Mark 8
8
1Neħ, ne' neħˑho'o̱ˑweh chiˑdwă̱'nĭsˑhăˑdeˑnyo̱ħ', neħ, he'sòħˑjih gă̱nˑdyòh'goˑwaˑnă̱h; thă̱ħˑă̱h', kuh, deħˑsho'diˑyă̱ħ' niˑyees'; haˑa'go̱ˑno̱'go̱sˑo̱h ne Jeˑsus, naˑgo̱'iˑo̱ˑnyaˑnih, haˑyaħ'daˑdeħ; neħ', kuh, naˑgo̱'yă̱ˑa̱h'seeh,
2Neħ ne' weˑsòħ' oˑyaħ' niˑdyòħ'dă̱ ne' gyaħˑdaˑgo̱, kheˑdă̱ˑă̱s' ne gă̱nˑdyòh'goˑwaˑnă̱s; neħ gai'o̱ˑnih, heh, oˑnă̱h' să̱h niˑwă̱ă̱'nĭsˑhăˑgee' shaħ'deˑyaˑgwaˑdii'; thă̱ħˑă̱h, kuh, deħˑthaħ'gwĭsˑdă̱ħ' deˑo'diˑyă̱ħ' na'aˑdiik'.
3Da neħ', giħˑshă̱h', kuh, no̱ˑsaˑkhe'yatˑgaħ da'oˑno̱nˑdo̱nˑdyo̱'o̱nˑdyeħ, neħˑhuh' ho̱ˑsaˑdiˑyo̱'no̱o̱ħ heˑthoˑdi'no̱hˑsoˑdo̱ħ, ă̱ˑoˑdiħ'niˑgo̱'ă̱h'do̱ħ, waeh, ne'huh, he'niˑyòˑweħ; haˑdi'yaħˑdă̱ˑo̱ˑnyo̱ħ', să̱ħ'ă̱h, ne'huh, ne weˑă̱h' thoˑneehˑdo̱h.
4Neħ ne' desˑho̱'wa̱ˑwă̱n'no̱ħˑsăˑgwă̱h', hoˑnă̱ă̱, Gaˑă̱ˑo̱ˑweh' ne gă̱ħ' nă̱ntˑgaˑwih'dahˑgo̱ˑo̱k' noˑăh'gwaaħ', na'gaˑgweˑniħ' a'oˑdiħ'niˑgo̱ˑiˑyòs' nă̱ˑgă̱ă̱ no̱ˑgweh', nĕk'huh he'o̱ˑweh' deħˑe'na̱ˑgeˑnyo̱o̱ħ'?
5Oˑnă̱h' haˑgo̱ˑyaˑo̱n'do̱sˑo̱h, Do niˑswa'ahˑgwaˑyă̱ă̱ħ'? Neħ ne' oˑnă̱ă̱', Jaˑdʋk'.
6Neħ naˑgo̱'iˑwĭs'ahˑseeh no̱ˑgweh', ne yo̱ˑă̱n'jaħˑgĕh' ă̱'no̱nˑdyă̱ă̱ħ; oˑnă̱h' deˑoh'gwă̱h ne jaˑdʋk' niˑyò'ăhˑgwaˑgee, deˑo'dă̱nˑno̱'nyo̱s'o̱h, deˑo'yaħkˑho̱ħ', gwaħˑhuh'; oˑnă̱h' neħ, heˑa'go̱ˑyaˑwii naˑgo̱'iˑo̱ˑnyaˑnih; neħ', naeh, neħˑhuh' ă̱'a̱ˑdiˑyă̱ă̱ħ' he'aˑdiˑgat; doˑgă̱s, naeh, neħˑhuh' hoˑdi'geˑo̱ħ he'aˑdiˑgat no̱'gweh.
7Neħ, kuh, ne dòhˑgaaħ'ah' ne niˑgă̱n'jaħsˑa'ah hoˑdiˑyă̱ħ'; deˑo'dă̱nˑno̱o̱'nyo̱s'o̱h; waˑiˑwĭs'aaħ, gwaħˑhuh, ne' neħˑhuh', ha'eħˑgwah, ă̱ˑga'yă̱nˑdaħk, he'aˑdiˑgat.
8Neħˑhuh', naeh, niˑya'wă̱ħˑo̱h, hoˑno̱n'dekˑho̱'nyʋsˑo̱h, waˑoˑno̱hˑdaħt', gwaħˑhuh; da neħ heˑniˑyo̱o̱ do̱ˑsa'aˑdik, ne deˑyòˑăhˑgwa'iħˑsyo̱ħ' waħˑo'daˑdă̱ă̱ħ', jaˑdʋk' niˑgaħ'achˑhii'.
9Neħ heˑniˑyo̱o̱' ne' waˑă̱ˑno̱nˑdek'ho̱ˑniħ', geˑih', no̱o̱', niˑă̱'nă̱ħˑnyaħ'esˑhăs'hă̱ă̱. Oˑnă̱h' shaˑgo̱'yatˑgaħ'wă̱h.
10Da neħ' noˑnă̱h', sho̱', kuh, gaˑo̱ˑwa̱ˑgo̱o̱' hoˑdeħ'no̱hˑdaˑho̱h', kuh naˑgo̱'iˑo̱ˑnyaˑnih, neħˑhuh' niˑtho'neˑno̱o̱', hoˑdi'yo̱sˑo̱h he'yo̱'ă̱nˑjaˑdeħ ne Dalˑmaˑnuˑtha.
11Oˑnă̱h' ne Pharˑiˑsees daˑă̱'no̱hˑdă̱nˑdyo̱ˑgwa'o̱o̱ħ; hoˑno̱h'saaħ', kuh', wa'o̱ˑwa̱nˑdo̱ˑnyo̱o̱ħ, waˑă̱ˑnihˑsaak' haˑyaħ'daˑdeħ neh oˑi'waˑnăă'gwat heˑno̱'yaˑwă̱h', gă̱ˑo̱'yaħˑgĕh o̱'daˑweehˑdʋk' haħ'daˑwaˑdyă̱ˑo̱ˑnyo̱o̱ħ'; ho̱ˑwa̱ħ'niˑgo̱ˑă̱k'do̱ħ.
12Da neħ naˑgwʋs' hoˑtwa'isˑhă'go̱hˑjih daˑweehˑdʋk' waˑos'yòˑdyă̱h; haˑwă̱ă̱', kuh, A, naeh, heˑgoˑwaa' hă̱ˑnih'saas, nă̱ˑgă̱' gaˑwaˑjiˑyăˑdeħ', neh, aˑă̱ˑno̱nt'gatˑhòħ naˑyò'iˑwaˑnăăˑgwah'do̱ˑo̱k'? Doˑgă̱s' neħ, noħˑgwă̱'a̱s, Thă̱ħ'ă̱h tha'o̱ˑwă̱ˑno̱h naˑyò'iˑwaˑnăăˑgwah'do̱ˑo̱k nă̱ˑgă̱' ga'waˑjiˑyăˑdeħ.
13Oˑnă̱h' hoˑthăˑdaˑdo̱h' haˑdi'yaħˑdaˑdeħ; gaˑo̱ˑwa̱ˑgo̱o̱', aeħ, shoˑdeħ'no̱hˑdaˑho̱h, desˑhoˑnyòˑdaiˑyaħ'go̱h.
14Da neħ' heˑniˑya'wă̱ħˑo̱h, waˑo'diħˑni'go̱hˑhă̱h naˑgo̱'iˑo̱ˑnyaˑnih, na'aˑdi'aaħ noˑăh'gwaħ, thă̱ħˑă̱h, kuh, ha'eħˑgwah, ne' gaˑo̱ˑwaˑgo̱o̱ deˑoˑdiˑyă̱ħ', neħˑhuh', sho̱, ne joˑăh'gwat.
15Oˑnă̱h ne Jeˑsus haˑgo̱ħ'niˑgo̱'o̱ˑnii, haˑwă̱ă̱, Swatˑga'ă̱ˑo̱o̱h, swaˑdah'niˑgo'ă̱ˑă̱ă̱k', kuh; he'niˑgaˑdeħ neh hă̱ˑno̱nt'hăhˑgwă̱ħ'gwatˑhaħ ne Pharˑiˑsees; neħ, kuh, naˑthăh'gwă̱ħˑgwat'haħ neh Herˑod.
16Oˑnă̱h' deˑoˑdiˑyaħ'doˑweh'daˑno̱ħ naˑdi'yaħˑdii, hoˑnă̱ă̱, Neħ, gă̱h, ne gă̱ħ gai'o̱ˑnih heˑdeħˑo̱ˑgwaah'gwaˑyă̱ħ.
17Neħ, dih, ne Jeˑsus, noˑnă̱h' waˑă̱'niˑna̱nˑdook, haˑgo̱'yă̱ˑa̱h'seeh, A, naeh', heˑdeˑswa'yaħˑdo'wehˑdaˑno̱h', neħ, gai'oˑnih, heˑdeħˑswa'ahˑgwaˑyă̱ħ'? Tă̱ħ'ă̱h, gă̱h', ahˑso̱h' deħˑswaˑgă̱h; thă̱ħˑă̱h, gă̱h', kuh, deħˑswaħ'niˑgo̱'ă̱ˑyă̱nˑdaħs? Neħ, gă̱h, nah'so̱h oˑniˑyo̱h' ne swă̱ˑnyah'saħ?
18Swaˑgaa'daˑnyo̱ħ', naeh, thă̱ħˑă̱h, gă̱h', deħˑswaˑgă̱h? Swaˑo̱h'doˑdo̱ħ', gwaħˑhuh', thă̱ħˑă̱h' gă̱h' deħˑswa'o̱kˑhaħ? Neħ, gă̱h', kuh, ne thă̱ħ'ă̱h deħˑji'swasˑhaˑaħs?
19Neħ, waeh, ne shaħˑkhe'ăhˑgwi'yaħkˑho̱'o̱s ne wĭs niˑă̱'nă̱ħˑnyaħ'esˑhăs'hă̱ă̱ ne wĭs niˑyò'ăhˑgwaˑgee, do niˑgaħ'achˑhii' ne deˑyòˑăhˑgwa'iħˑo̱h' deˑjiˑswahˑgwă̱h'? Neħ no̱ˑwă̱'a̱hˑseeh, Wʋsˑhă̱ă̱ dekˑni' sgaˑeħ.
20Haeħˑgwah', kuh, ne jaˑdʋk', noˑnă̱h neħˑhuh' deˑwaˑdoˑgwah'do̱h haˑdi'yaħˑdaˑdeħ' ne geˑih' niˑă̱'nă̱ħˑnyaħ'esˑhăs'hă̱ă̱, do niˑgaħ'achˑhii' neˑdeˑyò'iħˑsyo̱ħ' deˑji'swahˑgwă̱ă̱h'? Neħ ne' oˑnă̱ă̱, Ja'dʋk.
21Oˑnă̱h' haˑgo̱'yă̱ˑa̱h'seeh, A niˑyòħˑdă̱ă̱' he thă̱ħ'ă̱h deħˑa'o̱h aˑeˑswaħˑni'go̱ˑă̱ˑyă̱nˑdaħt'?
22Oˑnă̱h' neħˑhuh' hoˑyo̱s'o̱h ne' Bethˑsaiˑda; da neħ, ne' neħˑhuh ho̱ˑwa̱'yaħˑtheeh' haˑyaħ'daˑdeħ, ne deˑa'gahˑgweˑgo̱h' no̱'gweh; neħ', kuh, no̱ˑwa̱'do̱ˑeh'syo̱hˑgwa'nisˑo̱h naaħˑdaˑo'yă̱ˑo̱ˑnyo̱o̱ħ.
23Oˑnă̱h' waˑos'ohˑdaah ne deˑa'gahˑgweˑgo̱h' no̱'gweh; wa'oˑnă̱chˑhiiħ' waˑo'yaħˑdiitˑgă̱h' he'gaˑno̱nˑdaˑyă̱ħ; neħˑhuh, dih, noˑnă̱h' hoˑnis'gyo̱nˑdyo̱s'o̱h naˑgaaħ'gĕh, waˑoˑnisˑoh'daˑă̱ħ, gwaħˑhuh'; hoˑo̱n'do̱sˑo̱h', a'diħˑgwah haħˑgwĭs'dă̱ħ ha'gă̱h'.
24Oˑnă̱h' hotˑgaaˑthwă̱h' neh' heħ'tgă̱h; neħ, kuh, ne'aˑwă̱ă̱, Kheˑgă̱h' no̱ˑgweh', neħ' shaħˑgaat heˑniˑyòħ'dă̱ă̱ ne' găˑiˑdo̱ħ a'wă̱ˑneħ.
25Oħˑga'at ne' neh, oˑna'eħ shoˑnis'ohˑdaas'o̱h naˑgaaħ'gĕh; do̱nˑdaˑoˑno̱h'do̱ˑo̱s', gwaħˑhuh', heħtˑgă̱h' sa'aˑtgatˑhòħ; neħˑhuh' niˑyòˑweħ' deˑdyòˑye'iħˑo̱h, det'gaˑyeˑiħ', gwaħˑhuh, he'saˑa'go̱ˑyat'gatˑhòħ' no̱'gweh'.
26Oˑnă̱h' shotˑgaħ'wă̱h, neħˑho'gwa sa'oˑgo̱ˑdʋk' heˑthoˑno̱h'sòòt; haˑwă̱ă̱', Să̱ˑno̱h' neħˑhuh' hă̱hˑseeh he'gaˑno̱nˑdaˑyă̱ħ; să̱ˑno̱h', kuh, so̱ˑgaaħ' ă̱sˑhe'oˑwih ne' gaˑno̱n'daˑgo̱o̱.
27Oˑnă̱h' hoˑya'gă̱ħˑo̱h ne Jeˑsus, kuh naˑgo̱ˑi'o̱ˑnyaˑnih; neħˑhuh' heˑo'neˑno̱o̱ hetˑga'no̱nˑdaˑyă̱nˑdo̱ħ' ne Cesˑaˑreˑa Phiˑlipˑpi. Neħ', dih, he'no̱ħˑweeħ hă̱ˑno̱nt'haiˑneħ', haˑgo̱ˑya'o̱nˑdo̱sˑo̱h' na'go̱'iˑo̱ˑnyaˑnih, haˑgo̱'yă̱ˑa̱h'seeh, So̱ naħˑohˑdă̱ħˑă̱h giħˑo̱h', haˑna̱nˑdo̱h' no̱ˑgweħ', ne gă̱ħ Niiħ'?
28Neħ ne' desˑho̱ˑwa̱ˑwă̱'no̱ħˑsăˑgwă̱h, hoˑnă̱ă̱, John ne Bapˑtist; neħˑgwa', gye, nă̱'na̱nˑdo̱h, Eˑliˑas; oˑyaħ'sho̱ħˑo̱h, kuh, gye, nă̱'na̱nˑdo̱h, Shaˑyaħ'daat no'oˑdiˑdoˑgă̱s'daˑnih.
29Oˑnă̱h' haˑgo̱'yă̱ˑa̱h'seeh, So̱, dih, niis' naħˑoh'dă̱ħˑă̱h swaˑdo̱h' ne gă̱ħ niiħ'? Neħ ne' Peˑter thosˑnyeħ'o̱h, haˑwă̱'a̱hˑseeh', Neħ', waeh', niis ne Christ, [ne Chaˑga'o̱hˑheˑdʋs.]
30Oˑnă̱h' haˑgo̱ħ'niˑgo̱ˑă̱nˑdo'gă̱sˑdo̱h na'gă̱ˑa̱a̱k' so̱ˑgaaħ' deˑo̱'wa̱ˑoˑwiiħ no̱'gweh, haˑyaħ'daˑdeħ.
31Neħˑhuh' niˑyòˑweħ', oˑnă̱h' hohˑsaaħ, ne waˑa'go̱'iˑo̱ˑnyă̱ħ, he neħ' ne' tgaˑgo̱nt weˑsòħ' oˑi'waˑgee, ă̱ˑo̱'yaˑgă̱ħ No̱ˑwa̱'wa̱k no̱ˑgweh'; neħ', gwaħˑhuh', nă̱'o̱ˑwa̱ˑdiħ naˑdi'gă̱hˑjis'ho̱ħˑo̱h; haeħˑgwah', kuh, naˑdih'să̱nˑnoˑwaˑnă̱s, haˑdi'yaħˑdo̱nˑthwʋs; kuh ne shaˑgo'diˑyaˑdo̱ˑnih; neħ', gwaħˑhuh', nă̱'o̱ˑwaˑnyòħ'; da neħ' noˑnă̱h' ă̱ˑga'at neh să̱h' niˑwă̱'nĭsˑhăˑgee, oˑnă̱h' dă̱ntˑhatˑgă̱h.
32Da neħ' he'no̱ˑoˑwă̱nˑna̱ˑwă̱h' heˑwaˑas'nyeħt, aˑgwʋs' neħ', ne gwaħ' thaˑdwĕnˑna̱'ă̱ħ. Oˑnă̱h ne' Peˑter waˑoˑyeˑna̱a̱ħ', waˑah'saˑwă̱ħ' ne waˑo'ĭsˑdă̱ħ.
33Neħˑhuh, dih', noˑnă̱h' oħˑtha'dihˑsaˑdeˑniħ', waˑa'go̱ˑyat'gatˑhòħ', kuh, naˑgo̱'iˑo̱ˑnyaˑnih, waˑo'ĭsˑdă̱ħ ne' Peˑter; haˑwă̱ă̱, Gesˑho̱ˑne'gwa niis' daˑsaˑdăk' Seˑnĭs'heˑoˑno̱ħ; neħ, waeh, niis ne' thă̱ħ'ă̱h neħ' deħˑsă̱n'no̱hˑdo̱'nyo̱hˑgwaħ Naˑwĕnˑni'yòħˑgeeˑkhaaħ; neħ, sho̱, heˑweˑgă̱ă̱h no̱ˑgwe'eˑkhaaħ.
34Neħˑhuh' niˑyòˑweħ', noˑnă̱h' heˑa'go̱ˑno̱'go̱sˑo̱h no̱ˑgweh' haˑyaħ'daˑdeħ; heˑaˑdiˑyaħ'daaħ', kuh, naˑgo̱'iˑo̱ˑnyaˑnih; haˑgo̱'yă̱ˑa̱h'seeh, So̱nˑdiħˑgwa'naħˑoh'dă̱ħˑă̱h hoˑgaˑyă̱s' na'akˑno̱nˑdăˑdyeħ', neħ nă̱ˑa̱nˑdaˑdat'gaħˑwah'jih; neħ, kuh', deˑak ne'oˑwă̱h' ne deˑga'yahˑso̱nt; oˑnă̱h' hak'no̱nˑdă̱h.
35Neħ', waeh, ne so̱n'diħˑgwa'naħˑot ă̱ˑeh'heˑaak, Dă̱ˑwa̱'gă̱ħˑnyaˑdo̱o̱k' he'go̱ˑheħ, haħ'deˑgaˑgo̱nt' waˑoh'do̱o̱ħ ne' neħ; neħ', kuh, neh so̱n'diħˑgwa'naħˑot ă̱ˑeh'heˑaak, Ă̱ˑwa̱'gahˑdo̱o̱ħ he'go̱ˑheħ, neħ ă̱ˑdyò'iˑwaħ'gă̱ˑa̱k haakˑno'o̱hˑgwaħ, kuh, ne gaiˑwiˑyòs'dʋk, neħ ne'neħ shaˑa'yaħˑdaat, haħˑdeˑgaˑgo̱nt' saˑaˑdaˑdyaħ'daˑgòħ.
36Neħ, să̱ħˑă̱h, neh, aˑnaħˑoh'dă̱ħˑă̱h' aˑoˑdesˑdă̱ħ'' no̱ˑgweh'', ne neħ', giħˑshă̱h', gaˑgweˑgo̱h' aˑaˑyaħ'daˑgwĕnˑniˑyòħ'heħt he'yo̱ˑă̱nˑjaˑdeeħ', a'ohˑdo̱o̱ħ', naeh, notˑhwa'isˑhăħ?
37Neħ', giħˑshă̱h, neh, aˑnaħˑoh'dă̱ħˑă̱h' hoˑgweˑnyo̱o̱h', no̱'gweh, o̱n'daˑatˑgaaħ', neh o̱'sa'aˑniˑno̱ħ'dʋk notˑhwais'hăăħ'?
38Neħ' neh so̱'diħˑgwa'naħˑoh'dă̱ħˑă̱h, ă̱ˑa̱ˑde'ă̱h'seek he'gyaħˑdaˑdeħ, neħ, kuh, heˑniˑgwă̱'no̱ħˑdă̱ă̱, nă̱ˑgă̱ he'aˑdiˑgat hoˑdiħ'no̱'wehˑhăăt, hoˑdiˑwa'neħˑaˑgo̱h', kuh, ga'waˑjiˑyăˑdeħ; neħ ne' neħ haˑyaħ'daˑdeħ, ha'eħˑgwah, No̱ˑwa̱'wa̱k no̱ˑgweh, ă̱ˑo'deˑaħt, noˑnă̱h' ă̱ntˑheħ' neħ ă̱ntˑhoˑdyeˑăħ'dahˑgo̱'o̱nˑdyeħ ne deˑa'ă̱hˑsă̱'o̱hˑgo̱h No'oħˑnih; ă̱ntˑhaˑdiˑyaħ'dăˑdyeħ', gwaħˑhuh', noˑo̱'yaħˑge'oˑno̱ħ'sha̱ħˑsho̱ħ', hoˑdi'yaħˑdaˑdoˑgă̱h'diħ.
Currently Selected:
Mark 8: SEE
Highlight
Share
Copy
Want to have your highlights saved across all your devices? Sign up or sign in
Gospels published by the American Bible Society in 1872, Psalms in 1892.
