साल्न्हाका चात्या 10
10
पतरुस कालाउ कर्नेलियस
1कैसरिया सहरता कर्निलियस मिङ हिका एमि द्याङ हिघाहि, जाइ इतालिया दोअ्का पल्टनको एमि कप्तान हिघाहि। 2वा परमेस्वरको आराधाना पाघाखे, कालाउ वा वाको ताइको झाराङ जाहान परमेस्वरहेङ थिघाखे। कालाउ वा गरिब यहुदि द्याङगेलाइहेङ उद्दार मनहोइ साघाइघाखे कालाउ दिनाङ परमेस्वर दोफा प्रार्थाना पाघाखे। 3एनि कर्निलियस नितिमा सुम बजेको पहरता दर्सनता झालाझालापा परमेस्वरको एमि स्वर्गदुत ताइमि भारि लोतेङ एसा दोअ्तेङ हिका हिङहि, “ओइ कर्निलियस!”
4कर्निलियस स्वर्गदुतहेङ थिचोङतेङ खाङहि कालाउ दोअ्हि, “प्रभु, दोअ्” कालाउ स्वर्गदुत वासेहेङ दोअ्हि, “परमेस्वर नाङको प्रार्थाना हिङपिका हि कालाउ गरिब दुखिगेलाइहेङ पाका नाङको दायाको कामगेलाइ सम्झानाको रुपता परमेस्वरको आगाता थुकाका हि। 5एला आधिमि द्याङगेलाइहेङ जोप्पा नगरता दिङगिल कालाउ सिमोन दोअ्का पतरुसहेङ काइगिल्सु। 6वा धालेको काम पाका सिमोनकोता हि, जाइको साअ् समुन्द्रको काम्भेता हि।”
7इदोइ झोको दोअ्तेङ स्वर्गदुत कर्निलियससो बिदा ह्रुतेङ हानिहि। कालाउ वा ताइको चाकारियागेलाइ मध्ये न्हेमि कालाउ वाको जेलाउ बुङ सेवा पाका एमि सिपाइहेङ काइहि, उङको सिपाइ चाहि परमेस्वरको आराधाना पाघाखे। 8कर्निलियस इम्बालाइहेङ स्वर्गदुत ताइमिहेङ दोअ्का काथा बाताइहि, कालाउ वा इम्बालाइहेङ जोप्पा नगरता पतरुसहेङ चुमालि दिङगिल्हि।
पतरुसको दर्सन
9भेनेङ दिना तेन्हे पहर उङको सुमि द्याङहेङ जाइहेङ कर्निलियस दिङगिल्का हिघाहि इम्बालाइ जोप्पा नगरको भेर्पा लोहि। ओदोङ बेला पतरुस चाहि प्रार्थाना पालिको भाअ्सिङ साअ्को कौसिता ताङहि। 10पतरुस म्हितुका हिघाहि, कालाउ वा हाइ दोङ चाअ्लि खाङघाखे, कालाउ ओबालाइ उम गाअ्काताङ पालाउ वा एनोङ दर्सन तिङहि। 11वा आकास हेअ्न्हाका कालाउ इन्तासो बार्का धाबा भाइका द्यापाहाङसो धेउन्हातेङ आधे प्रिथिबि हुल्काताङ हिका तिङहि। 12इङको धाबाता प्रिथिबिको गोताङ खाल्को द्यालोङ खोकोइ हिका गुपुसगेलाइ कालाउ सेसालाइतेङ हिगिल्का जन्तु कालाउ आकासता उराइका जिहाँ-जुइलेङगेलाइ हिघाहि। जाइहेङ मोसाको व्यवस्थाहोइ आसुद्द जेङखे दोअ्खे, कालाउ यहुदिगेलाइ चाअ्लि माएल दोअ्खे। 13कालाउ पतरुस एनोङ गाला हिङहि, “पतरुस ल्हो, कालाउ सेअ्तेङ चाअ्।”
14कालाउ पतरुस दोअ्हि, “माको प्रभु, हाइपालिपानु का हेलाउ बुङ आपबित्तरो माकुनु आसुद्द थोक चाअ्का मान्थुघा।”
15कालाउ आरोङ न्हुसो न्हेतेङ पोल्ति वा इङको गाला हिङहि, “परमेस्वर जेदोङ सुद्द पाका हि नाअ् यासेहेङ आपबित्तरो माअ्दो।”
16इसिका घाटाना सुम्खे जेङहि, कालाउ एन्सालाउ दोङ इङको धाबा आकास भारि चुम्पुहि।
17इसिका दर्सनको मतलब हाइ वाला दोअ्तेङ पतरुस आवाइतुहि, कोकोङ बेला कर्निलियस दिङगिल्का द्याङगेलाइ सिमोनको साअ् पाट्ता लागाइहि। कालाउ इम्बालाइ फिनुता जाअ्तेङ हिघाहि। 18इम्बालाइ हापाङ ह्रिकाइतेङ काइहि कालाउ हिअ्हि, “सिमोन जाइहेङ पतरुस बुङ दोअ्खे हाइ वा इता हिखे?”
19जेलाउ पतरुस इङकोङ दर्सनको बिसोइता फोम पातेङ हिघाहि, कालाउ पबित्तरो आत्मा वासेहेङ दोअ्हि, “खाङसु, सुमि द्याङगेलाइ नासेहेङ भोदोङखे। 20ल्हो, कालाउ लेताको तालाता हाने, इम्बालाइ गैर-यहुदिगेलाइ जेङलाउ बुङ इम्बालाइ दोफा आनिकानि मापासिङ हाने, हाइपालिपानु का दोङ इम्बालाइहेङ नाङकोता दिङगिल्का हिघा।”
21कालाउ पतरुस उङको द्याङगेलाइ हिका लेताको तालाता खुअ्हि कालाउ वा दोअ्हि, “नेलाइ भोतेङ हिका द्याङ का दोङ। नेलाइ हाइ पालि इता लोसुन्हा?”
22उङको द्याङगेलाइ दोअ्हि, “कप्तान कर्निलियस केलाइहेङ दिङगिल्का हि, वा आसल कालाउ परमेस्वरहेङ थिअ्का द्याङ हि। कालाउ गोताङ यहुदि जातिगेलाइसो साम्मान निङका द्याङ हि, एमि पबित्तरो स्वर्गदुत वाकोता देखाल जेङहि कालाउ नासेहेङ वाको साअ्ता काइतेङ नाङको उपदेस हिङका आग्या स्वर्गदुत पिका हि।” 23कालाउ पतरुस इम्बालाइहेङ लिता लोसु कालाउ नानि इताङ बासा हिलि सेउपाहि, कालाउ न्हु दिना पतरुस तियार जेङतेङ उङको सुमि द्याङगेलाइ दोफा हानिहि। कालाउ आधेमि जोप्पा नगरको खान्धुराइ ओगेलाइ बुङ पतरुस दोफा हानिहि।
कर्नेलियसको साअ्ता पतरुस
24इतिनि दिना इम्बालाइ कैसरिया सहरता थुकाहि, कालाउ कर्निलियस लाम्फासोङ ताइको जाहानगेलाइ कालाउ ताइको सानाइति भायागेलाइहेङ जोम्पातेङ इम्बालाइहेङ ह्रुम्तेङ हिघाहि। 25जेलाउ पतरुस साअ् लिता हानिलि तोमलाउ, कर्निलियस वाको दोफा भेतिहि कालाउ पतरुसको खोकोइता तुघुरतेङ वाको आराधाना पाहि। 26कालाउ पतरुस वासेहेङ ल्होपातेङ दोअ्हि, “काङको आराधाना मापा हाइपालिपानु का बुङ नाअ् भाइकाङ द्याङ हिघा।”
27कालाउ पतरुस कर्निलियस दोफा काथा पाकाताङ साअ् लिता दुल्हि, कालाउ इन्ता वा हेन्जा द्याङगेलाइ जोम्का तिङहि। 28पतरुस इम्बालाइहेङ दोअ्हि, “नेलाइ गिसुखेन्हा, कि केलाइ यहुदि जेङतेङ आरु जातिको द्याङगेलाइ दोफा एन्सा हिगिल्लि याते इम्बालाइकोता हानिलि केलाइको व्यवस्थाको बिरोध हि। कालाउ बुङ परमेस्वर कासेहेङ हासुहेङ बुङ आपबित्तरो माकुनु आसुद्द मादोअ्लि दोअ्तेङ धिर्पाका हि। 29ओदोङ भाअ्सिङ काइनासात आनकानाइ मापासिङ का लोघा, एला कासेहेङ दोअ्सु, हाइ पालि कासेहेङ इता काइसुन्हा?”
30कर्निलियस दोअ्हि, द्या दिना लाम्फा का साअ्ता प्रार्थाना पातेङ हिघाखा। कोकोङ बेला दिनाको सुम बजेका हिघाहि। एन्सालाउ आचानक एमि द्याङ जाहाँका धाबा होङतेङ काङको आगाता जाअ्हि, 31कालाउ वा दोअ्हि, “कर्निलियस, परमेस्वर नाङको प्रार्थाना पाका हिङपिका हि, कालाउ नाअ् गरिब दुखियागेलाइहेङ साघाइका कामहेङ परमेस्वर फोम पाका हि। 32ओदोङ भाअ्सिङ जोप्पा नगरता द्याङगेलाइ दिङगिल्तेङ सिमोन दोअ्का पतरुसहेङ काइतेङ चुमासु। वा सिमोन धालेको काम पाकाको साअ्ता हिखे जाइको साअ् समुन्द्रको काम्भेता हि। 33ओदोङ भाअ्सिङ का एन्सालाउ दोङ नासेहेङ काइलि दोअ्तेङ द्याङगेलाइ दिङगिल्घा कालाउ नाअ् लोपिन्हा। एला प्रभुसो नासेहेङ आग्या जेङका गोताङ काथागेलाइ हिङलि केलाइ झाराङ परमेस्वरको आगाता इता लोका हिनाहि।”
34कालाउ पतरुस नुइ धुइलि तेङहि, “एला का जातिङ भारि बुझिखा, कि परमेस्वरको भाअ्सिङ झाराङ द्याङगेलाइ एनोङ दोङ साम्मान हि। 35कालाउ गोताङ जातिता जाइ परमेस्वरहेङ थिखे, कालाउ वा उचित काम पाखे, उङको परमेस्वरको आगाता ग्रहन योग्य जेङखे। 36परमेस्वर केलाइहेङ इस्राएलगेलाइहेङ पिगिल्का सन्देस नेलाइहेङ थाहा हि, वा सान्तिको प्राचारको बिसोइता दोअ्हि, जेदोङ द्याङगेलाइ येसु ख्रिस्टता पाका खाङधुरि पाहासो निङखे। कालाउ वा दोङ गोताङ द्याङगेलाइको प्रभु हि। 37युहान्ना बप्तिस्ताको प्राचार पालि दोतेङ गालिल जिल्लासो सुरु जेङतेङ यहुदिया जिल्ला भरि घातिका घाटानाको बारेता नेलाइहेङ थाहा दोङ हि। 38कि नासरत देराको येसुहेङ परमेस्वर पबित्तरो आत्मा कालाउ सरबुङ आबिसेक पाहि। कालाउ वा आसल काम पाकाताङ कालाउ भुत-आत्मा खोका द्याङगेलाइहेङ एल्पाकाताङ गोताङ थामेगेलाइता हानिहि, हाइपालिपानु परमेस्वर वाको दोफा हिघाहि।
39कालाउ येसु यहुदिया जिल्लाता कालाउ यरुसेलेम सहरता पाका गोताङ कामगेलाइको केलाइ साक्सि हिन्हाहि। कालाउ यहुदि आगुवागेलाइ यरुसेलेमता वासेहेङ क्रुस्टा तोइतेङ सेअ्हि। 40कालाउ वासेहेङ परमेस्वर सिकासो सुम्निको दिनाता सिन्हु पाहि कालाउ द्याङगेलाइ वासेहेङ तिङलि निङहि। 41कालाउ येसुहेङ झाराङ द्याङगेलाइते तिङलि माअ्दोहि, कालाउ केलाइहेङ परमेस्वर लाम्फासोङ साक्सिको भाअ्सिङ साल्का चात्याको रुपता साल्हि, कालाउ येसु सिकासो सिन्चाल्हि कालाउ केलाइ येसु दोफा चाअ्न्हाहि आम्न्हाहि। 42येसु केलाइ झाराङ द्याङगेलाइहेङ प्राचार पालि कालाउ साक्सि पिलि आग्या पाका हि, वा दोङ येसु हि जाइहेङ परमेस्वर बान्चिका कालाउ सिकालाइको न्हेमि दोङ द्याङगेलाइको न्याय पालिको भाअ्सिङ नियुक्ति पाका हि। 43गोताङ परमेस्वरको बक्तागेलाइ येसुको साक्सि पिका हि, कि ख्रिस्ट क्रुस्टता जेदोङ पाहि वाको ह्रुता खाङधुरि पाका झाराङ वाको मिङसो पापको स्यामा निनावा।”
44पतरुस इदोइ काथा दोअ्काताङ पालाउ बचन हिङका झाराङ द्याङगेलाइ ह्रुता पबित्तरो आत्मा खुअ्हि। 45यहुदि खान्धुराइगेलाइ जाइ पतरुस दोफा इन्ता लोका हिघाहि, इम्बालाइ भारभुसाइहि हाइपालिपानु गैर-यहुदिगेलाइकोता बुङ पबित्तरो आत्माको बरदान हुपिका हिघाहि। 46हाइपालिपानु भनेङ-भेनेङ भासाता धुइतेङ इम्बालाइ परमेस्वरको बाखानाइ पाकाताङ पाका इम्बालाइ हिङहि। कालाउ पतरुस दोअ्हि, 47“केलाइ भाइपाङ परमेस्वरसो पबित्तरो आत्मा निङका एबालाइहेङ चिको बप्तिस्ता ह्रुलिसो हासु रोकिलि द्वावा?” 48कालाउ पतरुस कर्निलियसको साअ्सो लोका द्याङगेलाइहेङ येसु ख्रिस्टको मिङता बप्तिस्ता पिका आग्या पिहि। कालाउ इम्बालाइ पतरुसहेङ आले दिना थेकापा इताङ हिलिको भाअ्सिङ सेउपाहि कालाउ इम्बालाइ आले दिना थेकापा इङताङ दोङ हि।
Currently Selected:
साल्न्हाका चात्या 10: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
