Kisah Para Rasul Uram 26

Er Paulus biryi weik sienyi Agripa urasintam tikokmou ura, erdamnyi libdanmou uram

26:1-11

1Ura, er weik sienyi Agripa biryi er Paulus bisi ato ebmou, “Kanci kandamnyi libdaminci, uram ur ebdum,” ebmou. Ba, er Paulus biryi, “Ni nai yabwe,” tenen er taruk ninikoka lakmou ura, erdamnyi ato eboka libdanmou.

2“Nai weik sienyi Agripa, niryi kan urasintam tikoka abniryi, ni damnyi libdankun ati, ni kanya kilkil kubmanir. Sun Yahudi yala nang aryi nisi tola ati uram eboka tatab-tatab enunung deyok ati, niryi ni damnyi libdankun. 3Kanda nun Yahudi yala nang kuramib to ab lulurdana deyok ababyi bita bingsurumnyi kurum ati, niryi kilkil asa aryi kan urasintam tikoka ni damnyi libdankun. Ati, ‘Nai, kanci teleb kanya boboka ni ebkun uram asi kekebnurum,’ tenen molobmakin.

4Ni mitik talak kuranse to ara sun Yahudi yala nang nirya aryi bingnunung. Ara, yuma kobdob aryi nisi deianei mutuk Kilikia kuranse ani, Yerusalem atei bina kuranse. 5Ni mitik talak ara Farisinyi kuranse ara, sun Yahudi yala nang nirya bingnunung. Nun Yahudi yala nang nirya aryi nun Nai Imtamnyi bisi molonub bok, nun Farisi nang ara iya busul kuboka Er Imtamnyi bisi molonub. Sun Yahudi yala nang aryi ni kuranse to lak ebnitingnyi ura, sunci niti, ‘Tola kuma. Anyi bira Farisi nang aca,’ ebniting. 6Ura, ukuryok sun Yahudi yala nang aryi nisi tatab-tatab enunung. Ara, niryi, ‘Er Imtamnyi biryi nun abwe yabwe asi ebdeibmou uram asi kunubkwansir,’ tenen dibde bunun ati, sunci nisi tatab-tatab enunung. 7Nun Israel yala amolbaryi nang nirya aryi, ‘Er Imtamnyi biryi ebdeiansou to kununa teleb,’ tenen dibde bunub. Ara, busul kuboka kitingtam lukunda nirya aryi Er Imtamnyi si weik eboka molonubci, nun Israel yala nang nirya aryi, ‘Er Imtamnyi biryi nun din nang asi kam bukeibsute,’ tenen dibde bunub. Ura, ukuryok, weik sienyi kanci nisi kekenurum. Sun Yahudi yala nang aryi ato tenen dibde bunung cok, sunci nisi kam burdeirinin deyok ati tatab-tatab enunung. 8Er Imtamnyi biryi sun din nang asi kam kum bukeibsute do? Unato ati, sunci a dinyi ati, ‘Dib tenebman kum dinyi,’ tenebmarum do?

9Minob talak ara niryi, ‘Nazaret ateinyi si Yesus bisi mikib kuboka bisik sengna ara kublobman kum dinyi kurur,’ teneranse. 10Niryi Yerusalem atei asi ato akwe kuranse. Ara, nun Du Yesus milin nang ara Er Imtamnyi Uram diboka kunuramnyi nang asi niryi taleboka sun ninyi wenen ai asi dongorbaranse. Ara, niryi sun Er Imtamnyi kan ninyi kan noutam kuboka antanirdeirin deyok nang dam molorbaranse ba, sunci, ‘Ur talebdum,’ eranei ura, niryi taleboka weneranse. Tonda, nun sien nang aryi, ‘A nang asi obkwayeb,’ eboka uram dodeibne ura, nibabyi, ‘Ur obkwayeb,’ teneranse. 11Tonda, niryi sun buluboka Musa Uram eteren ai yuk-yuk asi wengbindokabsiryi, niryi sunsi weneranse. Ara, niryi, ‘A nang aryi Er Yesus bisi dib tenena taklobting,’ tenen niryi sunsi weneranse. Ni kanya a nang ati, iya tin weik kuranou akiryi, niryi yuk atei yuk atei yibindoka a nang asi domkiringnanse. Weik mutuk atei ababyi yibinkirikoka niryi sunsi domkiringnanse,” eboka nukmouci, libdandobmou.

Er Paulus biryi, “Er Yesus ab ni ab ebdanmanoumwe,” ebmou uram

26:12-18

12Ebmou cok, Paulus biryi ato ebmou, “Ura, ato kuboka domkiringnansiryi, ni Damsyik atei binmase. Ara, sun Er Imtamnyi kan ninyi kan noutam kuboka antanirdeirin deyok nang aryi niti, ‘Sun Yesus milin nang ur talebdur,’ eboka kerek sekmai ura, niryi a kerek sengna boboka Damsyik atei binmase. 13Damsyik atei kum binmasiryok, bisik noutam banmase uca, kiting dukduk en aryi, ‘Nai e,’ imtam aryi kuboka sinarya milil weik berengna aryi ni ab ni ab tonkwa banmoubwe nang ab asi aknabdongobsou cok, lukdandoka berekeibmasou. Nai Agripa, kiting sinarya berengna ababyi berengdeirisurur bok, a dangebmasou berengna ara bisibkaboka iya milil ilinto berengna asi berekeibmasou. 14A berengna aryi dangebdeibmasou uca, nun nirya sakoka tukwe ai maryibinmoubwe. Ura, niryi kekenmase uca, Ibrani uram aryi ebmunyi biryi nisi ato ebmanou, ‘Saulus, Saulus! Kanci unato ati Nisi domkiringnanirim do? Kanci Ni Erebdobnyi biti, “Er ab obdatinimnyi,” tenen ukubdeminyei. Ukubdeminyi ura, kandamnyi dilaka dobdeibdaminyei,’ ebmou.

15Ato ebmou ba, niryi nisi uram ebmanounyi bisi, ‘Nai Arungdeirisurumnyi, Kanda unanyi do?’ eboka asibdenmase. Ato eboka asibdenmase uca, Anyi Erebdobnyi biryi imtam aryi kuboka ato ebmanou, ‘Nira Yesus, kanci domkiringnanirimnyi kunun,’ ebmanou. 16Ebmou cok, Erci nisi ton ato ebmanou, ‘Kan tikokdum. Niryi kanti, “Ni arungnanyi kubkwande,” tenen kansi Ni damnyi lak kibmakin. Ara, kanci Niti eibmanirim dinyi yuk nang asi lak etereboka, “Dib,” ebkwandim ati, Niryi kansi Ni damnyi lak kibmakin. Tonda, aminda aryi lak kibkwankin dinyi ababyi kanci yuk nang asi, “Dib en uram akwe kurur,” ebkwandim ati, Niryi kansi tikeibkwinkin. 17Ura, ninyi aryi Paulus kansi malyi kubdeibdekingyi ababyi, Ni Yesus biryi kansi lebdeibkwankin. Ara, kan mining yala Yahudi yala nang aryi malyi kubdeibdekingnyi ababyi, sun yuk yala nang aryi malyi kubdeibdekingnyi ababyi, Niryi kansi lebkwankin. Ni Yesus biryi Paulus kansi, “Sun yuk yala nang asi birum,” eboka bokdonokwinkin. Ara, sun Nisi kum bingnunung nang aryi Nisi dib tenebkwaning ati, Niryi kansi bokdonokwankin. 18Sun dib en uram ati asing kum eirinung nang aryi dib en uram diboka eibkwaming ati, bokdonokwinkin. Ara, a nang aryi sun kuramingnyi kunuk dam asi takloboka Ni berengna dam asi yankwaming ati, bokdonokwinkin. Tonda, isa sienyi si Iblis biryi kalingna dam asi takloboka Er Imtamnyi kalingna dam yankwaming ati, Niryi kansi bokdonokwinkin. Tonda, Er Imtamnyi biryi sun malyi kun dinyi kilibkwande ati, Er Imtamnyi biryi sunti, “Ni mabwe,” tenen iya teleb kubdeibkwande ati, bokdonokwinkin. Sun yuk yala nang ababyi Ni Yesus bisi dib tenebkwaning deyok aryi, Er Imtamnyi biryi sunbabyi, “Ni mabwe nermabwe,” tenerur ati ebman.’ Ato eboka nun Du Yesus biryi nisi, ‘Yuk yala nang dam asi birum,’ eboka bokdonoknou,” ebmou.

Er Paulus biryi, “Ato-ato eboka lak etereranse,” eboka nukmou uram

26:19-23

19Ebmou cok, Paulus biryi ton ato ebmou, “Ati, nai o, weik sienyi Agripa, kanci kekenurum! Nun Du biryi nisi lak kibdanmoucok, ‘Sun yuk yala nang dam asi birum,’ eboka aruknou ati, niryi, ‘Ni li,’ kum ebmase. 20Eda, ‘Ukubkwan,’ tenen niryi Damsyik atei yuma bindokabsiryi, Yerusalem atei asi aminda binmase ani, ‘Teleb Uram dib tenebdarur,’ eboka lak eterebde baranse. Ura, Yudea mutuk kuboka atei nirya asi bindokabsiryi, sun yuk yala nang dam ababyi binmase ani, niryi ninyi nirya asi Teleb Uram lak etereranse. Etereranse ura, niryi sunsi ato ebmase, ‘Sun malyi kurandau dinyi asi takloboka Er Imtamnyi biryi teleb tenesurur to asi ukubdarur,’ eranse. Tonda, niryi sunsi ato eranse, ‘Er Imtamnyi bisi tamurbindoka teleb akwe ukubdarur. Ato kubmunyi ura, sunda Er Imtamnyi biryi teleb tenesurur dinyi kunun nang kurandum ati, lak kibkwande,’ eranse. 21Niryi ato eboka etereranse deyok aryi, sun Yahudi yala nang aryi, ‘A uram nun li,’ tenen nisi talebmanei. Ara, nira Bait Allah ai dam keta asi kunmase bok, sunci nisi taleboka obdenmanei. 22Obdenmanei bok, Er Imtamnyi biryi nisi miliboka kalingnanir. Arub ababyi Erci nisi miliboka kalikmanir ba, ato kuboka niryi sun urasintam tikman aryi, niryi sun nirya asi dib en uram lak ebmasin. Ara, sun erebdob nang nirya ton, sun luknubdob nang nirya ababyi dib en uram lak esunun. Sun Er Imtamnyi Uram ebdeibmaci to lak etereramnyi nang aryi, ‘Ato-ato kubkwande,’ eramnyi to nibabyi eterenun. Tonda, er Musa biryi, ‘Ato-ato kubkwande,’ eramwe to nibabyi eterenun. Nira yuk dinyi aryi kum eterenun ati ebman. 23Sunci eramnyi to Er Imtamnyi biryi bokwetebmou ninyi Lemsururnyi sirya yankwamwe ura, ninyi aryi Ersi mambul weik kubdeibkwamnyi ba, dibkwamwe. Sirya dibkwamwe ani, kam tubto bukokwamwe. Anyi bira yuma kobdob aryi kam bukokwamwe ura, sun din nang yuk nang ababyi ara aminda aryi miliboka kam bukokwaming. Anyi yuma kobdob aryi kam bukokwamunyi biryi sun Israel yala nang ab sun yuk yala nang ababyi binkwamuryok, Erci, ‘ “Ni berengna karebkwansin,” eboka sunsi lebkwamwe.’ Ati, sun Er Imtamnyi Uram ebdeibmaci bobaramnyi nang aryi er yankwamunyi ninyi Lemsururnyi biti ato eramnyi. Ura, sunci eramnyi to nibabyi eterenun,” ebmou.

Paulus biryi Agripa bisi, “Dib tenebdum,” ebmou uram

26:24-32

24Ura, er Paulus biryi erdamnyi tuba limdanmou bok, er Kaisar amwetam bunanyi Festus biryi uram sekoka uram weik dobmou cok, er Paulus bisi ebmou. “Paulus, kanda luba talebmakir do? Kanda utotoa nirya lilibde bingdumnyi kurum bok, luba talebmakir. Kanci tanglona kum uca, ‘Utotoa nirya biktinyi,’ tenebde lilirum akiryi luba talebmakir aryi enmarim,” ebmou.

25Ebmou uca, er Paulus biryi ersi ato ebmou, “Ni nai Festus, Kaisar amwetam bunanyi. Kekenurum. Ni luba kum talebmanir. Eda, dib en uram ton bikdob uram ton akwe ebmasin. 26Kanci nisi, ‘Luba talebmakir,’ ebmanirim bok, nun nai weik sienyi Agripa biryi a ebmasin dinyi ati bita bikmar. A deyok aryi, niryi ilil kum asa aryi a dinyi nirya asi er urasintam lak ena teleb. Niryi sunsi lak ebmasin dinyi nirya ara nun nai Agripa bita bikmar tenebman. Niryi nun Du Yesus deyok ati lak ebmasin dinyi ara duknuboka dinyi kum kurur. Ninyi nirya aryi a bingnung. 27Ura, nai, weik sienyi Agripa. Niryi kansi asirdena teleb do? ‘Sun Er Imtamnyi Uram ebdeibmaci to lak etereramnyi nang aryi kerek sekmai uram asi kanci dib tenebmarim do?’ Dib tenebmarim ara ni bikman,” ebmou.

28Ebmou uca, er Agripa biryi er Paulus bisi ato ebmou, “Kanci niti, ‘Uki kum uca Kristus milinanyi kibdeibkwan,’ tenebmanirim darib?” ebmou. 29Ebmou uca, er Paulus biryi Agripa bisi ato ebmou, “Uki kum uca nun Du Yesus bisi milinanyi kimna ara teleb. Tonda, uki weik uca nun Du Yesus bisi milinanyi kimna ababyi teleb. Nai o, niryi kan ab sun yuk wekmang weik nang nirya ab ati molobmilisiniryi, ‘Ni kuran to kubkwanting,’ tenen Er Imtamnyi bisi molonun. Ara, ‘Nisi besi tabwe debmanei to sunbabyi besi tabwe debsiting,’ tenen kum molonun. Eda, ‘Nira Er Kristus bisi milinun to sunbabyi arub aryi kuboka er Kristus bisi milibting,’ tenen niryi sun nirya ati molormilisunun,” ebmou.

30Er Paulus biryi sirya ato ebmou ura, er weik sienyi Agripa ab, er Kaisar amwetam bunanyi Festus ab, tonda sien ner si Bernike ab aryi, “A kunum sirya kekebmab,” tenen tikokmai. Tonda, sun yuk a wekmai weik nang ababyi tikokmai. Tikokmai ura, sun nirya sakwetebmai. 31Ura, sakwetebmai cok, sunci sun mamun asi ato ebdanmai, “Anyi Paulus bira malyi dinyi ton kum kubmou. Ati, erci, ‘Weneboka obkwayeb,’ tenen dinyi ton kum kubmou. Tonda, erci, ‘Ninyi wenen ai asi dongobkwayeb,’ tenen dinyi ababyi ton kum kubmou,” ebmai. 32Ebmai cok, er weik sienyi Agripa biryi Kaisar amwetam bunanyi Festus bisi ato ebmou. “Anyi Paulus bira malyi dinyi ton kum kubmou ati, lobdeibtibyi. Lobdeibtibyi bok, erci, ‘Er Kaisar biryi ni deyok lilibkwanir,’ eboka molobmou ababyi lobdeibman kum kurur,” ebmou.

Currently Selected:

Kisah Para Rasul Uram 26: MTG

Highlight

Copy