मति 27
27
येसुहेङ पिलातसकोता चुम्पुका
(लुक 23:1-5,13-25; युहा 18:28-38)
1एह्रिमाङ मुलि पुजारिगेलाइ कालाउ द्याङगेलाइको आगुवागेलाइ, येसुहेङ सेअ्लिको भाअ्सिङ साल्लाहा पाहि। 2कालाउ ओबालाइ वासेहेङ जिङतेङ पिलातस हाकिमकोता जिम्मा पिपुहि।
यहुदा इस्कोरियत दिहाम होङतेङ सिका
(प्रे 1:18-19)
3जेलाउ यहुदा इस्कोरियत येसुहेङ सेअ्लि खाङका दोअ्का काथा हिङतेङ पासताइहि। कालाउ मुलि पुजारिगेलाइहेङ कालाउ यहुदि आगुवागेलाइहेङ न्हे कुरि ते चान्दिको थुरि घुरिपालि चुमाहि। 4कालाउ वा दोअ्हि, का निरदुसि द्याङहेङ सेअ्लिको भाअ्सिङ रिम्पा पिघा। कालाउ इम्बालाइ दोअ्हि, नाअ् दोफा केलाइहेङ इङको वास्ता मान्थु इङको नाङको समस्या केलाइको माको।
5कालाउ वा चान्दिको थुरिगेलाइ परमेस्वरको मुन्दिरको सालेङता थाल्तेङ हानिहि, कालाउ बाहार हानितेङ दिहाम होङतेङ सिहि।
6कालाउ मुलि पुजारिगेलाइ चान्दिको थुरिगेलाइ चुम्तेङ दोअ्हि, केलाइको व्यवस्था आन्सार इदोइ धनहेङ मुन्दिरको भाकारता ताअ्लि उचित मान्थु, हाइपालिपानु याते हितिको भाअ्सिङ पिका दाम हि। 7ओदोङ भाअ्सिङ इम्बालाइ ता-ताइमिता साल्लाहा पातेङ परदेसिहेङ लिअ्लि कुमालेको मिलिङ चोल्हि। 8एन्सालाउ सोङ एला थेकापा इङको मिलिङहेङ हितिको मिलिङ दोअ्दोङखे। 9लाम्फाको परमेस्वरको बक्ता यर्मियाको दोअ्का काथा पुरा जेङहि। वा दोअ्हि, इस्राएल सारभिको द्याङगेलाइहेङ वाको भाअ्सिङ तोकि पिका दाम चान्दिको न्हे कुरि ते थुरि हिघाहि इङको इम्बालाइ ह्रुहि। 10कालाउ परमप्रभु कासेहेङ आदेस पिका आन्सार कुमालेको मिलिङ चोल्लिको भाअ्सिङ इङको ताका लागाइहि।
11येसुहेङ हाकिमको आगाता जाअ्पाहि, कालाउ वा येसुहेङ हिअ्हि हाइ नाअ् यहुदिगेलाइको राजा दोङ? येसु दोअ्हि, नाअ् दोङ एन्साङ दोअ्खेना।
12कालाउ मुलि पुजारिगेलाइ कालाउ यहुदि आगुवागेलाइ येसुहेङ दुसिहि, कालाउ बुङ वा हाइ दोङ जोबाफ मादोअ्हि। 13कालाउ पिलातस येसुहेङ हिअ्हि, “नासेहेङ आरोप लागाइका काथा माहिङना। नाअ् हाइ पालि जोबाफ मापिखेना?” 14कालाउ येसु हाकिम पिलातसहेङ हाइ दोङ जोबाफ मापिहि। इदोइ काथाता पिलातस भाङ-भाङहि।
15निस्तार पार्बाता द्याङगेलाइ दोअ्का बमोजिम हाकिम एमि कैदिहेङ लापिलि, गोइका मुन्धुम हिघाखे। 16इङको बेला बारब्बा इम्बालाइको एमि कुख्यात कैदि हिघाहि। 17जेलाउ झाराङ द्याङगेलाइ पिलातसको साअ्ता जोम्का हिघाहि। पिलातस इम्बालाइहेङ दोअ्हि, नेलाइको भाअ्सिङ एमि द्याङहेङ लाप्याङका। कालाउ हिदोइ द्याङहेङ लापिलि दोअ्सु बारब्बा ना ख्रिस्ट दोअ्का येसुहेङ? 18हाइपालिपानु वासेहेङ थाहा हिघाहि कि इम्बालाइहेङ डाहा पातेङ येसुहेङ रिम्का हिघाहि।
19पिलातस न्याय पाका आसानता योम्तेङ हिलाउ वाको बे वासेहेङ एनोङ बानाल पिगिल्हि। उङको निरदुसिको बिरोधता हाइ दोङ मापा वाको बारेता नानिको न्हिसिनता का सोप्पन तिङघा। इङको सोप्पनसो वाको कारन का हेन्जाङ दुख भोगेघा।
20कालाउ मुलि पुजारिगेलाइ कालाउ यहुदि आगुवागेलाइ बारब्बाहेङ लाअ्पिलि, कालाउ येसुहेङ सेअ्लि दोअ्लिको भाअ्सिङ द्याङगेलाइहेङ तोङपाहि।
21इम्बालाइहेङ आरोङ हाकिम पिलातस हिअ्हि, “इदोइ न्हेमिता हासुहेङ लाअ्पिलि ठिक जेनाङ। इम्बालाइ दोअ्हि बारब्बाहेङ?”
22पिलातस इम्बालाइहेङ हिअ्हि, “एन्सा पानु ख्रिस्ट दोअ्का येसुहेङ हाइ पालि गोयाङ?” झाराङ द्याङगेलाइ दोअ्हि, “वासेहेङ क्रुस्टा तोइपि।”
23पिलातस इम्बालाइहेङ हिअ्हि, “वा हाइ आपाराध पाका हि रो?” कालाउ झन इम्बालाइ पिलातसहेङ ह्रिकाइतेङ दोअ्हि, “वासेहेङ क्रुस्टा तोइतेङ सेअ्सु।”
24कालाउ पिलातस हाइ बुङ पारा मातिङहि आरोङ हेन्जाङ गोलमाल जेनाङबे दोअ्तेङ थिहि। कालाउ वा चि चुम्पुतेङ जेरको आगाता ताइको खुर पातेङ दोअ्हि, “नेलाइ ताइमिङ गिसु का या द्याङहेङ सेअ्का दुसिका कासेहेङ माको भरु नेलाइहेङ दोङ लाग्याको।
25झाराङ द्याङगेलाइ जोबाफ पितेङ दोअ्हि, वासेहेङ सेअ्का को दुसिका केलाइहेङ कालाउ केलाइको सान्तान ह्रुता परियाको।”
26कालाउ पिलातस ओबालाइको भाअ्सिङ बारब्बाहेङ लाअ्पिहि, पिलातस आधिमि सिपालाइहेङ येसुहेङ द्वालिहोइ म्हेलि लागाइहि। कालाउ क्रुस्टा तोइलि दोअ्हि।
येसुहेङ खुजालाइका
(मर्कु 15:16-20; युहा 19:2-3)
27कालाउ पिलातसको सिपालाइ येसुहेङ बारका हाकिमको साअ्ता चुम्पुहि, इन्ता झाराङ सिपालाइ येसुको कोरपाहाङ जाअ्हि। 28इम्बालाइ येसुको लोखोन होपितेङ, कालाउ वासेहेङ गाङगाउरा धाबा होम्पाहि। 29चुइको मुकुट पुइतेङ येसुहेङ तुअ्पाहि, कालाउ वाको दाम्पाहा खुरता एनोङ निगालोको लाठि ताअ्पिहि, कालाउ वासेहेङ जेङका-माजेङ काथागेलाइ दोअ्तेङ खुजालाइतेङ दोअ्हि, यहुदिगेलाइको राजाको जय ज्याको! 30सिपालाइ येसुहेङ थोअ्हि, कालाउ निगालोको लाठिहोइ वाको पुरिङता दान्हाइपिहि। 31कालाउ खुजालाइलि दोतेङ नेल्पा धाबा खाइपिहि, कालाउ वाको ताइकोङ धाबा होङपाहि। इन्तासो क्रुस्टा तोइलि येसुहेङ चुम्पुहि।
क्रुसता येसु
(मर्कु 15:21-32; लुक 23:26-43; युहा 19:17-27)
32हानेकाताङ पालाउ इम्बालाइ कुरेनि सहरको सिमोनहेङ दामाता दुसुहि, कालाउ इम्बालाइ येसुको क्रुस फाअ्लि कर लागाइहि, 33कालाउ इम्बालाइ गलगथा दोअ्का थामेता थुकाहि, गलगथा दोअ्का चाहि खप्परे थामे, 34जेलाउ इम्बालाइ गलगथा थुकाहि कालाउ सिपालाइ येसुहेङ म्हाका मुर्र मिस्लाइका दाखरस आम्पाहि इन्ता खाका पित्त मिस्लाइका हिघाहि, कालाउ येसु आम्लि माकिहि। 35कालाउ येसुहेङ इम्बालाइ क्रुस्टा ताराइतेङ तोइहि। वाको धाबा हासु हाइ निनाङ दोअ्तेङ इम्बालाइ चिट्ठा लागाइहि कालाउ वाको धाबा ता-ताइमिता बाखाराइहि। 36कालाउ इम्बालाइ इन्ता हितेङ येसुहेङ पहरा पिहि। 37येसुको, पुरिङ ह्रुता यहुदिगेलाइको राजा दोअ्का लेखेका दुसिहि पात्तारा ताअ्पितेङ ताअ्का हिघाहि। 38वा दोफा न्हेमि डाकागेलाइहेङ बुङ क्रुसता तोइहि। एमिहेङ येसुको दाम्पाहा, भेनेङहेङ केपाहा तोइहि। 39इङको दामा पाहासो तेकालाइ लोकालाइ-हानिकालाइ ता-ताइको निर्घा मेतेङ-मेतेङ येसुहेङ इसिका दोअ्तेङ खुजालाइहि, 40ते दोअ्, “मुन्दिरहेङ ह्राअ्तेङ कालाउ सुम्निता धाम्लि खाङका द्याङ नाआङ माको? जेसापा नाअ् परमेस्वरको चान नुते ताइमिहेङ बान्चिपातेङ क्रुससो लेता खुअ्तेङ लौउ।”
41मुलि पुजारिगेलाइ, कालाउ व्यवस्था धिरपाका द्याङगेलाइ कालाउ यहुदिगेलाइको आगुवा इन्ताङ हिघाहि। उङको द्याङगेलाइ बुङ येसुहेङ खुजालाइतेङ दोअ्हि, 42“या आरुहेङ बान्चिपालि दोहि, कालाउ एला ताइमिहेङ बान्चिपालि माद्वाङ। ओइ इस्राएल सारभिको राजा क्रुससो खुअ्तेङ लौउ, इदोइ तिङनु केलाइ बुङ नासेहेङ खाङधुरि पाङ।” 43वा परमेस्वरता आस ताअ्का हि, परमेस्वर दोङ वासेहेङ बान्चि पाको। जेसापा परमेस्वर वासेहेङ लाअ्पालि खाङनु, वासेहेङ एलाङ दोङ लाअ्पाको हाइपालिपानु वा ताइमिङ दोअ्का हि का परमेस्वरको चान हिघा। 44कालाउ वाको दोफा क्रुसता तोइन्हाका उङको डाकागेलाइ बुङ वासेहेङ खुजालाइहि।
येसुको सिका
(मर्कु 15:33-41; लुक 23:44-49; युहा 19:28-30)
45नितिमाको तेन्हे बजेसो सुम बजे थेकापा गोताङ सारभिता नितिमाङ कितिकितिहि। इन्सिका घाटाना सुमिङ भरि सुम घान्टा थेकापा जेङहि। 46येसु सुम बजेको सोमोइ इसिका दोअ्तेङ बार्का गालाहोइ ह्रिकाइहि, एलि-एलि लामा सबखथानि? इदोइ दोअ्का चाहि काङको परमेस्वर, काङको परमेस्वर नाअ् कासेहेङ हाइ पालि लाअ्न्हा?
47इन्ता जाअ्कालाइ मध्ये हिङतेङ आधिमि गलत सम्झिहि कालाउ दोअ्लि तेङहि, “हिङसु, याते आगमबक्ता एलियाहेङ ताइमिहेङ साघाइलिको भाअ्सिङ काइदोङखे!”
48कालाउ एमि द्याङ धाअ्तेसाङ हानितेङ चेन्थ्रा चुकता चोबेतेङ निगालोको लागासिता खोइतेङ चुमाहि कालाउ इङको चेन्थ्रा येसुको नुइता युपिहि। कालाउ बाकि द्याङ दोअ्हि, “म्हा-म्हा खानाइने 49एलिया लोतेङ वासेहेङ बान्चेपावा बे?” दोअ्तेङ ओबालाइ इन्ता खाङतेङ हिघाहि।
50येसु आरोङ एखे बारका गालाहोइ ह्रिकाइहि, कालाउ वा ताइको प्रान लाअ्हि।
51कालाउ मुन्दिरको पर्दा ह्रुतासो लेता थेकापा न्हे पाना जेङतेङ थेअ्हि, इङकोङ बेला भुइचाल लोहि कालाउ आरडाङगेलाइ भापाहि। 52तोमगेलाइ चिरन्हाहि, कालाउ हेन्जाङ परमेस्वरको पबित्तरो द्याङगेलाइ सिकासो सिन्हुतेङ ल्होहि। 53कालाउ इम्बालाइ तोम्सो सिन्हुतेङ बाहार ओल्लेहि। कालाउ येसु बुङ सिकासो सिन्हुतेङ न्हुसो ओबालाइ पबित्तरो सहरता दुल्हि कालाउ हेन्जाङ द्याङगेलाइ इम्बालाइहेङ तिङहि।
54सिपालाइको कप्तान कालाउ येसुहेङ ह्रुम्का सिपालाइ भुइचाल लोका, कालाउ इन्ताको जेङका गोताङ घाटानागेलाइ इम्बालाइ तिङहि, कालाउ इम्बालाइ मारेम्फाङ थिहि। कालाउ इम्बालाइ एसा दोअ्हि, “याते जातिङको परमेस्वरको चान कि रो?”
55इन्ता दुरेसोङ जाअ्तेङ खाङतेङ हिका द्याङता बेबालाइ बुङ हिघाहि, उङको बेबालाइ गालिल जिल्लासो येसुहेङ सामाराइलिको भाअ्सिङ येसु दोफाङ लोका हिघाहि। 56मग्दल देरासो मरियम, याकुब कालाउ योसेफको आमाइ मरियम, कालाउ जब्दियाको न्हेमि चानको आमाइ हिघाहि।
येसुहेङ लिका
(मर्कु 15:42-47; लुक 23:50-56; युहा 19:38-42)
57कोकोङ दिनाको दिलिमा एमि आरिमाथियाको सहरता हिका द्याङ योसेफ यरुसलेमता लोहि। वा येसुको एमि चात्या हिघाहि। 58वा पिलातसकोता हानेतेङ येसुको सिका जिउ ह्रेहि, कालाउ येसुको सिका जिउ चुम्पुलि पिलातस पिहि। 59कालाउ योसेफ मेनाङ जाङका जाहाँका धाबा चोल्हि, कालाउ मानचाउलिहोइ सिका जिउहेङ लुन्धाइहि। 60कालाउ येसुको सिका जिउहेङ एनोङ आरडाङता बानाइका नावा तोमता ताअ्हि। योसेफ इङको तोम ताइमिको भाअ्सिङ उन्ठुइको आरडाङता बानाइका हिघाहि। कालाउ इङको तोमको फिनु थुम्लिको भाअ्सिङ एनोङ बार्का उन्ठुइ गाम्बाराइ पातेङ तोमको फिनु थुम्हि। इदोइ काम पातेङ योसेफ ताइ दामा चाहि। 61मग्दल देराको मरियम, कालाउ मरियम मिङ पाका आरोङ भेनेङ बेबाल बुङ तोमको भेनेङ पाहा योम्तेङ हिघाहि।
तोमता पालेगेलाइ
62न्हु दिना, परमेस्वरको पबित्तरो दिनाको मुलि पुजारिगेलाइ कालाउ फारिसिगेलाइ मिलितेङ पिलातसकोता हानेहि। 63ओबालाइ दोअ्हि नेउ केलाइहेङ थाहा हि, या ठगिका द्याङ सिन्हुपा हिलाउ का सितेङ सुम्निता आरोङ सिन्हुतेङ ल्होकाङका दोअ्का हिघाहि। 64ओदोङ भाअ्सिङ सुम्नि थेकापा इङको तोमता ह्रुम्लिको भाअ्सिङ पाले तालि खाबारा पि, माकुनुते वाको सिका जिउहेङ चात्यागेलाइ लोतेङ खुतेङ चुम्पावा, कालाउ द्वावा वाते सिकासो सिन्हुतेङ ल्होहि दोअ्तेङ द्याङगेलाइहेङ दोअ्तावा, कालाउ लाम्फाको ठगिका खान्तेङ एनाङको ठगिका झन हेन्जा मारेम्का जेनावा।
65कालाउ पिलातस इम्बालाइहेङ दोअ्हि, आधिमि सिपालाइ चुम्तेङ हानेसु कालाउ रेम्फा तोमहेङ जोगिपातेङ तासु। 66जेलाउ इम्बालाइ इन्ता हानिहि, कालाउ इङको तोमको फिनुता बार्का उन्ठुइहोइ थुम्तेङ ताअ्हि कालाउकि हासु बुङ इङकोहेङ ताइको थामेसो मासारियाको। कालाउ सिपालाइ तोम ह्रुम्लि लागाइहि।
Currently Selected:
मति 27: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
