Zekaria 6
6
Ziemho Thethau: Kierbagei Diau
1Süsie a meho la sie ru kierbagei dia kijüthou kenie, mese pie kechü kijüthounie donunu par. 2Kierbagei kerieu nu kiernie merie, kierbagei kenieu kiernie tei. 3Kierbagei seu kiernie kra, mu kierbagei diau kiernie rürhü rümho. 4Sitse ae teigeidielie a rüchü kethau ki, “A niepuu, hako kedipuo ga?” 5Siru teigeidielieu a die kela di, “Hako kijü pete Niepuu mhodzünu uko thuo uko khashükewa sie, takepra teigei teikhrie diako zo. 6Kier keteiko ze ketuo kierbageiu ta rüna pesotsa va voya, kekrako ta niakratsa rüna va voya, mu rürhü rümhocüko ta rüna pekhrotsa vaya.” 7Siro kierko par tse, ukoe tatatuoü meyhumezhieta mu kijüu pfhe whi votuo üdi. Sitse puo sie, “Volie, di kijüu pfhe whi voshülie.” Süla uko kijüu pfhe whi voshü. 8Süsie puo melie peto di sie a ki, “Harie, rüna pesotsa vakecükoe a ruopfü bu pesotsa kijüko nu rüleiliete.”
Puoco-u bu Dikelie
9Jihova die a ki vor di sie: 10rakachüko siro suna, miadie chüketuoko, Heldai, Tobija, mu Jedaia-Babilon nunu kevorko kinu pielie, sidi no sünhie Zefania nuou Josia ki volie. 11Rakachü mu suna pielie di keditsüre puo chülie, sidi süu pie Jehozadak nuou Joshua zievokezhatho-u tsügei shüshülie. 12Sidi puo ki krodiko Jihovae puya: Haki mia puo puo za Puoco ükecüu ba; kekreilamonyü puoe süu geinu puo dza chü thepratuo, mu puoe Jihova rüsuokiu chütuo. 13Jihova rüsuokiu chüshüketuou sü puo zo; puo kedi therhu pfütuo, mu puoe kediba gei balie di mha kekhatuo. Siro puo kediba nu zievo puo batuo, unie donu kezekevi kepfhesikelie se di. 14Siro keditsüreu Heldai, Tobija, Jedaia, mu Zefania nuou Josia dzie nu se kemenuo batuo, Jihova rüsuoki nu rükraketuo puo chütuo.
15Kepetse nu ketuoko vor di Jihova rüsuoki kechü nu kekhruohituo; sitse noe krodiko Jihova a ketsepie n ki shü ücü silietuo. Noe menuo di Jihova n Kepenuopfü pfhe zelie ro mha hau chülietuo.
Currently Selected:
Zekaria 6: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
