Lukas 8

Ovakazendu mbaa ve kongorere Jesus

1Kombunda yanao Jesus wa ryangere movihuro na movirongo ama zuvarisa Ombuze Ombwa youhona wa Ndjambi. Ovahongewa mba omurongo na vevari va ya puna ye, 2#Mt 27:55, 56; Mk 15:40, 41; Lk 23:49novakazendu tjiva wina mu mwa pitisirwe ozombepo ozohakohoke na mba verukisirwe komitjise. Mu wo mwa ri Maria, ngwaa isanewa Magdalena, mu mwa pitisirwe ozombepo ozohakohoke hambombari, 3na Johana, omukazendu wa Kusa; Kusa wa ri omutarere mondjuwo ya Herodes; na Susana, novakazendu ovakwao varwe ovengi mbaa ve vatere Jesus novahongewa ve nouini wawo oveni.

Omasanekero womukune

(Mt 13:1-9; Mk 4:1-9)

4Ovandu aave ya ku Jesus okuza kovirongo pekepeke, notjimbumba otjinene tji tja woronganene, Jesus arire tja serekarere omasanekero nga:

5“Eyuva rimwe omukune wa ire okukakuna ovikokotwa. Neye ngunda ama kunu ozondwi motjikunino, tjiva za wira meṋe yondjira naze yatwa, nozonḓera aze ze ri. 6Tjiva za wira mehi romawe, nozo tji za pita za hakahana okukukuta, ehi tjinga ari ha ri noutaazu. 7Ozongwao za wira mokati kozohongwe; nozohongwe za hapa naze ṋee inḓa ozondwi. 8Ozondwi tjiva za wira mehi ewa, nozo za hapa aze twako ovikokotwa, aihe peke esere rimwe.”

Nu Jesus wa mana nomambo nga: “Ngu nomatwi okuzuva nga zuve.”

Omaheero womasanekero

(Mt 13:10-17; Mk 4:10-12)

9Ovahongewa va Jesus ve mu pura kutja omasanekero nga maye hee tjike, 10#Jes 6:9neye wa zira a tja: “Eṋe mwa pewa okutjiwa oviundikwa vyouhona wa Ndjambi, nungwari imba ovandu varwe mave raerwa momasanekero, kokutja owo nandi va tara ave ha munu, nu nandi va putaratene ave ha zuu.

Jesus ma handjaura omasanekero womukune

(Mt 13:18-23; Mk 4:13-20)

11“Nambano omaheero womasanekero owo nga: Ozondwi ozo embo ra Ndjambi. 12Ozondwi inḓa nḓa wira meṋe yondjira ozo maze kuramenepo ovandu mba mbe zuva indi embo, nungwari Satan eya, nu a hakana embo ndi momitima vyawo, kokutja ave ha kambura nu ave ha yamwa. 13Ozondwi nḓa nḓa wira mehi romawe ozo maze kuramenepo ovandu mba mbe zuva indi embo nave yakura ro nenyando. Nungwari embo ndi kari hara omize mu wo; owo ve kara nongamburiro okaruveze okasupi uriri, nu omarorero tji ye ya ave poka kembo ndi. 14Ozondwi nḓa nḓa wira mokati kozohongwe ozo maze kuramenepo ovandu mba mbe zuva indi embo; nungwari omerikendero noutumbe nomananukiro woviṋa vyouye mbwi vi ya mu wo navi ṋee indi embo, nu ari ha twamo ovihape mu wo. 15Nozondwi nḓa nḓa wira mehi ewa maze kuramenepo ovandu mba mbe zuva indi embo nave ṱiza ro momitima omiwa nominanḓuviro, nowo ve ṱakama mu ro, nave kara novihape.

Emunine ndi ri kehi yotjitjuma

(Mk 4:21-25)

16 # Mt 5:15; Lk 11:33 “Kape nomundu ngu yakisa emunine, tjazumba a kutjire ko otjitjuma poo a twa kehi yombete. Moruveze rwanao eye me ri twa kotjikurameno tjomamunine kutja ovandu tji mave hiti ve mune ondjerera.

17 # Mt 10:26; Lk 12:2 “Otjiṋa atjihe tji tja horekwa maatji horoka, nu ngamwa atjihe tji tja vandekwa maatji vandururwa, nu atji ya komurungu waavehe.

18 # Mt 25:29; Lk 19:26 “Ṱakamiseye nawa kutja mamu puratene vi, orondu ingwi ngu notjiṋa, eye ma wezirwako komeho, nu ingwi ngu hi notjiṋa ma yekwa nangarire inga okaṱiṱi ku ma tjangovasi u na ko.”

Ina nOvazamumwe va Jesus

(Mt 12:46-50; Mk 3:31-35)

19Ina novangu va Jesus ve ere ku ye, nungwari owo kave sorere okuvaza ku ye mena rouingi wovandu. 20Nomundu umwe wa hepurira Jesus a tja: “Nyoko novangu voye va kurama pendje nu mave vanga okukumuna.”

21Jesus wa tja nai ku wo: “Mama novangu vandje owo ovandu mba mbe zuva embo ra Ndjambi nave yenenisa ro.”

Jesus ma porimanisa otjivepo

(Mt 8:23-27; Mk 4:35-41)

22Eyuva rimwe Jesus wa rondere mokayaha puna ovahongewa ve na tja ku wo: “Ngatu konde munda mbwina yomuronga.” Nowo arire tji va i. 23Nu ngunda amave kayenda, Jesus arire tja rara. Tjimanga kwa hinga otjivepo otjinamasa momuronga, nokayaha ka uta okuura omeva nga owo tji va kara moumba ounene. 24Ovahongewa va ya ku Jesus na ve mu pendura amave tja: “Muhona, Muhona! Eṱe matu ṱu!”

Jesus wa penduka na rakiza otjivepo nozongazona; ovyo vya porimana, aku mwina aku tja nyee. 25Tjazumba Jesus otja tja nai kovahongewa ve: “Ongamburiro yeṋu i pi?”

Nungwari owo va tira nave himwa, notji va purasana ave tja: “Hapo omundu ngwi owaṋi? Eye u rakiza ovivepo nozongazona, novyo avi mu zuu!”

Jesus ma verukisa omundu ngu nozombepo ozohakohoke

(Mt 8:28-34; Mk 5:1-20)

26Jesus novahongewa ve va kondere omuronga ave i kehi ra Gerasa, nda ri ozombarakana na Galilea. 27Jesus tja heruka pomukuro, wa hakaena nomurumendu ngwaa zu kotjirongo ho, nu ngwa ri nozombepo ozohakohoke. Omurumendu ngwi wa kara orure muzu, nu kaa kara monganda, nungwari aa kara momaendo. 28Neye tja munine Jesus, wa ura, a u kozongoro komurungu we na ravaere neraka enene a tja: “Jesus, Muna wa Ndjambi wOkombandambanda, otjiṋa tji u na tjo na ami otjikeṋa? Me riyarikaṋa kove, o ndji hihamisa!” 29Eye wa hungira omambo nga Jesus tjinga a rakizire ombepo ohakohoke kutja i ze mo mu ye. Potuingi ombepo ndji aa i mu kambura, nu nandarire kutja eye aa pandekwa omake nozombaze nouketanga okumutjevera, aa i timbura inga omapando, nai mu twara mokuti ongaango.

30Jesus we mu purire a tja: “Ena roye oove aṋi?”

Eye wa zira a tja: “Ena randje owami Legio#8:30 Legio: Okutja “Kuzeze.”,” orondu mwa hitire ozombepo ozohakohoke ozengi mu ye. 31Ozombepo ozohakohoke ze riyarikaṋa ku Jesus kutja e he ze hindi okukawira morutjiva.

32Nu popezu mbo pa ri orupanda orunene rwozombinda nḓaaze ri meṋe yondundu. Ozombepo ozohakohoke arire tji ze riheke ku Jesus kutja e ze yandjere okukahita mu zo, neye e ze yandjere. 33Nozombepo ozohakohoke za pita momurumendu ngwi naze kahita mozombinda. Orupanda aruhe rwozombinda arire tji rwa raukire morutjeṋe notjikara otjinene, aru kawira momuronga, nu aru ṋiṋiwa i omeva.

34Ovandu mbaa ve risa ozombinda va tupuka nave kaserekarera otjiṋa hi motjirongo na morukondwa rwehi. 35Ovandu va ire okukatara imbi mbya tjitirwe; nowo tji ve ya ku Jesus, va vaza omurumendu ngwi mu mwa pitire ozombepo ozohakohoke a haama pozombaze za Jesus e nozombanda, nu a kotora ozondunge ze azehe; nowo avehe va tira tjinene. 36Nu imba mba muna otjiṋa hi, va serekarerera ovandu imbwi omuhingo omurumendu ngwi ngwa ri nozombepo ozohakohoke mbwa verukisiwa na wo. 37Nu ovandu avehe vorukondwa rwa Gerasa va ningira Jesus kutja a yende, owo tjinga ava tira tjinene. Jesus arire tja rondo mokayaha na i. 38Omurumendu ngwi mu mwa pitire ozombepo ozohakohoke we riyarikaṋa ku Jesus kutja a yende puna ye.

Nungwari Jesus we mu raera kutja a yaruke, na tja: 39“Yaruka koyeṋu u kaserekarere imbi Ndjambi mbya tjiti kove.”

Omurumendu ngwi otja ryanga motjirongo atjihe ama zuvarisa imbi Jesus mbya tjitire ku ye.

Omukazona wa Jairus nomukazendu ngwa ṱuna kombanda ya Jesus

(Mt 9:18-26; Mk 5:21-43)

40Jesus tja yarukire munda mbwina yomuronga, ovandu ve mu yakura nawa, owo avehe tjinga aave mu undju. 41Nu omurumendu wena Jairus weya mbo, eye wa ri umwe wovanane vosinagoge, notje riwisira pehi pozombaze za Jesus ne riyarikaṋa kutja eye a yende koye, 42orondu omukazona we omukwatwa erike ngwa ri nozombura omurongo na mbari wa ri popezu nokukoka.

Jesus ngunda ama ka wondja, ovandu ovengi tjandje mave yende amave mu ṋee kominda avihe. 43Nu mokati kawo mwa ri omukazendu ngwa verere omayuva we woukaendu tjinene oure wozombura omurongo na mbari; eye wa manena ouini we auhe mozonganga, nungwari kape ningire imwe ndja sorere okumuverukisa. 44Eye wa kaenda motjimbumba nga kongotwe ya Jesus, na ṱunu kotjikoro tjombanda ye, nomupupo wombinḓu ye arire tji wa yanda tjimanga. 45Jesus wa pura a tja: “Owaṋi ngwa ṱunu ku ami?”

Avehe va pataṋene, nu Petrus wa tja: “Muhona, otjimbumba tje ku woronganene kominda avihe nu matji ku kwaṋa!”

46Nungwari Jesus wa tjere: “Pe nomundu umwe ngwa ṱunu ku ami, orondu me tjiwa kutja mwa zu omasa mu ami.” 47Omukazendu tja muna kutja tji tja tjitwa ku ye matji horoka, otja pita eya ama zezera, ne riumbu pehi pozombaze za Jesus. Eye wa serekarera komurungu wotjimbumba atjihe kutja omena ratjike tja ṱunu ku ye na wina imbwi omuhingo eye mbwa verukisiwa tjimanga. 48Jesus wa tja komukazendu: “Muatje wandje, ongamburiro yoye ye ku vatere! Twende mohange.”

49Jesus ngunda ama hungire omambo nga, pe ya omuhindwa okuza kondjuwo yomunane wosinagoge na tja ku Jairus: “Omuatje woye wa koka. O uhara amo kendisa Omuhonge.”

50Nungwari Jesus wa zuva omambo nga, notja tja ku Jairus: “O tira, kara nongamburiro, nomuatje woye ma hupisiwa.”

51Jesus tje ya pondjuwo, ka yandjerere omundu nangarire umwe kutja a hite puna ye posi na Petrus na Johanes na Jakobus, na ingwi ihe na ina yomukazona uriri. 52Ovandu avehe mba ri mbo, tjandje mave ririre omukazona. Jesus wa tja nai: “Amu riri! Omukazona ka kokere, wa rara ozomboṱu uriri!”

53Owo avehe ve mu yora, tjinga aave tjiwa kutja ingwi omukazona wa koka. 54Nungwari Jesus we mu kambura keke na ravaere a tja: “Muatje wandje, penduka!” 55Nomuinyo we arire tji wa kotoka, neye a penduka tjimanga, nu Jesus we ve raera kutja ve yandje ovikurya komuatje. 56Ovanene ve va himwa tjinene; nungwari Jesus we ve rakiza kutja ave ha serekarere otjiṋa tji tja tjitwa hi komundu.

Currently Selected:

Lukas 8: HRR-UNI

Highlight

Copy