Rommiako 2
2
Ukepenuopfü Kemezhü Capi
1Süla nie kehoupuorei, mia pejoyakezhau, no mhapuorei pukelie ba jü; no kekreimia le pejo ba ro n thuo n pejo keba zo, no mia pejoyakezhau, no rei sümhie touko chüyakezha la. 2Noe sie,#2:2 Gk No sie icüu tuo mo. “Ukepenuopfü themia sikecü chüyakezhamia pejoketuoe ketho tou medzi di chüketuo hie si ba,” iya. 3Nie kehoupuorei, mha sikecü chüyakezhamia le pejoya, sirei n thuo zorei sükemhie chüya üro, sidi no Ukepenuopfü n pejo ketuou therhielie thenyüsiecü leya me? 4Morei no puo kekhrie kezha, puo nou chakecü mu shügeshühiekezha rütseya me? No Ukepenuopfü kekhrieu thuo n cha thapie thenoukedilieya ükecü si mo me? 5Derei n nou kekhrükere mu mengalie kemo la puo noupfhü teisozhau, Ukepenuopfüe kemezhü capi chüketuo pesikeshü nhie la n thuo noupfhüu kengu keba ze. 6Kekreilamonyü puoe u mhatho kheki sü chüpie mia puopuo tsü phre zotuo; 7shügeshühie di mha kevi chü di zayie mu therhu tsiu siatalie kelho pfhüyakezhako we kechachie kerhei pie tsütuo; 8derei kehoupuorei u thuo u zhazhü le mu ketho-u dieze chü mo di kerüzhü chüyakezhamia gei puo noupfhü rushütuo. 9Judamia bu rie siro süsie Grikmia rei sa di kemezhiekecü mu keziekere pie mha kesuo chükezhamia gei shütuo, 10derei zayie mu thetshetherhu tsiu noune pie mha kevi chüyakezha pete tsütuo, Judako rie, süsie Grikmia rei sa. 11Kekreilamonyü Ukepenuopfüe mia puo gei rei puo nei si kreiya mo.
12Thezho kejü nunu phoumakecü pete thezho kejü nu katuo, siro thezho-u khro nu phoumacü khe thezho-u nunu u nyie kecütuo. 13Thezho-u rünyükelie la miapuorei Ukepenuopfü mhodzünu mezhülieya mo, derei thezho-u chüüzeyakezhako rübei mezhülieyakezha zo. 14Siro Judakemoko thezho ngulie mo zo ürei lhenu thezho-u ze tuoya üro, thezho-u jü zorei süko pie u zho-u chülieta zo. 15Ukoe thezho-u nu chü morokesuoko pie uko melou geinu thulieketa thashü, mu uko noue süu zhapu chüya; sidi u noue huoki u pejo mu huoki vashü zoü tuoya, 16sünhie, a dieliekeviu nu kepu tuoi, Ukepenuopfüe, Jisu Khrista bu themia rüli kerüshükerüvieko kecütuo.
Judamia mu Thezho-u
17Derei nie thuo nie üse Judamia üya mu thezho-u gei tha di Ukepenuopfü n ze keperokecü la kemholie, 18mu puo medo-u si, tsiu thezho-u nu n ki pukeshü la kedipuo chü ro puotoutho shi silie, 19di mhiciemia chatha puo mu kezei nu ketuoko la mitu puo, 20kemeloko la chatha, nhicunuoko kepethau, sidi thezho-u nu mhasimhale mu ketho-u bacü siya, 21di no, kekreimia pethaya liro no n thuo n pethalie lho üme? No kerügu petsou di pethaya, sirei no rüguya le? 22No mia bu pieü chü lho üdi n thuo pieü chüya le? No terhuorhiko rütseya di rüsuokiko nu mha rüguya le? 23No thezho-u la kemholiekezhau thezho varhuo di Ukepenuopfü rhu kemo chüya die? 24Süla süu thupie kezhü, “Nieko lanu Judakemoko donu Ukepenuopfü za tha tuote,” isi.
25No thezho-u zeya liro zhükere-e puoma nyi; derei no thezho-u varhuoya ro, n zhükereu zhürekemo puo chüte. 26Süla zhürekemoko thezho nu chü morokesuoko chüya liro, uko zhürekemo üse zhükere mhie zoü motuo me? 27Süla nie thupie kezhü zho medzi di zhürelie derei thezho-u varhuo liro, chüümo nu u zhüre mo derei thezho-u chüüzekezhako thuo sier nie pejotuo. 28Kekreilamonyü chazou kengu nu rübei, morei chazou mu chüüphou geinu zhürekelie la Judamia mo. 29Derei Judamia ücüe u nou nu kechüu zo, tsiu u melou nu zhükere-e zhürekelie ketho-u, süu ruopfüu nunu zo mu kethuu medzikelie la mo. Sikecümia themia kinu monyü Ukepenuopfü kinu thetshe ngulieya.
Currently Selected:
Rommiako 2: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
