मति 25
25
तेमि धानिगेलाइको निङपिका
1आरोङ येसु ताइको चात्यागेलाइहेङ दोअ्हि, जेलाउ का द्याङको चान धुरितेङ ल्वाङका, कालाउ परमेस्वरको सासन एसापा जेनावा: तेलोङ धानिगेलाइ जाइ ताइको गेसा चुम्तेङ दाराहेङ कालाउ वाको बिहुको भातियारता भेतिलि हानावा। 2उङको मध्ये नामि धानिगेलाइ चाहि मुर्ख हिघाहि, कालाउ नामि धानिगेलाइ चाहि बुद्दिमान हिघाहि। 3उङको नामि मुर्ख धानिगेलाइ ताइको गेसा चुम्पुहि कालाउ ताइ दोफा आसा फाल्तु चुइति चाहि माचुम्पुहि। 4कालाउ नामि बुद्दिमानि धानिगेलाइ चाहि ता-ताइको गेसा चुम्पुहि कालाउ इम्बालाइ भेनेङ भाडाता बुङ आसा हेन्जा चुइति बुङ चुम्पुहि। 5कालाउ दारा लोलि बेलोम्हि, कालाउ झाराङ धानिगेलाइ निन्धा धुलाइतेङ जिम्लि तेङहि।
6कालाउ न्हिसिन्ता आधेमि ह्रिकाइहि, दारा लोखोइ वासेहेङ भेतिलि बाहार लोसु।
7कालाउ झाराङ धानिगेलाइ नाङघाहि। इम्बालाइता-ताइको गेसा तियार पालि तेङहि। 8कालाउ बुद्दि मान्थुका धानिगेलाइ बुद्दि हिका धानिगेलाइहेङ दोअ्हि, केलाइहेङ नेलाइको आतुइसा चुइति खिल्लि पिसु हाइपालिपानु केलाइकोता हिका चुइति दोहोइ, कालाउ गेसागेलाइ चि-चिहोइ।
9बुद्दिमानि धानिगेलाइ जोबाफ पिहि, माको हाइपालिपानु केलाइकोता हिका चुइति केलाइ कालाउ नेलाइको भाअ्सिङ प्रसस्त मापुग्याङ। भरु नेलाइ दोङ ताइको भाअ्सिङ दोकानता हानेतेङ चुइति चोल्तेङ चुमासु।
10कालाउ उङको नामि मुर्ख धानिगेलाइ चुइति चोल्लि हानिलाउ दारा लोहि। कालाउ तियार जेङका झाराङ धानिगेलाइ दारादोफा बिहुको भातियारता योम्लि हानिहि कालाउ फिनु गिहि।
11एघुरिङता उङको मुर्ख धानिगेलाइ घुरितेङ लोहि कालाउ इम्बालाइ दोअ्लि तेङहि, प्रभु, प्रभु, दोअ्तेङ काइतेङ दोअ्हि केलाइको भाअ्सिहेङ फिनु हिअ्पिसु!
12दारा जोबाफ पिहि, जातिङ भारि का नेलाइहेङ दोअ्खा, नेलाइहेङ मानाल्खा।
13ओदोङ भाअ्सिङ जेलाउ बुङ जागितेङ हिसु, नेलाइ मागिसुखेना कि द्याङको चान हिदोइ दिना, याते हिदोइ पहरता ल्वाङ।
सुमि चाकारियाको निङपिका
(लुक 19:11-27)
14जेलाउ का द्याङको चान घुरितेङ लोलाउ परमेस्वरको सासन एसापा जेनावा: एमि गिह्रि दुरेको दामा हानिलि खाङलाउ लाम्फा ताइको चाकारियागेलाइहेङ काइतेङ ताइको ताका मध्ये आधे ताका इम्बालाइहेङ पितेङ दोअ्हि, यासेहेङ लागानि पातेङ हेन्जा बानाइसु। 15वा इम्बालाइको खुबि आन्सार एमि चाकारियाहेङ आधा किलो सोनाको थुरि पिहि, भेनेङहेङ ए पावा सोनाको थुरि पिहि, कालाउ भेनेङ एमिहेङ आधा पावा सोनाको थुरि पिहि, कालाउ वा ताइको दामा चाहि। 16जेदोङ चाकारियाहेङ आधा किलो सोनाको थुरि पिका हिघाहि, वा मार्फा ब्यपार पालि तेङहि, कालाउ वा इङकोसो आरु आधा किलो सोनाको थुरि कामाइहि। 17ए पावा सोनाको थुरि निङका बुङ एन्साङ पातेङ आरु ए पावा सोनाको थुरि कामाइहि। 18कालाउ आधा पावा सोनाको थुरि निङका चाकारिया चाहि भोनोइता घारा तोअ्तेङ गिह्रिको धन म्होतेङ ताअ्हि।
19“हेन्जा सोमोइ न्हुसो गिह्रि ताइ साअ् भारि घुरिहि, वा चाकारियागेलाइहेङ ए थामे जोम्पाहि कालाउ इम्बालाइसो ताइको हिसाब ह्रेहि।” 20आधा किलो सोनाको थुरि निङका चाकारिया थुरि चुम्तेङ ग्रिह्रिकोता लोतेङ दोअ्हि, माहासय, नाअ् कासेहेङ आधा किलो सोनाको थुरि पिन्हा, इङकोसो आरु आधा किलो सोनाको थुरि कामाइघा।
21“गिह्रि वासेहेङ दोअ्हि, नाअ् रेम्का पाना नाअ् आसल चाकारिया नासेहेङ खाङधुरि पालि द्वाङ। आतुइसा ताकाता बुङ नाअ् खाङधुरि योग्य हिना। ओदोङ भाअ्सिङ नासेहेङ आरु हेन्जा जिम्माबारि पिलि द्वाङका लौउ का दोफा लेङचा।”
22“कालाउ ए पावा सोनाको थुरि निङका चाकारिया ग्रिह्रिकोता लोतेङ दोअ्हि, माहासय, नाअ् कासेहेङ ए पावा सोनाको थुरि पिका हिघाखेना। इङकोहेङ का ब्यापारता लागाइघा कालाउ आरु ए पावा सोनाको थुरि कामाइघा।”
23वाको ग्रिह्रि दोअ्हि, नाअ् रेम्का पाना नाअ् आसल चाकारिया हिना, जाइहेङ खाङधुरि पालि द्वाङ। आतुइसा थुरिसो बुङ ताअ्लि खाङधुरि योग्य हिना। ओदोङ भाअ्सिङ का नासेहेङ आरु हेन्जा जिम्माबारि प्याङका नाअ् बुङ लौउ कालाउ का दोफा लेङचा।
24कालाउ न्हुसो आधा पावा सोनाको थुरि निङका चाकारिया बुङ ग्रिह्रिकोता लोतेङ दोअ्हि, माहासय, नाअ् राङका द्याङ हिना दोअ्का कासेहेङ थाहा हिघाहि, हाइपालिपानु नाअ् इसिका द्याङ हिना चालाइ माथिङका थामेसो चेखेना कालाउ मायाका थामेसो ल्होपाखेना। 25ओदोङ भाअ्सिङ का ते थिघा नाङको पिका आधा पावा सोनाको थुरि भोनोइता म्होतेङ ताअ्घा, नाङको पिका इङको थुरि इदोइ दोङ।
26ग्रिह्रि वासेहेङ दोअ्हि, नाअ् दुस्ट कालाउ कुरियाका चाकारिया, जेलाउ नासेहेङ थाहा हिघाहि कि का ताइमिङ चालाइ माथिङका थामेसो चेखा कालाउ मायाका थामेसो ल्होपाका राङका द्याङ का। 27जेलाउ नाअ् काङको थुरि ब्याजता लागाइलि गोइधाना। कालाउ का जेलाउ घुरितेङ लोलाउ हाइ दोङ मानिङलाउ बुङ ब्याजते निङधाङका। 28कालाउ गिह्रि आरु चाकारियागेलाइहेङ दोअ्हि, वाकोसो थुरि घिङतेङ ओदोङ ए किलो सोनाको थुरि हिकाहेङ पि। 29हाइपालिपानु जाइ दोफा हि वासेहेङ आरु प्याङ, वा दोफा हेन्जा जेनावा कालाउ जाइ दोफा मान्थु वाको दोफा हिका बुङ आतुइसा हिका बुङ घिनाङ। 30इङको काम मालागिका चाकारियाहेङ बाहार कितिकितिकाता थाइगिल्सु। जेता द्याङगेलाइ तासिङ जितेङ खारतेङ ह्याको।
न्यायको दिना
31जेलाउ का द्याङको चान आरोङ महिमाता जेङतेङ ल्वाङका, कालाउ गोताङ स्वर्गदुतगेलाइ बुङ का दोफाङ ल्वाङ, कालाउ का महिमाको सिङहासनता योम्तेङ झाराङ द्याङगेलाइको न्याय पाङका। 32काङको आगाता सुमिङ भरिको गोताङ द्याङगेलाइ जोम्मावा कालाउ लाखुरिया भाइपाङ मेसा कालाउ भेडागेलाइहेङ खेनाङ। एन्साङ पातेङ का द्याङगेलाइहेङ बुङ खेनाङका। 33भेडागेलाइ चाहि धर्मि द्याङगेलाइ हि, इम्बालाइहेङ ताइको दाम्पाहा ताअ्ताङका कालाउ मेसागेलाइ चाहि आधर्मि द्याङगेलाइ हि, इम्बालाइहेङ ताइको केपाहा ताअ्ताङका।
34कालाउ का राजा ताइको दाम्पाहा योम्कालाइहेङ दोअ्ताङका, लोसु काङको आबा परमेस्वर नेलाइहेङ आसिरबाद पिका हि। लोसु कालाउ परमेस्वर नेलाइको भाअ्सिङ प्रतिग्या पाका सासनता आधिकारि हिसुना। सुमिङ सिरजाइकाको लाम्फासोङ इदोइ नेलाइको भाअ्सिङ तियार पाका हिघाहि। 35हाइपालिपानु का म्हुतुका बेला नेलाइ कासेहेङ चालि पिका हिघासुना। का चि आम्लि किलाउ नेलाइ कासेहेङ चि आम्लि पिसुना। जेलाउ का परदेसि हिघाखा नेलाइ कासेहेङ नेलाइको साअ्ता स्वागत पासुन्हा। 36जेलाउ का नाङघाङ हिघाखा, नेलाइ कासेहेङ लोखोन धाबा होङलि पिका हिघासुखेना। जेलाउ का मासाधेका हिघाखा, नेलाइ कासेहेङ सामाराइका हिघासुखेना। जेलाउ का झ्यालखानाता हिघाखा, नेलाइ कासेहेङ खाङलि लोसुना।
37जेलाउ धर्मि द्याङगेलाइ जोबाफ पियाङ, प्रभु, केलाइ नासेहेङ हेलाउ म्हुतुका हिका तिङन्हाहि कालाउ चापान्हाहि? हेलाउ चि आम्लि किका तिङन्हाहि कालाउ चि आम्लि पिनाहि? 38केलाइ नासेहेङ हेलाउ परदेसि तिङन्हाहि, हेलाउ केलाइको साअ्ता स्वागत पान्हाहि, कालाउ हेलाउ नासेहेङ नाङघाइ तिङन्हाहि कालाउ लोखन धाबा होङलि पिन्हाहि? 39हेलाउ नासेहेङ मासाधेका तिङन्हाहि कालाउ सामाराइन्हाहि हेलाउ झ्यालखानाता तिङन्हाहि कालाउ केलाइ खाङलि लोन्हाहि?
40कालाउ का राजा इम्बालाइहेङ जोबाफ प्याङका, का नेलाइहेङ जातिङको दोअ्खा, इता नेलाइ काङको उङको खान्धुराइ सानाइतिगेलाइ मध्ये झाराङ खान्तेङ म्हुइकाहेङ जेदोङ पासुन्हा इङको कासेहेङ दोङ पाका दोङ।
41कालाउ न्हुसो का ताइको केपाहा योम्का द्याङगेलाइहेङ दोअ्ताङका नेलाइ स्रापित द्याङगेलाइ काङकोसो दुरे हानेसु। साइतानको कालाउ वाको दुतगेलाइको भाअ्सिङ परमेस्वर तियार पाका आनान्तको मेता हानेसु। 42हाइपालिपानु का म्हितुका हिघाखा, नेलाइ कासेहेङ हाइ दोङ चालि मापिसुन्हा, कालाउ का चि आम्लि किका हिघाखा नेलाइ कासेहेङ चि आम्लि मापिसुन्हा। 43का परदेसि हिलाउ नेलाइ कासेहेङ ताइको साअ्ता स्वागत मापासुन्हा। कालाउ का नाङघाङ हिलाउ लोखन धाबा मापिन्हा, का मासाधिका कालाउ झ्यालखानाता हिलाउ नेलाइ कासेहेङ खाङलि मालोसुन्हा।
44कालाउ इम्बालाइ बुङ जोबाफ प्यावा प्रभु, केलाइ नासेहेङ हेलाउ म्हितुका, चि आम्लि किका, परदेसि जेङका, नाङघाङ हिका, मासाधेका हिका कालाउ झ्यालखानाता परेका तिङन्हाहि कालाउ मासाघाइन्हाहि रो?
45कालाउ का ओबालाइहेङ जोबाफ प्याङका, जातिङ भारि का नेलाइहेङ दोअ्खा, काङको खान्धुराइ सानाइतिगेलाइ मध्ये झाराङ खान्तेङ म्हुइकाहेङ मासाघाइलि दोङ कासेहेङ मासाघाइलि।
46जेलाउ आधार्मिगेलाइ जाइ काङको केपाहा योम्का हि इम्बालाइ आनान्तको दन्ड निनावा, कालाउ जाइ धर्मिगेलाइ काङको दाम्पाहा योम्का हि इम्बालाइ आनान्त जिबन निनावा।
Currently Selected:
मति 25: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
