मर्कुस 3

खुर सेङका द्याङ एल्हि

1न्हुसो आरोङ येसु यहुदिगेलाइको चाउघारा साअ्ता हानिलाउ इन्ता एमि खुर सेङका द्‍याङ हिघाहि। 2परमेस्वरको पबित्तरो दिनाता उङको द्‍याङहेङ एल्पाङबे दोअ्तेङ वासेहेङ दुसिलिको भाअ्सिङ द्‍याङगेलाइ दाउ भोतेङ हिघाहि। 3येसु खुर सेङका द्‍याङहेङ दोअ्हि, “झाराङको आगाता जाअ्।”

4जेलाउ येसु दोङ इम्बालाइहेङ दोअ्हि, हिदोइ चाहि हि, परमेस्वरको पबित्तरो दिनाता रेम्फा पालि रेम्का नाअ् मारेम्का हि? हासुको बुङ प्रान बान्चिपालि, कि नाअ् सेअ्लि, हिदोइ चाहि रेम्का हि? कालाउ इम्बालाइ नुइ माधुइसिङ सिकापा हि।

5येसु मेनाङ चेर ताम्पाहि जेलाउ वा द्‍यापाहाङ खाङहि, उङको द्‍याङगेलाइको राङका मनहेङ तिङतेङ वा मेनाङ दुखित जेङहि। कालाउ उङको द्‍याङहेङ दोअ्हि, “नाङको खुर फेनापा।” उङको द्‍याङ खुर फेनापाहि, कालाउ वाको खुर एल्हि। 6जेलाउ फारिसिगेलाइ चाउघारा साअ्सो बाहार ओल्लेतेङ धेमाङ राजा हेरोदको दल दोफा आधे द्‍याङगेलाइ हेसा पातेङ येसुहेङ सेअ्लि द्वाङ वाला दोअ्तेङ वाको बिरोधता ल्होहि।

जेरगेलाइ येसुहेङ पिताइका

(मति 12:15-16; लुक 6:17-19)

7-8कालाउ येसु ताइको चात्यागेलाइ दोफा हानिहि कालाउ द्‍याङको बार्का जेर बुङ येसुहेङ पिताइपुहि। इम्बालाइ गालिल जिल्लाको, यरुसेलेम सहर, यहुदिया जिल्लाको देरासो, इदुमिया जिल्लासो, कालाउ यर्दन झोराको नुहेपाहाको इलाकासो, कालाउ टुरोस कालाउ सिदोन सहर भेरपाको इलाकासो लोका हिघाहि। इदोइ गोताङ द्‍याङगेलाइ येसुको पाका माहान कामगेलाइको बारेता हिङतेङ लोहि। 9येसु ताइको चात्यागेलाइहेङ दोअ्हि, “कासेहेङ योम्लिको भाअ्सिङ एनोङ नाउ चुमातेङ लौउ कालाउकि द्‍याङगेलाइको जेर कासेहेङ मायानाको।” 10इङको दिना येसु हेन्जा द्‍याङगेलाइहेङ एल्पानाङ, जेथे बुङ मासाधेकालाइ हिघाहि वासेहेङ साइलि खोसु धाअ्सुघाहि। 11जेलाउ भुत-आत्मा धेल्कालाइ वासेहेङ तिङघाहि, कालाउ येसुको आगाता साम्मान तिङपालिको भाअ्सिङ पोम्भेलेतेङ इसिका दोकाताङ ह्रिकाइघाहि, “नाअ् परमेस्वरको चान हिना।” 12कालाउ येसु भुत-आत्माहेङ थाङका आग्या पिहि, “हासुहेङ बुङ मादोअ्सु का हासु दोअ्तेङ।”

येसु तेन्हे चात्यागेलाइहेङ साल्हि

(मति 10:1-4; लुक 6:12-16)

13कालाउ येसु तिकारता ताङलाहि कालाउ वा दोङ ताइको मन्दा ताअ्का द्‍याङगेलाइहेङ काइहि। कालाउकि इम्बालाइ वाको चात्या जेनाको दोअ्तेङ कालाउ इम्बालाइ वाकोता लोहि। 14जेलाउ ताइ दोफा हिलिको भाअ्सिङ कालाउ सुसमाचार पालि दिङगिल्लिको भाअ्सिङ वा दोङ तेन्हे झना चात्या काम पालि छाल्हि। 15कालाउ इम्बालाइहेङ भुत-आत्मागेलाइ ओल्लापालि खाबारा बुङ पिहि। 16उङको तेन्हे झना छाल्का चात्या (प्रेरित) इम्बालाइ दोङ, सिमोन (जाइको मिङ पतरुस ताअ्पिहि)। 17जब्दियाको न्हेमि चानगेलाइ याकुब कालाउ युहान्‍ना, कालाउ वा इम्बालाइहेङ बोआर्गनेस माकुनु (गर्जनको चानगेलाइ) दोअ्तेङ मिङ ताअ्पिहि। 18आन्द्रियास, फिलिप, बारथोलोमाइ, मति, थोमा, आल्फायासको चान याकुब, थेदियास, कालाउ सिमोन कानानि, 19कालाउ यहुदा इस्कोरियत जाइ न्हुसो येसुहेङ बोमिको खुरता रिम्पापिका हिघाहि।

येसु कालाउ साइतान

(मति 12:22-23; लुक 11:14-22)

20कालाउ न्हुसो येसु कालाउ वाको चात्यागेलाइ आरोङ साअ् भारि घुरिहि। आरोङ इन्ता द्‍याङको जेर बिरुबिरुपा जोम्हि, इदोइ झोको कि वा कालाउ वाको चात्यागेलाइ उम चाअ्लि बुङ सुकापा मानिङहि। 21जेलाउ येसुको जाहान इङको काथा हिङहि, कालाउ वासेहेङ चुम्पुलि इम्बालाइ ओल्लेहि, हाइपालिपानु वाको मन थेगानाता मान्थु दोअ्तेङ इम्बालाइ दोअ्घाखे।

22यरुसेलेम सहरसो लोका व्यवस्था धिरपाका द्‍याङगेलाइ दोअ्हि, “येसुकोता साइतान हि, कालाउ भुत-आत्मागेलाइको ग्रिह्रि साइतान पाहासो दोङ, येसु भुत-आत्मागेलाइ ओल्लेपाखे।”

23कालाउ येसु दोङ इम्बालाइहेङ ताइमिकोता काइतेङ निङपिका पाहासो दोअ्हि, “साइतान दोङ ताइको भुत-आत्मागेलाहेङ ओल्लेपालि मादोखे।” 24जेसापा हिदोइ बुङ सारभिको द्‍याङ ता-ताइमिता खेङन्हाहि पानु इङको सारभि तिकिलि मादोखे। 25एन्साङ पातेङ एनोङ जाहान एमिसो-भेनेङको बिरोधता हि पानु, इङको जाहान ए दोफाङ हिलि माद्वाङ। 26जेसापा साइतान दोङ साइतानकोङ बिरोधता जाअ्तेङ इङको तिकिलि माद्वाङ, कालाउ वाको आन्तय लोलि दोका हिखे। 27येसु इता साइतानको तुलाना एमि बल्लियाका द्‍याङ दोफा पाका हि, जाइ दोफा एनोङ साअ् हि। हिदोइ बुङ द्‍याङ लाम्फा बल्लियाका द्‍याङहेङ जिङलि गोइखे कालाउ खिनिङ वाको साअ्को धन-सम्पति कालाउ साअ् लुतिलि द्वावा। 28जातिङ भारि का नेलाइहेङ दोअ्खा, परमेस्वर माकुनु हासुको बुङ बिरोधता पाका पापगेलाइ कालाउ मन्दा माताका परमेस्वर स्यामा पाङ, 29कालाउ पबित्तरो आत्माको बिरोधता मन्दा माताकाहेङ मिधुलाउ बुङ परमेस्वर स्यामा मापाप्याङ, कालाउ वासेहेङ जेलाउलाउको भाअ्सिङ पापको दुसिका जेनाङ।

30येसु इदोइ बचन दोअ्हि, हाइपालिपानु “वाकोता भुत-आत्मा धेल्का हि” दोअ्तेङ इम्बालाइ दोअ्का हिघाहि।

येसुको आमाइ कालाउ ओनेगेलाइ

(मति 12:46-50; लुक 8:19-21)

31येसुको आमाइ कालाउ ओनेगेलाइ इन्ता लोहि। साअ्को बाहार जाअ्तेङ येसुहेङ काइगिल्हि। 32येसुको कोर्पाहाङ द्‍याङगेलाइको जेर जाअ्तेङ हिघाहि। कालाउ इम्बालाइ वासेहेङ दोअ्हि, “नाङको आमाइ कालाउ नाङको ओनेगेलाइ नासेहेङ भोदोङखे, ओबालाइ बाहार ह्रुम्तेङ हि।”

33कालाउ येसु इम्बालाइहेङ दोअ्हि, “काङको आमाइ, ओनेगेलाइ हासु?”

34ताइको हिका कोर्पाहाङ खाङतेङ वा दोअ्हि, “खाङसु, काङको आमाइ कालाउ ओनेगेलाइ एबालाइ दोङ, 35हाइपालिपानु जाइ परमेस्वरको मन भाइपाङ पाखे, वा दोङ काङको बेजान ओनेगेलाइ, कालाउ वाजान ओनेगेलाइ कालाउ काङको आमाइ।”

Currently Selected:

मर्कुस 3: DHINT

Highlight

Copy