Lukas 15

Onḓu ndja pandjara

(Mt 18:12-14)

1 # Lk 5:29, 30 Ovasutise votjisuta tjouhona novanauvi ovengi ve ya okuyekupuratena ku Jesus. 2Nu Ovafarisei nozonongo zomambo va uta okuunauna ave tja: “Tareye, omundu ngwi ma yakura ovanauvi, nu wina ma ri puna wo.” 3Jesus arire tje ve serekarerere omasanekero nga a tja:

4“Omundu uṋe mokati keṋu ngu nozonḓu esere rimwe, nu tja pandjarisa imwe yazo, ngu hi nokuisa inḓa omirongo muvyu na muvyu mokuti, nu a kateza indji ndja pandjara, nga tje i munu? 5Nu tje i munu, ma kara nenyando, e i twa koviṱuve vye 6ne i twara konganda. Tjazumba eye ma woronganisa omapanga novararanganda na tja ku wo: ‘Nyandeye puna ami, orondu onḓu yandje ndja pandjarere, mbe i munu!’ 7Me mu raere: Otji mamu kara enyando nao meyuru mena romunauvi umwe ngwe ritanaura okukapita ovasemba omirongo muvyu na muvyu mbe hi nokuhepa ondanaukiro.

Otjimariva tji tja pandjara

8“Poo omukazendu uṋe ngu novimariva ovisilveri omurongo, nu tja pandjarisa tjimwe ngu hi na ku yakisa emunine, na kombo ondjuwo ama paha tjinene nga tje tji munu? 9Nu tje tji munu, eye ma woronganisa omapanga novararanganda na tja ku wo: ‘Nyandeye puna ami, orondu otjimariva tjandje tji tja pandjarere, mbe tji munu.’ 10Me mu raere: Otji mape kara enyando nao komurungu wovaengeri va Ndjambi mena romunauvi umwe ngwe ritanaura.”

Omuzandu ngwa pandjara

11Jesus wa hungira komurungu a tja: “Pa ri omundu umwe ngwa ri novazandu vevari. 12Nu ingwi omuangu arire tja tja ku ihe: ‘Tate, ndji pa otjirumatwa tjouini woye, ihi tji matji rire otjandje.’ Ihe otja haṋena ovazandu ve vevari ouini we. 13Kombunda yomayuva ouṱiṱi omuatje ingwi omuangu wa randisire ouini we auhe, na i na imbi ovimariva kehi rokokure, ke kevimorosera mehambaneno. 14Nu tja mana oviṋa avihe mbya ri na vyo, arire tji mwa kara ondjara onene mehi ndo, neye otja uta okuhepa. 15Nu eye wa kaungura pomurumendu umwe omukwatera wehi ndo, neye we mu hinda kohambo yotjirongo tje okukarisa ozombinda. 16Nomuzandu ngwi wa zerire okukutisa ezumo re novikurya mbyaa vi riwa i ozombinda, nungwari kape ningire omundu ngwe mu pere vyo. 17Korusenina eye we rizemburuka na tja: ‘Tate u novaungure ovengi, nowo avehe ve novikurya mbya takavara, nu owami ngwi me ṱondjara muno mwi. 18Me sekama, e yaruka ku tate ne katja nai ku ye: Tate, ami mba tjiti ourunde komurungu wa Ndjambi na komurungu woye. 19Opu mbi ha pwire okuisanewa omuatje woye rukwao, ndji vara otja umwe wovakarere voye.’ 20Neye otja sekama na yaruka ku ihe.

“Nu ngunda e ri kokure, ihe arire tje mu munu, nu a ṱondjenda na ye, a utuka, e rimanga mosengo ye ne mu hupite. 21Nomuatje wa tjere ku ihe: ‘Tate, ami mba tjita ourunde komurungu wa Ndjambi na komurungu woye. Otji mbi ha sere okuisanewa omuatje woye rukwao.’ 22Nungwari ihe wa isana ovakarere ve a tja: ‘Hakahaneye! Eteye ombanda indji ombwa tjinene mu mu zarise, nu mu twe ko ongoho wina komunwe we, nozongaku kozombaze ze. 23Nu kaeteye ondana ndja ṋunisiwa i ṱe, tu rye nu tu nyande! 24Orondu omuatje wandje ngwi wa kokere, nu eye ngwi nambano wa kotora omuinyo; wa pandjarere, nambano eye ngwi wa munika.’ Nowo arire tji va utu okunyanda omukandi.

25“Nomuzandu we ingwi otjiveri tjandje nai u ri motjikunino. Neye tje ya popezu nonganda, arire tja zuu ozongoma nomihiva. 26Eye wa isanene omukarere umwe ne mu pura kutja ovikeṋa mbi. 27Omukarere wa zirire a tja: ‘Omuangu woye wa kotoka konganda, nu iho otja zepa ondana ndja ṋunisiwa, tjinga e mu kotokere nomuinyo, nu e hi notjipo.’

28“Omuatje ingwi otjiveri wa pindika tjinene na ha vanga okuhita monganda. Ihe arire tja piti na utu nokuriyarikaṋa ku ye. 29Nungwari eye wa zira ihe a tja: ‘Tara, oure wozombura azehe nḓa ami mbe ku ungurira tjimuna omukarere, nu hi na pu mba katuka omarakiza woye, nu ngamba ko na indu we ndji pere nangarire okangombona kutja mbi nyande omukandi puna omapanga wandje! 30Nambano omuatje woye ngwi ngwa kamorosa ouini woye puna ovakorondu, weya, nove we mu zepere ondana ndja ṋunisiwa!’ 31Ihe wa zira a tja: ‘Muatje wandje, ove aruhe u ri puna ami, noviṋa vyandje avihe ovyoye. 32Nungwari eṱe twa sokunyanda nu twa sokuyoroka, orondu omuangu woye ngwi wa kokere, nambano eye ngwi wa kotora omuinyo; wa pandjarere, nambano eye ngwi wa munika rukwao.’ ”

Currently Selected:

Lukas 15: HRR-UNI

Highlight

Copy