Thekrü 4
4
Zion Siazha Ngukelie
1Kikemhie di sunau zeita,
siro kimhie di suna kevithopfü rüdite mu!
Kemesa tsieko khu ketoupie chaü peteko nu kezakeziwate.
2Zion nuonuo puoma kereko,
suna kevipfü ze kemejülie vi!
Kimhie di uko pie litho-u thedzie pie kechü rünyoli kemhie üte shi!
3Meseruko thuo zorei puo nu khapie u nuonuo kemedzüko bu nulieya,
derei a themiako u zhosuote,
rayha nu ostrik rako tuoite.
4Terhümerükecü la kenunuoko meü vo u me kupfü bate;
nhicunuoko niekhrüda cha,
derei miapuorei mhapuorei pie uko tsü mo.
5Kecükekrie pie thehethehie chüketuomia chaüko nunu kate;
pfhe meriemegekecü dzie kevormia thubuokhruko nu bate.
6Kekreilamonyü a themia mha kesuo kechü#4:6 Moro kejo. siazhau Sodom kephouma siazhau ki zhakuota zo,
süue hiepuo kinu pekawa,
thedzie puorei puo gei shü morei.
7Puo kedinuokoe pekrie ki rei mesakuo,
mithunudzü ki rei krakuo;
uko moko ketsie ki rei meteikuo,
uko tsüthae safir kemhie.
8Derei tsie we uko zie-e ketsiemizhü ki rei teikuo;
chaüko nu mia uko si mote.
Uko zhü uko ru dapfü bate;
tsiu sei kemhie sotote.
9Zhiecha bu u dukhrikewamiae khe di siakecümia ki vikuo,
lie nu puo si vülie mo di u kerheiro jü voketa ki rei.
10Mia ngumezhieyakecü thenupfüko dzie thuo u nuonuo pie dzü nu belie;
süko pie u kecüca chü, a themiako kaketa nhie.
11Jihovae puo noupfhü kha tseishü;
puoe puo nouyie kereu rushü,
sidi Zion nu mi petushü,
sidi puo mvüdzeko thewa.
12Kijü nu kediko, morei
kijü nu kelhoumia miapuorei,
u petsoukecümia morei ngumvümia Jerusalem kharuko nu lelietuo ükecü pelelie mo zo.
13Puo siedzekesiko kephouma la,
tsiu puo zievoko mha kesuo kechü la,
ukoe u donu kemiathomia zie pekrukecü lanu zo.
14Uko chaüko nu mhiciemia mhiei yotuo,
ukoe thezie pie u thuo u perhuwa, süla miapuorei uko pfheneiko nyülie kenjüte.
15Themiako uko pu di, “Tuotalie! Mesa mo,”
“Tuotalie, tuotalie! Nyü hie!”
Süla uko taketuomia mu rühouketuomia chüte,
süla seyieko donu kepu di,
“Ukoe hanu tuo salie lhote.”
16Jihova thuo uko bie ketsieyawate,
puoe uko dze le sa mote;
therhu pie zievoko tsü mo,
phichüko khriekecü rei chü mo.
17Hie mhi-e kemethuo kekhruohi pfhü di merüte;
hieko mia kelashülie kenjükecü seyie puo pfhe terü vor.
18Uko hie phichako sie pie di khashü mvü,
sidi hie bu hie chaüko nu tuo volie kenjüte;
hie thela penuo vor bate;
hie teisozhako phrüwate;
hie thela vortakecü la.
19Hie whuo ketuomiakoe teiko gei tsüüra ki ta vikuo;
ukoe kijüthouko geinu hie whuo tuoya,
ukoe rayha nu hieko rü zhüya.
20Hie kerhei thesüu,
Jihova thuo kenhekelieu,
uko kheho nunu teliete,
hiekoe puo dze pu di sie,
“Puo shükhro nu hie seyieko donu lhoutuo,” iyakezhau.
21N neilie tsiu n noumvülie, he-i Edom nuopfü,
Uz kijü nu bayakezhapfü;
derei tehieu rei sa keyiepie n ki vortuo;
no mezetatuo sidi n thuo methuo zhütatuo.
22N kesuo kechü siazhau chüshüwate, he-i Zion nuopfü,
puoe cüsie n ze vo miadie chü salie lhote;
derei puoe n kesuo kechüko siazha chüshütuo, he-i Edom nuopfü;
puoe n kephoumako hielashütuo.
Currently Selected:
Thekrü 4: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More