2 Ekuruhungi 16
16
Ovita kuna Ovaisrael
(1Ozo 15:17-22)
1Mombura oitjamirongo vitatu na hamboumwe youhona wa Asa, ombara ya Juda, Basa, ombara ya Israel, wa rwisa Juda na zeuparisa otjihuro Rama, kokutja a pate ozondjira azehe zokuhita nozokupita mOjuda. 2Asa otja toora osilveri nongoldo movihuze vyondjuwo ya Muhona novyondjuwo youhona ne vi hindi kOdamaskus ku Benhadad, ombara ya Sirie, nombuze ndji: 3“Ngatu rikute kumwe otja ootate tji va tjitire. Osilveri nongoldo ndji ovyo oviyandjewa kove. Nambano teya omakutasaneno woye kuna Basa, ombara ya Israel, kokutja a ise mo ovimbumba vye vyovita mehi randje.”
4Benhadad wa itavera kembo ra Asa na hindi ovahongore ovatye ve novimbumba vyawo vyovita okukarwisa ovihuro vyOvaisrael. Owo va havera Ijon na Dan na Abel-Maim, novihuro avihe vya Naftali maamu pwikirwa oviṋa. 5Ombara Basa tja zuva imbi mbya tjitwa, otja isa okuzeuparisa Rama na yandisa imbi oviungura. 6Ombara Asa wa woronganisa ovarumendu mehi ra Juda arihe ne ve toorisa omawe nomiti, Basa mbya ungurire na vyo mOrama; nowo va zeuparisa na vyo ovihuro ooGeba na Mispa.
Omuprofete Hanani
7Moruveze ndo omuprofete Hanani wa ire kombara Asa na tja: “Ove tjinga awe riyameka kombara ya Sirie moruveze rwokuriyameka ku Muhona, Ndjambi woye, otjimbumba tjovita tjombara ya Israel otji tja hena kove. 8Ovaetiopi nOvalibie kava ri novimbumba ovinamasa vyovita nomatemba omengi wovita novakavire voukambe ovengi are? Nungwari tjinga awe riyameka ku Muhona, eye ope ku tjitira kutja u ve toṋe. 9Muhona u tjevera kombanda youye auhe okuyandja omasa ku imba mbe ṱakama mu ye. Ove wa tjita ouyova, nu okuzamba aruhe mo kara movita.” 10Ihi tja tjita kutja Asa a pindikire omuprofete; neye we mu pandekisa nouketanga. Moruveze tjingero ndwi Asa otja uta okutatumisa otjiwaṋa noutwe wina.
Ondjandero youhona wa Asa
(1Ozo 15:23-24)
11Ovitjitwa avihe vyouhona wa Asa okuza kombutiro nga kondjandero vya tjangwa mEkuruhungi rOzombara za Juda noza Israel. 12Mombura oitjamirongo vitatu na muvyu youhona we, Asa wa remanisiwa i omutjise omuzeu tjinene wozombaze; neye wa ire kozonganga, nungwari ka ire ku Muhona. 13Kombunda yozombura mbari eye otja koka 14na pakwa meyendo roruuwa nda kororerwe i ye omuini mOtjihuro tja David. Ovandu va twirisa orurova rwe novyomoro omuwa nomaze omavawa okuruṱunina ombakero nave yakisa omuriro omunene okuyozika onḓiro ye.
Currently Selected:
2 Ekuruhungi 16: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.