मति 26
26
येसुहेङ सेअ्लि दाउ भोगिल्का
(मर्कु 14:1-2; लुक 22:1-2; युहा 11:45-53)
1येसु इङको गोताङ काथा दोअ्लि दोअ्तेङ न्हुसो ताइको चात्यागेलाइहेङ दोअ्हि, 2“नेलाइहेङ थाहा दोङ हि, न्हे दिना न्हुसो निस्तार पार्बा सुरु जेनाङ। कोकोङ दिना का द्याङको चानहेङ क्रुस्टा तोइलि सतुरुगेलाइकोता पिपुवावा।”
3कोकोङ बेला कैयाफा प्राधान पुजारिको साअ्लेङता मुलि पुजारिगेलाइ कालाउ द्याङगेलाइको आगुवागेलाइ इन्ता जोम्हि। 4इङको चाउघारा साअ्ता येसुहेङ रिम्लि दोअ्तेङ दाउगेलाइ इम्बालाइ ओल्लापाहि। इम्बालाइ आधिमि धाताइका निउ पातेङ कासेहेङ रिम्लि कालाउ सेअ्लिको भाअ्सिङ निस्चित पाहि। 5इम्बालाइ दोअ्हि, “निस्तार पारबाको दिना केलाइ येसुहेङ रिम्लि माद्वाङ। हाइपालिपानु द्याङगेलाइ आउलिगेलाङ।”
बेथानियाता येसुहेङ आत्तरको चुइति पुरिङता होपिहि
(मर्कु 14:3-9; युहा 12:1-8)
6येसु बेथानिया देराता रोग्या खोका सिमोनको साअ्ता हिलाउ, 7एमि बेजान सिङगमरमरको बोतलता हेन्जा जाङका आत्तरको चुइति चुम्तेङ वाकोता लोहि, कालाउ वा चालि योम्लाउ उङको बेजान आत्तरको चुइति पुरिङता हुपिहि। 8चात्यागेलाइ इङको तिङतेङ उङको बेजान दोफा चेर ताम्पाहि, चात्यागेलाइ हिअ्हि, “इङको आत्तर हाइको भाअ्सिङ नासापाना? 9हाइपालिपानु इङको हेन्जा दामता पितेङ गरिबगेलाइहेङ पिलि दोधाङ।”
10येसु इदोइ गोताङ काथा थाहा गितेङ दोअ्हि, नेलाइ वासेहेङ हाइ दोङ मापासु वाते काङको भाअ्सिङ रेम्का काम पाका हि। 11इङको दोअ्का द्याङगेलाइ दिनाङ नेलाइ दोफा हि। का चाहि दिनाङ नेलाइ दोफा माह्याङका। 12उङको बेजान काङको जिउ दोङ भरि आत्तर मोपिहि। वा कासेहेङ का सिलाउ सिका मुन्धुमको भाअ्सिङ तियार पाका हि। 13जातिङ भारि का नेलाइहेङ दोअ्खा, “सुमिङको जेता-जेता काङको बारेता इदोइ रेम्का सुसमाचारको प्राचार थुकातावा, इन्ता इदोइ बेजान हाइ पाका हि वाको फोम लावा।”
यहुदा येसुहेङ धोका पिहि
(मर्कु 14:10-11; लुक 22:3-6)
14कालाउ न्हुसो तेन्हे चात्यागेलाइसो एमि मुलि पुजारिगेलाइकोता हानेहि। उङको चात्याको मिङ यहुदा इस्कोरियत हिघाहि, 15यहुदा दोअ्हि, का नेलाइको खुरता येसु सुम्पिप्याङका, इङको को भाअ्सिङ कासेहेङ हेथे हाइ पिस्वाना? पुजारिगेलाइ वासेहेङ चान्दिको ए कुरि तेलोङ थुरि पिहि। 16कोकोङ पहरसोङ यहुदा येसुहेङ रिम्पालि दाउ भोगिल्हि तेङहि।
आम्तिम भातियार
(मर्कु 14:12-26; लुक 22:7-23; युहा 13:21-30)
17आखिमिरि तोले चाका पार्बाको लाङ दिना, चात्यागेलाइ येसुकोता लोहि। चात्यागेलाइ दोअ्हि, “नाङको निस्तार पार्बाको भोज चालि केलाइ नासेहेङ तियार पाप्याङ। केलाइ हिता तियार पाका नाअ् मन्दा ताखेना?”
18येसु दोअ्हि, “सहरता एमि द्याङकोता हानेसु, कालाउ वासेहेङ दोअ्सु, ‘गुरु ज्यु एसा दोअ्लि दोअ्का हि, काङको सोमोइ हेन्जाङ भेरपाङ लोका हि। का निस्तार पार्बाको भोज काङको गोताङ चात्यागेलाइ दोफा नाङको साअ्ता चाङका।’” 19चात्यागेलाइ येसुको आग्या जेसाङ गोताङ काम पापिहि। इम्बालाइ निस्तार पार्बाको चाका-आम्का तियार पाहि।
20जेलाउ बेल्हातेङ येसु ताइको चात्यागेलाइ दोफा चालि योम्का हिघाहि। 21इम्बालाइ झाराङ उम चाकाताङ हिघाहि, येसु दोअ्हि, “जातिङ भारि का नेलाइहेङ दोअ्खा, नेलाइ मध्येसो एमि कासेहेङ रिम्पास्वाना।”
22एन्सालाउ इसिका हिङतेङ चात्यागेलाइ मेनाङ ह्राइ दापाहि, झाराङ एमि-एमिपा एसा दोअ्लि तेङहि, हाइ प्रभु, उङको का ते माको दोअ्काताङ हिअ्हि।
23येसु जोबाफ पिहि, जाइ काङको बातिता का दोफा खुर चोबिका हि, वा दोङ कासेहेङ रिम्चापावा। 24हाइपालिपानु का द्याङको चानको भाअ्सिङ लेखेका हि, द्याङको चान धर्मसास्तरता लेखेका भाइपाङ सिलि गोयाङ कालाउ उङकोहेङ धिक्कार हि। जाइ द्याङको चानहेङ धोका पितेङ रिम्पावा, वाकोते जोलोम जेङका खान्तेङते माजेङका रेम्का जेङधाङ।
25कालाउ न्हुसो येसुहेङ रिम्चापाका यहुदा इस्कोरियत येसुहेङ दोअ्हि, गुरु ज्यु, हाइ उङको का दोङ? कालाउ येसु वासेहेङ दोअ्हि, एइ उङको नादोङ दोअ्खेना।
26चाकाताङ पालाउ येसु तोले चुम्हि। कालाउ तोलेको भाअ्सिङ परमेस्वरहेङ धन्यबाद पिहि कालाउ तोले पोङहि कालाउ चात्यागेलाइहेङ तोले पितेङ दोअ्हि, “कोसु कालाउ चासु, इदोइ काङको जिउ दोङ हि।”
27कालाउ न्हुसो ए बात्ति आङगुरको रस चुम्हि। येसु दोअ्हि “नेलाइ झाराङ इतासो आम्सु। 28इदोइ काङको आङगुरको रस काङको हिति, काङको हिति परमेस्वर पाहासो वाको द्याङगेलाइको भाअ्सिङ नावा बाचा सुरु जेनावा। इदोइ हिति हेन्जाङ द्याङगेलाइ ओबालाइको पाप स्यामाको भाअ्सिङ होपावा। 29जातिङ भारि का नेलाइहेङ दोअ्खा, कालाउ न्हुसो का इङको दिना थेकापा हेलाउ बुङ आङगुरको रस माआमाङका, जेलाउ थेकापा का परमेस्वरको सासनता नावा आङगुरको रस माआम्पा।”
30जेलाउ येसु कालाउ वाको चात्यागेलाइ परमेस्वरको बाखिन पाहि कालाउ यरुसेलेम सहरको बाहार ओल्लेतेङ जैतुन तिकार भारि हानिहि जेदोङ भेरपाङ हिघाहि।
पतरुसको इन्कार पाका
(मर्कु 14:27-31; लुक 22:31-34; युहा 13:36-38)
31येसु चात्यागेलाइहेङ दोअ्हि, “नानि आधा न्हिसिन्ता काङको कारनसो नेलाइ ताइको खाङधुरि लाअ्स्वाना हाइपालिपानु इदोइ धर्मसास्तरता लेखेका हि: का लाखुरियाहेङ दानाइयाङका कालाउ बागालको भेडा मेसागेलाइ जोसो ओसोङ चिलिबिलिगिल्तेङ आवाइगिल्लावा। 32कालाउ सिकासो सिन्हुतेङ ल्होकाङका कालाउ का गालिल जिल्लाता नेलाइ खान्तेङ लाम्फा थुकाताङका।”
33पतरुस येसुहेङ दोअ्हि, “झाराङ लाअ्तेङ खाअ्लाउबुङ का नासेहेङ चाहि हेलाउ बुङ मालाअ्ताङका।”
34येसु दोअ्हि, जातिङ भारि का नासेहेङ दोअ्खा, नानि बेल्हालाउ धाङगाइ किया ओलि खान्तेङ लाम्फा नाअ्, “कासेहेङ सुम्खे लाअ्का ह्याना।”
35कालाउ बुङ पतरुस जोबाफ पिहि, “का नाअ् दोफाङ सिलि गोइलाउ बुङ का नासेहेङ इन्कार मापाङका।” कालाउ झाराङ चात्यागेलाइ बुङ इदोइ काथा दोअ्हि।
येसु गेतस्मनि
(मर्कु 14:32-42; लुक 22:39-46)
36जेलाउ येसु चात्यागेलाइ दोफा गेतस्मनि दोअ्का बागाइचाता थुकालाहि, कालाउ वा ताइको चात्यागेलाइहेङ दोअ्हि, “का परमेस्वरता प्रार्थाना पापाभरि नेलाइ इताङ हिसु।” 37कालाउ येसु पतरुस, कालाउ जब्दियाको न्हेनोङ चानगेलाइहेङ ताइको दोफा चुम्पुहि, कालाउ येसुको मन मेनाङ जिउधाइ ल्होपाङ खारतेङ हिघाहि। 38येसु पतरुस कालाउ जब्दियाको न्हेनोङ चानगेलाइहेङ दोअ्हि, काङको मन मेनाङ जिउधाइ ल्होपाङ खारतेङ हि, नाअ् सिलि नाअ् हिलि जेङका हि। नेलाइ इता का दोफा जागितेङ हिसु। 39कालाउ येसु ओबालाइसो आसा दुरे हानितेङ भोनोइता तिरु थोतेङ परमेस्वरता प्रार्थाना पाघाहि, हे काङको आबा, जेङलि दोनु कासेहेङ कस्टको इदोइ बात्ति आसा दुरे जेनाको। कालाउ बुङ इदोइ काङको मनहोइ पाका भाइका माको, नाङको मनहोइ जेनाको।
40कालाउ न्हुसो येसु ताइको चात्यागेलाइकोता घुरितेङ लोलाउ येसु ओबालाइहेङ मस्त जिम्तेङ हिका तिङहि, येसु पतरुसहेङ दोअ्हि, नाअ् काङको भाअ्सिङ ए घान्टा बुङ जागितेङ हिलि मादोसुना? 41जागितेङ हिसु, कालाउ ल्होतेङ प्रार्थाना पासु, नेलाइ जाचिकाता मापरिसु। जातिङ भारि नेलाइको आत्मा तियार हि, कालाउ बुङ नेलाइको जिउ चाहि हुइका हि।
42आरोङ न्हुसो येसु न्हे पल्ति हानिहि, कालाउ प्रार्थाना पालि तेङहि, हे काङको आबा, जेसापा का माआम्सा माजेङनु इदोइ कस्टको बात्ति नाअ् हिसिका पालि खाङखेना इन्सिकाङ हिलि पि।
43आरोङ बुङ लोलाउ वा चात्यागेलाइहेङ जिम्तेङ हिका तिङहि, हाइपालिपानु इम्बालाइ हेन्जा माइका हिघाहि 44ओदोङ भाअ्सिङ येसु ओबालाइहेङ लाअ्तेङ आसा फारापा हानिहि। कालाउ येसु आरोङ प्रार्थाना पाहि। सुम्खे लोलाउ बुङ ओबालाइहेङ लाम्फाको भाइपाङ तिङहि।
45कालाउ येसु चात्यागेलाइहेङ लोतेङ दोअ्हि, नेलाइ एला बुङ जिम्तेङ हिस्वाना, कालाउ माइसातेङ हिसुन्हा? एला का द्याङको चानहेङ पापिगेलाइको खुरता रिम्लि तोम्का पहर चेम्ताङ लोलि दोहोइ। 46एला ल्होसु, जागियाइने! खाङसु, कासेहेङ रिम्पाका द्याङ भेरपा लोका हि।
येसुहेङ रिम्चापाका
(मर्कु 14:43-50; लुक 22:47-53; युहा 18:3-12)
47येसु काथा दोअ्काताङ हिघाहि, उङको एन्सालाउ दोङ यहुदा इन्ता लोहि, यहुदा इस्कोरियत तेन्हे चात्यागेलाइसो एमि हिघाहि। यहुदा दोफा हेन्जा द्याङगेलाइ हिघाहि। उङको द्याङगेलाइहेङ मुलि पुजारिगेलाइ कालाउ द्याङगेलाइको आगुवागेलाइहेङ दिङगिल्का हिघाहि। यहुदाको उङको द्याङगेलाइ दाब्बिया कालाउ लाथिगेलाइ चुम्तेङ लोका हिघाखे। 48येसुहेङ रिम्पाका यहुदा उङको द्याङगेलाइहेङ इसिका दोअ्का हिघाहि, “जाइहेङ का साम्मान पातेङ खोमाङका, ओदोङ दोङ येसु, नेलाइ वासेहेङ रिम्तेङ चुम्पुसु।” 49कालाउ यहुदा सोझाङ येसुकोता हानितेङ दोअ्हि, “सेउपाखा गुरु ज्यु!” कालाउ येसुहेङ चुमाइ चाहि।
50येसु दोअ्हि, “ओइ सानाइति, नाअ् हाइ पालि लोना, एनाङ दोङ पाअ्।” कालाउ ओदोङ घुरि द्याङगेलाइ लोतेङ येसुहेङ रिम्हि लोहि। 51जेलाउ इसिका जेङहि, येसुको दोफा हिका एमि चात्या दाब्बिया ओल्लेपाहि कालाउ वा प्राधान पुजारिको चाकारियाको न्हातोङ पुक्कापा पाल्पिहि।
52येसु वासेहेङ दोअ्हि, नाङको दाब्बिया वाकोङ दाबिता ह्वावा! जाइ दाब्बिया चालाइखे वासेहेङ दाब्बियाहोइ दोङ सेअ्तावा। 53नासेहेङ थाहा हि, का काङको भाअ्सिङ आबा दोफा साघाइलिको भाअ्सिङ सेउपानु वा स्वर्गदुतगेलाइको तेन्हे पल्तन खान्तेङ हेन्जा एनाङ दोङ मादिगिलप्यावा रो? 54कालाउ का ह्रेखा पानुते धर्मसास्तरता इसिका जेङलि गोयाङ दोअ्तेङ लेखेका काथा हेसा पुरा जेङलि द्वावा रो?
55इम्बालाइहेङ येसु दोअ्हि, हाइ का डाकु नेलाइ कासेहेङ खुकालाइ भाइपा लाठि, दाब्बिया चुम्तेङ कासेहेङ रिम्लि लोसुन्हा? का लिपाङ नेलाइ दोफाङ योम्तेङ मुन्दिरता धिर्पालाउ हाइ पालि मारिम्सुना 56इदोइ गोताङ काथागेलाइ परमेस्वरको बक्तागेलाइ लेखेका आन्सार पुरा जेनाको दोअ्हि, कालाउ इसिका जेङहि। कालाउ ओदोङ घुरि गोताङ चात्यागेलाइ येसुहेङ एकालाङ लाअ्तेङ हानेहि।
येसु माहासभाको आगाता
(मर्कु 14:53-65; लुक 22:54-55,62-71; युहा 18:13-14,19-24)
57येसुहेङ रिम्कालाइ वासेहेङ प्राधान पुजारि कैयाफाको साअ्ता थुकापाहि। व्यवस्था धिरपाका द्याङगेलाइ कालाउ यहुदिगेलाइको आगुवागेलाइ इन्ता जोम्तेङ हिघाहि। 58पतरुस चाहि दुरेसोङ प्राधान पुजारिको साअ्लेङ लिता वाको न्हु-न्हु हानिहि, कालाउ इन्ता मुन्दिरको पालेगेलाइ दोफाङ योम्तेङ वा मे एम्तेङ हिघाहि।
59इन्ता हिका मुलि पुजारिको जेर कालाउ यहुदि माहासभाको आरु सदस्यगेलाइ येसुहेङ सेअ्लिको भाअ्सिङ वाको बिरोधता मारेम्का गवाहि भोहि कालाउ इन्सिका हाइ दोङ मानिङहि। 60इन्ता हेन्जाङ धाताइका गावाहि पिका द्याङगेलाइ लोहि कालाउ येसुको बिरोधता गल्तिगेलाइ लागाइहि। कालाउ बुङ माहासभाता येसुहेङ सेअ्लिको भाअ्सिङ इन्सिका हिदोइ बुङ मारेम्का सदर प्रमान निङलि मादोहि कालाउ न्हेमि द्याङ लोतेङ दोअ्लि तेङहि, 61“इदोइ द्याङ दोअ्हि, ‘का परमेस्वरको मुन्दिर ह्रालि द्वाङका कालाउ सुम दिनाता आरोङ का इदोइहेङ धाम्लि द्वाङका’ दोअ्का हि।”
62कालाउ प्राधान पुजारि ल्होतेङ येसुहेङ दोअ्लि तेङहि, हाइ नाअ् हाइ दोङ जोबाफ मापियाना? या द्याङगेलाइ नाङको बिरोधता पिका गवाहि हाइ कुनु? 63येसु हाइ दोङ मादोअ्सिङ सिकापा दोङ हि। कालाउ प्राधान पुजारि येसुहेङ हिअ्हि, “एला बान्चिका परमेस्वरको मिङता केरा चातेङ का दोअ्खा, केलाइहेङ दोअ्, हाइ नाअ् दोङ परमेस्वरको चान ख्रिस्ट हिना?”
64येसु दोअ्हि, एइ का दोङ कालाउ का दोअ्खा न्हुसो भबिस्यता नेलाइ का द्याङको चानहेङ परमेस्वरको दाम्पाहा भारि योम्तेङ हिका स्वर्ग कालाउ आकासता सरबुङसाइपा लोकाताङ पाका तिङस्वाना।
65प्राधान पुजारि ताइको धाबा थेअ्तेङ दोअ्हि, याते परमेस्वरहेङ मन्दा माताका कालाउ मारेम्का काथा दोअ्हि। केलाइहेङ एला आरु गवाहिगेलाइ हाइको सरोकार हि रो? नेलाइ दोङ एलाङ या परमेस्वरहेङ मन्दा माताका दोअ्का हिङसुना। 66नेलाइको हाइ बिचार हि कुनु? इम्बालाइ जोबाफ पिहि, या द्याङ सिलि गोयाङ।
67कालाउ इम्बालाइ येसुको नुइता थोअ्तेङ वासेहेङ भुकुन्दिहोइ दानाइहि, आधिमि एसा दोअ्काताङ चाउरेहि। 68इम्बालाइ दोअ्हि, “नाअ् परमेस्वरको बक्ता ख्रिस्ट हिना दोअ्तेङ प्रमान तिङपा! नासेहेङ दानाइका हासु हा?”
पतरुस येसुहेङ मानाल्का
(मर्कु 14:66-72; लुक 22:56-62; युहा 18:15-18,25-27)
69इङको बेला पतरुस सालेङता योम्तेङ हिघाहि। एमि चाकारिया बेजान लोतेङ दोअ्हि, “नाअ् बुङ इङकोङ गालिलि येसु दोफा हिघाखेना?”
70कालाउ पतरुस इन्ता हिका झाराङ द्याङगेलाइको आगाता इङको काथा सुइकार मापाहि वा एसा दोअ्हि, “नाअ् हाइ दोअ्खेना का हाइ दोङ माबुझिघा?”
71कालाउ न्हुसो इङको थामे लाअ्हि, फिनु भेरपा आरोङ भेनेङ चाकारिया बेजान वासेहेङ तिङहि, कालाउ वा इन्ता हिका द्याङगेलाइहेङ दोअ्हि, “इदोइ द्याङ बुङ नासरतको येसु दोफा हिघाहि।”
72पतरुस आरोङ सुइकार मापाहि, कालाउ वा दोअ्हि परमेस्वरको मिङता केरा चातेङ दोअ्खा, “उङको द्याङ हासु का मानाल्खा।”
73एघुरिङता, आधिमि जाअ्तेङ हिका द्याङगेलाइ पतरुसकोता हानिहि कालाउ दोअ्हि, केलाइ गिन्हाखे एमि येसुको चात्या मध्ये, “नाअ् बुङ एमि हिना।” नाङको नुइ दुइकासो लागिखे।
74कालाउ पतरुस ताइमिहेङ धिक्कारलि तेङहि कालाउ दोअ्हि, का परमेस्वरको मिङता केरा चातेङ द्वाङका कि उङको द्याङ हासु का नाल्का बुङ मान्थुघा। पतरुस एन्सा दोअ्का बितिकोङ धाङगाइ किया ओहि।
75कालाउ पतरुसहेङ येसुको दोअ्का काथागेलाइ फोम जेङहि धाङगाइ किया ओलि लाम्फाङ कासेहेङ सुम्खे नाअ् मानाल्लाना कालाउ न्हुसो पतरुस बाहार हानितेङ मन थुर्पातेङ खारहि।
Currently Selected:
मति 26: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
