere okumuna oviṋa mbi mamu munu, nungwari owo kave vi mwine ko, nokuzuva imbi mbi mamu zuu, nungwari kave vi zuvire ko.”

Omasanekero wOmusamaria omunatjari

25 # Mt 22:35-40; Mk 12:28-34 Onongo imwe yOmatwako ye ya ku Jesus, nu mokuvanga okumupata momambo arire tji ye mu pura ai tja: “Muhonge, me sokutjita tjike kutja mbi mune omuinyo waaruhe?”

26Jesus wa zira a tja: “MOmatwako mwa tjangwa vi? Nu u resa mo tjike?”

27 # Deu 6:5 Lev 19:18 Indji onongo ya zira ai tja: “Suvera Muhona, Ndjambi woye, nomutima woye auhe, nomuinyo woye auhe, nomasa woye aehe, nozondunge zoye azehe; nu suvera omukweṋu otja tji we risuvera omuini.”

28 # Lev 18:5 Jesus wa zira a tja: “Ove wa ziri nawa, tjita nao nu mo kara nomuinyo.”

29Nungwari omuhonge wOmatwako wa vanga okuritwa pouwa, narire tja pura Jesus a tja: “Nu ingwi omukwetu owaṋi?”

30Jesus wa zirire a tja: “Omundu worive wa ka wondja okuza kOjerusalem okuyenda kOjeriko, narire tja hakaene novapunde; owo ve mu hukura ozombanda, ave mu tono nave mu esa nokamuinyo okaṱiṱi ohinga kokuṱa. 31Omupristeri umwe wa twarere ondjira ndjo, nungwari eye tje mu muna wa konda ondjira munda warwe na kapita. 32Nu Omulevi wina ngwe ere mbo we mu muna, nu arire tja kapita uriri kokure. 33#2Eku 28:15Nungwari Omusamaria worive ngwa ri mouyenda weya popezu na ye, nu tje mu muna otje mu ṱira ondjenda tjinene. 34Eye weya ku ye, a tirire ko omaze nomavinu kovirwaro vye ne vi kutu; tjazumba wa twa ingwi omundu kotjikavirwa tje omuini ne mu twara kondjuwo yovayenda, e kemuhunga. 35Nu mependukirwa, Omusamaria wa nana ovimariva vivari ovisilveri, e vi yandja komuini wondjuwo yovayenda na tja ku ye: ‘Hunga omundu ngwi, noviṋa avihe mbi mo manene mu ye posi yaimbi me yokukusuta tji mba kotoka.’

36“Nambano mu imba ovetatu mba ove ngu mo munu kutja wa ri omukwao waingwi ngwa wira momake wovapunde, eye ngwi ouṋe?”

37Omuhonge wOmatwako wa zira a tja: “Eye ngwi ngwe mu tjitira otjari.”

Jesus wa zira a tja: “Twende, nu ove wina katjite nao.”

Jesus ma kavarura Marta na Maria

38 # Jhn 11:1 Jesus novahongewa ve ngunda averi mouyenda wawo, eye weya potjirongo tjorive; nu omukazendu wena Marta we mu sekirisa moye. 39Marta wa ri nomuangu wena Maria; nu ingwi Maria wa haamene pozombaze za Muhona ama puratene komahongero we. 40Marta we rikenda noviungura avihe mbya sokuungura, notja sekama na tja: “Muhona, ove ko na ko na tja kutja omuangu wandje me ndji tarere ame ungura oviungura avihe erike po? Mu raera e ndji vatere!”

41Muhona we mu zira a tja: “Marta, Marta! Ove mo rikende nu mo kurungisiwa i oviṋa ovingi, 42nungwari otjihepwa itjimwe uriri. Maria we ritoororere ihi otjinanḓengu tjinene nu ka pena ngu ma yenene okumuyeka tjo.”

Currently Selected:

Lukas 10: HRR-UNI

Highlight

Copy