Mhasidie 20
20
1Zue mha krekezhau, zu kekuoe kegeikecüu;
mu süu bu u ketsikewamia mhasikemomia zo.
2Kediu nouyie-e losha meho keba mhie;
themia kehoupuorei puo nou chü kemeyieshüyakezhau puo kelhou pejüwatuo.
3Kegei nunu kethekelie-e therhu;
derei mhalekemo khe kegei ba zotuo.
4Mhachü kemecüu puotei ki liecielie lho;
puo lieyie teiki mhapfhütuo mu puorei ngulie lho.
5Themia mharhüe dzü kesou mhie zo,
derei kemeciemia süu teshü se parlieya.
6Themia kekra dietho zo ketha pu phreya;
derei supuonie pelelie kesümia ngulie vi ta?
7Kemiathomia kedietho cha nu tuoya,
süu kemedzimia nuonuoko theja ngulieya:
8Kedimia capi ba gei bayakezhaue puo mhi üse mha kesuo pete whuowaya.
9Supuonie “A melou chü kemesaliete;
a kephouma nunu mesate” sikecü pulie vi ta?
10Mha mesi ketou kemo mu mha kemejü kekreikecü,
Jihova mhodzüki kerütse zo.
11Nhicumia zorei puo mhatho geinu puo silieya,
puo mhatho mesa mu puotou mo mo shicü.
12Sikelie nyie mu ngukelie mhi,
Jihovae sünie kenienie rei chüshü.
13Keze u nei hie, mhajüta molieketuo la,
mhirhoshülie, sitse no kecüca kekra ngulietuo.
14Mha kekhrüue sie, “Hau vi mo, hau vi mo,” ituoya,
derei tuovüta tse, puo kemelha tuotaya.
15Suna mu ketsie puoma kere kekra ba;
derei kesikele tie-e ketsie puoma kerepfü zo.
16Sikemomia puo zhapu chükeshüu pfhe pielie,
puo die khakeshü zhapuko la puo pfhe pietalie.
17Mia kese nunu ngukelie niekhrüdae mouya,
derei kenuotsa puo me nu tsiesenuo thuo tshupfütatuo.
18Mharhü pete rei ketahiketarhokecü geinu pesielieya;
chatha kevi se di terhü chüya.
19Sieüsielumia mha kepekhreko hielashüya;
süla mia kese die puketuomia ze kepekro hiecie.
20N puo n zuo rüseya liro
n mitubou zeibouikecü nunu mhetatuo.
21Therie ki kiülie ngu mhaikelieu;
thela nu theja ngulie lho.
22“A mha kesuou mese chüshütuo,” idi pu hiecie;
derei Jihova pfhe balie, sitse puo n khruohishütuo.
23Kemejü tsie kekrücüu Jihovae rütseya;
mu mha kemejü kekrücü vi mo.
24U phichako pete Jihova gei ba,
we kikidi u cha silie ta?
25Mia puoe meyhumehe di sie, “Süue mesa,” idi pushü,
tsiu puo phrakeshüu meho menuo lashü ro süu puo la kebie puotaya.
26Mhakesi kediue kerüzhümia whuowaya,
mu uko mho geinu bageithuou peta votaya.
27Themia ruopfüe Jihova mitu zo,
süue u nou kesouthoko rei pfhüya.
28Dietho zo kethau mu kemiatho-u kedimia pekruse balieya,
tsiu kemiathoe#20:28 Gk: Ibri Kedietho. puo kedibau se balieya.
29Khriesamia zayieu sü kemecakemekhro-u,
derei ketsako ziviue u tsütha kerüpouu zo.
30Vü kerüzakeshüe mha kesuo khrü kemesawaya;
u vükeshüe u nou kesoutho pete chü kemesawaya.
Currently Selected:
Mhasidie 20: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
