2 Ekuruhungi 15
15
Asa ma yarura ko omerikutiropamwe koupe
1Ombepo ya Ndjambi ye ya ku Asarja, omuzandu wa Oded; 2neye wa ya okukahakaena nombara Asa, na karavaera a tja: “Puratena ku ami, mbara Asa, na eṋe amuhe Vajuda nOvabenjamin! Muhona u ri puna eṋe, eṋe ngunda amu ri puna ye. Tji mamu mu paha, eye me rimunikisa ku eṋe, nungwari tji mamu humburuka na ye, eye ma humburuka na eṋe. 3Oruveze orure Ovaisrael va kara nokuhina Ndjambi watjiri, nokuhinovapristeri okuvehonga, nokuhinomatwako. 4Nungwari oumba tji weya, owo ve ritanaura ku Muhona, Ndjambi wa Israel. Ve mu paha nave mu munu. 5Momayuva ngena kapa ri omundu ngwaa ryanga mohange, tjinga amwa ri oumba nezunganeno momahi aehe. 6Otjiwaṋa tjimwe aatji ṋiṋikiza otjikwao, notjihuro tjimwe aatji ṋiṋikiza otjikwao, Ndjambi tjinga a etere oumba nombamisiro ku vyo. 7Nungwari eṋe panḓipareye, nu amu mumapara. Oviungura, mbi mamu ungura, mavi munu ondjambi.”
8Asa tja za nokuzuva omaukiro, nga hungirirwa i Asarja, omuzandu wa Oded, otja yanḓipara. Eye wa nakaura oomukuru avehe vovisenginina mehi ra Juda nora Benjamin, noomukuru avehe vovisenginina mba ri movihuro eye mbya huurire mehi rozondundu ra Efraim. Wina wa tungurura otjipunguhiro tja Muhona tjaa tji kurama morumbo rwondjuwo ya Muhona.
9Asa wa rakiza kotjiwaṋa atjihe kutja tji worongane, okutja otjo hi otja Juda notja Benjamin, novandu avehe mba konda komukuma we okuza kehi ra Efraim nora Manasse nora Simeon, nu nambano mba tura mouhona we, orondu owo va muna kutja Muhona wa ri puna ye. 10Owo va woronganena mOjerusalem momueze outjatatu wombura oitjamurongo nandano youhona wa Asa. 11Meyuva ndo owo va punguhira Muhona ozongombe omasere hambombari, nozonḓu omayovi hambombari okuza movihuurwa, mbi va eterera. 12Owo va tjita omerikutiropamwe, nu va zuvasana kutja mave rikotamene ku Muhona, Ndjambi wooihe mukururume, nomitima nominyo vyawo avihe. 13Auhe, omutanda poo omukururume, omurumendu poo omukazendu ngu he rikotamenene ku Muhona, Ndjambi wa Israel, wa pwire pokuṱa. 14Owo va tjita oruyano neraka enene mena ra Muhona kutja mave yenenisa omerikutiropamwe; tjazumba va yoroka nave tono ozohiva. 15Otjiwaṋa atjihe tja Juda tja kara nenyando, tjinga atja tjita omerikutiropamwe nga nomutima watjo auhe. Va kara nondjoroka mokurikotamena ku Muhona, neye we ve yakura ne ve pe ohange komikuma avihe.
16Ombara Asa wa isa mo ina mukurukaze wena Maaka motjihavero otja ombara oserekaze ina, mena rokutja Maaka wa tungire otjiserekarera otjiyaukise tjomukuru wotjisenginina oserekaze Asera. Asa wa ka otjiserekarera hi moundimbu pekepeke na ningiririsire oundimbu mbwi motjana tja Kidron. 17Nangarire kutja Asa ka nyonene poṋa pekepeke pomerikotameneno kovisenginina kozondunda, wa kara nouṱakame mu Muhona ngunda e nomuinyo. 18Eye wa twa oviyambo ihe mbya yapurira Ndjambi mondjuwo ya Muhona, wina imbi oviyambo avihe ovingoldo novisilveri eye omuini mbye mu yapurira. 19Kape na pa karere ovita rukwao nga mombura ndji oitjamirongo vitatu nandano youhona we.
Currently Selected:
2 Ekuruhungi 15: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.