Kisah Para Rasul Uram 27

Er Paulus weik co ngun-ngun wekoka ilila me kwan deici banmou uram

27:1-12

1Ura, Kaisar amwetam bunanyi biryi er Paulus biti, “Kaisar kurande mutuk si Italia birur,” eboka uram dodeibmou ura, sun yin doun nang sien nang aryi er Paulus bisi ninyi si Yulius taruk dam karebmai. Anyi Yulius bira yin doun nang seratus baryi asi arungnamuryok, er wekamwe yin doun nang buluna si ara, “Kaisar bisi Kalikoka Milina Nang,” kuramwe. Ara, sun yin doun nang sien nang aryi er Yulius ab er milibmai yin doun nang ab asi ato eboka arukmai. “Er Paulus ab yuk tabwe debmai nang ab asi bobindoka Kaisar kurande weik atei Roma asi bobindarur,” eboka arukmai. 2Ato eboka arukmou ura, nunda weik co ngun-ngun wengbinmoubwe. A co ngun-ngun ara atei si Adramitium aryi kuboka Asia mutuk co ngun-ngun dararyangan atei yuk-yuk asi binkwamou co ngun-ngun asi wekmoubwe. Sirya wekmoubwe ura, nunda Kaisarea atei aryi anaboka me kwan deici banmoubwe. Banmabwe ura, nun kwit Aristarkhus bira Makedonia mutuk atei si Tesalonika ateinyi nun ab tonkwa banmoubwe. 3Banmabuburyi, mabmoubwe ani, berekwe ura, Sidon atei dararbinmoubwe. Dararbinmoubwe ura, sun yin doun nang arungnanyi si Yulius bira er Paulus bisi er kanya namin kuramwe deyok aryi, erci Paulus bisi ato ebmou. “Kanci, kan kwit yabwe akatei kuramingnyi nang ati, ‘Ni ataranici tok karebniting,’ tenebminyi ura, kanci sunsi ur dirbirum,” ebmou. 4Ura, dirbinmoubwe ani, sirya dibdenmoubwe ura, nunda co ngun-ngun tubto wekokabuburyi, Sidon atei aryi anaboka ilila me kwan deici tubto banmoubwe. Banmoubwe bok, kumwe ara nun u deiboka banmoubwe tam aryi kuboka mikibanun yanmou. Ati, sun co ngun-ngun kalingna nang aryi, “Kumwe mikib kum donmar tam bindoka yibinkwayeb,” tenen kalukdongobmai uca, nunda me dumdum si Siprus bisiboka kumwe mikib kum tam asi yibinmoubwe. 5Sirya bisiryibinmoubwe ura, ilila me kwan noutam asi banmoubwe. Ara, Kilikia mutuk tam kuboka ab, Pamfilia mutuk tam kuboka ab me kwan deici banmoubwe. A ilila me kwan noutam aryi banmoubwe ani, Likia mutuk atei si Mira dararbinmoubwe. 6Ura, a weik co ngun-ngun asi takmoubwe ura, er yin doun nang arungnanyi biryi eibmou co ngun-ngun yuk dinyi asi wekmoubwe. A weik co ngun-ngun ara Aleksandria atei aryi kuboka yanganmou ani, Italia mutuk binkwamwe asi nun wekmoubwe.

7Ura, kumwe aryi nun baramoubwe tam aryi mikibanun yanmou akiryi, nunda nimalyok-nimalyok banmoubwe. Nimalyok-nimalyok baramoubwe uca, uki ilinto bisibmou. Baramoubwe ani, co ngun-ngun dararyangan atei si Knidus dam binmoubwe. Kumwe mikibanun donmou akiryi, nunci akatei asi dararbinman kum kubmoubwe. Ura, nunci weik me dumdum si Kreta youkwetam bisiboka kumwe mikib kum donmou tam asi yibinmoubwe. Yibanmaburyok, me akwe dam atei si Salmone kanimbindokabuburyi Kreta asi youkwetam yibinmoubwe. 8Weik me dumdum Kreta katum dam nimalyok-nimalyok yibanmoubwe ani, co ngun-ngun dararban ai si, “Pelabuhan Indah,” dararbinmoubwe. A dararyangan ai ara atei si Lasea dam dararbaramnyi. 9Nunda akatei aryi uki weik kunmoubwe ani, nun Yahudi yala nang aryi yina kum yiramib uki tum si, “Malyi Kun Dinyi Kilina,” uki tum bisibmou. A uki tum sirya bisibmaci ura, ibalya ara weik dorande akiryi, ilila me kwan deici bana ara, “Obsicei,” teneramnyi. A deyok aryi, er Paulus biryi, “Ilila me kwan deici bibyei,” tenen sun weik co ngun-ngun kalingna nang asi ato ebmou. 10“Ni kwit yabwe, ibalya ara weikanun dobkwamar ati, nunda anaboka ilila me kwan deici bibyei. Me kwan deici banmabyi ura, ibalya weik dobci uca, co ngun-ngun asi tolobcei. Tolobmaci ura, co ngun-ngun umbura bon dinyi ara me umbura wekoka wanikminiksicei. Tonda, nunda co ngun-ngun bukoka baramib nang ababyi ibalya aryi obsicei. A deyok aryi, niryi sunsi, ‘Ilila me kwan deici bibyei,’ ebmasin,” ebmou. 11Er Paulus biryi ato ebmou bok, er co ngun-ngun kalingna sienyi ab er co ngun-ngun damnyi ab aryi, “Anabdobkwayeb,” ebmai. Ura, sun yin doun nang arungnamunyi Yulius biryi er Paulus biryi ebmou uram ara malyi kibminikoka sun a co ngun-ngun kalingna nang aryi ebmarei to asi kekebmouci, “Ur anabdobkwayeb,” ebmou. 12Ura, nun kunmoubwe dararyangan ai ara ibalya don talak asi kuramwe ba, dararyangana kikib kum kuramwe. A deyok aryi, ton nang aryi, “Anabdobibyei,” ebmoubwe bok, yuk nang ilinto aryi, “Anabkwayeb,” ebmai. Ati, sunci ato tenebmai. “Me dumdum si Kreta aryi kuboka Feniks atei bibyi ura, ibalya don li dibde buktibyi,” tenebmai. A co ngun-ngun dararyangan atei si Feniks ara, me dumdum Kreta asi kitingbantam katum kuboka doramnyi atei.

Ilila me kwan noutam aryi banmoubwe bok, ibalya weik dobmou uram

27:13-38

13Ura, kumwe ara mitikanun me youkwetam aryi doboka yanganmou bok, sun co ngun-ngun kalingna nang aryi, “Ukuryok loubsir ati, anabkwayeb,” tenebmai. Tenebmai ura, sunci co ngun-ngun darardongon keil asi bowelebmai. Sirya bowelebmai ura, nunci anaboka ilila me kwan deici banmoubwe. Kitingbantam kuboka banmoubwe ani, me dumdum si Kreta bisiboka yibanmoubwe. 14Uki mitikanun yibanmoubwe ura, ibalya dobkalibmou. Ara, ibalya si, “Me Utam Kan Yaletam Kan Dorande Kumwe,” aryi weikanun dobmou cok, bubatikde yanmou. Ara, me dumdum Kreta tam aryi yanmou ibalya ara weik dobmou. 15Ibalya weikanun dobmou uca, me kwan kwatib-kwatib eboka, nun co ngun-ngun asi obmou. Ura, nunci, “Co ngun-ngun asi tamubdeiboka ibalya yangantam asi bobinkwayeb,” tenen ukubdenmoubwe. Uca, ibalya yanganmou tam asi tamubdeibman kum kubmasou ura, nunci, “Ibalya mikib aryi co ngun-ngun bobisurur” tenen bisik sekman kum ati, taklobmoubwe. 16Ba, banmoubwe ani, mitik me dumdum si Kauda bisiboka ibalya mikib kum tam yibinmoubwe. Yibinmaburyok, nun bukmoubwe weik co ngun-ngun ara lemdaron co ngun-ngun mitik-mitik co ngun-ngun aryi weik co ngun-ngun asi bokilibmou. Bokilibmou bok, kumwe aryi mikibanun donmou uca, nun lemdaron co ngun-ngun asi bobinkou. Bobinkou bok, nunci lemdaron co ngun-ngun mitik dinyi asi erebdeiboka nun bukmoubwe weik co ngun-ngun deici deibdenmoubwe. Bok, me ilinto kwatib-kwatib erongmou aryi, mitik co ngun-ngun ara min dobman kumto kubmasou. Ura, tubto ukuramoubwe uca, lemdaron co ngun-ngun asi dobtaleboka weik co ngun-ngun deici diboka deibmoubwe. 17Ura, lemdaron co ngun-ngun dobweleboka diboka deibmoubwe ura, nunci, “Me kwatib-kwatib ena weik aryi weik co ngun-ngun er yuk daksaksicei,” tenen nunci co ngun-ngun asi tabwe biribdongoboka aknaboka libmoubwe. A sirya ura, nunci, “Ibalya aryi Libia mutuk otam boyasici ura, ilila me kwan umbura me wininga erebdob ai kwebtelebibyei,” tenebmoubwe. Tenebmoubwe uca, sun co ngun-ngun kalingna nang aryi weik aling ara kumwe aryi co ngun-ngun bobana aling asi loboka yuryanmai. Loboka yuryanmai ura, nunci, “Ibalya bisik sekman kum ati, da bobisurur,” tenen taklobokmoubwe ba, co ngun-ngun er yuk ibalya aryi borkengmasou. 18A borkengmasou bok, mabmoubwe ani, berekwe ura, ibalya ara weiktoto tuba donmou ati, co ngun-ngun umbura bona aling ya nirya asi doboka me dongobmoubwe. Ara, “Co ngun-ngun tolobcei,” tenen nunci ikin dinyi nirya asi doboka me dongobmoubwe. 19Ura, a uki tum ababyi tubto mabmoubwe ani, berekwe ura, ibalya weik tuba donmou bok, sun co ngun-ngun kalingna nang aryi, “Co ngun-ngun ikin tuba ati, tolobcei,” tenen sunci co ngun-ngun umbura ingwelen co ara co ngun-ngun bobana aling birina co asi kweboka me dongobmai. Ara, sunci a ikin-ikin co ara sun taruk aryi dobtaleboka me dongobmai. 20Ura, ibalya weikanun tuba dormururamwe ba, uki-uki ilinto mabisibmou. A ibalya ilinto doramwe talak ara, nunci kiting ababyi kurya ababyi asing ton kum eiriramoubwe. Ato kuransou deyok aryi, nunci, “Lebdankwamib,” tenen kanya ara ton kum tenebmou, erda nirya taklobmoubwe.

21Ura, uki ilinto bisibmou ba, nunda weik co ngun-ngun umbura bukmoubwe nang ara yina ton kum yibmoubwe. Yina ton kum yibmabuburyi, bukamoubwe asi, er Paulus biryi tikoka sun yuk nang asi ato ebmou. “Ni kwit yabwe, sunci ni ebmasise to kekeanindaute ura, me dumdum si Kreta aryi kum anabdobmatibyi. Ura, nun boamoubwe dinyi ab co ngun-ngun asi bobana dinyi ab ara waningminingna kum kubmatibyi. 22Bok, ukuryok akiryi niryi sunsi ton ebkwinsin ara, sun kanya katabum erdongordana teleb. Nun wekoubwe weik co ngun-ngun ababyi daksakwamar bok, nun kankan aryi ninyi tentok ababyi ton kum dibkwamab ati ebman. 23Ambutum mabmoubwe lukunda aryi Er Imtamnyi ni molonunyi biryi Er uram eryuryangananyi ton nisi bokdonokmo. Ba, imtam aryi yuryandoka ni Er Imtamnyi Uram diboka kunununyi dam yandoka tikmou. 24Ni dam yandoka tikmou ura, Er Uram eryuryangananyi biryi nisi ato ebmano. ‘Paulus o, kanda ilil kanya bon mem. Weik sienyi si Kaisar biryi kan deyok asi lilibkwankir ati, kan ukuryok kum dibkwandim. Er Imtamnyi biryi Paulus kansi lebkwankiriryi, Erci sun kan ab tonkwa bandarur nang ababyi bico tenen nisintum lebdeibkwansir.’ Imtam aryi kuboka uram eryuryangananyi biryi ato ebmanou. 25A deyok aryi, niryi sunsi, ‘Sun kanya katabum erdongordana teleb,’ ebmasin. ‘Er Imtamnyi biryi nisi ebmanir to diboka kunubkwamasir,’ tenen niryi sunsi, ‘Ilil kuna mem,’ ebsin. 26Ibalya aryi co ngun-ngun asi bobanmasici ani, mitik me dumdum asi bobinkwamasir,” eboka er Paulus biryi sun co ngun-ngun umbura wekamnyi nang kanya asi katabum ebdeibmou.

27Ura, ibalya ara co ngun-ngun asi cabdonoknin bobanmasou ani, ilila me kwan si Adria me kwan bordeirirbinmasou. Ura, uki empat belas baryi tum aryi bordeirirbanmasou. Ura, lukunda dukduk en aryi sun co ngun-ngun kalingna nang aryi, “Ei, tukwe kib ai sirya boyasir darib?” ebdanmai. 28Ura, sunci kiklina tabwe biribmai keil asi doboka me umbura donokoka, “Me umbong weik do? Me wininga damtoto do?” tenen kiklibdenmai. Kiklibdenmai uca, me kwan umbong ara empat puluh meter kubmou asi bikmai. Ura, mitikanun bai ani, tubto kiklibdenmai uca, umbong ara tiga puluh meter kubmou asi bikmai. 29Ura, sunci, “Co ngun-ngun ara ola banmariryi, keil ai kwebtelebibyei,” tenen, “Darabdongobkwayeb,” tenen sunci darardeirina keil dumbaryi asi dobkwetebmai. Ara, co ngun-ngun dongtam tikoka sunci tabwe birikmai darardeirina keil dumbaryi asi dobkwetebmai. Dobkwetebmai ura, sunci, “Minola berekdur,” tenen dibde bunmai. 30Ura, sun co ngun-ngun kalingna nang aryi, “Lebdankwayeb,” tenen kebum eboka co ngun-ngun aryi sakwetebdenmai. Ara, sunci co ngun-ngun menekoka bantam bindokabiryi, yuk darardeirina keil asi dorkweteninto kubmai cok, sunci aibminikmai. Ara, sunci, “Lebdandobtibyi,” tenen lemdana co ngun-ngun mitika asi dobkwetebmai. 31Lemdana co ngun-ngun asi dobkwetebmai bok, er Paulus biryi sun yin doun nang arungnamunyi ab sun yin doun nang ab asi ato ebmou. “Sun co ngun-ngun kalingna nang ara nun ab tonkwa kum buktibyi ura, sun nirya ara kum lebdankwandaute,” ebmou. 32Er Paulus biryi ato ebmou ba, sun yin doun nang aryi, “Co ngun-ngun kalingna nang bindobingnyei,” tenen lemdaron co ngun-ngun asi birikamwe tabwe asi sekdongobmai uca, lemdaron co ngun-ngun asi ibalya aryi caboka me aryi bobinmou.

33Ura, berekwamouci, im ki likmou ura, er Paulus biryi sun co ngun-ngun umbura wekamnyi nang nirya asi ato ebmou. “Sunci yina doboka yibdarur. Uki empat belas baryi kubde yanamoubwe bok, sun nirya ara ilil kubsou ba, yina utotoa ton kum yirondarur. 34A deyok aryi, niryi ebdaraboka ato ebmasin. Sunci, ‘Lebdankwayeb,’ tenen yina mitikanun yibdarur. Nun nirya ara nun damnyi lebdandoka tukwe kib binkwamib ati ato ebman. Lemdaronmamunyi ura, dilaka mitik ababyi ton kum sakwamasir. Sun kisok otong tentok ababyi ton kum leksakwamasir,” ebmou. 35Er Paulus biryi ato ebmou ura, erci roti dobokaburyi, Er Imtamnyi si weik eboka molobmou. Ara, sun co ngun-ngun wekamnyi nang nirya aryi kekenmai ba, erci molobmou. Sirya molobmou ura, er Paulus biryi roti toboka yibmou. 36Er Paulus bira minob yuma yibmou ura, sun yuk wekmai nang nirya aryi asing eibmaici, sun kanya darabum ebdongobmou uca, sunbabyi yina mitikanun yibmai. 37A weik co ngun-ngun wekamoubwe nang ara dua ratus tujuh puluh enam baryi nang wekamoubwe. 38Ura, a wekamoubwe nang nirya aryi yinmabubu ba, nun sirya boubmasou ura, sun co ngun-ngun bon nang aryi, “Co ngun-ngun caknam kibkwayeb,” tenen sunci co ngun-ngun umbura bobaramoubwe gandum asi doboka me umbura dongobmai.

Co ngun-ngun ara me wininga deici kwebtelebmou ura, daksakmou uram

27:39-44

39Sirya berekwe ura, sun co ngun-ngun bon nang aryi dinmai uca, tukwe kib asi asing eibmai. Eibmaici, sunci, “A eibmab mutuk si ara a mutuk,” tenen ara kum bikmai. A mutuk ara sun kum bikmai cok, sunci me kwan lumun asi asing eibmai. Eibmaici, sunci, “Co ngun-ngun ara me kwan lumun katum dam asi bobitibyi uca, co ngun-ngun dararbitibyi,” tenen uram dodeibmai. 40Ati, sunci darardeirina keil birikmai tabwe asi sekmai uca, co ngun-ngun darardeirina keil asi me kwan umbong wekmou. Ura, sunci, “Co ngun-ngun kalukwayeb,” tenen kalurdongona asi darardongon tabwe birikamnyi asi sekdongobmai. Sirya sekdongobmai ura, sunci, “Kumwe aryi me katum dam bobinkwansurur,” tenen sunci kumwe aryi co ngun-ngun bobana aling mitika biribwelebmai. Akaling ara co ngun-ngun menekoka bantam tikamwe co ingwelena asi tengeboka biribwelebmai. Biribwelebmai ura, kumwe aryi bobaransou ba, me katum tam banmoubwe. 41Kumwe aryi bobaransou ba, co ngun-ngun ara me katum damtoto kuramwe me wininga dam kwebtelebmou. Co ngun-ngun urasintam asi me wininga kwebtelebmou akiryi luluboka bobinman kum kubmou. Ura, co ngun-ngun amwetam ara me lontik-lontik ebmou akiryi tolobdonokoka daksakmou.

42Ura, sun yin doun nang aryi sun tabwe debmai nang ati, “Me kekoka bindobingnyei,” tenen, “Obkwayeb,” ebdanmai. 43Ebdanmai bok, sun yin doun nang arungnamunyi biryi sun tenen dinyi asi bisik sekoka, “Obmunyei,” eboka arukmou. Ara, “Er Paulus bisi obingnyei,” tenen erci ato eboka arukmou. Arukmou cok, erci sun co ngun-ngun wekamnyi nang asi ato ebmou. “Co ngun-ngun aryi sakwetebibyi ura, sun me kengna bingna nang ara minob me kekebokabmunci, me katum dam minob bindarur. 44Ura, sunda me kengna walwal nang ara co ngun-ngun abilinga kum dakdob co lase kum talebdobmunyi ura, co deici bukoka me katum dam bindarur,” ebmou. Ura, ato kubokabuburyi, nun co ngun-ngun wekamoubwe nang nirya ara nun damnyi lebdandoka tukwe kib ai bindobmoubwe.

Currently Selected:

Kisah Para Rasul Uram 27: MTG

Highlight

Copy