Lukas 16

Omutarere omuhasemba

1Jesus wa tjere kovahongewa ve: “Pa ri omundu umwe omutumbe ngwa ri nomutarere wouini we. Omutarere ngwi wa hororwa komutumbe kutja u morosa ovimariva vyomuhona we. 2Omutumbe arire tja isana omutarere na tja ku ye: ‘Otjiṋa tji me zuu okutjama na ove hi, otjikwatjiike? Eta oviṋa avihe vyouini wandje mbi mbe kupa kutja uṱize, orondu ko na kurira omuṱize wouini wandje rukwao.’ 3Omutarere ngwi we rihungirira nai mu ye omuini: ‘Omuhona wandje me ndji ramba moviungura vyandje vyoutarere. Nambano me tjiti vi? Okutwera ehi hi ku i, nu okuningira ovyousyona me ṱohoṋi. 4Me tjiwa kutja me tjiti vi! Tji mba rambwa moviungura vyoutarere, me ripahere omapanga ngu maye ndji sekirisa mozoyawo.’

5“Eye otja isana koumweumwe auhe ngwa ri nozondjo zomuhona we na pura nai komutenga: ‘U nozondjo nḓe ṱeki pi komuhona wandje?’ 6Eye wa zirire a tja: ‘Omaze womiṋinga omahoro esere rimwe.’ Omutarere wa tja ku ye: ‘Toora embo roye, kara pehi, nu u hakahane u tjange omirongo vitano.’ 7Tjazumba arire tja pura komukwao a tja: ‘Ove u nozondjo nḓe ṱeki pi?’ Eye wa zira a tja: ‘Ovikokotwa omakutu esere rimwe!’ Omutarere wa tjere ku ye: ‘Toora embo roye u tjange omirongo hambondatu!’

8“Komuhingo mbwi omuhona otja tanga omuṱize wouini we omuhasemba mena rokutja wa ungura nounongo, orondu ovandu wouye mbwi ozongengeze tjinene mokati kawo okukapita ovanatje vondjerera.”

9Nu Jesus wa hungirire komurungu a tja: “Ritjitireye oveni oupanga nomautumbe wouye kokutja owo tji ya yanda, mu yakurwe momaturiro waaruhe. 10Ngamwa ngu ri omuṱakame moviṋa oviṱiṱi, ma rire omuṱakame movinene wina; nu ngu ri omuhasemba moviṋa oviṱiṱi, ma rire omuhasemba movinene wina. 11Nu eṋe tji mu he ri ovaṱakame movitjitwa vyeṋu vyomautumbe wouye, ngu me mu pe okuṱakamisa ouini wouatjiri, owaṋi? 12Nu tji mu he ri ovaṱakame moviṋa vyomundu warwe, ngu me mu pe imbi mbi mavi rire ouini weṋu, owaṋi?

13 # Mt 6:24 “Kape nomukarere ngu ma sora okuungurira ovahona vevari tjimwe, orondu eye ma tondo umwe na suvere ingwi omukwao poo me riyameke ku umwe na tengurura ingwi omukwao. Otji mu hi nokusora okukarera Ndjambi novimariva tjimwe.”

Omatwako nouhona wa Ndjambi

(Mt 11:12-13; 5:31-32; Mk 10:11-12)

14Ovafarisei va zuvire omambo nga aehe, nowo tjinga ava ri ovasuvere vovimariva, otji va uta okunyekerera Jesus. 15Jesus wa tja ku wo: “Eṋe oweṋe mba mbu mu rivara otja ovasemba komurungu wovandu, nungwari omitima vyeṋu Ndjambi u vi i, orondu oviṋa ovandu mbi mave tjangovasi ovinanḓengu, ovyo oviyaukise komurungu wa Ndjambi.

16 # Mt 11:12, 13 “Omatwako wa Moses nomatjangwa wovaprofete ya kara po nomasa nga koruveze rwa Johanes Omupapitise. Okuzambo Ombuze Ombwa youhona wa Ndjambi otji ya uta okuzuvarisiwa, nu auhe u rarakana okuhita mu wo. 17#Mt 5:18Nungwari oupupu tjinene eyuru nehi okuyanda okukapita okarupa kemwe okaṱiṱi komatwako okuwira pehi.

18 # Mt 5:32; 1Kor 7:10, 11 “Auhe ngu ma isa omukazendu we na kupu warwe, ma katuka orukupo; nu ingwi ngu ma kupu omukazendu ngwa isiwa, ma katuka orukupo.

Omutumbe na Lasarus

19“Pa ri omurumendu omutumbe ngwaa zara ozombanda ozombwa ozomanise, nu ngwaa kara mevyaro omayuva aehe. 20Wina pa ri omurumendu omusyona wena Lasarus. Orutu rwe aruhe rwa ri novirwaro, neye aa karangavara pomuvero wondjuwo yomutumbe, 21ama undju kutja nani me rikutisa noukurya mbu mau u kotjiriro tjomutumbe. Nu inḓa ozombwa wina aaze ya okurasa ovirwaro vye.

22“Nomurumendu ngwi omusyona wa koka, nu arire tja twarewa i ovaengeri okukahaama mekoro ra Abraham. Ingwi omutumbe wina wa koka na pakwa; 23neye ngunda e ri motjovakoke momihihamo ominene, otja era omeho we na mwine Abraham kokure ena Lasarus mekoro, 24narire tja ravaere a tja: ‘Tate Abraham, ndji tjariparera, nu u hinde Lasarus a katjaveke ohonga yomunwe we momeva nu e ye okutarareka eraka randje, orondu mbi hihamwa tjinene morururumo ndwi!’

25“Nungwari Abraham wa zirire a tja: ‘Zemburuka, muatje wandje, kutja ove ngunda au nomuinyo, wa perwe oviṋa avihe oviwa, Lasarus tjandje wa perwe imbi ovivi; nambano eye ma nyanda omutima, nove mo hihamisiwa. 26Nokombanda yanao pa sewa orutjiva orunene pokati ketu na eṋe kutja imba ovanguno mbu mave vanga okukonda ku eṋe ngo, ave ha sora, nu imba vomunda weṋu wina ave ha sora okukonda nguno.’ 27Omutumbe wa tja: ‘Nu me riyarikaṋa kove, tate Abraham, kutja u hinde Lasarus kondjuwo ya tate. 28Ami mbi novangu vetano, nu eye nge keveronge kutja ave he ya kotjirongo hi tjomihihamo.’

29“Abraham wa tjere ku ye: ‘Ovangu voye ve na Moses novaprofete okuveronga, ngave zuve komambo wawo.’ 30Nomutumbe wa zirire a tja: ‘Kako, tate Abraham, nungwari umwe wovakoke tja i ku wo, owo mave ritanaura kourunde wawo.’ 31Nungwari Abraham wa zirire nai: ‘Tji ve hi nokuzuva ku Moses novaprofete, kamaave kambura nangarire kutja umwe wa imba ovakoke wa penduka.’ ”

Currently Selected:

Lukas 16: HRR-UNI

Highlight

Copy