साल्न्हाका चात्या 11
11
पतरुस यरुसेलेम सहरता घुरिका
1यहुदिया जिल्लाता हिका साल्न्हाका चात्यागेलाइ कालाउ खान्धुराइ ओनेगेलाइ गैर-यहुदिगेलाइ बुङ परमेस्वरको बचन सुइकार पाका हि दोअ्का काथा हिङहि। 2जेलाउ पतरुस यरुसेलेम सहरता लोहि, यहुदि खान्धुराइगेलाइ पतरुसहेङ एसा दोअ्काताङ दुसिलि तेङहि, 3“नाअ् ते गैर-यहुदिगेलाइको साअ्ता हानितेङ इम्बालाइ दोफा हिना कालाउ चान्हा-आमन्हा।”
4कालाउ पतरुस ओबालाइहेङ इङको गोताङ काथा जेदोङ कर्नलियसको साअ्ता जेङका हिघाहि पाहि-पाहिपा दोअ्लि तेङहि: 5का जोप्पा नगरता हिलाउ प्रार्थाना पादोङघाखा, कालाउ का एनोङ दर्सन तिङघा। कालाउ आकाससो बार्का धाबा भाइका द्यापाहाङसो धेउन्हातेङ लेता हुल्तेङ हिका आधे आमेने का तिङघा कालाउ इङको काङकोता लोहि। 6जेलाउ का रेम्फा खाङघा, इन्ता प्रिथिबिको द्यालोङ खोकोइ हिका गुपुसगेलाइ, झारभारिको गपुसगेलाइ कालाउ सेसालाइतेङ हिगिल्का जन्तु कालाउ आकासता उराइका जिहाँ-जुइलेङगेलाइ तिङघा। 7कालाउ का एसा दोअ्का एनोङ गाला हिङघा, “पतरुस ल्हो, कालाउ सेअ्तेङ चाअ्।”
8कालाउ का दोअ्घा, माको “प्रभु का हेलाउ बुङ आपबित्तरो माकुनु आसुद्द थोक चाअ्का मान्थुघा।”
9कालाउ आकाससो आरोङ न्हेतेङ पोल्ति इङको गालाहोइ कासेहेङ दोअ्हि, “परमेस्वर जेदोङ सुद्द पाका हि नाअ् यासेहेङ आपबित्तरो माअ्दो।” 10इसिका घाटाना सुम्खे जेङहि कालाउ इङको गोताङ आमेने आकास भारि चुम्पुहि।
11कोकोङ बेला कैसरिया सहरसो कर्नलियस काङकोता पिगिल्का सुमि द्याङगेलाइ केलाइ हिका साअ्ता लोहि। 12पबित्तरो आत्मा कासेहेङ आना-कानि मापासिङ इङको द्याङगेलाइ दोफा हाने दोअ्हि। इदोइ तुमि खान्धुराइ ओनेगेलाइ बुङ का दोफा लोहि, कालाउ केलाइ कर्निलियसको साअ्ता हानिन्हाहि। 13कर्निलियस ताइको साअ्ता जाअ्तेङ हिका एनोङ स्वर्गदुतहेङ तिङका काथा केलाइहेङ दोअ्हि, कालाउ स्वर्गदुत वासेहेङ एसा दोअ्का हिङहि, आधेमि द्याङगेलाइहेङ जोप्पा नगरता दिङगिल्सु कालाउ सिमोन जाइ पतरुस दोअ्खे वासेहेङ काइसु। 14वा नेलाइहेङ इङको सन्देस हिङपावा जाइसो परमेस्वर नाअ् कालाउ नाङको झाराङ जाहान मुक्ति निनावा।
15जेलाउ का नुइ धुइलि तेङघा, कालाउ पबित्तरो आत्मा नेलाइकोता एसाङ दोङ लोहि जेसाङ लाङ पल्ति केलाइकोता लोका हिघाखे। 16कालाउ कासेहेङ प्रभुको दोअ्का बचन फोम लोहि, “युहान्नाते द्याङगेलाइहेङ चिको बप्तिस्ता पिहि, कालाउ नेलाइ चाहि पबित्तरो आत्माको बप्तिस्ता निङस्वाना। 17ओदोङ भाअ्सिङ प्रभु येसु ख्रिस्ट ह्रुता खाङधुरि पालाउ परमेस्वर केलाइहेङ जेदोङ बरदान पिहि, इम्बालाइहेङ माकुनु इङको गैर-यहुदिगेलाइ बुङ ओदोङ बरदान पितेङ न्हुसो परमेस्वरहेङ रोकिका का हासु रो?”
18जेलाउ यहुदि खान्धुराइगेलाइ इदोइ काथागेलाइ हिङहि, ओबालाइ सिकापा हि, कालाउ एसा दोअ्ताङ ओबालाइ परमेस्वरको बाखिन पाहि, “एलाते परमेस्वरहेङ गैर-यहुदिगेलाइहेङ बुङ आनान्ताको जिबनको भाअ्सिङ पाप पालि लाअ्लि कालाउ येसु ख्रिस्टता खाङधुरि पालि मौका पिका हि।”
एन्तिओकता मन्डलि
19स्तिफन सेन्हातेङ न्हुसो, हेन्जा खान्धुराइगेलाइ साताइन्हाका कारनहोइ यरुसेलेम सहर लाअ्तेङ हानिहि। कालाउ आउलि गिल्का खान्धुराइगेलाइ आरुगेलाइहेङते माको, कालाउ यहुदिगेलाइहेङ खिनिङ परमेस्वरको बचन प्राचार पाकाताङ फोनिके प्रदेसता, साइप्रस टापु कालाउ सिरिया प्रदेसको एन्तिओक सहर थेकापा हानिहि। 20कालाउ इम्बालाइ मध्ये हेथेते खान्धुराइगेलाइ साइप्रस टापु कालाउ कुरेनिको द्याङगेलाइ हिघाहि। इम्बालाइ एन्तिओक सहरता लोतेङ ग्रिकगेलाइहेङ बुङ प्रभु येसुको बिसोइता सुसमाचार हिङपाहि। 21प्रभुको सरबुङ ओबालाइ दोफा हिघाहि, कालाउ हेन्जा गैर-यहुदिगेलाइ ओबालाइको सन्देसता खाङधुरि पातेङ प्रभु येसुता खाङधुरि पालि तेङहि।
22इदोइ बानाल यरुसेलेमको खान्धुराइगेलाइकोता थुकाहि, कालाउ इम्बालाइ बार्नाबासहेङ एन्तिओक सहरता दिङगिल पिहि। 23बार्नाबास इन्ता लोतेङ परमेस्वरको आनुग्रह तिङतेङ मेनाङ लेङचाहि, कालाउ इम्बालाइ झाराङहेङ गोताङ ह्रदयहोइ प्रभु दोफा खान्धुराइ जेङतेङ हिलि हाउसाइ पिहि। 24बार्नाबास चाहि आसल, पबित्तरो आत्माहोइ पोङघाहि कालाउ खाङधुरिता बल्लियाका द्याङ हिघाहि। कालाउ वा पातेङ हेन्जा द्याङगेलाइ प्रभुता खाङधुरि पाहि।
25कालाउ बार्नाबास एन्टिओक सहर लाअ्हि कालाउ साउलहेङ भोलि टार्सस सहर भारि हानिहि। 26जेलाउ बार्नाबास साउलहेङ निङहि वासेहेङ एन्तिओक सहरता चुमाहि। साउल कालाउ बार्नाबास इन्ता पुरा ए बासार थेकापा हि, कालाउ इम्बालाइ इन्ता खान्धुराइगेलाइ दोफा भेतघात पातेङ हि, कालाउ हेन्जा द्याङगेलाइहेङ येसु ख्रिस्टको बारेता सिक्स्या पिहि। कालाउ चात्यागेलाइहेङ लाङ पोल्ति एन्टिओक सहरता दोङ ख्रिस्टियान दोअ्हि।
27ओदोङ सोमोइता आधे खान्धुराइगेलाइ जाइ परमेस्वरको बक्तागेलाइ हिघाहि यरुसेलेम सहरसो एन्तिओक सहरता लोहि। 28ओबालाइ मध्येसो आगाबास मिङ हिका एमि परमेस्वरको बक्ता जाअ्तेङ सारा सुमिङ भरि दोङ बारका आनिकाल जेङलि तोम्का हि दोअ्तेङ पबित्तरो आत्मासो आगमबानि पाहि। इङको आनिकाल रोमि साम्रात क्लौदियसको सासनकालता जेङहि। 29कालाउ चात्यागेलाइ झाराङ ता-ताइको पिलि दोका जति यहुदिया जिल्लाता हिका खान्धुराइ ओनेगेलाइको साघाइलिको भाअ्सिङ भेति पिगिल्लि निस्चय पाहि। 30इम्बालाइ एन्साङ पाहि, कालाउ इम्बालाइ बार्नाबास कालाउ साउल पाहासो इम्बालाइको ताका यरुसेलेम सहरको मन्डलिको आगुवागेलाइहेङ पिगिल्हि।
Currently Selected:
साल्न्हाका चात्या 11: DHINT
Highlight
Share
Copy

Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.