Mark 7
7
1Oˑnă̱h' neħˑhuh' hoˑdi'yaħˑdaˑye'iħˑo̱h' haˑyaħ'daˑdeħ ne Pharˑiˑsees haˑdiˑyaħˑdaˑdoˑgă̱'no̱ħ, kuh, neh haˑdi'yaˑdo̱'o̱ħ, Jeˑruˑsaˑlem da'ă̱ˑno̱hˑdă̱nˑdiħ.
2Neħ noˑnă̱h' wa'o̱ˑwa̱ˑdiˑgă̱ħ' haˑdi'yaħˑdaˑdoˑgă̱ă̱' naˑgo̱'iˑo̱ˑnyaˑnih', neħˑhuh', sho̱, heˑo'disˑoh'datˑgiħ haˑdi'ăhˑgwaas, (neħ gă̱nˑdo̱h' netˑhă̱ħ'ă̱h deˑo'no̱hˑjo'aeh,) neħ' hoˑdi'wă̱ˑo̱ˑgwă̱h', hoˑwa̱'iˑwa'yă̱hˑdah'go̱h.
3(Neħ, să̱ħ'ă̱h, ne Pharˑiˑsees, gaˑgweˑgo̱h', kuh', ne Jews, neħ nă̱ˑgă̱'a̱k iˑgă̱ă̱' deħˑshă̱n'no̱hˑjo'aes, thă̱ħˑă̱h deˑă̱ˑno̱nˑdek'ho̱ˑnih, neħ haˑdi'yeˑno̱'wa̱ħkˑho̱ħ heˑno̱n'daˑoˑdiˑoħ'dă̱ˑo̱nˑdyeħ' naˑdi'gă̱hˑjis'ho̱ħˑo̱h.
4Neħ, kuh, noˑnă̱h' neħˑhuh' do̱ˑda'ă̱ˑneet heˑthă̱nˑno̱nt'geˑo̱n'dahˑgwaħ', ă̱ˑgă̱'a̱k iˑgă̱ă̱' deˑo'no̱nˑdyaħ'doˑaˑeħ', thă̱ħˑă̱h, kuh, daħˑa'ă̱ˑno̱n'dekˑho̱ˑniħ. Weˑsòħ, kuh, noˑyaħ' oˑi'weˑno̱o̱ħˑsho̱ħ' gaˑge'o̱nˑdaˑdyeħ', na'diˑyeˑno̱'wa̱ħkˑho̱ħ; neħ, iˑgă̱ă̱, nă̱ˑgaˑnoˑaeħ'ho̱o̱k ne gaˑwĭs'daħˑsho̱ħ'o̱ħ gaˑno̱ħ'jaħˑsho̱ħ'o̱h, kuh; oˑgwă̱n'nĭsˑhăħ', kuh neˑgaˑwĭs'diˑyòħs; aˑdekˑhwaah'gwaħˑsho̱ħ'o̱h, gwaħˑhuh'.)
5Oˑnă̱h' ne Pharˑiˑsees, gaˑgweˑgo̱h', kuh, ne shaˑgo'diˑyaˑdo̱ˑnih', ho̱ˑwa̱'o̱nˑdo̱s'o̱h, A na'eh heˑgoˑwaa' ne sheˑi'o̱ˑnyaˑnih, neħˑhuh' daħ'deˑoˑno̱nt'haħˑah'gwă̱ˑa̱ˑdyeħ' heˑno̱ˑda'oˑdiˑòħ'dă̱ˑo̱nˑdyeħ' naˑdi'gă̱hˑjis'ho̱ħˑo̱h'? neħ, gwa, gă̱s', naeh, naˑdi'ăhˑgwaas nah'so̱h deˑoˑno̱hˑjo'aeh.
6Dechˑhaˑgoˑwă̱'na̱ħˑsăˑgwă̱h' haˑgo̱'yă̱ˑa̱h'seeh, Hoˑi'waˑye'isˑdo̱h do'gă̱s' ne Eˑsaiˑas, hoˑdo'gă̱sˑdaˑnii, he'swaˑyaħ'daˑdeħ, deˑswa'go̱hˑsaˑneet'; neħ he'niˑgaˑyeˑă̱h' gaˑyaˑdo̱ħ, Neħ nă̱ˑgă̱ă̱' no̱ħˑga'waˑji'yòħˑdă̱ħ ho̱ˑgeh'să̱ˑni'yòsˑthaħ, neħ haˑdiˑyeˑăħ'dahˑgwaħ' naˑdisˑgwăăħ'sho̱ħ; weˑă̱h', gwa', naeh, nit'gaˑdeħ' noˑnă̱n'nyahˑsaħ.
7Neħˑhuh', gwa', naeh, thă̱ħ'ă̱h deħˑwa'desˑthaħ, heh', tho̱ˑga'dă̱nˑna̱'yă̱ˑnih'; neħ', gwaħˑhuh', hă̱nˑno̱n'diˑo̱ˑnyaˑnih' ne no̱ħˑo'iˑoħ'dă̱ħˑsho̱ħ no̱ˑgweh' hoˑdi'wih'saħˑo̱h.
8Neħ, să̱ħ'ă̱h, ne' wakˑah' ă̱ˑswaisˑdo̱n'dyeħ'seek noˑi'wihˑsaħ'o̱h Na'wĕnˑni'yòħ', neħ, waeh, swaˑyeˑno̱ˑwa̱ħk''ho̱ħ no̱ˑgweh' hoˑdiˑwih'saħˑo̱h; neħ, iˑgă̱ă̱, naˑgaˑnoˑa'eħˑho̱o̱k, ne gaˑno̱ħ'jaħˑsho̱ħ'o̱h, gaˑwĭs'daħˑsho̱ħ'o̱h, gwaħˑhuh'; oˑi'waˑweˑsòħ', gwaħˑhuh', noˑyaħ' oˑi'weˑno̱o̱ħˑsho̱ħ', niˑswa'dyehˑhaħ.
9Da neħ' naˑgo̱'yă̱ˑa̱h'seeh, Wiˑyòò'', ă̱ă̱ħ, he' wakˑah' swais'do̱ˑo̱nˑdyeħs no̱ˑi'wihˑsa̱ħ'ho̱ħ Na'wĕnˑni'yòħ', neħ na'eˑswaˑyeˑno̱ˑwa̱ħk'ho̱o̱k', sho̱', heˑniˑswai'oħ'dă̱ă̱.
10Neħ, să̱ħ'ă̱h, neh haˑwă̱ă̱ ne Moˑses, Deˑe'sesˑnyeek ne' yaħˑnih, kuh, ne saˑnoħ'ă̱h; neħ, kuh, ne so̱n'diħˑgwa'naħˑot ă̱ntˑhoħ'syo̱ˑnă̱nt' he dă̱'oˑsnyeek' no'oħˑnih; neħ, giħˑshă̱h, no'noħ'ă̱h, neħ nă̱'o̱ˑwa̱ˑnyòħ.
11Neħ, waeh, niis' ne swaˑdo̱h', Neħ, giħˑshă̱h, no̱'gweh ă̱ˑa̱'wă̱ˑa̱s no'oħˑnih; neħ, giħˑshă̱h', no'noħ'ă̱h; Neħ, să̱ħ'ă̱h, ne Corˑban; (neħ gă̱nˑdo̱h', neh, deˑwa'gyaħˑdo'wehˑdo̱h, neħ ho'gwa aˑge'go̱nˑdah'go̱h oˑno̱h'saˑdo'gă̱hˑdiħ'gĕh,) naˑwaˑgye'ăħˑdah'go̱ˑna̱ħ a'giˑyaħ'daˑgeh'haħˑdo̱h; neħ ă̱nˑdyòˑi'waħ'gă̱ˑa̱k ă̱ˑa̱ˑda'dwĕnˑniˑyòħ'heħt.
12Neħ, kuh, ne thă̱ħˑă̱h deħˑche'swaˑga'yaħˑseh naaħ'gwĭs'dă̱ħ no̱ˑsa'oˑdyeˑăħs no'oħˑnih, neħ giħˑshă̱h' no'noħ'ă̱h;
13Neħˑhuh, dih, niˑswaˑye'ă̱h ne swaˑnyòò' na'wă̱ˑno̱ħ Na'wĕnˑniˑyòħ, swaˑye'ăħˑdah'go̱h heˑno̱nˑdeˑswai'oħˑdă̱'a̱nˑdyeħ; neħˑhuh' niˑswai'oħ'dă̱ă̱ heˑswaˑya'gă̱ˑo̱h; weˑsòħ', gwaħˑhuh', noˑyaħ' oˑi'weˑno̱o̱ħˑsho̱ħ' nă̱ˑgă̱ă̱' des'gyaˑdyeˑă̱h', niˑswaˑyă̱ˑnoħ'dă̱ă̱.
14Neħ noˑnă̱h' gaˑgweˑgo̱h' no̱ˑgweh' heˑa'go̱ˑno̱'go̱sˑo̱h haˑyaħ'daˑdeħ, haˑgo̱'yă̱ˑa̱h'seeh, Daˑgwa'diˑwat'ho̱nˑdaˑdă̱h, haħˑdeˑjo̱ˑgweħ'daˑgee; swaħˑni'go̱ˑă̱ˑyă̱nˑdaħt', gwaħˑhuh.
15Tă̱ħˑă̱h deħˑthaħ'gwĭsˑdă̱ħ deħ'gaˑdeħ' nasˑdeˑgwa'aˑgwa' no̱ħˑwa̱nˑdih' haˑyaħ'daˑdeħ no̱''gweh, neh, haˑyaħ'daˑgo̱o̱', giħˑshă̱h', ha'weeħ, deħˑaˑo̱h' a'gaˑgweˑniħ', na'oˑyaħ'datˑgit; neħ, gwa, ne' no̱ħˑo'iˑoħ'dă̱ħˑsho̱ħ' tgaˑyaˑgă̱ħs' haˑyaħ'daˑdeħ, neħ hoˑyaħ'datˑgit'haħ no̱''gweh.
16Neħ, giħˑshă̱h', neh, so̱ˑgaaħ' no̱'gweh haˑo̱h'doˑdo̱ħ no'gweˑnyo̱o̱h' ă̱ˑot'ho̱nˑdeek', hotˑho̱nˑdeek' ne' neħ.
17Neħ noˑnă̱h' heˑga'no̱hˑsòòt heˑo'yo̱sˑo̱h,' wakˑah' he'o̱ˑweh' niˑă̱'niħˑdyo̱ħ' no̱ˑgweh', ho̱ˑwa̱'a̱nˑdo̱s'o̱h naˑgo̱'iˑo̱ˑnyaˑnih ne'naħˑot' waˑă̱nˑdo̱ħ' hoħ'thaˑyă̱ˑo̱ˑdăăk.
18Neħ na'go̱ˑyă̱ˑa̱h'seeh, Neħˑhuh, gă̱h, nă̱ă̱ħ'' iis, ahˑso̱h' neħ'huh niˑyòħ'dă̱ă̱, ne thă̱ħ'ă̱h deħˑswaħ'niˑgo̱'ă̱ˑyă̱nˑdaħs? Thă̱ħ'ă̱h, gă̱h', deħˑswa'gaħˑă̱'yo̱ˑo̱ħ naˑdiħˑgwa'naħˑoh'dă̱ħˑă̱h asˑde'gwa'aˑgwa nă̱nˑdweehˑdʋk', haˑyaħ'daˑgo̱o̱ no̱'gweh hă̱ˑweeħ', heh thă̱ħ'ă̱h deħˑa'o̱h' a'gaˑgweˑniħ' a'oˑyaħ'datˑgit?
19Neħ gaiˑo̱ˑnih he thă̱ħ'ă̱h haˑwă̱n'nyahˑsaˑgo̱o̱' theħ'weˑno̱s; hatˑgwĭs'daˑgo̱o̱, gwa', gă̱s; neħˑhuh', kuh, hes'gaˑyaˑgă̱ħs' he'o̱ˑweh heˑga'yaˑgă̱h'dahˑgwaħ, deˑdwʋs'atˑhaħ' naaħˑde'yòħˑwa'gee.
20Neħ neh haˑwă̱ă̱, Neħ nă̱nt'gaˑyaˑgă̱ħt' haˑyaħ'daˑdeħ no̱'gweh, neħ ne'neħ, hoˑyaħ'datˑgit'haħ no̱'gweh.
21Neħ, să̱ħ'ă̱h, ne no̱ħ'go̱o̱'gwa nă̱nˑdwe'ehˑdʋk, he'o̱ˑweh' thoˑnă̱n'nyahˑsaat' no̱'gweh', neħˑhuh' ne'huh tgaˑya'gă̱hˑdah'gwaħ, ne wă̱nˑno̱h'do̱ˑnyo̱ħ'shăˑetˑgă̱ħ', waˑdyaħ'do̱nˑdyo̱s, oħˑno̱'wehˑhaˑat, waˑdyo'o̱ˑnyo̱ħ,
22Gaˑno̱s'gwaˑo̱h, oħˑno'shă̱ă̱h', gai'waˑneħ'akˑshăħ'sho̱ħˑo̱h, gaħˑni'go̱hˑho̱ħ'dʋsˑhăħ, geˑos'yo̱sˑhăħ, waˑetˑgăħ' ne yeˑgaaħ'gĕh, gòh'să̱nˑno̱ˑet'gă̱ntˑhaħ, waˑdat'goˑnyă̱s'do̱sˑhăħ, deħˑoħ'niˑgo̱nt;
23Oˑi'waˑgweˑgo̱h' nă̱ˑgă̱ă̱ neħˑhuh' dwetˑhaħ', ne no̱ħˑgo̱o̱'gwaa; neħ' hoˑyaħ'datˑgit'haħ no̱'gweh.
24Da neħˑhuh' oˑnă̱h' detˑho'daħˑo̱h, neħˑhuh' heˑa'weˑno̱o̱h', heˑo'yo̱sˑo̱h' he'no̱ħˑdeˑyòˑdo̱'ă̱ˑjoħk'do̱nˑdyeħ ne' Tyre; Siˑdon, kuh; heˑo'yo̱sˑo̱h' heˑgaˑno̱h'sòòt ne'neħˑhuh; neħ, kuh, de'oˑdo̱ˑă̱nˑjoˑni'ak na'gă̱ˑa̱k' so̱ˑgaaħ' no̱'gweh deˑo'gaħˑă̱'yo̱sˑo̱o̱ħ; thă̱ħˑă̱h, gwa', deˑo'gweˑnyo̱o̱ħ' na'oˑdyaħ'dahˑseh'do̱ˑo̱k', sho̱'.
25Neħ, să̱ħ'ă̱h, ne yeˑyaħ'daˑdoˑgă̱ă̱' ne yaˑgo̱ˑgweh', neħ ne' goˑaˑwak' goˑdyă̱ˑniih' notˑhwa'isˑhăˑtgiħ, ho̱ˑwa̱i'wa'o̱ˑgă̱h; neħˑhuh', kuh, niˑdya'gaˑweˑno̱o̱h' goˑyaħ'dyeˑnă̱ħ'o̱h, neħˑhuh' heˑdeˑah'siħˑdaˑdeˑnyo̱ħ.
26(Neħ, ne yaˑgo̱ˑgweh', Greek naħˑoh'dă̱ħˑă̱h, Syˑroˑpheˑniˑciˑan, naeh, no̱ħˑo̱ˑga'ă̱ˑjòħ'dă̱ħ.) Da neħ' no̱ˑwa̱ˑdo̱ˑe'syo̱hˑgwaˑnii', neħ no̱ˑsa'oˑyaħˑdo̱ħ'neek naˑnĭs'heˑoˑno̱ħ, he'o̱ˑweh niˑye'yaħˑdaˑdeħ ne' go'aˑwak.
27Neħ, dih, ne Jeˑsus, shaˑga'wă̱ˑa̱h'seeh, Neħ', yaˑeħ, dwaˑdyeˑă̱nt' naˑdĭk'saħˑsho̱ħ'o̱h hoˑno̱h'daħt; neħ, să̱ħˑă̱h, ne thă̱ħ'ă̱h deħˑneħ'hòhˑjih ne' neħ do̱nˑdaˑgah'gwă̱ˑa̱a̱k noˑdi'ăhˑgwaħ naˑdĭk'saħˑsho̱ħ'o̱h; neħˑhuh' ha'waˑdyo̱'o̱o̱k heˑwaˑdi'yaħˑdaˑdeħ ne niˑgaˑjiˑyăħs'aa'sho̱ħˑo̱h.
28Desˑho̱'wa̱ˑwă̱n'no̱ħˑsăˑgwă̱h', ho̱ˑwă̱'a̱hˑseeh, Neeħ', Syaħ'daˑgwĕnˑniˑyòħ', neħ gwa', naeh, gă̱s, ne niˑgaˑjiˑyăħs'aa'sho̱ħˑo̱h, neħ wă̱ˑno̱n'dekˑho̱ˑnih nohˑdo̱'nyo̱ħˑshăħ, ne waˑdekˑhwaah'gwaħˑshăˑgo̱o̱'gwa, neh hoˑno̱ħ'să̱ħˑseh' naˑdĭk'saħˑsho̱ħ'o̱h.
29Neħ ne' shaˑgaˑwă̱'a̱hˑseeh, Neħ gai'o̱ˑnih nă̱ˑgă̱' heˑneˑsaˑwă̱nˑna̱ˑwă̱h', neħˑhuh' ho̱ˑsaˑseeh' he'o̱ˑweh' hă̱chˑheeħ; shoˑya'gă̱ħˑo̱h, naeh, oˑnă̱h', naˑnĭs'heˑoˑno̱ħ, he'o̱ˑweh yeˑyaħ'daˑdeħ ne' sheˑaˑwak.
30Neħ noˑnă̱h' neħˑhuh' saˑyeˑyo̱ħ' heˑgoˑno̱h'sòòt, shoˑya'gă̱ħˑo̱h, gwa', naeh, haˑnĭs'heˑoˑno̱ħ'; gaˑno̱kˑdaħˑgĕh', naeh, yeˑyʋs'hă̱ħ ne' goˑaˑwak.
31Oˑnaeħ' shotˑhă'daˑdo̱h' ne neħˑhuh' he'no̱ħˑdeˑyòˑdo̱'ă̱nˑjoħk'do̱nˑdyeħ ne' Tyre; Siˑdo̱n, kuh; neħˑhuh' hesˑho'yo̱sˑo̱h het'gaˑnyòˑdaˑeħ' ne Galˑiˑlee dyo̱'ă̱nˑjaˑdeħ; neħˑhuh' haħˑde'wah să̱n'no̱sˑho̱ħ hoˑăh'do̱h heˑniˑyòˑdo̱ˑă̱n'jòħkˑdaˑdyeħ' ne' Deˑcapˑoˑlis.
32Neħ ne' o̱ˑwa̱'yaħˑtheeh' neħˑhuh' haˑyaħ'daˑdeħ, shaˑyaħ'daat ne deˑaħ'sweˑgo̱h, thă̱ħˑă̱h', gwaħˑhuh', de'aˑwă̱nˑniˑyòò; da neħ no̱ˑwa̱ˑdo̱ˑeh'syo̱hˑgwaˑnii' na'oˑnĭs'ohˑda'ă̱ħ.
33Oˑnă̱h' hoˑyaħ'do̱ħˑno̱o̱, he'niˑaˑdiˑyaħ'daˑdeħ ne gă̱nˑdyòh'goˑwaˑnă̱h; neħˑhuh' niˑyòˑweħ' oˑnă̱h', waˑă̱ħ'nyaˑyaħ'daˑno̱o̱ħ' neh haˑo̱h'daˑgo̱ˑsho̱ħ; daˑă̱'nisˑgyo̱ˑdiħ', gwaħˑhuh; hoħˑtha'yă̱ˑo̱ˑnyo̱o̱ħ', kuh, năˑăħ'no̱hˑsaħ'gĕh;
34Oˑnă̱h' gaˑo̱'yaħˑge'gwa heˑot'gatˑhwă̱h, thosˑsyòˑdyă̱sˑo̱h', kuh; neħ, kuh, naˑwă̱'a̱hˑseeh, Ephˑphaˑtha; neħ gă̱nˑdo̱h, neh, Waˑdeh'hoˑdo̱ˑgòh.
35Neħ noˑnă̱h', sho̱', kuh, oħˑwa'dehˑhoˑdo̱ˑgwa'o̱o̱ħ heh, haˑo̱h'doˑdo̱ħ; neħ, kuh, nos'hăăˑdeħ năˑăħ'no̱hˑsaħ'gĕh, oħˑwa'tyòħˑdă̱s; da neħ neh, saˑyo'o̱ˑgaħt'heħt, ne waˑas'nyeħt.
36Oˑnă̱h' haˑgo̱ħ'niˑgo̱'o̱ˑnii na'gă̱ˑa̱k so̱ˑgaaħ' no̱'gweh deˑo̱'wa̱ˑoˑwiiħ; saħ'gwah gwa', sho̱, gă̱s, no̱ˑsa'aˑgă̱ˑis saˑaˑgo̱ħˑni'go̱ˑo̱ˑniħ'; neħˑhuh', kuh, gă̱s, no̱ˑsa''aˑdiˑgă̱ˑis' heˑniˑweˑsòħ' do̱ˑsaˑă̱ˑno̱n'diˑoˑgwat;
37Neħˑhuh', kuh', na̱ħ'a̱ˑwă̱h, ne weˑsòħ' saˑyò''ăhˑdʋk héˑno'oˑdiiˑwaˑnă'ăˑgòħ, hă̱ˑno̱nˑdo̱h', Neħˑhuh'jih he'no̱ˑo̱ˑyeeħ' ne yò'iˑwaˑgweˑgo̱h; deˑja'o̱h', waeh, hoˑgweˑnyo̱o̱ ne deˑyo̱ħ'sweˑgo̱h, ă̱ˑjo̱'o̱k; kuh', ne' deħ'eˑwă̱ˑno̱nt', ă̱ˑjes'nyeħt.
Currently Selected:
Mark 7: SEE
Highlight
Share
Copy
Want to have your highlights saved across all your devices? Sign up or sign in
Gospels published by the American Bible Society in 1872, Psalms in 1892.
