Thekrü 5
5
Ngumezhieshünu Kecha
1He-i Jihova, kedipuo hieko gei vor shikecü, rükrashüyi,
mehoshüyi,
sidi hie kemengakecü leshüyi!
2Hie kayieko sikemomia tsüwate,
hie kiko pie solhimia tsüwate.
3Hiekoe merünuomia,
upuonuo kejümia chüte;
hie zuonuoe samimiapfü mhiete.
4Hie dzü kekrie ma su morosuote;
hie sei rei khrü morosuote.
5Vocie pie hie vo gei shü di hie bu kemezhie phite;
hie hie nyiete,
kerülei pie hie tsü mo.
6Niekhrüda cü pevülietuo üdi hie Ijiptmia tsiu Asiriamia ze kepfhekhowa.#5:6 Ibri Dzie khashü.
7Hie puonuoko phoumawa;
uko tuo mote,
sidi hie bu uko kephouma pfüte.
8Kediemia hie mho dite;
miapuorei uko dzie nunu hie shüphralieketuo jüte.
9Hie kerheiro pie kemichie nu phi di hie niekhrüda nguya;
rayha nu zhiechau la.
10Pekriekecü bu u the di hie zhü teipie miphu ketei tuoite.
11Zion nu thenupfümia,
tsiu Juda nadiko nu rüü phouseko shüwa.
12Kedinuoko pie gouwa;
phichümia rhukecü tuo mo.
13Khriesako kemvü chüpie mhage,
thepfunuoko seide pfü di pevüvüte.
14Nadi kharu nu phichümia ba sa mote,
khriesamia tsali chü sa mote.
15Hie nou keneiu tseite;
hie dowhuo keba pie thekrü chüwate.
16Hie tsü gei keditsüreu tetsute;
hie we ce, chülietie,
hie phoumawaketa la!
17Hau la hie nou thachüte,
hau la hie mhi merüte.
18Zion kijüthouu, ruozhüketa la;
meseru sügei rühou tuote.
19Derei no we, he-i Jihova, kechachie di baya;
n kedi-e thephou pete nu baya.
20Kiüdi no hie rükra mo tseita ga?
No kiüdi teisozha kekra hie khawata ga?
21He-i Jihova; hie teshüpie n kitsa shülieyi,
sitse hie lhou lalietuo;
thiedzü kemhie hie teisozhako chü kesa lashücie,
22no hie kha tseiwa,
tsiu n nei mothorta zo kemosie.
Currently Selected:
Thekrü 5: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More