मर्कुस 4

चालाइ बिकाको निङपिका

(मति 13:1-23; लुक 8:4-15)

1येसु आरोङ गालिल समुन्द्रको काम्भेता सुसमाचार पालि तेङहि। इन्ता वथे बारका जेर जोम्का हिघाहि, येसु इन्ता हिका नाउता धोल्हि, कालाउ जेरगेलाइ समुन्द्रको काम्भेता योम्हि। 2कालाउ येसु इम्बालाइहेङ निङपिकासो हेन्जाङ काथागेलाइ दोअ्पिहि। कालाउ वा ताइको सिक्स्याता इसिका दोअ्हि, 3हिङसु, एमि किसान चालाइ बिलि ताइको मिलिङता हानिहि। 4कालाउ चालाइ बिलाउ आतुइसा दामा भारि थाल्न्हाहि, आधे चालाइ जिहाँ-जुइलेङ लोतेङ चालाइ चुम्तेङ हानिहि। 5आधे चालाइ उन्ठुइभारि बिन्हाहि, जेता रेम्का भोनोइ मान्थुघाहि। कालाउ जेता हेन्जा भोनोइ मान्थुनाङ, इङको धेमाङ योहि। 6जेलाउ हेन्जा सान्हेनाङ, आतुइका चालाइको तुपा सेङहि, लिता जारि जोअ्लि मादोनाङ इङको चालाइगेलाइ युल्हि। 7आधे चालाइ चुइगेलाइ भारि थालन्हाहि, चुइगेलाइ बारानाङ इङको आतुइका चालाइगेलाइहेङ बारालि मापिहि, कालाउ इङको चालाइ एरिन्हाहि, कालाउ फल मासेहि। 8कालाउ आतुइसा चालाइ रेम्का भोनोइता बिन्हाहि, कालाउ इङको योकाताङ बाराकाताङ झाङगिहि, आधे चालाइ साइ गुना, आधे चालाइ तुते गुना कालाउ आधे चालाइ सुम्ते गुना सेहि।

9कालाउ आरोङ येसु दोअ्हि, “जाइ काङको या काथा हिङदोङखे, वा इङको काथाहेङ ध्यान पितेङ हिनाको।”

10जेलाउ येसु एक्लाङ जेङहि, कालाउ तेन्हे झना चात्यागेलाइ कालाउ आरोङ वाको सानाइति येसु दोफा ओबालाइ इङको निङपिका को बारेता हिअ्हि। 11येसु इम्बालाइहेङ दोअ्हि, “नासेहेङ परमेस्वरको सासनको रहस्य पिका हि, जाइ परमेस्वरको सासनको बाहार हिकालाइहेङ निङपिका पाहासो गोताङ काथा दोअ्पिहि।” 12जेसाङ परमेस्वरको धर्मसास्तरता लेखेका हि,

“जेदोङ का पाखा इम्बालाइ खाङनुते खाङखे मातिङखे,

जेदोङ का दोअ्खा हिङनुते हिङसुखेना कालाउ मागिसुखेना।

माकुनुते इम्बालाइ पाप पालि लाअ्धावा,

कालाउ परमेस्वर इम्बालाइको पाप स्यामा पापिधावा।”

चालाइ बिका निङपिका को ब्याख्या

13आरोङ येसु इम्बालाइहेङ दोअ्हि, “नेलाइ इदोइ निङपिका मागिसुखेना भाइसो, भेनेङ निङपिका हेसा गिस्वाना?” 14इदोइ निङपिका को आर्था इदोइ हि कि, चालाइ बिका किसान चाहि इसिका हि जाइ परमेस्वरको बचन चारचाराइपाखे। 15आधिमि द्‍याङगेलाइ दामा भाइका हि, जेता चालाइ बिन्हाका हि। जेलाउ इम्बालाइ बचन हिङखे, कालाउ एन्सालाउ दोङ साइतान लोखे, हिङका बचन चुम्पुतेङ हानिखे। 16कालाउ आधिमि द्‍याङगेलाइ इङको उन्ठुइ भाइका मिलिङ हि, जेता चालाइ बिन्हाका हि, या इसिका द्‍याङगेलाइ दोङ हि जाइ दोङ लेङचातेङ परमेस्वरको बचन हिङखे कालाउ एन्सालाउ दोङ ग्रहन पाखे। 17जेलाउ इम्बालाइको जारि लिता थेकापा माजोनाङ परमेस्वरको बचन ताअ्लि मादोअ्खे, ओदोङ भाअ्सिङ इम्बालाइ आले दिना थेकापा खिनिङ खाङधुरि पाखे। जेलाउ बचनको भाअ्सिङ इम्बालाइता दुख कालाउ सतावत लोखे, कालाउ इम्बालाइ एन्सालाउ दोङ परमेस्वरको बचन ह्रुता खाङधुरि पालि लाअ्खे। 18आधिमि द्‍याङगेलाइ चुइको झुन्झिता भाइका हि जेता चालाइ बिन्हाका हि, जाइ इसिका द्‍याङ हि वा परमेस्वरको बचन हिङखे, 19कालाउ सुमिङको सुरताहोइ, धनको मायारुहोइ कालाउ रेम-रेम्का आनेमानेको लोभ, इदोइ वाको जिबनता लोखे कालाउ परमेस्वरको बचनता आगा बारालि मापिखे। कालाउ इन्सिका द्‍याङ परमेस्वरको बचनता आगा बारालि मादोअ्खे। 20आधिमि द्‍याङगेलाइ रेम्का मिलिङ भाइका हि, जेता चालाइ बिन्हाका हि, जाइ इसिका द्‍याङ हि ओबालाइ परमेस्वरको बचन हिङतेङ ग्रहन पाखे कालाउ इन्सिका द्‍याङ परमेस्वरको बचनता आगा बारालि दोखे। आधिमि द्‍याङगेलाइ साइ गुना, आधिमि द्‍याङगेलाइ तुते गुना, कालाउ आधिमि द्‍याङगेलाइ सुम्ते गुना फल सेपाखे।

टाकि ह्रुताको गेसा

21येसु इम्बालाइहेङ दोअ्हि, हासु बुङ गेसा जोलाइतेङ पाथि लिता माकुनु खात लिता ताअ्खे रो? झाराङ द्‍याङ तिनाको दोअ्तेङ टाकि ह्रुता ताखे, 22एसापा हाइ दोङ म्होतेङ ताअ्का तिनाङ, जेदोङ म्होनाका काथा हि देखाल जेनावा। जेदोङ काथा म्होन्हाका हि इङको प्रकासता माल्वाङ। 23“जाइ काङको या काथा हिङदोङखे, वा इङको काथाहेङ ध्यान पितेङ हिनाको।”

24येसु आरोङ इम्बालाइहेङ दोअ्हि, “नेलाइ हाइ हिङसुखेना इन्ता मन पिसु, जेथे हेन्जा मन पितेङ हिनाना, ओदोङ झोको हेन्जा नाअ् ग्यान #4:24 नेलाइ हाइ हिङसुखेना इन्ता मन पिसु, जेथे हेन्जा मन पितेङ हिनाना, ओदोङ झोको नाअ् ग्यान बुझियाना। ओदोङ काथा इता लेखेका हि, हाइपालिपानु नेलाइ जेदोङ हिसिका मनहोइ पिसुखेना नेलाइ बुङ इन्सिकाङ मनहोइ निङस्वाना कालाउ आरुङ हेन्जा नेलाइहेङ प्याङबुझियाना। 25जाइ दोफा ग्यान हि वासेहेङ हेन्जा प्याङ, जाइ दोफा ग्यान मान्थु वाको आतुइसा हिका बुङ चुम्पावा#4:25 हाइपालिपानु हासु दोफा हि वासेहेङ प्यावा, हासु दोफा मान्थु वाको हिका बुङ धिनावा। ओदोङ काथा इता लेखेका हि, ।”

चालाइ बिकाको निङपिका

26येसु आरोङ दोअ्हि, “परमेस्वरको सासन इसिका हि, जेसाङ किसान मिलिङता चालाइ बिका हि, 27चालाइ बितेङ वाको बारेता निल्हि झेम्पाङ लिपाङ वा काम पातेङ हि, कालाउ वा थाहा मानिङहि कि इङको चालाइ एसा योतेङ बाराहि।” 28मिलिङ ताइमिङ चालाइ योपाखे हाइपालिपानु मिलिङ, लाम्फा तुपा, इन्तासो सिसा कालाउ सिसाहेङ मिङपाखे। 29जेलाउ फल मिङखे कालाउ किसान ताइको द्‍याङहेङ काचिया पितेङ उम चेलि दिङगिल्खे। हाइपालिपानु उम मिङका पोहर जेङका हिखे।

पासाइको चालाइसो निङपिका

(मति 13:31-32; लुक 13:18-19)

30येसु आरोङ दोअ्हि, केलाइ परमेस्वरको सासन इदोइ प्रकारसो तुलाना पालि द्वाङ। का नेलाइहेङ निङपिका पाहासो द्वाङका। 31परमेस्वरको सासन सुमिङता हिका मध्ये झाराङ खान्तेङ म्हुइका पासाइको चालाइ भाइका हि। 32जेलाउ पासाइको चालाइ बिखे, कालाउ बाराखे, कालाउ “गोताङ सारसिङगेलाइ खान्तेङ बार्का जेङखे, कालाउ बा-बार्का डालेङ जोखे, कालाउ आकासको जिहाँ-जुइलेङगेलाइ बुङ हिलि दालेङता ताइको भाअ्सिङ भाअ्सा जोखे।”

33कालाउ येसु ओबालाइ ग्याको दोअ्तेङ इदोइ खाल-खाल्को थुपरोङ निङपितेङ बचन हिङपाहि। 34येसु जेलाउ बुङ निङपितेङ परमेस्वरको सासनको बारेता दोअ्घाखे, कालाउ ताइको चात्यागेलाइहेङ वा दोङ सिकापा गोताङ काथाको आर्था दोअ्पिघाहि।

येसु दुरभेर्माहेङ गाम्पाहि

(मति 8:18; 23-27; लुक 8:22-25)

35कोकोङ दिनाको दिलिमा येसु ताइको चात्यागेलाइहेङ दोअ्हि, “लोसु केलाइ गालिल समुन्द्रको ओदोइ पार हानाइने।” 36चात्यागेलाइ बुङ जेरहेङ लाअ्तेङ ओदोङ नाउता येसु दोफा हानिहि, जेता येसु योम्तेङ हिघाहि। इम्बालाइ येसुहेङ बुङ ताइ दोफा चुम्पुहि। वाको दोफा आरु नाउगेलाइ बुङ हिघाहि। 37-38येसु चाहि नाउको लेसारा भारि खिम्सुता पुरिङ ताअ्तेङ जिम्तेङ हिघाहि। आचानक बार्का दुम भेर्मा लोलि तेङहि कालाउ उल्लाउ-उल्लाउका सालगेलाइ नाउता थुन्हालि तेङहि। नाउ चिहोइ पोङघातेङ दुबिलि तोम्का हिघाहि। कालाउ चत्यागेलाइ येसुहेङ ल्होपाहि कालाउ दोअ्हि, “गुरु ज्यु, केलाइ झाराङ वाङलि तोम्न्हाहोइ कालाउ नासेहेङ हाइ दोङ चिन्ता मान्थु?”

39येसु ल्होतेङ भेरमाहेङ चेरहि कालाउ समुन्द्रको सालगेलाइहेङ दोअ्हि, “सिकापा गाङ” कालाउ एन्सालाउ दोङ दुर भेरमा कालाउ समुन्द्र गाङहि।

40जेलाउ येसु चात्यागेलाइहेङ हिअ्हि, “नेलाइ हाइ पालि एसापा थिसुखेना? हाइ नेलाइहेङ एला थेकापा खाङधुरि मान्थु?”

41इम्बालाइ मेनाङ थिहि, कालाउ ता-ताइमिता दोअ्हि, “या द्‍याङ हासुको? समुन्द्र कालाउ भेरमा बुङ याको काथा साअ्खे।”

Currently Selected:

मर्कुस 4: DHINT

Highlight

Copy